Ol Lotu i Laik Pinis o Olsem Wanem?
“Olgeta samting long graun bai i save tru long Bikpela. Dispela save bai inapim olgeta hap graun olsem solwara.”
AISAIA, EM WANPELA PROFET BILONG ISRAEL LONG YIA 730 SAMTING B.C.E.
WANPELA profet Hibru, em Aisaia, em i tok profet olsem wanpela taim bai kamap na olgeta man long graun bai wanbel long lotuim God i Gat Olgeta Strong. Tasol long nau, i olsem dispela samting i no inap kamap.
Yumi ken tingim samting i bin kamap long Rasia bihain long yia 1900. Insait long Rasia yet, ol man bilong kamapim gavman Komyunis, ol i ting ol i mas pinisim olgeta lotu long kantri bilong helpim wok bilong ol long helpim ol lain wokman i kamap fri. Ol i tok, pasin bilong bilip olsem i no gat God i stap, bai ‘helpim bikpela lain wokman long kamap fri long planti hevi.’ Taim yia 1917 i no kamap yet, Misin Otodoks long Soviet Yunion i gat planti haus lotu—winim 40,000. Tasol Stalin i wok strong long pasim ol, olsem na long yia 1939 inap 100 haus lotu tasol i stap.
Hitler tu i ting lotu i wanpela samting i save pasim em long bosim olgeta samting. Wanpela taim em i tok: “Man em i wanpela Kristen o em i wanpela Jeman. Yu no inap stap tupela wantaim.” Isi isi Hitler i tingting long pinisim olgeta lotu em i no inap bosim. Bilong mekim olsem, ol Natsi i kamapim pasin bilong ol yet long beten, na ol bikpela de, na baptais, na planim man. Hitler i bin stap olsem man bilong kisim bek ol Jeman, na kantri i olsem god bilong ol. Ol man inap mekim pasin nogut tru long narapela man sapos Hitler i orait long en.
Em Las De Bilong Lotu?
Ol samting Stalin na Hitler i bin mekim i no inap daunim ol lotu. Tasol long nau i olsem narapela samting i laik daunim ol lotu—pasin bilong les. Ol sumatin bilong Baibel i no save kirap nogut long dispela kain senis. Aposel Pol i tokim Timoti olsem long “taim bilong las de” ol man bai ‘laikim tumas ol kain kain pasin bilong amamas na bai ol i no laikim God.’—2 Timoti 3:1-4.
Olsem wanem? Baibel i save tok, long “las de” ol man i no ken givim bel moa long lotu na bihain olgeta lotu bai pinis? Nogat. Baibel i no tok olgeta lotu bai pinis, em i tok lotu giaman—na em i gat nem olsem Bikpela Babilon—em bai pinis.a Buk Kamapim Tok Hait i tok: “Wanpela strongpela ensel i kisim wanpela ston i wankain mak olsem ol bikpela ston bilong wilwilim wit. Em i . . . tromoi i go daun long solwara. Na em i tok olsem, ‘Long dispela pasin tasol ol bai i kisim dispela bikpela taun Babilon na tromoi i go daun strong tru, na ol man bai i no inap lukim moa.’ ”—KTH 18:21.
Tasol taim lotu giaman i pinis, i no olsem ol man bilong dispela graun i no ken tingim God; nogat. Song 22:27 i tok: “Olgeta manmeri bilong graun bai ol i tingting long God, na bai ol i kam bek long em. Olgeta lain manmeri bai ol i lotu long em.” Man! Tingim wanpela taim na “olgeta lain manmeri” bai wanbel long lotuim trupela God! Taim Kingdom bilong God i bosim graun, truim bilong dispela gutpela tok promis bai kamap. (Matyu 6:10) Long dispela taim, lotu—trupela lotu—em bai bikpela samting tru. Tasol olsem wanem long nau?
Kisim Ol Samting Bilong Spirit
Long nau tingting bilong planti man long Yurop olsem ol samting bilong spirit i no bikpela samting, i wankain long tingting bilong ol man long taim bilong ol aposel na Gavman Rom i bosim ol man. Man bilong raitim stori bilong ol samting i bin kamap bipo, em Will Durant, em i stori long olsem wanem ol Kristen bilong pastaim i bin helpim ol man i sot long ol samting bilong spirit. Em i tok: ‘Lotu Kristen i kamap long taim ol lotu haiden i wok long i dai na ol man i no save wanem pasin i stret na wanem pasin i no stret. Em i kamap long taim lain Stoik i no bin sori long ol man, na lain Epikurian i mekim pasin giaman, na ol man i les pinis long pasin nogut bilong bagarapim man, na hatpela pasin, na pasin bilong daunim ol, na ol i no save wanem pasin i stret long ol samting bilong maritpasin, na ol kantri i no gat wok moa long ol strongpela god bilong pait. Em nau, namel long ol dispela kain pasin, lotu Kristen i kisim nupela pasin i kam long ol, olsem pasin bilong stap wanbel olsem brata brata, na mekim gut long ol man, na mekim stretpela pasin, na stap isi wantaim.’
Long nau, ol man i sot long ol samting bilong spirit na ol i no save wanem pasin i stret o i no stret, ol i ken kisim helpim long rot bilong wankain gutpela tok ol Kristen bilong pastaim i bin autim taim Gavman Rom i bosim ol man. Na planti man i harim tok. Maski pasin bilong planti man long Yurop i makim olsem ol i no man bilong lotu, ol i pilim olsem God i bikpela samting yet long i stap bilong ol. Ol i no save go long lotu, tasol sampela i mekim ol samting bilong helpim ol long painim ol samting bilong spirit.
Juan José, em wanpela yangpela man bilong Palma de Majoka, Spen. Em i bin skul long wanpela skul Katolik, na inap long em i kisim 13 krismas em i mekim wok olsem altaboi. Long olgeta Sande, em i bin go long Misa wantaim famili bilong em, tasol taim em i wok long i go bikpela, em i lusim lotu. Bilong wanem em i mekim olsem? Em i tok: “Mi les long go long Misa. Mi save pinis long olgeta pasin bilong misin long mekim lotu na mi inap kolim nating. Ol i kolim kolim ol tok planti taim, em ol tok mi save pinis long en. Na narapela samting, em pasin bilong pris. Planti taim em i mekim hatpela pasin long mipela ol altaboi. Na mi ting i no stret ol rabisman i mas baim pris bilong planim man.
“Mi no lusim bilip long God, tasol mi ting mi inap mekim laik bilong em long rot mi laik bihainim, maski long misin. Wantaim sampela pren bilong mi, mi kirap na painim amamas, na em i bin kamap olsem namba wan samting long i stap bilong mi.
“Tasol taim mi kisim 18 krismas mi kirap na stadi Baibel wantaim ol Witnes Bilong Jehova. Ol Witnes inap givim wanem samting long mi, mi no bin kisim insait long olpela misin? Strongpela bilip em Baibel i as bilong en. Ol i no skulim mi long ol pasin na bilip bilong bipo na ol ‘tok hait,’ em ol samting mi no inap save long as bilong en maski mi bin go long lotu. Tasol ol nupela bilip mi kisim save long en i mekim, na mi mas senisim pasin bilong mi. Olgeta Sarere Sande mi bin wok long bosim ol pati i save kamap long wanpela haus disko, tasol nau mi kirap na raun long haus bilong ol man na stori wantaim ol long nupela bilip bilong mi. Nau i stap bilong mi i gat as bilong en, long wanem, mi wok long helpim ol narapela. Inap 7-pela yia pinis mi mekim wok autim tok long olgeta de olsem wanpela Witnes Bilong Jehova.”
I no ol yangpela tasol i wok long kisim ol samting bilong lotu ol i sot long en. Antonia, em wanpela lapun meri bilong Estremadura, Spen. Inap planti planti yia em i bin wok long “painim God.” Taim em i yangpela, em i go long Misa long olgeta de, na bihain em i go insait long wanpela haus sister. Em i ting: “Sapos mi no inap painim God insait long haus sister, mi no inap tru painim em.” Tasol 3-pela yia bihain em i lusim haus sister; tingting bilong em i no senis—em i pilim yet olsem i stap bilong em i no gat as bilong en, na em i no amamas.
Bihain, taim em i gat 50 krismas samting, em i kamap wanpela Witnes Bilong Jehova. Em i tok: “Mi amamas tru taim ol Witnes i kam lukim mi na bekim ol askim bilong mi long Baibel bilong mi yet. Kirap long taim mi kamap wanpela Witnes Bilong Jehova, i stap bilong mi i gat as bilong en. Tru, mi gat sampela hevi, tasol mi inap karim, long wanem, nau mi painim pinis trupela God.”
Dispela kain samting i save kamap long planti man. Ol i no bihainim pasin bilong ol man i les long lotu, nogat; ol i bung wantaim ol Witnes Bilong Jehova, na ol i kisim save olsem pasin bilong bihainim bilip na autim long ol narapela i mekim na i stap bilong ol i gat gutpela as bilong en.
Trupela Lotu Em Bikpela Samting Moa
Long nau planti man i lusim lotu, tasol i no stret yumi ting olgeta lotu i samting nating. Tru, long taim bilong yumi, planti man i wok long lusim ol bilaspasin bilong lotu na ol bilip bilong bipo em Baibel i no as bilong en, na ol i tok bilas long ol man i go long lotu bilong makim olsem ol i man bilong lotu. Baibel i tok, yumi mas klia long ol lotu giaman. Aposel Pol i tok, long taim bilong “las de” sampela man bai “bihainim pasin bilong God long skin tasol na ol bai i no save liklik long bikpela strong i stap long pasin tru bilong God.” Long skin ol i olsem man bilong lotu, tasol pasin bilong ol i kamapim olsem ol i lotu nating. Yumi mas ting olsem wanem long ol kain man olsem? Pol i tok: “Stap longwe long ol.”—2 Timoti 3:1, 5.
Tasol Pol i tok: “Sapos yumi bihainim pasin bilong God yumi kisim planti gutpela samting.” (1 Timoti 6:6) Pol i no stori long wanpela lotu nating, nogat. Ol i tanim dispela tok “pasin bilong God” long wanpela hap tok Grik (eu·seʹbei·a), na insait bilong dispela tok i olsem “givim bel long God o lotuim God.” Trupela lotu, em pasin bilong givim bel tru long God, “em inap long helpim yumi long dispela laip nau yumi stap long en, na long laip yumi bai kisim bihain tu.”—1 Timoti 4:8.
Olsem yumi stori pinis, trupela lotu inap helpim yumi na bai i stap bilong yumi i gat as bilong en, na em inap helpim yumi long kisim strong bambai yumi inap karim ol hevi. Na wanpela gutpela samting moa, trupela lotu em inap tru long helpim yumi long kisim laip oltaim. Dispela kain lotu i gutpela long bihainim, long wanem, em bai “inapim olgeta hap graun.”b (Aisaia 11:9; 1 Timoti 6:11) Em nau, trupela lotu em bikpela samting moa long nau.
[Ol Futnot]
a Baibel i tok piksa long taun Babilon bilong bipo olsem wanpela samting i makim olgeta lotu giaman, long wanem, dispela taun i as bilong planti bilip na tingting bilong lotu giaman. Insait long ol planti handet yia, ol bilip na tingting bilong ol Babilon i bin kam insait long ol bikpela lotu bilong graun.
b Bilong save long olsem wanem yumi ken save long trupela lotu, lukim sapta 5, “God i Laikim Lotu Bilong Husat?” bilong buk Save i Bringim Man Long Laip Oltaim, em Sosaiti Wastaua bilong Nu Yok i wokim long 1995.
[Blok/Ol Piksa long pes 10]
Stori Bilong Tupela Haus
Spen i gat planti haus lotu, tasol nau ol man i no givim bel moa long wokim ol bikpela haus lotu i gat bikpela pe. Olsem: Long Mehorada del Kampo klostu long Madrit, ol i wokim wanpela bikpela haus lotu Katolik. Justo Gallego Martínez, bipo em i wanpela bruder, em i bin kirapim dispela wok inap 20 yia i go pinis, tasol wok i no pinis yet. Long ausait i olsem ol i wokim pinis, tasol long insait i no gat wanpela samting. Martínez tasol i wok long dispela haus lotu na em i winim 60 krismas, olsem na ating dispela wok i no inap pinis. Tasol inap 300 kilomita long hap bilong saut i gat narapela stori.
“Bilip Inap Surikim Ol Maunten.” Em het-tok bilong wanpela nius i stori long wanpela Haus Kingdom bilong ol Witnes Bilong Jehova long Matos, Haen, Spen, na ol i bin wokim insait long tupela de tasol. Nius i tok: “Olsem wanem kain samting olsem inap kamap? Long nau ol man i save tingim ol yet tasol. Tasol ol dispela volantia i kam long olgeta hap bilong Spen i no tingim ol yet, nogat; ol i kam long Matos bilong wokim wanpela haus i winim olgeta narapela kain wok olsem long kamap wantu tasol, na i nambawan tru, na i stret tru.” Bilong bekim dispela askim, nius i kamapim tok bilong wanpela volantia olsem: “Mipela inap mekim olsem, long wanem, Jehova i save skulim mipela.”
[Ol Piksa long pes 10]
Mehorada del Kampo
Haus Kingdom long Matos