Ol Yangpela i Laik Save . . .

Bilong Wanem Ol Narapela i Kisim Amamas?

Yangpela Jason i gat 15 krismas i bel hevi na em i tok: “Mipela i laik amamas, tasol mipela i no inap.”

YUMI olgeta i laik amamas​—⁠em pasin bilong yumi ol man. Na taim yumi yangpela, yumi laikim moa yet! Amamas i bikpela samting long planti yangpela, olsem kaikai na slip i bikpela samting. Ol yangpela i gat bikpela laik long painim kain kain amamas, na ol wanlain na ol nius samting i helpim dispela laik bilong ol. Wanpela lain i tok, sampela samting ol yangpela i gat bikpela laik long mekim long ol apinun tru em olsem: Go lukim ol pren, lukim televisen o piksa wokabaut, go long ol pati, na danis. Na planti yangpela i gat bikpela laik long kaunim buk, pilai wanpela spot samting, na harim musik.

I gat planti samting bilong painim amamas, olsem na ating sampela man i bikpela pinis, ol i hatwok long save bilong wanem sampela yangpela olsem Jason ol i tok, amamas ol i kisim i no inap. Tasol sampela yangpela Kristen i bin tok olsem! Yangpela Casey, em wanpela Witnes Bilong Jehova, em i tok: “Long skul mi lukim ol narapela yangpela i pati na mekim ol narapela samting, na mi pilim olsem mi no kisim gutpela amamas olsem ol i save kisim.” Tasol olsem wanem? I stap bilong em i nogut?

Olsem wanem? Baibel i tambuim yumi long painim amamas? Nogat. Baibel i tok, Jehova i as bilong “amamas.” (1 Timoti 1:11) Na King Solomon i tok: “Olgeta samting . . . i save kamap long taim bilong em yet. [God] i makim taim bilong krai na taim bilong lap. Em i makim taim bilong sori na taim bilong singsing.” (Saveman 3:​1, 4) As bilong dispela tok “lap” i kam long wanpela tok Hibru, na dispela wankain tok long tok Hibru ol i tanim olsem, ‘kalap na singsing,’ “pilai,” ‘kain kain pasin bilong lap na tok bilas.’​—⁠2 Samuel 6:21; Jop 41:⁠5; Hetman 16:⁠25.

Long taim bilong ol man i bin raitim Baibel, lain bilong God i amamas long mekim kain kain gutpela amamas olsem singsing na wokim musik, na danis, na toktok, na pilai spot. Na ol i bin wokim pati na ol bikpela kaikai long sampela kain taim bilong amamas wantaim. (Jeremaia 7:34; 16:9; 25:30; Luk 15:25) Na Krais Jisas i bin go long wanpela marit!​—⁠Jon 2:​1-10.

Olsem na i no tambu long ol yangpela Kristen long nau i kisim gutpela amamas. Tru tumas, Baibel i tok: “Yupela yangpela manmeri, yupela i mas amamas long taim yupela i yangpela yet.” Tasol bihain Solomon i tok: “Tasol lukaut, God bai i skelim pasin bilong yupela long kot bilong en.” (Saveman 11:⁠9) Yes, yu ken bihainim laik bilong yu yet long painim amamas, tasol yu mas tingim, God bai skelim olgeta pasin bilong yu long kot bilong em. Olsem na long ol samting bilong amamas, yu mas ‘lukaut gut long wokabaut bilong yu. Yu no ken wokabaut olsem man i no gat save. Nogat. Yu mas wokabaut olsem man i gat save.’ (Efesus 5:​15, 16) Bilong wanem Baibel i tok olsem? Long wanem, planti yangpela i no save bihainim gutpela tingting taim ol i painim amamas.

Taim Yumi No Inap Bosim Amamas

Tingim wanpela samting i bin kamap long taim bilong ol man i bin raitim Baibel. Sampela Israel i no bin tingting gut long ol samting bilong amamas​—⁠long nait olgeta ol i bin wokim ol pati nogut! Profet Aisaia i tok: “Bai yupela i bagarap, yupela ol man bilong kirap long bikmoning tru na dring wain na ol kain kain strongpela dring. Yupela i save dring na spak i go abrusim biknait. Long holim pati na dring wain na pilai ol kain kain musik long gita na mambu na kundu, em yupela i save tumas.” I no gat rong long bung wantaim na amamas long kaikai na musik na danis. Tasol Aisaia i stori long ol dispela man bilong pati olsem: “Ol samting Bikpela i wok long mekim, em yupela i no gat save long en.”​—⁠Aisaia 5:​11, 12.

Planti yangpela long nau ol i bihainim wankain pasin​—⁠taim ol i painim amamas, ol i no save tingim God. Sampela i bikhet tru long ol pasin bilong God na mekim pasin pamuk, raun na bagarapim ol samting, kisim ol drak, na mekim ol narapela kain pasin nogut bilong kisim “amamas.” Tasol sampela yangpela i no laik mekim rong. Ol i no tingting gut na mekim ol samting i stret na i gat skel bilong en. (Sindaun 23:20; 1 Timoti 3:11) Olsem na taim ol i bung wantaim bilong kisim amamas, em nau, ol dispela bung i paul na kamap pati nogut i gat kain kain pasin nogut i kamap long en.​—⁠Skelim wantaim 1 Korin 10:​6-8.

I no longtaim i go pinis na Kirap! i askim sampela yangpela olsem: “Ol man bilong dispela graun i save mekim wanem long ol pati?” Wanpela yangpela meri i tok: “Ol i kisim drak, ol i dring. Em nau.” Yangpela Andrew i stori long sampela manki long skul bilong em na ol i save go long ol pati. Em i tok: “Ol i no les long tok hambak long ol i bin dring planti.” Na Jason i tok: “Klostu olgeta pati bilong graun i gat sampela samting nogut i kamap long en.” Baibel i tambuim ol ‘pati nogut,’ olsem na ol yangpela i stap aninit long God, ol i no save go long ol kain pati olsem.​—⁠Galesia 5:⁠21.

Na sampela amamas yumi ting i no gat rong long mekim inap bagarapim yumi tu. Olsem: Sampela piksa wokabaut planti man i save laikim, ol i kamapim piksa bilong man o meri i stap skin nating, pasin pamuk, pait na bagarapim man. Tok bilong planti singsing em ol tok doti bilong pasin sem samting. Na planti taim long ol bung bilong rok-musik, ol yangpela i kisim drak na kros pait.a

Taim Papamama i Tok Nogat

Dispela i lainim yu gut olsem wanem? Sapos yu wanpela Kristen, yu no inap mekim olgeta samting ol wanlain bilong yu i amamas long mekim. Na Jisas i tok, lain bilong em “i no man bilong dispela graun,” olsem na yumi mas i stap narapela kain long ol man bilong graun. (Jon 15:19) Sapos papamama bilong yu i stap aninit long God, ol i save long dispela samting. Ol i gat bikpela laik long lukautim yu, olsem na ating sampela taim ol i no ken orait long sampela samting, o bai ol i strong long tambuim sampela samting​—⁠em ol samting ol narapela yangpela inap mekim. Sampela taim i hatwok tru long bihainim laik bilong papamama. Wanpela yangpela meri i strong long tok: “Ol man i laik amamas! Taim papamama bilong mipela i yangpela ol i bin painim amamas, tasol i olsem sampela taim ol i laik kalabusim mipela.”

Ating i hatwok long bihainim tok bilong papamama long ol dispela samting maski yupela i gat wankain tingting long planti samting. Wanpela yangpela man i gat strongpela skin, em Jared, em i tok: “Mi gat laik long pilai basketbal wantaim tim bilong skul. Planti man i strong long mi mas insait long tim, olsem na mi tingting planti. Mi bin toktok wantaim papamama.” Papamama bilong Jared i tokim em long ol hevi inap painim em sapos em i “poroman wantaim ol man nogut,” na ol i tokim em basketbal bai pulim bikpela hap taim bilong em. (1 Korin 15:33) Jared i bel hevi taim em i tok: “Em nau, mi no inap pilai.” Em i bihainim tok bilong papamama, tasol em i bel hevi em i no inap pilai.

‘Mi Lus!’

Ating sampela taim yu tu bai bel hevi sapos yu harim ol wanskul bilong yu i hambak taim ol i stori long ol samting ol i bin mekim bilong kisim amamas. Ating yu bai tok: ‘Bilong wanem ol narapela yangpela i kisim amamas na mi nogat?’ Olsem wanem yu ken winim dispela hevi long pilim olsem yu lus long kisim gutpela samting?

Sapos yu kaunim Song 73 ating dispela bai helpim yu. Kaunim na tingim gut long bel ol samting i bin painim Asap, em man bilong raitim dispela hap bilong Baibel. Long Song 73 ves 2 na 3, em i tok olsem: “Klostu mi laik pundaun long sin. Mi olsem lek i wel pinis na mi laik pundaun na lusim bilip. Long wanem, mi lukim ol man nogut i kamap maniman na mi mangal long ol samting bilong ol dispela bikhetman.” Yes, i gat lo i pasim Asap long mekim planti samting, tasol ol narapela man i save hambak na tok ol i ken bihainim laik bilong ol yet, na i olsem hevi i no painim ol​—⁠ol i gat planti samting na ol i wok long kisim planti samting moa. (Song 73 Ves 12) Em nau, bel bilong Asap i bagarap stret na em i tok: “Mi bin lukaut gut na bel bilong mi i stap klin, na mi no bin mekim sampela sin. Ating dispela em i lus nating, a?”​—⁠Song 73:⁠13.

Tasol gutpela tru, Asap i tingting gut pastaim; em i no kirap na mekim wanpela samting bilong bagarapim sindaun bilong em. Em i go insait long “haus lotu” bilong God, na long dispela gutpela ples em i bin tingting gut. Bihain em i save, ol man bilong sakim God na painim amamas tasol, God i “mekim ol i wokabaut long rot i wel moa yet, na [em i] mekim ol i pundaun na ol i bagarap olgeta.”​—⁠Song 73:​17, 18.

Na i wankain tu long planti wanlain bilong yu em ol i wok long painim amamas. Ol i ting ol i kisim amamas long nau. Tasol pasin bilong inapim olgeta laik bilong skin na bihainim pasin bilong sin, dispela amamas i bilong sotpela taim tasol! (Hibru 11:25) Ol i no bihainim ol lo bilong Baibel na i olsem ol i wokabaut long “rot i wel moa yet.” Ol i tingting long amamas tasol, olsem na wantu ol i laik pundaun na bagarap olgeta​—⁠maski ol i no ting dispela samting inap painim ol. Baibel i tok: “Yu planim pikinini bilong wanem kain kaikai, em dispela kain kaikai tasol bai i kamap.” (Galesia 6:⁠7) Ating yu save long sampela wankrismas bilong yu em ol i bin dai taim ol i yangpela yet, o ol i kisim pinis wanpela sik bilong pamuk, o ol i gat bel, o ol i stap kalabus, long wanem, ol i bin painim “amamas, a?” Em nau, sapos yu stap longwe long ol dispela samting, dispela bai helpim yu, a?​—⁠Aisaia 48:⁠17.

Solomon i givim gutpela tok olsem: “Yu no ken laikim tumas pasin bilong ol man bilong mekim sin. Nogat. Oltaim yu mas strong long i stap aninit long Bikpela. Sapos yu mekim olsem, bai yu painim gutpela taim bihain, na yu no inap i dai kwik.” (Sindaun 23:​17, 18) Tru tumas, i no gat wanpela kain amamas i winim samting yu wetim​—⁠em laip i stap oltaim long Paradais long graun.

[Ol Futnot]

[Piksa long pes 16]

I stret sapos yu pilim olsem yu no inap kisim amamas, long wanem, yu no inap insait long amamas bilong graun?