Yu Ken Kamapim Kru Bilong Bin Samting
WANPELA MAN LONG HAWAII I RAITIM DISPELA STORI BILONG KIRAP!
OLSEM WANEM? Sampela taim yu hatwok long painim gutpela kumu long maket, em kumu i nupela na i gutpela bilong strongim skin? Orait, yu no ken hatwok moa! Long haus o flet bilong yu, yu ken kamapim hariap wanpela kain kaikai i no hatwok long kamapim. Yu ken kamapim kru bilong bin samting!
Kru bilong bin i no gat hatwok—pikinini tu i ken kamapim. Kru bilong bin inap kamap long liklik spes tasol, na yu no gat wok long digim graun, rausim gras nogut, o putim marasin samting. Na gutpela samting—yu ken kaikai kru bilong bin bihain long 4-pela o 5-pela de tasol! Tasol ol gutpela samting bilong kru i winim pasin bilong mekim ol samting i no gat hatwok.
Olsem: Kru bilong bin samting i gutpela kaikai bilong strongim skin—winim bin yet. Wanpela buk (The Beansprout Book) bilong Gay Courter, i tok: ‘Taim pikinini bilong bin samting i wok long kru, ol vaitamin bilong en i wok long kamap bikpela. Long Yunivesiti Bilong Pensilvenia ol i skelim ol nupela kru bilong bin soya. Ol i kisim save olsem, long olgeta 100 gram (olsem 4-pela auns) bilong bin soya, kru bilong en i gat 108 miligram vaitamin C. Tasol bihain long 72 aua, vaitamin C i go bikpela moa inap 706 miligram!’
Na bilong kamapim kru bilong bin, yu no ken lusim bikpela mani. Ating ol samting yu mas mekim wok long en bilong kamapim kru bilong bin, ol i stap pinis long haus.
Redim Ol Samting
Pastaim yu mas kisim wanpela bikpela botol glas o plastik em maus bilong en i op, o wanpela sospen graun, o plet glas o plet simen, o bikpela dis tu i gutpela. Yu ken mekim wok long liklik dis tu na putim ol pikinini kaikai namel long strongpela pepa bilong draim han, o namel long strongpela laplap koten. Pepa o laplap i mas i gat wara bambai ol bin i no ken drai. Maski yu mekim wok long wanem samting, em i mas bikpela inap long ol bin i ken kru na win i ken holim olgeta bin—nogut ol i pas pas tumas. Taim mi yet i laik kamapim kru bilong wanpela kain liklik pikinini kaikai ol i kolim alfalfa, mi save mekim wok long botol glas em maus bilong en i op. Ol bikpela pikinini kaikai olsem bin mang, em bai kru gutpela tru long bikpela dis o bikpela sospen. Sapos ol i gat bikpela hap spes bilong kru, ol i no ken sting o lusim swit bilong ol.
Na yu mas i gat wanpela samting bilong karamapim maus bilong botol o dis samting. Waia plastik, o strongpela laplap koten i gutpela. Mekim wok long liklik strongpela raba o string bilong pasim karamap long maus bilong botol o dis samting. Yu mas wasim ol pikinini kaikai tupela taim long olgeta de, olsem na yu mas i gat wara na bikpela sip bilong rausim wara.
Nau yu mas kisim ol pikinini kaikai. Klostu olgeta pikinini kaikai yumi inap kaikai, em bai kru. (Tasol mi save was gut long ol pikinini kaikai ol i bin wasim long marasin.) Bin mang o pikinini kaikai alfalfa i gutpela long man i nupela long kamapim kru bilong bin. I no hatwok long kamapim kru bilong ol dispela kain bin na ol i swit moa! Orait, nau mi laik stori long pasin bilong kamapim kru bilong bin samting.
Kamapim Kru Bilong Bin
DE WAN: Pastaim wasim gut ol pikinini kaikai o bin. Bihain pulapim wara long botol o dis samting. Wara i mas bikpela olsem 5-pela sentimita antap long ol pikinini kaikai o bin. Ol i mas stap insait long wara inap 8-pela i go 10-pela aua. Yu ken mekim olsem long nait taim yu laik slip. Bihain long 8-pela i go 10-pela aua samting, ol bai solap na skin bilong ol bai bruk liklik. Nau ol i redi long kru.
DE TU: Long moningtaim, pasim waia plastik o strongpela laplap koten long maus bilong dis samting na rausim wara. (Ol vaitamin i stap insait long wara tu, olsem na mi save putim long ol plaua bilong mi.) Nau putim nupela wara insait long botol o dis na seksekim liklik. Nau tanim botol o dis olgeta inap long maus bilong en i stap daun na wara inap raus. Mekim wankain samting inap 3-pela taim. Sapos ol pikinini kaikai i stap insait long botol samting i gat wara na nau yu rausim na putim long wanpela liklik plet, isi isi kapsaitim liklik wara antap long strongpela laplap koten i pas antap long plet. Slipim plet i go daun liklik bilong rausim wara. Bihain, mekim wankain samting inap tupela taim long olgeta de.
DE TRI: Ating nau yu lukim kru i wok long kamap. Wok yet long wasim ol bin tupela taim long olgeta de.
DE FOA: Nau yu ken kaikai kru bilong ol bin samting! Yu inap larim kru bilong bin mang i go bikpela liklik na ol bai swit yet. Tasol yu mas wasim ol tupela taim long olgeta de. Sapos yu laik, yu ken putim kru bilong bin long san inap wanpela aua na bihain putim long bokis ais. Kala bilong liklik lip bilong kru bai kamap grin na dispela bai pulim ai bilong yu na yu gat bikpela laik long kaikai!
Taim wok bilong yu i kamap gutpela, ating nau yu laik traim long kamapim kru bilong sampela narapela kain bin. Swit bilong wan wan i narapela narapela kain na taim bilong ol long kru, em tu i narapela narapela kain. Ating yu ken traim long kamapim kru bilong pikinini sanplaua em strongpela skin bilong en i raus pinis. Yu mas kaikai dispela kain kru insait long 2-pela de na longpela bilong en i olsem hap ins tasol. Sapos kru i go longpela moa, ating em bai pait long maus.
Rot Bilong Kaikai
Kru bilong planti kain bin yu inap kaikai nating wantaim letis, tomato, na kukamba samting, o yu ken putim long sanwis, o long olgeta kaikai yu save wokim long bin samting. Tasol sapos yu laik kukim kru bilong bin paslain long yu kaikai, yu ken kukim nating long sospen inap 10 i go 15 minit, o yu ken praim liklik long praipan wantaim liklik wel, galik, na sol. Dispela i swit moa! Kru bilong pikinini wit na rai i swit tru na sapos yu wokim sampela kain bret na putim dispela kain kru insait long plaua, bret i gutpela moa.
Olsem na wok bilong kamapim kru bilong bin samting i gutpela—gutpela bilong strongim skin na i gat liklik pe. Na ating yu bai amamas long mekim dispela wok na bai yu kisim gutpela samting long en. Tru tumas, i no hatwok long kamapim kru bilong bin, na em wanpela kaikai i swit tru long maus!
[Piksa Kredit Lain long pes 13]
Japanese Stencil Designs
[Piksa long pes 14]
DE WAN: Bungim pikinini kaikai na larim ol i stap insait long wara 8-pela i go 10-pela aua
[Piksa long pes 14, 15]
DE TU NA TRI: Wasim gut tupela taim long olgeta de
[Piksa long pes 15]
DE FOA: Ol i redi long kaikai! (Em arere bilong plet na ol i slip long strongpela laplap koten)