Yumi Mas Mekim Gobek Long Man i Laik Harim Tok

1. Yumi mas givim wara long wanem samting na em bai kamap?

¹ Taim yumi planim sid long gaden, yumi mas givim wara long en na bai em i ken kamap. I wankain tu long tok i tru em yumi autim long ol man long teritori bilong yumi. (1 Kor. 3:⁠6) Sapos yumi laik bai Tok Bilong God i go daun long bel bilong man na bai em i kamap strong, orait yumi mas mekim gobek na helpim em.

2. Yumi ken mekim wanem na bai rot i op long yumi mekim gobek?

² Kamapim Askim: Taim yu redim ol tok yu bai kamapim, i gutpela yu tingim tu wanpela askim bilong kirapim laik bilong man long harim tok na dispela bai opim rot long yu ken mekim gobek. Yu ken kamapim dispela askim long pinis bilong toktok bilong yu, na stretim rot bilong i go bek lukim man. Planti pablisa i save kamapim wanpela tok long buk Baibel i Tok na dispela i opim rot long ol i ken soim man long pasin bilong mekim stadi.

3. Yu ken raitim wanem ol samting long notbuk?

³ Raitim Long Notbuk: Taim yu lusim man, kwiktaim raitim ol samting em yupela i bin toktok long en. Raitim nem na atres bilong man. Na tu, i gutpela long raitim det, taim, samting yutupela i toktok long en, na buk samting yu tilim long em. Olsem wanem? Em i bin stori olsem em i gat lotu? Em i gat famili? Em i stori long ol samting em i save laikim na ol samting em i save tingting planti long en? Ol dispela samting bai helpim yu na taim yu go bek yu inap stori wantaim em long ol samting em i tingting long en. Na tu, raitim wanem taim yu bai go bek lukim em na askim yu bin givim long em.

4. Bilong wanem yumi mas wok strong long mekim ol gobek?

⁴ Wok Strong Yet: Satan bai wok strong long “rausim tok” yumi bin putim long bel bilong man. (Mak 4:​14, 15) Olsem na no ken givap sapos yu mekim gobek tasol man i no stap long haus. Ating i gutpela long raitim liklik toksave na lusim long haus. Wanpela painia i bin kirapim Baibel stadi wantaim wanpela meri taim ol i sanap long dua bilong haus, tasol taim em i go bek meri i no stap, olsem na painia i salim wanpela pas long em. Bihain taim sista i bungim em long haus, dispela meri i kamapim olsem em i pilim tru pasin bilong sista long tingim em. Sapos yumi wok strong long mekim ol gobek na stadi wantaim man, yumi bai kisim amamas long lukim ol i wok long kamap strong na karim kaikai, “sampela i karim 30, na sampela i karim 60, na sampela i karim 100.”​—⁠Mak 4:⁠20.