Mekim Wok Autim Tok i Kamap Gutpela Moa—Redim Rot Bilong Mekim Gobek

Em i Bikpela Samting: Taim yumi bungim man i laik harim tok, yumi laik go bek lukim em taim em i stap long haus na stori moa wantaim em, olsem givim wara long sid bilong tok i tru yumi planim long bel bilong em. (1 Kor. 3:6) Bilong mekim olsem, paslain long yumi lusim man, yumi mas redim rot bilong mekim gobek, olsem toktok wantaim em long wanem taim i gutpela long go bek lukim em. Na tu, i gutpela long lusim wanpela askim em yumi ken toktok wantaim em long en long taim yumi mekim gobek. Dispela bai kirapim laik bilong man long wetim yumi, na sapos bekim bilong dispela askim i stap long magasin samting em yumi bin lusim wantaim em, ating em bai ritim. Taim yumi redim pinis rot bilong mekim gobek, em bai i no hatwok long yumi, long wanem, yumi makim pinis samting yumi bai stori long en, na man i save pinis long samting bai yumi toktok long en. Olsem na taim yumi go bek gen yumi ken tokim man olsem, mi kam bilong bekim dispela askim mi bin givim long yu las wik na bihain yu ken stori.