Go Bek Lukim Ol Man i Laik Harim Tok​—⁠Long Wanem Taim?

1. Wanem samting i insait long wok bilong kamapim ol disaipel?

¹ Wok bilong kamapim ol disaipel i makim olsem yumi mas go bek lukim ol man i gat laik long save long Kingdom Bilong Jehova. (Mt. 28:​19, 20) Sediul bilong yumi yet na sediul bilong man bilong haus bai makim wanem taim i gutpela long mekim gobek. Bilong wanem yumi mas go bek hariap bihain long yumi bin bungim man long namba wan taim?

2, 3. Bilong wanem yumi mas mekim gobek hariap?

² Bilong Wanem Yumi Mas Go Bek Hariap? Wok bilong autim “dispela gutnius bilong kingdom” bai pinis klostu, na pinis bilong pasin nogut bilong dispela graun i kam klostu tru. (Mt. 24:14; 1 Pi. 4:⁠7) Olsem na taim rot i op yet long God i “kisim bek” ol man i gat laik long harim tok, yumi mas “strong long autim tok,” na go bek hariap lukim ol man na strongim laik bilong ol long kisim save.​—⁠2 Ko. 6:​1, 2; 2 Ti. 4:⁠2.

³ Satan i wok strong long rausim pikinini kaikai bilong Kingdom yumi planim long bel bilong ol man i gat laik long harim tok. (Mk. 4:​14, 15) Planti taim ol famili, ol wanwok, na ol narapela i save tok bilas long ol man i gat laik long harim tok yumi autim. Pasin bilong go bek hariap i helpim yumi long skruim sampela tok moa long samting yumi bin stori pinis long en paslain long ol narapela man i daunim laik bilong man long kisim save.

4. Long namba wan taim yumi bungim man, yumi inap mekim wanem bilong redim rot bilong i go bek lukim em?

⁴ Makim Taim Bilong Go Bek: Taim yu bungim man long namba wan taim na paslain long yu lusim em, i gutpela long yu makim taim stret yu bai go bek lukim em. Kamapim wanpela askim em yu bai bekim taim yu go bek lukim em. Em i bikpela samting long yu mas raitim long notbuk ol samting yu bin toktok wantaim man long en na de yu makim bilong go bek lukim em. Sapos i stret long sediul bilong yu, yu ken askim man sapos i orait long yu go bek lukim em long de bihain o bihain tasol long sampela de. Sapos yu bin autim tok long man long wiken na man i gat laik long harim tok em i save wok namel long wik, ating em bai i tok orait long yu go bek lukim em long wiken bihain. Taim yu pasim tok long i go bek lukim man, yu mas truim tok bilong yu.​—⁠Mt. 5:⁠37.

5. Olsem wanem pasin bilong mekim gobek hariap bai helpim yumi long inapim wok Jisas i bin givim bilong kamapim ol disaipel?

⁵ I gat as tru na yumi laik go bek hariap long lukim man i gat laik long harim tok. Olsem na makim taim na go bek hariap, long wanem, “taim i sotpela nau.” (1 Ko. 7:29) Taim yumi go bek hariap long lukim ol man i gat laik long harim tok bilong Kingdom, wok bilong yumi bai kamapim gutpela kaikai tru.