Go Bek Bilong Helpim Man
1 Sapos yu mekim gut gobek dispela bai kirapim tingting bilong man bilong haus na helpim gut em long kamap strong na kamap bilipman. Wanem sampela gutpela samting yu ken tingim taim yu go bek lukim man i bin amamas long harim tok?
2 Namba wan samting yu mas mekim, em yu mas redi gut. Yu mas mekim dispela long taim yu go lukim man long namba wan taim. Bai yu mekim olsem wanem? Yu mas raitim gut sampela tok long wanpela hap pepa o notbuk, olsem nem bilong man bilong haus, na ol samting yu bin toktok wantaim em long en, na sampela tok em man yet i bin mekim, na ol samting yu bin tilim long em. Na bihain yu mas lukim gen ol dispela tok na beten na skelim gut wanem tok bai yu givim long man taim yu go bek lukim em.
3 Nau yu redi pinis na bai yu tok wanem? Sapos yu bin givim wanpela askim long man bilong haus taim yu go lukim em long namba wan taim yu ken stori long dispela askim taim yu go bek lukim em gen. Olsem: Taim yu autim tok long man long namba wan taim, sapos yu bin toktok long ol blesing em Kingdom bilong God bai kamapim, yu ken mekim askim olsem: “Bilong wanem God i larim pasin nogut i stap?”
Taim yu go bek lukim man na yu tok moning pinis na yu kolim nem bilong yu, yu ken mekim tok olsem:
◼ “Taim mi lukim yu pastaim, yumi bin toktok long wanpela askim olsem: Bilong wanem God bilong pasin sori i larim ol pasin nogut tru i stap long nau? Taim mi lusim yu, yu bin tingting long dispela samting? [Larim man i bekim tok.] Yu ting God i tingim tru ol man? [Larim man i bekim tok.] Lukim tok bilong Baibel long Jon 3:16.” Taim yu kaunim pinis dispela ves yu ken soim man long sampela as na bai em i ken save bilong wanem God i larim pasin nogut i stap long nau.
4 Narapela askim bilong kirapim tingting bilong man em olsem: “Sapos God i laik bai man i ken stap oltaim long graun, bilong wanem ol man i save go lapun na i dai?” Taim yu go bek lukim man, yu ken kamapim bekim bilong dispela askim long Baibel long Rom 5:12. Taim yu kaunim skripsa pinis kamapim sampela tok i stap long laspela paragraf bilong pes 34 long buk Yumi Bilong i Stap Nau Tasol?, em i stori long as tru na ol man i save go lapun na i dai.
5 Wanpela tok lukaut. Was gut long ol askim yu mekim taim yu go bek lukim man, olsem: “Yu kaunim pinis samting mi lusim wantaim yu?” o “Yu tingim mi yet?” o “Yu tingim yet ol samting yumi bin stori long en long taim mi bin kam lukim yu pastaim?” Sapos yu mekim ol dispela kain askim, man bilong haus i no ken amamas. Kain askim olsem bai i no inap kamapim gutpela samting. Tasol sapos yu mekim gutpela pasin pren long em, na yu redi long senisim toktok, na yu mekim sotpela tok, dispela bai mekim na man i amamas long harim tok yu autim long em.
6 Yu ken mekim kain tok olsem na sampela narapela tok, na man i laik harim tok i ken pilim tru tok yu autim long em. Yu ting olsem wanem? Yu inap putim mak olsem yu bai mekim wanpela gobek o sampela moa long olgeta wan wan wik? Mekim wok long ol dispela tok yumi stori pinis long en, na askim sampela pablisa i gat save long mekim gobek na ol i ken helpim yu. Taim yu mekim gutpela gobek long ol man yu bin autim tok long ol, amamas bilong yu bai i go bikpela.
[Ol Askim]
1. Sapos yu mekim gut gobek, dispela bai kamapim wanem gutpela wok?
2. Bilong redi long mekim gobek yu ken mekim wanem?
3. Wanem sampela rot na yu ken kirapim tok taim yu mekim gobek?
4. Taim yu laik lusim man yu ken givim wanem askim long em bilong kirapim tingting bilong em? Na taim yu go bek lukim em, bai yu tok wanem long em?
5. Yu no ken mekim wanem ol askim taim yu mekim gobek?
6. Yu ken putim wanem mak bilong mekim gobek?
This article is repeated in km 1/96.