Planim Kaikai Bilong Tok i Tru Bilong Kingdom
“Yu mas planim sampela lain kaikai long moningtaim na sampela long apinun tu.”—SAVEMAN 11:6.
1. Olsem wanem ol Kristen long nau ol i insait long wanpela wok bilong planim kaikai?
OL GADEN bilong kaikai i bikpela samting long ol Hibru bilong bipo. Olsem na Jisas—taim em i stap long graun em i sindaun long Graun Bilong Promis—em i stori long ol samting bilong gaden long ol tok piksa bilong em. Olsem: Em i tok wok bilong autim gutnius bilong Kingdom bilong God em i kain olsem wok bilong tromoi pikinini wit long gaden. (Matyu 13:1-9, 18-23; Luk 8:5-15) I kam inap long nau, maski yumi stap insait long wanpela lain bilong wokim gaden o nogat, wok bilong planim pikinini kaikai bilong spirit, olsem wok bilong autim tok, em i nambawan bikpela wok ol Kristen i save mekim.
2. Wok bilong yumi long autim tok em i bikpela samting olsem wanem? Kolim sampela samting ol Witnes i mekim long nau bilong helpim ol long mekim dispela wok.
2 Em gutpela samting tru yumi inap insait long wok bilong planim tok i tru bilong Baibel long dispela taim bilong las de. Rom 10:14, 15 i kamapim klia olsem dispela wok em i bikpela wok tru: “Sapos i no gat wanpela i autim tok long ol, olsem wanem bai ol i harim? Na sapos ol i no salim ol man i go bilong autim tok, olsem wanem bai ol i autim? Buk bilong God i tok olsem, ‘Ol manmeri i amamas tru long lukim man i kam bilong bringim gutnius.’ ” I no gat wanpela taim bipo olsem long nau long yumi mas strong long mekim tru dispela wok God i bin givim long yumi. Long dispela as ol Witnes Bilong Jehova ol i wok strong long wokim na tilim ol Baibel na ol buk bilong stadi long Baibel long 340 tok ples. Bilong wokim ol dispela buk, i mas i gat 18,000 volantia long hetkota bilong ol na long ol brens-ofis long ol narapela narapela kantri. Klostu 6 milion Witnes i insait long wok bilong tilim ol dispela buk bilong Baibel long olgeta hap bilong graun.
3. Wok bilong planim tok i tru bilong Kingdom i kamapim wanem samting?
3 Dispela bikpela wok i kamapim wanem samting? Olsem long taim bilong ol Kristen bilong pastaim, planti man long nau ol i kisim tok i tru. (Aposel 2:41, 46, 47) Tasol samting i bikpela samting moa long bikpela lain i kisim baptais nupela na mekim wok olsem pablisa bilong Kingdom, i olsem: Dispela bikpela wok long autim tok i helpim wok bilong mekim holi nem bilong Jehova na long kamapim klia olsem Jehova wanpela tasol em i God tru. (Matyu 6:9) Na tu, save bilong Tok Bilong God i helpim planti man long mekim i stap bilong ol i kamap gutpela moa na em inap helpim ol long kisim laip oltaim.—Aposel 13:47.
4. Ol aposel i redi long mekim wanem bilong helpim ol man ol i autim tok long ol?
4 Ol aposel i save dispela gutnius inap helpim ol man long kisim laip, na ol i pilim tru hevi bilong ol man ol i autim tok long ol. Dispela samting i kamap klia long ol tok bilong aposel Pol, taim em i tok: “Mipela i laikim yupela tumas, olsem na mipela i laik givim gutnius bilong God long yupela. Na mipela i redi tu long givim laip bilong mipela bilong helpim yupela, long wanem, yupela i bin kamap pren tru bilong mipela.” (1 Tesalonaika 2:8) Long pasin bilong soim olsem ol i tingim tru ol man, Pol na ol narapela aposel ol i bihainim pasin bilong Jisas na ol ensel long heven, em ol i insait tru long dispela wok bilong helpim man long kisim laip. Orait nau yumi ken stori long sampela bikpela wok ol dispela wokboi bilong God long heven ol i mekim bilong planim tok i tru bilong Kingdom, na olsem wanem pasin bilong ol inap strongim yumi long mekim tru wok bilong yumi.
Jisas—Em Man Bilong Planim Tok i Tru Bilong Kingdom
5. Taim Jisas i stap long graun, em i wok strong long mekim wanem wok?
5 Jisas, em i gutpela olgeta, em i gat strong long helpim ol man long taim bilong em long planti gutpela samting bilong skin. Olsem: Em inap long stretim planti tingting kranki bilong ol man long ol sik samting long taim bilong em, o em inap long helpim ol man long kisim sampela save moa long ol samting bilong saiens. Tasol em i no mekim olsem. Taim em i kirap mekim wok bilong em long graun, em i kamapim klia olsem wok bilong em i bilong autim gutnius. (Luk 4:17-21) Klostu long pinis bilong wok bilong em long graun, em i tok: “Mama i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim.” (Jon 18:37) Olsem na em i wok strong long planim tok i tru bilong Kingdom. Wok bilong lainim ol man long God na long ol samting Em i laik mekim, dispela em i bikpela samting tru, winim olgeta narapela samting Jisas inap long skulim ol long en.—Rom 11:33-36.
6, 7. (a) Taim Jisas i laik go antap long heven, em i mekim wanem tok promis? Olsem wanem em i truim dispela tok promis? (b) Tingting bilong Jisas long wok autim tok em i mekim wanem long yu yet?
6 Jisas i kolim em yet olsem Man bilong planim tok i tru bilong Kingdom. (Jon 4:35-38) Long olgeta taim rot i op, em i save autim gutnius. Taim em i laik i dai long diwai pos, long dispela taim tu em i autim gutnius bilong wanpela paradais bai kamap long graun. (Luk 23:43, NW ) Tasol bikpela laik bilong em long wok bilong autim gutnius em i no pinis taim em i dai long pos. Taim em i laik go antap long heven, em i tokim ol aposel long ol i mas mekim yet wok bilong planim tok i tru bilong Kingdom na ol i mas kamapim ol disaipel. Nau Jisas i mekim wanpela gutpela tok promis. Em i tok: “Harim. Mi save stap wantaim yupela olgeta de, i go inap long dispela taim i pinis.”—Matyu 28:19, 20.
7 Dispela tok bilong Jisas i olsem wanpela tok promis bilong helpim na stiaim na lukautim wok bilong autim gutnius long “olgeta de, i go inap long dispela taim i pinis.” I kam inap long taim bilong yumi, Jisas i wok yet long helpim wok bilong autim tok. Em i Gopas bilong yumi, na em i bosim wok bilong planim tok i tru bilong Kingdom. (Matyu 23:10) Em i Het bilong kongrigesen Kristen, olsem na em i gat wok long ai bilong Jehova long lukautim dispela wok i stap long olgeta hap bilong graun.—Efesus 1:22, 23; Kolosi 1:18.
Ol Ensel i Save Autim Gutnius
8, 9. (a) Ol ensel i bin mekim wanem bilong soim olsem ol i tingim ol man na ol wok bilong ol? (b) Olsem wanem yumi mekim wok long ai bilong ol ensel?
8 Taim Jehova i wokim graun, ol ensel i “singim song, na ol . . . i amamas na singaut.” (Jop 38:4-7) Kirap long dispela taim na i kam, ol dispela ensel i bin tingim ol man na ol wok bilong ol. Jehova i bin mekim wok long ol bilong bringim tok bilong em i kam long ol man long graun. (Song 103:20) Nau long taim bilong yumi Jehova i mekim bikpela wok moa long ol bilong autim gutnius. Long tok hait aposel Jon i kisim, em i lukim wanpela “ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long ol manmeri i stap long graun. Em i autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin. Em i singaut strong olsem, ‘Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em.’ ”—KTH 14:6, 7.
9 Baibel i tok ol ensel ‘ol i spirit ol i save mekim wok bilong God. God i save salim ol i go bilong helpim ol man em i laik kisim bek ol.’ (Hibru 1:14) Taim ol ensel i givim bel long mekim ol wok bilong ol, ol i gat rot long lukim yumi na ol wok yumi mekim. Em nau, yumi mekim wok bilong yumi long ai bilong ol ensel. (1 Korin 4:9) Yumi amamas tru long save olsem i no yumi tasol i mekim dispela wok bilong planim tok i tru bilong Kingdom!
Yumi Strong Long Mekim Wok Bilong Yumi
10. Olsem wanem gutpela tok bilong Saveman 11:6 i stret long wok bilong yumi long autim tok?
10 Bilong wanem Jisas na ol ensel ol i tingim tru wok bilong yumi? Jisas i kolim wanpela as taim em i tok: “Mi tok stret long yupela, wankain amamas i save kamap namel long ol ensel bilong God taim wanpela man bilong mekim sin em i tanim bel.” (Luk 15:10) Yumi tu i save tingim tru ol manmeri. Olsem na yumi save wok strong long planim tok i tru bilong Kingdom long olgeta hap. Tok bilong Saveman 11:6 i stret long wok bilong yumi, em i tok: “Yu mas planim sampela lain kaikai long moningtaim na sampela long apinun tu. Yu no inap save, lain kaikai yu planim long moning o lain kaikai bilong apinun tasol bai i kamap gut, o tupela lain wantaim bai i kamap gut.” Tru, long olgeta wan wan man i kisim tok bilong yumi, ating planti handet o planti tausen ol i sakim dispela tok. Tasol wankain olsem ol ensel, yumi amamas taim “wanpela man bilong mekim sin” i kisim tok bilong rot bilong kisim bek ol man.
11. Ol buk em Baibel i as bilong en ol inap mekim wanem gutpela wok?
11 I gat planti samting insait long wok bilong autim gutnius. Wanpela bikpela samting i helpim dispela wok em ol buk na nius i gat ol tok bilong Baibel long en, em ol Witnes Bilong Jehova i save mekim wok long ol. Ol dispela buk na nius i kain olsem pikinini kaikai ol man i tromoi i go long olgeta hap. Yumi no inap save long wanem wanem hap ol buk yumi tilim bai mekim gutpela wok. Buk man i kaunim, ating pastaim ol narapela narapela i bin holim. Ating sampela taim Jisas na ol ensel i stiaim ol samting na bai man i gat stretpela bel inap kisim. Nau yumi ken tingim sampela ekspiriens i kamapim olsem wanem Jehova inap mekim na bai gutpela wok i kamap long ol buk na nius yumi tilim.
Wok Bilong Trupela God
12. Olsem wanem wanpela olpela nius i bin helpim wanpela famili long kisim save long Jehova?
12 Long 1953, Robert na Lila na ol pikinini bilong tupela ol i lusim wanpela bikpela taun na ol i go sindaun long wanpela olpela haus i stap nogut long ples bus, long Pensilvenia, Amerika. Bihain liklik long ol i go sindaun long dispela haus, Robert i tingting long wokim rum waswas aninit long lata em wanpela banis i banisim. Taim em i tekewe sampela plang, long baksait bilong banis em i lukim sampela pepa na skin bilong galip na sampela pipia moa em ol liklik rat i bin putim i stap. Namel long ol dispela pipia i gat wanpela nius, The Golden Age. Robert i laikim tru wanpela stori i toktok long pasin bilong mekim bikpela long ol pikinini. Em i kirap nogut long ol tok i klia gut na Baibel i as bilong en, na em i tokim Lila ol bai go insait long “lotu bilong Golden Age.” Insait long sampela wik tasol, ol Witnes Bilong Jehova i kam long haus bilong ol, tasol Robert i tok ol i laikim “lotu bilong Golden Age tasol.” Ol Witnes i tok, nius Golden Age i gat nupela nem, olsem Kirap! Robert na Lila i kirap stadi long Baibel wantaim ol Witnes, na bihain ol i kisim baptais. Bihain ol tu i kirap long planim kaikai—ol i autim tok i tru long ol pikinini bilong ol na planti gutpela samting i kamap. Long nau, inap 20 bilong dispela famili, em 7-pela ol i pikinini bilong Robert na Lila, ol i wokboi bilong God Jehova i baptais pinis.
13. Wanem samting i kirapim tupela marit long Pueto Riko na ol i gat laik long stadi long Baibel?
13 Inap 40 yia i go pinis, William na Ada, em tupela marit bilong Pueto Riko, ol i no gat laik long stadi long Baibel. Taim ol Witnes Bilong Jehova i kam paitim dua bilong ol, tupela i save giaman long ol i no stap. Wanpela taim William i go long wanpela hap bilong baim samting bilong stretim haus. Taim em i laik lusim dispela hap, em i lukim wanpela grinpela buk long wanpela bikpela dram pipia. Nem bilong dispela buk em Religion (Lotu), em ol Witnes Bilong Jehova i bin wokim long 1940. William i kisim dispela buk i go long haus na em i amamas long kisim save long olsem wanem lotu giaman i narapela kain long trupela lotu. Narapela taim ol Witnes Bilong Jehova i kam long haus bilong ol, William na Ada i amamas long harim tok na ol i kirap long stadi long Baibel wantaim ol. Sampela mun bihain ol i kisim baptais long Laik Bilong God Kibung Intenesenel long 1958. Kirap long dispela taim i kam inap long nau, ol i bin helpim 50 manmeri long kam insait long lain brata Kristen bilong yumi.
14. Olsem wanpela ekspiriens i kamapim, ol buk bilong yumi inap mekim wanem wok?
14 Karl i gat 11 krismas tasol na em i save mekim ol liklik pasin hambak. Long tingting bilong em i olsem olgeta taim em i kisim hevi. Papa bilong em i bilong Jemani na em i wanpela pasto bilong Misin Metodis. Em i lainim Karl olsem taim ol man nogut i dai, ol i go long hel na paia i kukim ol. Karl em i pret nogut tru long hel. Wanpela taim long 1917, Karl i lukim wanpela liklik pepa long rot, na em i kisim. Taim em i kaunim, kwiktaim wanpela askim i pulim ai bilong em: “Hel em i wanem samting?” Pepa i singautim ol man long kam harim wanpela pablik-tok i stori long hel, em pablik-tok bilong ol Baibel Stiuden, nau yumi kolim ol Witnes Bilong Jehova. Em i stadi long Baibel, na wanpela yia bihain, Karl i kisim baptais na kamap wanpela Baibel Stiuden. Long 1925 ol i singautim em i go wok long hetkota bilong ol Witnes Bilong Jehova, na em i wok yet long dispela hap. Man! Em i painim wanpela liklik pepa long rot na dispela i kirapim em long mekim wok Kristen inap 80 yia pinis!
15. Jehova inap mekim wanem?
15 Tru, yumi ol man bilong graun i no inap save ol ensel i bin mekim sampela wok bilong stiaim ol dispela samting o nogat. Tasol yumi ken bilip olsem Jisas na ol ensel ol i save mekim bikpela wok bilong helpim wok autim tok na Jehova inap stiaim ol samting olsem Em i laik mekim. Ol kain ekspiriens olsem i helpim yumi long save, ol nius samting yumi tilim ol inap mekim gutpela wok.
Yumi Bin Kisim Wanpela Gutpela Samting Bilong Lukautim
16. Namba Tu Korin 4:7 i lainim yumi long wanem samting?
16 Aposel Pol i tok long “ol gutpela mani samting i stap insait long ol sospen graun.” Dispela gutpela mani samting em i makim dispela wok God i bin givim long yumi bilong autim tok, na ol sospen graun i makim yumi ol man God i bin givim dispela gutpela wok long ol. Yumi ol man i gat sin na i gat sampela samting yumi no inap mekim, olsem na Pol i tok samting i kamap long dispela wok yumi kisim em i “bilong olgeta man i ken save, dispela bikpela strong ol i lukim em i strong bilong God. Em i no strong bilong mipela.” (2 Korin 4:7) Tru tumas, yumi ken bilip olsem Jehova bai givim strong long yumi bambai yumi inap mekim dispela wok.
17. Wanem samting inap kamap taim yumi planim tok i tru bilong Kingdom? Tasol bilong wanem yumi mas holimpas stretpela tingting?
17 Sampela taim yumi mas daunim sampela laik bilong skin. Long sampela hap i gat hatwok long autim tok, na i gat sampela hap yumi no laik go long en. Na long sampela hap planti man i les tru long harim tok, na sampela i mekim pasin birua. Yumi lusim bikpela strong long autim tok long kain hap olsem, na ating i no gat man i harim. Tasol i gutpela sapos yumi wok strong, long wanem, bagarap inap painim ol man. Tingim: Ol tok yumi autim inap helpim ol man long kisim amamas long nau, na long bihain, laip i stap oltaim oltaim. Ol tok bilong Song 126:6 i kamap tru planti taim: “Ol man i krai na karim pikinini kaikai i go bilong planim, bihain bai ol i singim song bilong amamas, na kisim ol kaikai i mau na i kam.”
18. Olsem wanem yumi inap was gut long wok bilong yumi? I gat wanem as na yumi mas mekim olsem?
18 Olsem na long olgeta taim rot i op, i gutpela sapos yumi planim planti pikinini bilong tok i tru bilong Kingdom. Yumi no ken lusim tingting olsem: Tru, yumi mekim wok bilong planim na givim wara long ol pikinini kaikai, tasol Jehova i save mekim kaikai i kamap. (1 Korin 3:6, 7) Tasol olsem Jisas na ol ensel i mekim tru wok bilong ol long helpim dispela wok, Jehova i laik bai yumi tu i mekim tru wok bilong yumi. (2 Timoti 4:5) Yumi mas was gut long ol wok yumi mekim bilong skulim ol man, na long tingting bilong yumi, na yumi mas strong long autim tok. Bilong wanem? Pol i tok: “Long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.”—1 Timoti 4:16.
Yumi Lainim Wanem Samting?
• Wanem sampela gutpela samting i save kamap long wok bilong yumi long autim tok?
• Olsem wanem Jisas Krais na ol ensel ol i insait long wok bilong autim tok long nau?
• Bilong wanem yumi mas wok strong long planim tok i tru bilong Kingdom?
• Taim yumi bungim ol man i les long harim tok o mekim pasin birua, wanem samting i mas kirapim yumi long mekim yet dispela wok?
[Piksa long pes 15]
Olsem ol Israel long bipo ol i save tromoi planti pikinini bilong wit long gaden, olsem tasol ol Kristen long nau i save tromoi planti pikinini bilong tok i tru bilong Kingdom
[Piksa long pes 16, 17]
Ol Witnes Bilong Jehova ol i save wokim na tilim planti buk na nius em Baibel i as bilong en, long 340 tok ples