Sampela Tok i Kam Long Olgeta Hap
Hanwas i No Save Kamapim Taim Tasol
Wanpela nius (O Globo) i tok: Long Rio de Janero, 77 sumatin i laik go long yunivesiti ol i no inap go, long wanem, taim ol i mekim tes ol i bin mekim wok long wanpela kain hanwas ol i kolim digital bilong mekim pasin giaman. Ol dispela hanwas i bin wok olsem wanpela liklik masin i toksave long man long namba bilong telefon em i mas ringim, tasol ol hanwas i no bungim ol namba bilong telefon, nogat; ol i bin kamapim ol stretpela bekim bilong ol askim bilong tes. Nius i tok, wan wan sumatin i bin lusim 14,000 dola bilong baim wanpela hanwas olsem. Ating yu kirap nogut long save, long 1987 ol lain bilong bosim tes bilong ol skul long Inglan na Wels, ol i bin tokim ol tisa long was gut long ol sumatin i laik mekim pasin giaman long rot bilong wanpela kain hanwas i wok olsem kompyuta.
Bikpela Samting Bilong Bungim Kaikai
Wanpela lain bilong nius (Reuters) i kamapim ripot olsem: “Em namba wan taim long dispela kantri na ol masin i bin winim pasin bilong ol man long wokim ol gaden wit bilong Saina.” Dispela lain i tok, ol Saina i bin mekim wok long 800,000 masin bilong bungim wit. Paslain long yia 1300 B.C.E. samting wit i bin kam nupela long Saina, na kirap long dispela taim i kam inap nau planti famili Saina i bin mekim wok long han tasol bilong planim wit long ol liklik hap graun bilong ol yet. Sapos yumi tingim olgeta manmeri bilong graun, inap 20 pesen bilong ol, ol i sindaun long Saina, tasol Saina i no gat bikpela hap graun bilong planim ol gaden—inap 7 pesen tasol bilong graun i gutpela bilong planim gaden. Olsem na ripot i tok: “Ol lain didiman i gat bikpela laik long kirapim ol man long dispela kantri long mekim wok long ol masin bilong wok gaden.”
Tingting Kranki Long Samting Ol i Lukim
Klostu olgeta manmeri i lukim pes bilong ol long glas ol i orait long samting ol i lukim—ol yet. Tasol ol manmeri i gat wanpela kain sik (dysmorphic disorder) na ol i lukluk long glas, ol i ting pes bilong ol i narapela kain. Nius The Province bilong Britis Kalambia, Kanada, i tok: “Dispela kain sik i mekim na ol i tingim tasol wanpela samting bilong pes olsem i no gutpela, tasol dispela samting bilong pes i gutpela.” Eric Hollander em wanpela dokta long Nu Yok, em i tok, ol man i gat dispela sik na ol i tingting kranki long pes bilong ol, ol i save bel hevi na inap 25 pesen bilong ol, ol i traim long kilim i dai skin bilong ol yet.
Ol i Wok Bisnis Long Ol Bun
Wanpela lain bilong nius (Reuters) i tok: “Bikpela pait long Kabul i mekim na ol manmeri long dispela hap i sot tru long ol samting, olsem na ol i save digim graun bilong painim bun bilong ol man i dai pinis inap long ol i ken salim bilong ol man i ken putim insait long kaikai bilong kakaruk.” Bun i gat gutpela marasin kalsiam, fosfet, na kaboneit long en, na sampela man i save mekim wok long bun bilong wokim kaikai bilong ol animal, sop, na wel bilong kukim kaikai. Man i salim ol bun i gat hevi olsem 6-pela kilogram, em inap kisim 40 toea samting, em bikpela mani liklik long ol manmeri i stap rabis tru long dispela biktaun. Yangpela Faizdeen i gat 14 krismas, em i tok: “Bun i gutpela wok bisnis. Planti taim mi save bungim bun bilong ol animal, tasol i no hatwok long painim bun bilong man long hia—planti moa i stap.” Sori tru, pait i bin kirap insait long Afganistan yet na inap planti yia ol i pait, olsem na ol i no sot long bun i gat ol gutpela marasin bilong mekim wok bisnis long en.
Planti Man Moa Ol i No Go Long Lotu
Long Yunaitet Stets, ol i ting insait long 30 yia i go pinis, klostu 50 pesen tasol bilong olgeta man i go bikpela insait long wanpela bikpela lotu Talatala, ol i save go long lotu bilong ol taim ol i bikpela pinis. Inap 78 milion manmeri bilong lotu Talatala long Yunaitet Stets, ol i stap olsem “arereman” tasol. Olsem: Ol i tok ol i bilong lotu Baptis, Episkopelian, Metodis, Presbitirian, o narapela lotu Talatala, tasol ol i no save go long lotu.
Ol Pris Pasto i Hatwok Long Kisim Insurens
Klostu olgeta misin i gat wanpela kain insurens bilong lukautim ol, nogut wanpela man i popaia na bagarapim narapela man. Tasol nius National Underwriter i tok, sampela kampani bilong insurens long Yunaitet Stets ol i no laik givim insurens moa bilong lukautim ol pris pasto i save “mekim pasin sem.” John Cleary, bikman bilong wanpela kampani bilong insurens (Church Mutual Insurance Company), em i tok: ‘Long insurens pepa bilong planti kampani long nau, ol i no raitim moa olsem ol bai givim insurens long ol pris pasto i mekim pasin sem, long wanem, dispela pasin i no wanpela popaia, em i wanpela rong.’ Donald Clark Jr., em loya bilong sampela misin, na em i tok dispela senis long pepa bilong ol kampani bilong insurens i kamapim klia olsem, ‘wok bisnis bilong ol kampani bilong insurens inap bagarap long dispela bikpela hevi ol man yet i save kamapim, na ating i winim tru hevi ol kampani bilong insurens bai kisim taim bikpela bagarap olsem guria samting i kamap.’ Mista Cleary i tok, kampani em i save wok long en (Church Mutual), em i wanpela nambawan bikpela kampani bilong givim insurens long ol misin long Yunaitet Stets, na kirap long 1984 i kam inap nau 1,500 i go inap 2,000 man i tok ol i laik kisim mani long insurens, long wanem, pris o pasto i bin mekim pasin sem long em.
Ol Sumatin Bilong Singapo Ol i Nambawan Sumatin
Winim 500,000 sumatin bilong 41 kantri ol i bin sindaun 90 minit na mekim tes bilong helpim ol tisa long skelim skul bilong olgeta kantri. Wanem samting i kamap? Ol mak bilong tes i kamapim klia olsem skul bilong Singapo i save kamapim ol nambawan sumatin long pasin bilong bungim ol namba na bilong saiens. Bihain long ol sumatin bilong Singapo, ol sumatin bilong 9-pela kantri moa ol tu i save gut long pasin bilong bungim ol namba, olsem: Saut Korea, Japan, Hong Kong, Beljam, Ripablik Sek, Ripablik Slovak, Swiselan, Netelan, na Slovenia. Ol nambawan sumatin bilong saiens em ol sumatin bilong Singapo, Ripablik Sek, Japan, Saut Korea, Balgeria, Netelan, Slovenia, Ostria, Hangari, na Inglan. Olsem wanem wanpela kantri i gat 3,400,000 manmeri tasol i ken kamapim ol nambawan sumatin, winim ol sumatin bilong ol narapela kantri? Ating i olsem long wanem ol i wok strong long lain na kisim save. Nius Asiaweek i tok, ol sumatin long Singapo i save lusim klostu 5-pela aua long olgeta de bilong mekim homwok, tasol ol sumatin bilong ol narapela kantri i save lusim 2-pela o 3-pela aua tasol long mekim olsem.
Mani i Kam Long Heven?
Ovataun em wanpela taun long Maiami, Florida, i no gat planti wok bisnis long en, olsem na ol manmeri bilong dispela taun ol i amamas tru taim mani i pundaun olsem em i kam daun long skai. Tasol dispela mani i no olsem mana i bin pundaun long heven, nogat. Em hap mani bilong 3.7 milion dola wanpela sekyuriti-ka i bin karim i go long wanpela hap, tasol taim ka i ran antap long wanpela bris em i bam, olsem na mani i bin kapsait i go daun long ol rot daunbilo. Polis i ting inap 100 manmeri i bin hariap hariap bilong bungim dispela mani, tasol ating planti manmeri moa i bin mekim olsem. Nius The New York Times i tok: “Polis bilong Maiami i askim ol manmeri long bekim dispela mani insait long 48 aua, na sapos ol i mekim olsem polis i no ken kotim ol, long wanem, ol i bin stil.” Tasol taim 48 aua i pinis, inap 3-pela manmeri tasol ol i bin kam long polis na bekim mani ol i bin kisim—500,000 dola i lus yet. Wanpela yangpela i gat 18 krismas em i tok: “Mani i pundaun nabaut nabaut insait long banis bilong ol man. Orait, yu ting ol bai mekim wanem long dispela mani?”
Ol i No Larim Skin Bilong Ol Sikman i Go Kol
Ol i save mekim rum bilong katim man long haus sik i kol inap long ol binatang bilong sik olsem jem ol i no ken kamap planti. Tasol wanpela saveman long Yunivesiti Bilong Kalifonia, em Daniel Sessler, em i tok, ol i kisim nupela save long nau olsem dispela i mekim na ol sikman i kisim planti sua moa. Sessler i tok: “Ol binatang bilong sik olsem jem na ol i stap long win, ol i no mekim sua i kamap long hap dokta i bin katim man, nogat; skin bilong sikman yet i no gat strong long sakim ol jem i stap long skin bilong em o insait long bodi bilong em.” Sapos rum bilong katim man i kol, hat bilong skin bilong sikman inap go daun olsem 2-pela digri Selsias samting. Na taim hat bilong skin i go daun olsem, blut i save karim oksijen em i hatwok long ran long ol rop blut—em bikpela samting bilong sakim sik. Sessler i tok, “ol sel na ol ensaim, em ol i gat wok long givim strong long skin bilong sakim sik, ol i no wok gut taim skin i kol.” Sessler na ol wanwok bilong em ol i kisim save olsem, ol sikman em skin bilong ol i no kol taim dokta i katim ol, planti bilong ol i no kisim sua na ol i lusim hariap haus sik, tasol ol sikman em skin bilong ol i kol taim dokta i katim ol, ol i mas slip 3-pela de moa long haus sik paslain long ol i ken lusim.
Ol i No Helpim Ol Manmeri
Nius Mainichi Daily News i tok: Long Japan inap 49 pesen bilong ol manmeri em wanpela lain i bin givim askim long ol, ol i tok ol bikman bilong gavman i save helpim ol yet tasol. Inap 7 pesen tasol bilong ol manmeri i ting ol dispela man i save wok bilong “helpim ol manmeri,” na 3 pesen tasol bilong ol manmeri i tok, ol i save mekim sampela wok bilong helpim kantri. Wan wan manmeri tasol long Japan ol i tok, ol bikman bilong gavman i save wok strong o givim bel long wok. Lain i bin givim ol askim long ol manmeri bilong Japan, ol i bin mekim olsem long Disemba 1996, em wanpela yia planti pasin nogut bilong sampela bikman bilong gavman i bin kamap ples klia na olgeta man i save long en.