Sampela Tok i Kam Long Olgeta Hap
Wara i Sot Tru
Nius The Star i tok, ‘Saut Afrika i gat bikpela hevi tru long wara i sot.’ Sapos ol i no painim narapela rot bilong kisim wara, ‘15 yia bihain long nau’ wara bai pinis. Wanpela as bilong dispela hevi em man—planti man tumas i kamap long Saut Afrika long nau na ol i wok long pinisim wara. Narapela as em ren—ren i save pundaun long Saut Afrika i liklik tru. Sapos yumi skelim ren planti kantri i save kisim, Saut Afrika i kisim inap 50 pesen tasol. Na narapela samting i mekim hevi i go bikpela moa, em taim ren i pundaun em i save drai hariap tru. Nambawan banis bilong pasim wara long Saut Afrika i save lusim 500 milion lita wara long olgeta yia, long wanem, san i save pulim wara i go antap. Bikpela hap wara bilong dring tu i no klin, long wanem, ol man i wok long bagarapim. Nius The Star i tok: ‘Long nau inap 12 milion man i no gat gutpela klinpela wara bilong dring, na winim 20 milion man i no gat wara bilong rausim toilet samting.’
Ol Ranawe Pikinini
Nius The Independent i tok, long Briten 98,000 pikinini i save ranawe long olgeta yia. Sindaun bilong planti pikinini i nogut tru taim ol i stap wantaim papamama, olsem na ol i ranawe. Winim 10,000 pikinini i no kisim yet 16 krismas na ol i bin ranawe inap 10-pela taim. Ol ranawe pikinini i no gat bikpela krismas bambai ol inap kisim liklik mani long welfe, olsem na planti bilong ol i save stil o pamuk bilong painim mani. Wanpela bikman (Ian Sparks) bilong lain Children’s Society, em i tok, sapos yumi ol man i givim baksait long dispela hevi, taim ol dispela pikinini i go bikpela, bai ‘ol i no gat ples slip na ol i no inap sindaun gut wantaim ol man.’ Sapos ‘yumi olgeta’ i tingim ol papamama na wok long helpim ol, orait, ‘planti hevi i no inap kamap.’
Planti Pairap
Long olgeta wan handet wan handet man, yau bilong 10-pela i bagarap liklik. Wanpela nius bilong Brasil (Globo Ciência) i tok, ‘planti pairap yumi save kamapim i no gutpela long yau bilong yumi.’ Sapos olgeta de man i save harim sampela kain pairap i no gutpela long yau bilong em, dispela inap mekim na em i no inap putim gut tingting long wanpela samting, na em i no inap wok gut, na em inap kros, na birua inap painim em long ples wok.
Ol i No Lusim Mani Tasol
Wanpela nius bilong Ostrelia (The Sydney Morning Herald) i tok, ol nupela haus laki i kamapim wanpela hevi gavman i no bin tingim: “Ol papamama i save lusim pikinini na ol i go pilai laki.” Polis i bin painim sampela pikinini insait long ka, em papamama i bin lokim dua bilong ka na ol i go pilai laki inap sampela aua. Planti man i save long wanpela samting nogut i bin painim tupela liklik pikinini olsem: Manki i gat 5-pela krismas na susa bilong em i gat 18 mun tasol, na tupela i no inap lusim ka, long wanem, papamama i bin lokim dua. Tupela i bin stap insait long ka inap 5-pela aua. Polis i painim tupela pikinini long 7 klok moningtaim. Nau long wanpela haus laki ol i pasim sampela toksave long banis bilong haus laki. Ol toksave i stap long sampela tok ples na i olsem wanpela tok lukaut long ol papamama. Sapos ol papamama i lusim pikinini long ka na ol i go pilai laki, ol bai baim kot long 5 tausen dola o ol inap kalabus. Dispela nius i tok, wanpela man i save wok long helpim ol famili i gat hevi, em i tok, pasin bilong pilai laki oltaim i bin ‘brukim marit bilong sampela, kamapim pasin raskol, sampela i raus long wok mani, na sampela i kilim i dai skin bilong ol yet.’
Ol Pikinini i Save Gut Long Rit Rait
Wanpela nius bilong Kanada (Globe and Mail) i tok: ‘Sapos yumi kaunim buk long ol pikinini dispela i save helpim rait bilong ol i kamap gutpela.’ Nau tasol wanpela lain bilong edukesen long Onterio, Kanada, i bin wokim tes wantaim ol sumatin. Dispela lain i tok, sapos papamama i bin kaunim buk long pikinini taim em i wok long i go bikpela, taim em i go long skul em i save skul gut. Sapos papamama i no bin mekim olsem o wan wan taim tasol ol i bin kaunim buk long pikinini, pikinini i no skul gutpela tumas. Nius i tok moa olsem: ‘Ol sumatin i save gutpela liklik long rit, ol i save gutpela liklik long rait tu.’ Na ‘ol sumatin i save kaunim buk long haus, ol i save gut long rit rait.’ Presiden bilong wanpela lain bilong ol tisa long Onterio (Teachers Federation), em i tok, taim ol i skelim ol tes bilong ol sumatin, ol i kisim save olsem, ‘ol sumatin i no save kaunim buk long haus, o wanpela i no kaunim buk long ol i go inap long taim ol i gat 14 krismas, taim ol i go bikpela ol i no inap kaunim buk.’