Bilong Wanem i Gat Planti Pasin Birua?
WANPELA MAN LONG JEMANI I RAITIM DISPELA STORI BILONG KIRAP!
“BILONG WANEM”—em sotpela tok, tasol em i wanpela tok i mas i gat bekim. Dispela askim i bin stap long wanpela liklik hap pepa i pas long wanpela mekpas plaua namel long planti planti plaua na doli olsem tedi-bea ol man i bin lusim ausait long wanpela skul long Danblen, Skotlan, long Mas 1996. Sampela de paslain, wanpela man i bin ran i go insait long skul na kilim i dai 16 pikinini na tisa bilong ol long gan. Sampela pikinini na tisa moa i bin kisim hap bagarap taim em i sutim ol tu long gan, na bihain dispela man i sutim em yet long gan na em i dai. Yumi save pinis, dispela man i nolaik tru long em yet na ol narapela man. Ol papamama i krai sori long pikinini bilong ol, na ol pren, na planti milion manmeri tu long olgeta hap, ol i gat wanpela askim, olsem: ‘Bilong wanem? Bilong wanem ol pikinini i no gat asua ol i mas dai olsem?’
Yu save, pasin birua i no gat as bilong en na i no stret, em i pulap long dispela graun. Na ating i gat kain kain as na pasin birua i bin mekim nogut long yu tu. Ating sampela taim yu tu yu bin tok: ‘Bilong wanem?’
Gutpela Samting na Samting Nogut Bilong Pasin Bilong Nolaik Tru
Dispela tok “nolaik tru” inap makim “pasin bilong bel nogut tru na pasin birua.” Tru i gutpela sapos yumi “bel nogut tru o birua” long ol samting em inap nogutim yumi o em inap bagarapim pasin pren bilong yumi wantaim narapela. Sapos olgeta man i gat dispela kain pasin birua, bai graun i gutpela ples bilong i stap long en. Tasol sori tru, pasin bilong ol sinman bilong graun em long birua long ol samting i no stret ol i birua long en.
Wanpela buk i tok, as bilong pasin birua i save bagarapim man em pasin bilong ol man long tingting nogut long ol man bilong narapela lain, o ol i no save gut long wanpela lain, o ol i gat tingting kranki; na planti taim samting i save kirapim pasin birua em “pret, belhat, o man i pilim olsem wanpela i bin rongim em.” Dispela kain pasin birua i no gat gutpela as, olsem na samting nogut i save kamap long en na planti taim ol man i laik save: ‘Bilong wanem?’
Yumi olgeta i save long sampela man em sampela taim pasin bilong ol i save skrapim bel bilong yumi, na sampela taim pasin bilong yumi i save skrapim bel bilong ol. Tasol pasin bilong skrapim bel i narapela kain tru long pasin bilong bagarapim skin bilong man. Olsem na ating yumi hatwok long save olsem wanem wanpela man inap birua long wanpela lain olgeta na planti man em i birua long ol em i no save long ol. Ating ol i no wanbel long tingting bilong em long ol samting bilong politik, o ol i bilong narapela lotu, o narapela lain, tasol yu ting dispela i gutpela as na em i ken birua long ol?
Tasol dispela kain pasin birua i stap! Long Afrika, pasin birua i as na long Ruanda long 1994, ol Hutu na Tutsi i kirapim pait na narapela lain i pait long narapela lain na planti i bin dai. Dispela i mekim na wanpela niusmeri i tok: “Olsem wanem bikpela pasin birua i kamap insait long wanpela liklik kantri?” Long hap bilong Midel-Is, pasin birua i as na ol paitman bilong Arap na Israel ol i givim bel long kilim i dai ol man long dispela hap. Long Yurop, pasin birua i mekim na planti kantri i no laik stap moa insait long kantri bipo ol i kolim Yugoslavia. Na wanpela ripot bilong nius i tok, long Yunaitet Stets i gat “250 lain i save kirapim ol man long mekim pasin birua,” na tingting bilong ol long birua long ol man bilong narapela skin i wok long i go kamap long olgeta hap bilong dispela kantri. Bilong wanem i gat planti pasin birua? Bilong wanem?
Pasin birua i pas strong long bel bilong ol man, olsem na maski ol i pinisim pait em pasin birua i as bilong en, dispela pasin birua i stap yet. Dispela i as na i hatwok long helpim ol kantri long i stap bel isi na no gat pait o paitman moa. Na i no gat narapela as na hevi i bin kamap bihain long ol i sainim kontrak bilong sekan long Paris long Disemba 1995, olsem biktaun Sarayevo i mas bung gen wantaim Bosnia na Hetsagovina-Kroesia Federesen. Klostu olgeta Serbia i sindaun long Sarayevo na ol hap klostu long en, ol i ranawe lusim dispela taun, long wanem, ol i pret long narapela lain bai bekim nogut long ol. Nius Time i kamapim ripot olsem taim ol dispela manmeri i ranawe, ol i no lusim wanpela samting—ol i stilim ol samting na kukim ol haus, olsem na nius i tok: “Sarayevo i wanbel gen; ol manmeri bilong en, nogat.”
Pasin sekan namel long ol manmeri i birua birua i no samting tru, em giaman tasol na i samting nating olsem mani giaman i samting nating. Dispela kain pasin sekan i no gat gutpela as, olsem na taim liklik hevi i kamap em bai pinis. Tasol i gat planti pasin birua long graun na i no gat planti pasin sori. Bilong wanem?