Ol i Lain Long Mekim Pasin Sori
OLKAIN pasin olsem laikim tru pasin bilong narapela, na mekim gut long em, o i gat ol wankain laik, ol i as bilong pasin sori. Pasin sori i olsem pasin bilong givim bel tru long narapela. Man i gat pasin sori em i no tingim em yet tasol, na em i stap gut long narapela, na em i tingim tru ol narapela na i laik mekim wok bilong helpim ol. Pasin sori i narapela kain tru long pasin birua. Man i larim pasin birua i kirapim bel bilong em bai tingim laik bilong em yet tasol; man i larim pasin sori i kirapim bel bilong em bai tingim ol narapela.
Wanem samting i save bosim sindaun bilong yu—pasin sori o pasin birua? Dispela i no wanpela askim nating, long wanem, bekim bilong yu i makim olsem yu bai kisim laip oltaim long bihain o nogat. Maski ol i stap namel long ol man i lain long mekim pasin birua, planti milion manmeri i wok long lain long mekim pasin sori. Ol i mekim olsem taim ol i wok long kisim ol gutpela pasin i helpim ol long kamap nupela man. Ol i no stori tasol long pasin sori; ol i wok strong long kamapim.
Sapos yu bin go long wanpela miting bilong ol Witnes Bilong Jehova, ating yu kirap nogut long ol samting yu lukim. Maski ol Witnes Bilong Jehova i bilong narapela narapela kantri, ol i wanbel long lotu. Ol i stap olsem wanpela bikpela lain brata long olgeta hap. Yumi inap luksave long dispela pasin long ol kongrigesen na kibung bilong ol, tasol wanpela ples dispela pasin i save kamap ples klia tru, em long ol famili bilong haus Betel. Em ol lain volantia i wok na sindaun wantaim olsem wanpela famili, na ol i wokim ol buk na nius bilong Baibel bilong salim i go long ol kongrigesen. Long olgeta kantri, sampela bilong ol i save lukautim wok ol Witnes Bilong Jehova i save mekim long dispela kantri. Dispela i bikpela wok tru, long wanem, long 1997 i gat 82,000 kongrigesen long 233 kantri. Bilong helpim ol dispela kongrigesen, winim 16,000 manmeri i save wok long ol famili bilong Betel long olgeta hap—long nambawan ofis tu na long ol brens-ofis long 103 kantri.
Long klostu olgeta famili bilong Betel, planti manmeri ol i asples bilong kantri em brens-ofis i stap long en. Tasol i no olsem long olgeta famili bilong Betel. Long sampela, ol Witnes i bilong kain kain kantri na lain o skin, na bipo ol i gat narapela narapela lotu tu. Yumi ken tingim famili bilong Betel long Seltes, Jemani. I gat klostu 1,200 manmeri bilong 30 kantri ol i stap long dispela famili. Wanem samting i save helpim ol long sindaun, wok, na lotu wantaim long pasin bilong i stap bel isi na wanbel na i no gat pasin birua namel long ol? Ol i bihainim tok bilong Baibel long Kolosi 3:14 (NW), em i tok:
“Laikim Tru Ol Narapela, Olsem Klos Yupela i Pasim”
Taim mama i karim yumi skin bilong yumi i no gat klos, na skin i no inap kisim klos sapos yumi toktok tasol long en. Taim yumi laik pasim klos, yumi yet i mas tingim gut wanem klos yumi bai pasim na yumi mas wok long bihainim tingting bilong yumi. I wankain long pasin sori. Taim mama i karim yumi, yumi no gat pasin sori. Na yumi no ken toktok tasol long en. Yumi mas wok strong bambai yumi ken kamapim pasin sori.
Klos i gat planti wok. Klos i save lukautim gut skin, na i save haitim sampela hap bilong skin i no gutpela tumas o i gat mak nogut samting, na klos inap mekim na ol man i save long tingting na pasin bilong yumi. Pasin sori i wankain. Pasin sori i save lukautim gut yumi, long wanem, sapos yumi laikim tru ol stretpela lo na yumi bung wantaim ol man i gat stretpela pasin, dispela i save kirapim yumi long sakim ol man o ples yumi inap kisim bagarap long en. Na pasin sori i save lukautim pasin pren bilong yumi wantaim ol narapela, em ol narapela yumi laikim ol tumas. Sapos yumi sori long ol narapela, dispela inap kirapim ol long sori long yumi, na sapos yumi no save mekim nogut long ol narapela, ating ol narapela i no ken mekim nogut long yumi.
Na pasin sori i save haitim sampela pasin bilong yumi i no gutpela tumas na ating ol narapela man i tingting planti long en. Yumi no hatwok long lusim tingting long ol liklik pasin kranki bilong ol man i gat pasin sori, tasol i hatwok liklik long lusim tingting long ol liklik pasin kranki bilong ol bikhetman na ol man i gat pasin antap na ol man i tingim ol yet tasol na ol i no gat pasin sori, a?
Ol man i save holim strong pasin bilong sori, ol i save kamapim ol gutpela pasin Kristen. Naispela skin i gutpela long ai, tasol ol gutpela samting bilong spirit i pulap long bel bilong man i save bosim olgeta tingting na pasin bilong em. Ating yu save long sampela manmeri yu ting ol i naispela tru, tasol yu no tingim skin bilong ol, nogat; yu tingim gutpela pasin tru bilong ol, a? Tasol planti bilong yumi i save long sampela meri o man i gat naispela skin tru, tasol taim yumi save long tingting na bel bilong ol, yumi no ting ol i naispela moa. Yumi amamas long stap klostu long ol man i save holim strong pasin bilong sori, a?
Rausim Pasin Birua na Kisim Pasin Sori
Long 1994, ol i bin givim sampela askim long 145,958 Witnes Bilong Jehova long Jemani na ol i kisim save olsem, ol man inap rausim pasin bilong birua na kisim pasin bilong sori.
Pasin bilong dring tumas, mekim nabaut long ol drak, pasin raskol, pilai laki, bagarapim sindaun bilong ol man o pait na bagarapim man, em ol pasin bilong man i tingim em yet tasol na i no hatwok long dispela pasin i kamapim pasin birua. Tasol inap 38.7 pesen bilong ol dispela man ol i bin givim askim long ol i tok, ol i bin winim wanpela o sampela bilong ol dispela hevi bilong inapim ol strongpela lo bilong Baibel ol Witnes i save autim. Ol i laikim tumas God na ol stretpela lo bilong em na dispela i bin kirapim ol long mekim olsem. Ol Witnes Bilong Jehova i mekim pasin sori na ol i bin helpim ol wan wan. Insait long 5-pela yia i go pinis (1992-1996), ol Witnes i bin helpim 1,616,894 manmeri long 233 kantri long senisim sampela pasin bilong ol. Taim yumi tingim dispela bikpela lain i bin senisim pasin bilong ol, yumi ken save, pasin sori i gat strong long daunim pasin birua.
Ol Witnes Bilong Jehova i tingim gut poroman marit bilong ol na sori long ol na dispela i save helpim ol long pas gut wantaim. Long sampela kantri planti manmeri i katim marit (wanpela long olgeta 2-pela o 3-pela). Tasol taim ol i skelim bekim bilong ol askim ol i bin givim long dispela lain Witnes yumi stori pinis long ol, em i makim olsem long nau inap 4.9 pesen tasol bilong ol i bin katim marit o marit i bruk. Tasol yumi no ken lusim tingting, planti bilong ol i bin katim marit paslain long taim ol i kamap wanpela Witnes Bilong Jehova.
God bilong sori em i Nambawan Tisa i save skulim ol man i laikim tumas em long ol pasin bilong em, olsem na namba wan man ol Witnes Bilong Jehova i save laikim, em God. Ol i no olsem ol narapela man, em planti bilong ol i save ‘laikim tumas ol kain kain pasin bilong amamas na ol i no laikim God’; ol Witnes Bilong Jehova i putim God i stap namba wan. (2 Timoti 3:4) Pasin bilong ol Witnes Bilong Jehova i narapela kain long pasin nogut bilong ol man bilong dispela graun, olsem na ol Witnes long Jemani i save lusim 17.5 aua long olgeta wik long mekim ol wok bilong lotu. Olsem na yumi save, ol Witnes i save tingim tru ol samting bilong spirit. Dispela i as na ol i amamas. Jisas i tok: “Ol manmeri i save, ol i stap rabis tru long ol samting bilong God, em ol i ken amamas. Ol dispela manmeri bai i kisim ol gutpela samting bilong kingdom bilong heven.”—Matyu 5:3.
Man bilong raitim Song 118 i tok, wokboi tru bilong God i no save pret long ol man. “Bikpela i stap wantaim mi na mi no inap pret. Ol man i no inap mekim wanpela samting long mi.” (Ves 6) Pasin bilong bilip strong long God, dispela i save pinisim wanpela as bilong pasin birua na pasin bilong pret long ol man.
Wanpela Kristen i save olsem God i ‘no save kros kwiktaim na em i laikim em tumas na em i no save senisim tok bilong em’ bai wok strong long lusim pasin bilong belhat, long wanem, dispela tu inap kamap olsem wanpela as bilong mekim pasin birua. Sapos em i wok long kisim ol gutpela pasin em spirit bilong God i save kamapim olsem pasin bilong i stap isi na pasin bilong daunim laik bilong olpela bel, dispela bai helpim em long mekim olsem.—Song 86:15; Galesia 5:22, 23.
Kristen tru i gat pasin daun em i no ting save na pasin bilong em i winim ol narapela, nogat. (Rom 12:3) Em i save kamapim pasin sori long olgeta man. Pasin sori i narapela kain long pasin birua. Man i gat pasin sori “em i no save belhat kwik. Em i no save tingim rong ol i mekim long em.”—1 Korin 13:5.
Tru tumas, pret, belhat, o pasin bilong pilim olsem wanpela i bin rongim ol, dispela inap mekim na ol man i birua long ol narapela. Tasol pasin sori i mekim na pasin birua i no gat as, olsem na pasin birua i lus na pasin sori i win. Yes, i no gat narapela samting i olsem pasin sori—pasin sori i strongpela samting, long wanem, “God yet em i as bilong dispela pasin bilong laikim ol arapela.”—1 Jon 4:8.
Klostu Nau Pasin Birua Bai Pinis Olgeta
God Jehova i no gat pasin bilong birua na tingim em yet tasol, olsem na ol dispela kain pasin i no inap i stap oltaim oltaim. Ol i mas pinis olgeta na bai pasin sori tasol i stap, na em bai stap oltaim oltaim. Sapos yu gat laik tru long pasin birua i ken pinis na pasin sori tasol i stap, orait larim ol Witnes Bilong Jehova i kamapim tok bilong Baibel long yu inap long yu ken save long ol samting yu mas mekim bilong i stap na lukim dispela taim.
Yes, gutpela yumi olgeta i askim yumi yet olsem, ‘Wanem pasin i save bosim sindaun bilong mi—pasin sori o pasin birua?’ Dispela i no wanpela askim nating. Man i save givim bel long birua bilong God, em Satan, em wanpela god bilong pasin birua, dispela man i no inap i stap longtaim. Tasol man i givim bel long Jehova, em God bilong pasin sori, em bai stap oltaim oltaim!—1 Jon 2:15-17.
[Piksa long pes 10]
Long nau tu ol man inap laikim tru ol narapela olsem klos ol i pasim