“Taim Bilong Laikim Tru na Taim Bilong Heitim”
“GOD em i pasin laikim.” Long sampela kantri, ol man i save putim dispela tok long wol bilong haus bilong ol. Em i wanpela naispela tok i makim tru pasin bilong God—em i Man bilong pasin laikim.
Tasol planti man i no save olsem dispela tok i stap long Baibel. Aposel Jon yet i bin raitim dispela tok: “Man i no mekim pasin laikim em i no kisim save long God, long wanem, God em i pasin laikim.” (1 Jon 4:8) Na Jon i toktok tu long pasin bilong God long laikim ol manmeri bilong graun na em i tok: “God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap abrusim bagarap na kisim laip oltaim.”—Jon 3:16.
Sampela i tingim dispela tok na ol i ting, maski yumi mekim wanem rong, oltaim God i redi long lusim tingting long en. I stap bilong planti man i soim olsem ol i ting maski ol i mekim wanem kain pasin, God i no inap kotim ol long dispela. Tasol yu ting dispela em i tru? Yu ting God i save laikim olgeta man, em ol gutpela man na ol man nogut wantaim? Yu ting sampela taim God i no save laikim ol man?
Pasin Bilong God Long Laikim Tru na Heitim
Saveman King Solomon i tok: “Olgeta samting i kamap long dispela graun, i save kamap long taim bilong em yet . . . taim bilong laikim tru na taim bilong heitim.” (Saveman 3:1, 8, NW ) Dispela stiatok i soim olsem God i gat pasin laikim tru na em i mekim gutpela pasin long ol man, tasol sampela taim em i save heitim pasin bilong ol man.
Orait pastaim yumi laik save, dispela tok “heitim” long Baibel i gat wanem mining? Wanpela buk i tok: “Long Baibel dispela tok ‘heitim’ i gat kain kain mining. Em inap makim pasin birua, olsem bel nogut tru long narapela na tingting long mekim nogut long em. Dispela pasin inap kamap strong insait long bel na tingting bilong man na mekim man i tingting oltaim long bagarapim narapela.” Yumi save gut long dispela mining bilong en, na yumi save lukim ol samting nogut dispela pasin i kamapim long olgeta hap bilong graun. Tasol buk i tok moa: “Dispela tok ‘heitim’ inap makim tu olsem man i no laik tru long wanpela samting, tasol em i no gat tingting long bagarapim dispela samting.”
Em dispela namba tu mining yumi laik toktok long en. Em pasin bilong nolaik tru—na i no pasin bilong bel nogut, o tingting long bekim rong, o tingting long bagarapim man, nogat. Yu ting God inap mekim dispela kain pasin bilong nolaik tru long samting? Tingim tok i stap long Sindaun 6:16-19: ‘Bikpela i no laikim tru [“heitim,” NW ] ol man i mekim dispela 7-pela pasin. Pasin bilong hambak na lukim ol arapela man i olsem samting nating, mekim tok giaman, kilim nating ol arapela man, tingting long mekim pasin nogut, hariap long mekim sin, tok giaman long kot, mekim ol man i bel nogut long ol brata bilong ol yet.’
Em nau, i gat sampela pasin em God i heitim tru. Tasol i no olsem em i heitim man i mekim ol dispela kain pasin, nogat. Em i save skelim ol samting i bin kirapim man long mekim pasin nogut—olsem sin i stap long skin, ples em i kamap bikpela long en, sindaun bilong famili, na save bilong em. (Stat 8:21; Rom 5:12) Man bilong raitim Buk Sindaun em i stori gut long dispela olsem: “Bikpela i save stretim ol man em i laikim tumas, olsem ol papa i save stretim ol pikinini ol i laikim tumas.” (Sindaun 3:12) Sapos pikinini i gat pasin bikhet, ating papamama bai heitim pasin bilong em, tasol ol bai laikim em yet na mekim olgeta samting bilong helpim em long lusim pasin nogut. Long pasin laikim, Jehova i save mekim wankain pasin taim em i lukim olsem i gat rot bilong kisim bek sinman.
Taim i Stret Long Heitim
Tasol olsem wanem sapos wanpela man i kisim save pinis long laik bilong God, tasol em i no bihainim? God i no inap orait long em. Sapos long laik bilong em yet em i mekim ol pasin em Jehova i heitim, orait Jehova bai i nolaik tru long em. Baibel i tok: “Jehova yet i save skelim ol stretpela man na ol man nogut. Na em i heitim tru ol man i laikim pasin pait.” (Song 11:5, NW ) Kain man olsem i no tanim bel, Jehova i no inap lusim rong bilong em. Aposel Pol i tokaut klia long dispela long pas em i raitim long ol Hibru, em i tok: “Sapos yumi kisim stretpela save pinis long tok i tru, tasol long laik bilong yumi yet, yumi bihainim pasin bilong mekim sin, orait i no gat narapela sakrifais moa bilong karamapim ol sin bilong yumi. Bai yumi pret na wetim kot, na belhat olsem paia bai pinisim tru ol birua bilong God.” (Hibru 10:26, 27) Bilong wanem God bilong pasin laikim i mekim olsem?
Sapos long laik bilong man yet em i mekim wanpela bikpela rong, dispela pasin nogut bilong em inap pas strong long em, na em i hatwok long lusim. Em inap kisim tingting na pasin i nogut tru, na i no gat rot bilong senisim pasin bilong em. Baibel i tok em i kain olsem wel pusi, em i no inap rausim ol makmak long skin bilong en. (Jeremaia 13:23) Dispela kain man bai i hatwok tru long tanim bel, em i mekim sin we Baibel i kolim olsem “sin i stap oltaim oltaim,” na God i no inap fogivim em.—Mak 3:29.
Dispela samting i bin painim Adam na Iv, na Judas Iskariot tu. God i bin wokim Adam na Iv i gutpela olgeta, na tok em i givim long tupela em i klia tru na ol i kisimgut, olsem na yumi ken tok long laik bilong ol yet ol i mekim sin na ol i no inap tok ol i no gat asua. Tok God i givim long ol bihain long dispela i soim olsem em i no givim rot long ol long tanim bel. (Stat 3:16-24) Maski Judas em i sinman, em i bin poroman gut wantaim Pikinini Bilong God yet, tasol bihain em i bin putim Jisas long han bilong ol birua. Jisas yet i kolim em olsem “man bilong bagarap.” (Jon 17:12) Baibel i soim tu olsem Satan em i man bilong mekim sin, olsem na i stret em i mas bagarap. (1 Jon 3:8; Revelesen 12:12) Ol dispela manmeri i bin mekim God i heitim tru ol.
Tasol yumi amamas long save olsem i gat rot long God inap kisim bek sampela manmeri husat i mekim sin. Jehova i save isi long ol man na em i no amamas long bagarapim ol man i no save long ol lo bilong em na ol i mekim sin. (Esekiel 33:11) Em i singautim ol long tanim bel na em bai lusim sin bilong ol. Baibel i tok: “Ol manmeri bilong mekim ol pasin nogut i mas lusim ol pasin nogut bilong ol na ol i no ken tingting moa long mekim ol dispela pasin. Na ol i mas kam bek long God . . . Em i save marimari moa yet long ol manmeri i kam bek long em, na em i save lusim sin bilong olgeta dispela lain.”—Aisaia 55:7.
Stretpela Tingting Long Laikim na Heitim
Ol Kristen tru i save bihainim pasin bilong God, olsem na ol i mas save wanem taim ol i mas “laikim tru” na wanem taim ol i mas “heitim.” Man i save sori nating, ating em i no inap holim stretpela tingting long pasin laikim na pasin marimari. Tasol tok bilong disaipel Jut inap helpim yumi long kisim stretpela tingting long pasin marimari na pasin bilong heitim sin: “Marimari yet long ol arapela na mekim wantaim pret. Ol i mekim klos bilong ol i kamap doti taim ol i mekim ol pasin nogut. Olsem na taim yupela i mekim pasin marimari long ol, yupela i mas stap longwe long ol dispela klos.” (Jut 22, 23) Olsem na i stret yumi mas heitim pasin nogut, tasol yumi no ken heitim man i bin mekim pasin nogut.
Na Jisas i tokim ol Kristen long mekim gutpela pasin long ol birua bilong soim pasin laikim long ol. Em i tok: “Yupela i mas laikim yet ol birua bilong yupela na beten long ol man i save mekim nogut long yupela.” (Matyu 5:44) Olsem na ol Witnes Bilong Jehova i no malolo long autim gutnius bilong Kingdom Bilong God, maski sampela man i no laik harim. (Matyu 24:14) Ol Witnes i save bihainim tingting i stap long Baibel na ol i tingim olgeta wan wan man olsem ol inap kisim pasin laikim na marimari bilong Jehova. Ol i laik helpim ol man, tasol taim ol man i no tenkyu long dispela o ol i sakim dispela tok o mekim nogut long ol, ol Witnes i bihainim tok bilong aposel Pol: “Wok long askim God long blesim ol man husat i mekim nogut long yupela, yupela i mas mekim olsem na no ken tok ol i mas bagarap. . . . No ken bekim pasin nogut long man i mekim pasin nogut long yupela.” (Rom 12:14, 17) Ol i save, Jehova yet bai skelim husat em bai laikim tru na husat em bai heitim. Em yet i Jas bilong skelim husat i mas kisim laip na husat i mas dai.—Hibru 10:30.
Tru tumas, “God em i pasin laikim.” Olsem na yumi mas tenkyu long pasin laikim bilong em na wok strong long kisim save long laik bilong em na bihainim. Ol Witnes Bilong Jehova long hap bilong yu bai amamas long helpim yu long rot bilong Baibel bilong yu yet long kisim save long laik bilong God na olsem wanem yu inap bihainim long laip bilong yu. Sapos yu mekim olsem, God bai i no inap heitim yu, nogat, em bai laikim yu tru.
[Rait long pes 23]
‘Bikpela i no laikim tru ol man i mekim dispela 7-pela pasin. Pasin bilong hambak na lukim ol arapela man i olsem samting nating, mekim tok giaman, kilim nating ol arapela man, tingting long mekim pasin nogut, hariap long mekim sin, tok giaman long kot, mekim ol man i bel nogut long ol brata bilong ol yet.’—SINDAUN 6:16-19
[Rait long pes 24]
“Sapos yumi kisim stretpela save pinis long tok i tru, tasol long laik bilong yumi yet, yumi bihainim pasin bilong mekim sin, orait i no gat narapela sakrifais moa bilong karamapim ol sin bilong yumi. Bai yumi pret na wetim kot . . . bilong God.”—HIBRU 10:26, 27
[Rait long pes 25]
“Ol manmeri bilong mekim ol pasin nogut i mas lusim ol pasin nogut bilong ol na ol i no ken tingting moa long mekim ol dispela pasin. Na ol i mas kam bek long God . . . Em i save marimari moa yet long ol manmeri i kam bek long em, na em i save lusim sin bilong olgeta dispela lain.”—AISAIA 55:7
[Piksa long pes 24]
Gutpela papa o mama i save stretim pikinini bilong helpim em
[Piksa long pes 25]
Pasin laikim na marimari bilong God i bin helpim planti kalabusman