Wanpela Rot Tasol Bilong Pinisim Pasin Birua

“I no gat pasin bilong bel nogut sapos i no gat pasin bilong pret. . . . Yumi save bel nogut long ol samting yumi pret long en, olsem na sapos pasin bilong bel nogut i stap, pasin bilong pret tu i stap.”​—⁠CYRIL CONNOLLY, MAN BILONG SKELIM WOK BILONG OL MAN BILONG RAITIM BUK NA WANPELA EDITA.

PLANTI man ol i bilip olsem pasin bilong bel nogut long narapela man i pas insait tru long tingting bilong ol man na dispela tingting i save slip i stap. Wanpela man bilong skelim wok gavman i tok, “Ating dispela pasin i pas tru long skin bilong olgeta manmeri, olsem pasin tru bilong ol.”

Yumi inap save long as na ol dispela man i mekim kain tok olsem. Ol i skelim ol lain taim mama i karim ol, ol i “man bilong mekim pasin nogut” na “man bilong mekim sin,” olsem Baibel i tok. (Song 51:⁠5) Na sampela tausen yia i go pinis, God i skelim ol sinman na em i tok em “i lukim pasin bilong ol manmeri long olgeta hap i nogut tru. Ol manmeri i tingting tasol long ol samting nogut.”​—⁠Stat 6:⁠5.

Pasin bilong tingting nogut long narapela lain na daunim narapela i save kamapim pasin birua, na ol dispela pasin i save kamap, long wanem, yumi gat sin na yumi save tingim yumi yet tasol. (Lo 32:⁠5) Tasol sori tru, i no gat wanpela gavman bilong ol man em inap kamapim wanpela lo i tok ol man i mas senisim dispela kain tingting i stap long bel bilong ol. Johanna McGeary, em wanpela niusmeri, i tok: “I no gat wanpela gavman, maski i gat bikpela strong, em inap kamap olsem polis bilong olgeta hap na pinisim pasin bilong birua na kilim i dai ol man bilong narapela lain i stap long ol kantri olsem Bosnia, Somalia, Laibiria, Kasmir, na long hap bilong Kokesas.”

Tasol bilong stretim dispela hevi, pastaim yumi mas kisim save long wanem samting i save kirapim dispela pasin bilong bel nogut long narapela.

Pret i Save Kamapim Pasin Birua

I gat kain kain pasin birua. Andrew Sullivan, em wanpela man bilong raitim buk, i tok: “Pasin bilong pret long narapela i kirapim man long bel nogut long narapela, na sampela i bel nogut long narapela lain, long wanem, ol i ting ol narapela i olsem pipia nating; na sampela i mekim wok long strong bilong ol long kamapim bel nogut bilong ol long narapela, na sampela i bel nogut, long wanem, ol i no gat strong bilong mekim wanpela samting long narapela; i gat pasin bilong bekim nogut na pasin bilong bel nogut, long wanem, man i bel kaskas long narapela. . . . Ol lain i save bosim na mekim nogut long wanpela lain, ol i save bel nogut long dispela lain, na dispela lain ol i mekim nogut long en i save bel nogut long lain i mekim nogut long ol. . . . Na i gat pasin bilong bel nogut i kain olsem wanpela bom i pairap, na sampela pasin bilong bel nogut i no save mekim wanpela samting.”

Yumi save, long nau ol man i tingting long sindaun bilong ol na mani, na dispela i kirapim ol long bel nogut na pait long ol narapela. Long hap i gat liklik lain tasol i stap gut long mani samting, pasin bilong tingting nogut long narapela lain na birua long ol i save kamap planti taim. Na tu, dispela pasin i save kamap long wanpela hap ol man bilong narapela kantri i kam sindaun long en, na ol man i sindaun pinis long dispela hap ol i pret, nogut ol nupela lain i bagarapim sindaun bilong ol.

Sampela i tingting planti, nogut ol nupela man i resis wantaim ol long kisim wok mani, na ol bai mekim wok maski i gat liklik pe tasol, o ol dispela lain bai mekim na pe bilong ol haus na graun long dispela hap bai i go liklik. Maski ol dispela tingting i gat as bilong en o nogat, bikpela samting em pasin bilong pret long lusim mani samting na pret olsem sindaun bilong ol bai bagarap. Dispela tupela samting i save wok strong long kirapim pasin bilong tingting nogut na bel nogut long narapela lain.

Wanem namba wan samting yumi mas mekim bilong pinisim pasin bilong bel nogut long narapela? Yumi mas senisim tingting bilong yumi.

Senisim Tingting

McGeary i tok: “Bilong kamapim wanpela senis tru tru, ol man mas i gat laik long senis i kamap.” Na olsem wanem laik bilong ol man inap senis? Ol samting i bin kamap i soim olsem tok bilong God i gat bikpela strong, na i save kirapim tru ol man long senisim tingting na pasin bilong ol, na em i wok oltaim long helpim ol manmeri na ol i no kisim pasin bilong birua long narapela. As bilong dispela em i olsem: “Tok bilong God em i gat laip, na em i wok strong i stap. Em i sap moa, na i winim bainat i gat tupela sap. Dispela tok i save sutim man na i go insait tru. . . . Olsem na em i save gut tru long olgeta tingting na laik bilong bel bilong yumi.”​—⁠Hibru 4:⁠12.

Tru, bilong rausim pasin bilong tingting nogut na birua long narapela, dispela i no save kamap wantu, nogat. Tasol em inap kamap. Jisas Krais em i bin kirapim ol manmeri long senisim tingting na pasin bilong ol. Sampela milion manmeri ol i bin bihainim tok bilong Jisas Krais: “Yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela.”​—⁠Matyu 5:⁠44.

Jisas i bihainim tok em i lainim ol man long en, na em i makim Matyu long insait long lain gutpela pren bilong em, em i save bilip tru long ol, tasol pastaim Matyu em i man bilong kisim takis na ol Juda i bin bel nogut tru long em. (Matyu 9:9; 11:19) Na tu, bipo ol Juda i bel nogut long ol manmeri bilong ol narapela lain na ol i no larim ol i insait long lotu bilong God, tasol Jisas i kirapim wanpela rot bilong lotu tru long God, na bihain planti tausen manmeri bilong ol narapela lain ol i bihainim dispela rot. (Galesia 3:28) Sampela manmeri bilong olgeta hap i bin kamap disaipel bilong Jisas Krais. (Aposel 10:​34, 35) Ol i kisim nem olsem lain bilong mekim pasin sori tru long narapela. (Jon 13:35) Taim ol birua i tromoi ston bilong kilim i dai Stiven, em i tok: “Bikpela, yu no ken bekim dispela sin long ol.” Stiven i laik bai gutpela samting inap painim ol.​—⁠Aposel 6:​8-14; 7:​54-60.

Ol Kristen tru bilong nau, ol tu i bihainim gutpela tok bilong Jisas long mekim gut long olgeta man​—⁠ol brata Kristen na ol man i birua long ol. (Galesia 6:10) Ol i wok strong long rausim pasin bilong bel nogut tru long tingting bilong ol. Ol i luksave long ol samting em inap kirapim ol long bel nogut long narapela, na ol i mekim ol samting bambai pasin sori i ken kisim ples bilong pasin birua. Tru tumas, olsem wanpela saveman i bin tok, “Pasin bilong bel nogut i save kirapim trabel. Tasol pasin bilong laikim ol arapela i save karamapim olgeta rong.”​—⁠Sindaun 10:⁠12.

Aposel Jon i tok: “Man i no laikim tru brata bilong en na i bel nogut long em, i olsem em i kilim man i dai. Na yupela i save, man i kilim narapela man i dai, em i no kisim laip bilong i stap gut oltaim oltaim.” (1 Jon 3:15) Ol Witnes Bilong Jehova i bilipim dispela tok. Olsem na ol i wok long bungim ol man bilong ol narapela lain, na skin, na pasin na sindaun, na lotu, na lain politik, long wanpela bikpela lain brata i stap long olgeta hap na ol i stap wanbel na narapela i no bel nogut long narapela.​—⁠Lukim tupela blok.

Pasin Birua Bai Pinis Olgeta!

Ating yu bai tok, ‘Em i gutpela samting long ol dispela man i insait long dispela lain, tasol dispela i no inap pinisim pasin bilong bel nogut long narapela.’ Tru, maski pasin bilong bel nogut long narapela i no stap long bel bilong yu, ol narapela inap bel nogut long yu. Olsem na yumi mas wetim God i stretim tru dispela hevi i stap long olgeta hap.

Klostu nau God bai rausim olgeta pasin bilong birua i stap hia long graun. Dispela samting bai kamap long rot bilong gavman bilong heven em Jisas i bin lainim yumi long beten long en, olsem: “Papa bilong mipela . . . Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”​—⁠Matyu 6:​9, 10.

Ol samting i save kirapim pasin birua bai i no stap moa taim God i truim dispela beten. Ol samting i save kamap na i mekim wok long dispela pasin bilong bel nogut long narapela, bai ol i pinis olgeta. Nupela save, na tok i tru, na stretpela pasin bai kisim ples bilong tok bilong giamanim man, na no gat save long ol narapela lain, na tingting nogut long ol. Long dispela taim God “bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—⁠KTH 21:​1-4.

Tasol i gat wanpela tok i gutpela moa yet, olsem: Ol samting i wok long kamap i kamapim klia tru olsem yumi stap long “taim bilong las de.” Olsem na yumi ken bilip tru olsem liklik taim na pasin bilong bel nogut long narapela bai i pinis olgeta. (2 Timoti 3:​1-5; Matyu 24:​3-14) Long nupela graun God i promis long kamapim, olgeta lain bai i stap olsem brata brata tru.​—⁠Luk 23:43; 2 Pita 3:⁠13.

Tasol long nau tu yu inap bung wantaim wanpela lain i stap olsem ol brata tru. Ol stori i kamap bihain long dispela i soim yumi, pasin sori Kristen i stap pinis long bel bilong planti milion manmeri, tasol sapos ol i no bin kisim dispela pasin, ol tu inap bel nogut long ol narapela lain. Mipela i singautim yu long kam insait long dispela lain ol i save mekim pasin sori na i stap olsem brata brata tru!

[Blok long pes 5]

“Sapos Jisas i Stap Em Bai Mekim Wanem?”

Long Jun 1998, 3-pela man waitskin long Teksas long Amerika i mekim nogut long James Byrd, Jr., em i wanpela man blakskin. Ol i kisim em i go long hap i no gat man na ol i paitim em nogut tru na pasim sen long lek bilong em. Nau ol i pasim sen long baksait bilong trak na pulim em i go inap 5-pela kilomita, na bodi bilong em i paitim wanpela hap bilong baret simen. Ol man i tok, dispela pasin em i samting nogut tru na i winim olgeta narapela pasin nogut ol man i bel nogut long narapela lain i bin mekim kirap long 1990 i go inap long 1999.

Tripela susa bilong James Byrd ol i Witnes Bilong Jehova. Ol i gat wanem tingting long ol man i bin mekim dispela pasin nogut tru? Tripela i tok: “Taim ol man i givim bikpela pen long wanpela wanblut na ol i kilim em i dai, bel hevi bilong dispela i bikpela tru. Tasol mipela i no tingting liklik long mekim pasin bilong bekim rong, o mekim sampela tok bilong kirapim ol man long bel nogut long narapela lain. Nogat. Mipela i ting olsem: ‘Sapos Jisas i stap em bai mekim wanem?’ Bekim bilong dispela askim em i klia olgeta. Em bai kamapim tok bilong bel isi na pasin bilong wetim gutpela samting bai kamap bihain.”

Sampela ves bilong Baibel i bin helpim ol na ol i no larim pasin bilong bel nogut long narapela lain i kamap long bel bilong ol, wanpela em Rom 12:​17-19. Aposel Pol i tok: “Sapos ol i mekim pasin nogut long yupela, orait yupela i no ken bekim pasin nogut long ol. Nogat. . . . Yupela i mas larim God i belhat long ol. Yupela i save, buk bilong God i gat tok olsem, ‘Bekim rong, em i wok bilong mi. Mi yet bai mi bekim rong bilong ol na mekim save long ol.’ ”

Ol i tok moa olsem: “Mipela i tingim ol stretpela tok i stap long ol buk na nius bilong mipela i tok, sampela pasin nogut ol man i mekim i nogut tru na i hatwok long tok, ‘Mi lusim rong bilong yu,’ na yu lusim tingting long en. Long kain rong olsem, yumi inap lusim dispela rong​—⁠olsem yumi no wok long tingim tingim na bel nogut i stap, na taim yumi mekim olsem, bel bilong yumi i stap isi na yumi no kisim sik bilong skin o bilong tingting long dispela samting.” Ol dispela tok i kamapim klia tru strong bilong Baibel long daunim pasin bilong bel nogut tru na i no ken kamap long bel bilong man!

[Blok long pes 6]

Pasin Birua i Senis na Kamap Pasin Pren

Inap sampela yia planti tausen manmeri bilong ol narapela kantri i kam sindaun long kantri Grik bilong painim wok mani. Tasol hevi bilong mani i go bikpela na i no gat planti wok mani olsem bipo, na ol man i resis moa yet long kisim wok mani. Olsem na pasin bilong bel nogut long ol manmeri bilong narapela lain i go bikpela. Dispela hevi i stap tu namel long ol lain bilong Albenia na Balgeria. Long planti hap bilong kantri Grik dispela tupela lain i resis strong long kisim wok mani.

Long taun Kiato, long hap not-is bilong provins Peloponisos, wanpela famili Balgeria na wanpela man Albenia i kirap stadi long Baibel wantaim ol Witnes Bilong Jehova na long dispela rot narapela i kisim save long narapela. Ol i bihainim ol gutpela lo bilong Baibel, na pasin bilong bel nogut i save stap namel long dispela tupela lain i no stap moa namel long dispela tupela man. Na dispela i helpim tupela long kamap olsem brata brata na pren tru. Ivan, em bilong Balgeria, i bin helpim Loulis, em bilong Albenia, long painim ples slip klostu long haus bilong Ivan. Tupela famili i no gat planti samting bilong skin, tasol planti taim narapela bai helpim narapela long kaikai na ol narapela samting bilong skin. Tupela man wantaim ol i kamap Witnes Bilong Jehova i baptais pinis na ol i save wok gut wantaim long autim gutnius. Na ol lain i stap klostu long ol i lukim dispela gutpela pasin pren Kristen i stap namel long tupela famili.

[Piksa long pes 7]

Pasin birua bai pinis olgeta hia long graun aninit long Kingdom bilong God