Wai na Pasin Bilong Heitim Narapela i Go Bikpela Tru?—Baibel i Tok Wanem?

Nius i pulap long ol ripot bilong ol woa, ol man i mekim ol tok bilong heitim narapela o ol i pait na bagarapim ol narapela bikos ol i heitim ol, na wanpela lain i pait long narapela lain.

“Long sosel midia long nau ol man i raitim ol tok na postim ol vidio samting bilong heitim narapela. Dispela pasin i kamap bikpela moa bikos long pait i kamap namel long Israel na Gaza na bikos planti man i sapotim pasin bilong birua na heitim narapela.”—The New York Times, Novemba 15, 2023.
“Kirap long Oktoba 7 i kam inap long nau, pasin bilong heitim narapela, mekim ol tok bilong heitim narapela, na pait na bagarapim ol narapela bikos ol i heitim ol i go bikpela moa long olgeta hap bilong graun.”—Dennis Francis, presiden bilong United Nations General Assembly, Novemba 3, 2023.

Pasin bilong mekim ol tok bilong heitim narapela, vailens, na ol woa em ol hevi i stap long bipo yet i kam inap long nau. Baibel i stori long ol man long bipo em “ol i redim ol tok nogut bilong ol bilong sutim long narapela olsem ol spia” na ol i insait long woa na vailens. (Buk Song 64:3; 120:7; 140:1) Tasol Baibel i stori long risen na pasin bilong heitim narapela i stap long nau.

Pasin bilong heitim narapela—Mak bilong las de

Baibel i stori long tupela risen na pasin bilong heitim narapela i kamap bikpela long nau.

1. Baibel i tok profet long wanpela haptaim bai kamap we “pasin laikim bilong planti manmeri bai i no strong olsem long bipo.” (Matyu 24:12) Ol man i no inap mekim pasin laikim, ol bai mekim ol pasin we i kirapim ol long heitim narapela.—2 Timoti 3:1-5.
2. Pasin bilong heitim narapela i go bikpela tru bikos Satan i stiaim ol manmeri long mekim ol pasin nogut. Baibel i tok “graun olgeta i stap long han bilong Satan.”—1 Jon 5:19; Revelesen 12:9, 12.

Tasol Baibel i tokaut tu olsem klostu nau God bai pinisim tru ol samting i kirapim ol man long heitim narapela. Na tu, God bai pinisim olgeta pen na hevi em pasin bilong heitim narapela i bin kamapim. Baibel i tok promis olsem:

God “bai mekim drai aiwara i stap long ai bilong ol, na bai i no gat dai moa, na ol bai i no bel hevi moa na krai moa, na ol bai i no inap pilim pen gen. Ol dispela samting bilong bipo ol i pinis olgeta.”—Revelesen 21:4.