Baibel i Tok Wanem

I Stret Ol Rabisman i Ken Stil o Nogat?

“Pasin bilong i stap rabis em i bikpela birua bilong ol manmeri, em i bagarapim amamas, na ol man i no stap fri, na i hatwok long ol rabisman long kamapim sampela gutpela pasin.”—Samuel Jonson, yia 1750 samting, man bilong raitim buk.

WANPELA man bilong gavman bilong Rom, em Magnus Orelius Kasiodorus, em i tok: “Pasin bilong i stap rabis em i mama bilong pasin raskol.” Ol dispela tok i kamapim tingting olsem, pasin bilong i stap rabis i save kirapim ol man long mekim sampela pasin raskol. I luk olsem planti man long nau i wanbel long dispela tok, na sapos ol man i stil, long wanem, ol i stap rabis, ol man i wanbel moa long dispela tok.

Planti man i ting, sapos ol man i stap rabis na ol narapela i daunim ol, i stret ol i ken stil. Tingim ol stori ol man i bin raitim long Robin Hut. Ol i raitim long Inglan long yia 1300 samting, em stori bilong wanpela raskolman i no bin i stap tru. Ol i stori olsem em i stilim samting bilong ol maniman na givim ol dispela samting long ol rabisman. Inap planti handet yia ol man i tingim em olsem wanpela hapman tru.

Tru, planti man long nau i sot tru long mani. Wol Beng i tok, inap 1.3 bilion manmeri i stap rabis na mani ol i tromoi bilong baim ol samting long olgeta wan wan de i no winim wan dola. Wanpela lain i kisim save long tingting bilong sampela man bilong kantri Filipin, na 70 pesen bilong ol i tok, ol i stap rabis. Inap 20 pesen bilong ol man long Brasil ol i stap maniman tru, na ol i kisim bikpela pe moa (inap 32 taims) long ol rabisman. Taim sampela man i karim kain hevi olsem, dispela inap kirapim ol long mekim kain kain samting bambai ol i ken i stap laip, na ol i stil tu.

Baibel i no orait long pasin bilong stil. Namba 8 lo bilong ol Tenpela Lo i tok: “Yupela i no ken stil.” (Kisim Bek 20:15) Tasol planti man i bilip long Baibel ol i pilim olsem, sapos man i stap rabis olgeta, i stret em i ken stil.

Dispela i kamapim sampela bikpela askim olsem: I stret ol rabisman i ken stil o nogat? Sapos man i stap rabis olgeta, em i ken mekim wanem bilong helpim sindaun bilong em? Olsem wanem sapos em i gat ol pikinini bilong lukautim na ol i sik na hangre? Olsem wanem? Sapos man i gat kain hevi olsem, Jehova i orait long em i ken stil sapos dispela i no putim hevi long man em i stil long em?

God i Tok Wanem?

Jisas i bihainim pasin bilong Papa bilong em, olsem na em i ken helpim yumi long kisim tingting bilong God. (Jon 12:49) Taim Jisas i stap long graun, em i pilim tru hevi bilong ol rabisman. Baibel i tok, “em i lukim ol bikpela lain manmeri, na em i sori tru long ol.” (Matyu 9:36) Tasol Jisas i no orait long pasin bilong stil, nogat tru. Olsem tasol, God i tingim tru ol rabisman, tasol em i no ting i stret ol rabisman i ken stil. Long Aisaia 61:​8, Baibel i tok, God ‘i no save laikim pasin bilong stil na pasin bilong mekim nogut long ol arapela.’ Na aposel Pol i tok klia olsem ol stilman i no inap i go insait long Kingdom bilong God. Olsem na yumi ken save tru long tingting bilong God long dispela samting.​—⁠1 Korin 6:⁠10.

Tasol Sindaun 6:30 i tok, “sapos wanpela man i hangre na i stilim sampela kaikai, orait ol man i no save tok nogut long em.” Olsem wanem? Dispela skripsa i tok orait long pasin stil? Nogat tru. Ol tok i stap klostu long dispela ves i kamapim klia olsem God i ting stilman i mas kisim strafe. Narapela ves i tok: “Tasol sapos ol i painimaut long dispela samting em i bin mekim, orait bai ol i kotim em na em i mas bekim planti samting moa, inap long pinisim olgeta samting long haus bilong en.”​—⁠Sindaun 6:⁠31.

Taim stilman i stil, long wanem, em i hangre, ating em i no gat bikpela asua kain olsem man i stil, long wanem, em i gat pasin mangal o em i laik bagarapim man. Tasol ol man i laik God i orait long ol, ol i no ken stil liklik. Maski man i stap rabis olgeta, pasin stil i bagarapim nem bilong God. Sindaun 30:​8, 9 i tok olsem: “Yu ken givim mi kaikai inap long skel bilong mi. . . . Nogut mi kamap rabisman na mi stilim ol samting na mi daunim nem bilong yu, God bilong mi.” Yes, stilman i save bagarapim nem bilong God. Pasin bilong stil i nogutim narapela, na em i wanpela sin, maski yu stil long maniman o rabisman. Ol man i laikim tru God na ol narapela man, ol i no orait long pasin stil, nogat tru.​—⁠Matyu 22:39; Rom 13:​9, 10.

Dispela tok, sapos sindaun bilong man i nogut tru i stret em i ken stil, em i no stretpela tingting. Sapos yumi tok olsem i olsem yumi tok, sapos skin bilong wanpela man bilong pilai spot i no strong tumas, i orait long em i kisim ol marasin i tambu long ol man bilong pilai spot, bambai em i ken win. Maski em i win, em i no bin bihainim stretpela pasin. Ol narapela man bai ting em i win tasol, long wanem, em i bin trikim ol. Olsem tasol long stilman. Long pasin i no stret, em i kisim samting bilong narapela man. I stap bilong em i no mekim na nau em i ken stil.

Sapos wanpela stilman i laik God i orait long em, em i mas tanim bel na lusim dispela pasin. Baibel i tok: “Ol stilman i no ken stil moa. Nogat. Nau ol i mas wok. Ol i mas mekim gutpela wok long han bilong ol yet.” (Efesus 4:28) Ol man i bin stil na ol i tanim bel tru, ol i ken save Jehova i lusim tingting long rong bilong ol.​—⁠Esekiel 33:​14-16.

Ol Rabisman i Ken Mekim Wanem?

Baibel i tok promis olsem: “Bikpela i no save larim ol stretpela man i sot long kaikai. Tasol em i no save larim ol man nogut i kisim ol samting ol i sotwin tru long kisim.” (Sindaun 10:⁠3) God i no helpim ol man i brukim lo bilong em bilong inapim laik bilong ol. Tasol em i sori tru long ol man i wok strong tru long bihainim tok bilong em, na em bai blesim hatwok bilong ol bilong painim kaikai samting.​—⁠Song 37:⁠25.

Planti milion manmeri i kisim save olsem, taim ol i bihainim lo bilong God, sindaun bilong ol i kamap gutpela. Olsem: Taim ol i bihainim tok bilong Baibel na ol i wok strong na abrusim ol pasin nogut, kain olsem pilai laki, dring spak, smok, na kisim drak, dispela i helpim ol long kisim planti samting, winim ol samting ol i mas kisim. (Galesia 5:​19-21) Bilong mekim ol dispela samting ol i mas bilip long God, na ol man i bin mekim olsem, ol i kisim save olsem Jehova em i “gutpela tru” na em i helpim tru ol man i bilip long em.​—⁠Song 34:⁠8.

[Piksa Kredit Lain long pes 12]

Robin Hut: General Research Division/The New York Public Library/Astor, Lenox and Tilden Foundations