Ol Yangpela i Laik Save . . .

Bilong Wanem Mi No Ken Stil?

‘Mi gat 16 krismas na mi gat wanpela bikpela hevi. Nau mi mekim pasin stil planti taim. Nau tasol mi go long stua na stilim 7-pela yau-ring. Mi pret long tokim wanpela man long hevi bilong mi. Plis, helpim mi!’

EM TOK bilong wanpela yangpela meri i bel hevi stret na em i salim tok bilong em i go long wanpela nius bilong kisim helpim. Wanpela man bilong raitim buk i tok: ‘Long olgeta yia long Amerika, long kain kain rot ol man i save stil​—⁠stilim ol samting long ol stua, o ol kampani i giaman bilong stilim mani bilong man. Pe bilong ol dispela samting ol i stilim long olgeta yia i olsem 10 bilion dola. Inap 50 pesen bilong ol man i save stil long ol bikpela stua na polis i holim ol, em ol yangpela.’

Wanpela lain i skelim dispela hevi na i tok, long olgeta 10-pela 10-pela sumatin long haiskul, winim 3-pela i tokaut olsem ol i bin stil long ol bikpela stua. Jane Norman na Myron Harris i skelim dispela hevi tu na tupela i tok: ‘Klostu olgeta yangpela i tok, ol i bin kisim nating wanpela samting long stua, ol i no baim.’

I Gat Wanem As na Ol i Save Stil?

Stilman em wanpela man i kisim samting bilong narapela man na em i no bin askim em long kisim. Sapos wanpela man i sot tru long wanpela samting na em i stilim, ating em i ting dispela pasin i no gat rong. Wanpela yangpela i stap rabis em i tok: ‘Mi bin sot tru long kaikai, olsem na mi go long baksait bilong wanpela ples kaikai, kikim dua, na taim dua i op mi kisim hap kakaruk. Em tasol, mi no kisim narapela samting. Na mi mekim olsem, long wanem, mi hangre.’

Baibel i tok: “Sapos wanpela man i hangre na i stilim sampela kaikai, orait ol man i no save tok nogut long em.” Tasol maski ol man i ting olsem, pasin stil i no stret. Long narapela ves Baibel i tok, maski man i hangre na em i stil, “em i mas bekim planti samting moa, inap long pinisim olgeta samting long haus bilong en.”​—⁠Sindaun 6:​30, 31.

Tasol ating yu kirap nogut long save, wan wan yangpela tasol i stil long wanem em i sot tru long wanpela samting. Tingim yangpela Mary Jane, em i tok: ‘Yes, mi bin stil long ol bikpela stua, na mi no save bilong wanem mi mekim. Papamama i givim mani long mi long baim olgeta samting​—⁠mi no sot long wanpela samting.’a Wanpela nius (Seventeen) i tok: ‘Wanpela lain (National Crime Prevention Council) i skelim pasin stil na i tok, planti yangpela i stilim wanpela samting ol i tok, ol i gat laik tasol long kisim fri dispela samting.’ Na sampela yangpela bilong stil i tok, ol i no mekim rong taim ol i stil, long wanem, pe ol stua i putim bilong baim sampela samting i “antap tumas”!

Planti yangpela i stil, long wanem, ol i les. Bipo yangpela Jeremy i bin stil taim skul i pinis long apinun. Em i tok: ‘Em i wanpela samting bilong mekim tasol taim skul i pinis.’ Na sampela yangpela i ting pasin stil i olsem wanpela kain pilai bilong kisim narapela kain amamas. Taim ol i stilim laplap o wanpela disk bilong musik na putim i go insait long paus bilong ol, ol i amamas tru long samting skin i pilim​—⁠marasin adrenalin long skin i mekim na klok bilong ol i meknais hariap.

Ol i Stil Bilong Daunim Bel Hevi?

Tasol sapos yangpela i les, i gat ol narapela rot bilong winim dispela hevi, nogut em i go kalabus. Ating narapela samting i as bilong pasin ol i mekim, i no olsem ol i laik painim liklik amamas tasol. Planti saveman i ting olsem tu. Wanpela nius (Ladies’ Home Journal) i tok, sampela yangpela ‘i hatwok tru long karim ol hevi i save painim ol taim ol i go bikpela. Sapos ol i pait wantaim papamama, o ol i bruk wantaim gutpela pren bilong ol, o ol i no kisim gutpela mak long skul, ol dispela samting inap mekim na ol i pilim olsem ol i no inap bosim moa tingting na bel bilong ol. Olsem na taim ol i brukim wanpela lo, ol i pilim olsem ol i kisim bek strong.’

Em nau, ating i olsem stilman i amamas, tasol em i bel hevi long wanpela samting na em i laik haitim, olsem na em i kirap na stil. Olsem Baibel i tok, ‘maski man i lap, bel hevi i no inap lusim em.’ (Sindaun 14:13) Ol man i kisim save olsem, sampela yangpela i save stil planti taim long ol bikpela stua, ol i gat bikpela bel hevi. Na ol i kisim save olsem, taim ol i liklik, man i bin mekim pasin nogut long sampela yangpela na dispela i kirapim ol long stil. Maski wanem wanem samting i as bilong hevi bilong ol, ol i ting amamas ol i kisim taim ol i stil bai daunim hevi bilong ol. Tru, em inap mekim, tasol ol bai amamas inap sotpela taim.b Tingim wanpela yangpela bilong Amerika. Bilong painim amamas em i save stilim ka na draiv nating i go. Em i tok: ‘Mi save amamas long mekim olsem. Mi pret, tasol mi pilim narapela kain, olsem mi spak.’

Ol Wanlain i Pulim Ol

Baibel i tok: “Sapos yumi poroman wantaim ol man nogut, bai ol i bagarapim gutpela pasin bilong yumi.” (1 Korin 15:33) Planti man i save dispela tok i stret. Wanpela meri bilong raitim buk (Denise V. Lang), em i tok: ‘Taim ol yangpela i paul, planti i no save mekim taim ol i stap wanpela.’ Planti taim ol wanlain i subim ol yangpela long stil. Ol i tok: “Goan, yu mekim.” Sori tru, planti yangpela i harim tok bilong ol.

Yangpela Kathy i tok: ‘Mi bin poromanim wanpela lain meri long haiskul.’ Kathy i mas mekim wanem bilong insait long dispela lain? Em i mas stilim wanpela kolsinglis i gat bikpela pe. Kathy i tok: ‘Mi gat bikpela laik long insait long dispela lain, olsem na mi bin go long wanpela stua na stilim wanpela kolsinglis i gat bikpela pe.’

Kisim Tingting Bilong God

Ating sampela i tingting long stil, long wanem, em rot bilong kisim planti samting ol i no gat mani bilong baim, o ol inap kisim narapela kain amamas, o wanlain bai laikim ol. Tasol wanpela lo bilong Tenpela Lo long Baibel i tok: “Yupela i no ken stil.” (Kisim Bek 20:15) Aposel Pol i tok, ‘ol stilman i no inap i go insait long kingdom bilong God.’ (1 Korin 6:10) Ol yangpela i go bikpela insait long wanpela famili Kristen i mas tingting gut long tingting bilong God long pasin stil. Sapos ol narapela i ting ol i stretpela man, tasol long pasin hait ol i stil, ol i giaman tru! Aposel Pol i stori long dispela kain pasin olsem: “Yupela i save skulim ol arapela manmeri, tasol bilong wanem yupela i no save skulim yupela yet? Yupela i save tok, ol man i no ken stil, tasol ating yupela yet i save stil?”​—⁠Rom 2:⁠21.

Sapos yangpela i tingim sem em bai kisim sapos polis i holim em, ating dispela i gutpela as na em bai givim baksait long pasin stil. Taim polis i holim wanpela yangpela i bin stil, em i tok: ‘Mi pilim olsem mi laik i dai.’ Taim yumi save Jehova i nolaik tru long “pasin bilong stil,” dispela i gutpela as na yumi no larim wanpela laik i bosim yumi o wanpela man i subim yumi long stil. (Aisaia 61:⁠8) Maski wanpela yangpela i stil na em i haitim dispela pasin long bos bilong stua, polis, papamama, em i no inap haitim long Jehova. Pasin nogut bilong em bai kamap ples klia.​—⁠Aisaia 29:15.

Na tingim, sin i save mekim na bel bilong man i kamap strong. (Hibru 3:13) Planti man i stilim ol liklik samting, bihain ol i stilim ol bikpela samting. Pastaim yangpela Roger em i kirap na stilim mani long paus mani bilong mama bilong em, bihain em i wok long subim ol lapun meri i go daun long graun na stilim paus mani bilong ol!

Sakim Pasin Nogut

Tru, sapos wanpela yangpela i save hait na mekim pasin stil, em bai hatwok long lusim. Wanpela yangpela i tok: ‘I olsem mi kalabus long pasin stil na mi mas mekim olgeta taim.’ Wanem samting i ken helpim wanpela yangpela long senisim pasin bilong em?

Kamapim rong bilong yu long God. Man i tanim bel na kamapim rong bilong em long God, God bai “marimari moa yet” long em.​—⁠Aisaia 55:⁠7.

Kisim helpim. Planti yangpela i save kaunim dispela nius ol i save go long wanpela kongrigesen Kristen bilong ol Witnes Bilong Jehova long hap bilong ol. Olsem na sapos ol i laik wanpela i helpim ol, i gutpela ol i ken go lukim ol wasman Kristen long kongrigesen na askim ol long helpim ol long spirit na givim sampela tok bilong helpim ol long stretim pasin bilong ol. (Jems 5:​14, 15) Ol papamama i gat gutpela stretpela pasin, ol tu i ken helpim na strongim yangpela i gat hevi. Sapos bel bilong yangpela i bagarap, o em i bel hevi, o em i les, olsem na em i mekim pasin kranki, i gutpela em i toktok wantaim wanpela man i gat pasin bilong putim gut yau na ating dispela bai helpim em.​—⁠Sindaun 12:25.

Bekim. Lo Bilong Moses i tok, ol samting man i kisim long pasin bilong stil, em i mas bekim olgeta na hap moa tu. (Wok Pris 6:​4, 5) Sapos man i mekim rong na em i bihainim dispela lo long nau tu, dispela bai helpim em. Bel i no gat tok moa na em bai pilim hevi ol man i save kisim taim narapela i stilim samting long ol. Baibel i tok promis olsem: Man “i bekim ol samting em i bin stilim, na em i bihainim gut olgeta lo bilong mi, . . . orait dispela man i no inap i dai. Nogat. Em bai i stap gut.”​—⁠Esekiel 33:⁠15.

Daunim bel nogut na pasin mangal. Laspela lo bilong Tenpela Lo i tok: “Yupela i no ken mangalim . . . olgeta arapela samting bilong en.” (Kisim Bek 20:17) Sapos yu sot long wanpela samting o yu laik kisim wanpela samting tasol yu no gat mani bilong baim, ating yu inap painim rot bilong bungim liklik mani na bihain yu ken baim. Aposel Pol i tok: “Ol stilman i no ken stil moa. Nogat. . . . Ol i mas mekim gutpela wok long han bilong ol yet.”​—⁠Efesus 4:28.

Was gut long ol poroman bilong yu. Meri bilong raitim buk, em Denise Lang, em i tok: ‘Sapos yu stap wantaim wanpela pren o lain pren, na ol i mekim wanpela pasin kranki o pasin nogut, maski yu no insait long dispela rong, polis bai ting yu tu i gat asua, long wanem, yu stap wantaim ol.’ Sapos wanlain bilong yu i laik yupela i mekim wanpela samting i no stret, yu mas strong na no ken larim ol i pulim yu.​—⁠Sindaun 1:​10-19.

Tingim ol samting nogut pasin stil i mekim long ol narapela. Stilman i save tingim em yet tasol, em i no tingim narapela man. Tasol Jisas i tok: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” (Matyu 7:12) Taim man i tingim narapela man, dispela bai helpim em na em i no inap mekim wanpela samting bilong bagarapim dispela man.

Tingim ol hevi inap painim yu. (Galesia 6:⁠7) Maski long tingim dispela naispela bis o narapela samting yu laik kisim tasol yu no gat mani bilong baim, tingim sem yu bai kisim sapos polis i holim yu na yu gat kot; na tingim samting dispela bai mekim long nem bilong papamama na long nem bilong God tu! Tru tumas, nau yu save, pasin stil em i longlong pasin.

[Ol Futnot]

[Piksa long pes 18]

Taim yangpela i stil na wanpela i lukim em o holim em, em bai sem pipia