No Ken Kamap Stilman!

OLSEM WANEM? Wanpela man i bin stilim wanpela samting bilong yu?— Yu pilim olsem wanem long dispela?— Man i mekim dispela pasin em i stilman, na i no gat wanpela man i laikim stilman. Yu ting man i kamap stilman long wanem rot? Yu ting em i gat pinis dispela laik bilong stil taim mama i karim em?—

Yumi kisim save pinis olsem taim mama i karim yumi, sin i stap pinis long skin bilong yumi. Olsem na yumi olgeta i no gutpela olgeta. Tasol i no gat wanpela man i stilman pinis taim mama i karim em. Stilman inap kamap long wanpela gutpela famili. Ating papamama, ol brata, na ol susa bilong em i save mekim stretpela pasin. Tasol laik bilong man yet long kisim ol samting, olsem mani na ol samting mani inap baim, dispela inap kirapim em long kamap stilman.

Yu ting husat em i namba wan stilman?— Orait yumi skelim. Bikpela Tisa i bin save long dispela man taim Em i stap long heven. Dispela stilman i wanpela ensel. Tasol God i bin wokim olgeta ensel i kamap gutpela olgeta, olsem na dispela ensel i kamap stilman long wanem rot?— Olsem yumi bin lainim long Sapta 8 bilong dispela buk, em i laikim samting i no bilong em. Yu tingim em wanem samting?—

Taim God i wokim pinis namba wan man na meri, dispela ensel i laik bai ol i lotuim em. I no stret long em i ting ol i mas lotuim em. Ol i mas lotuim God tasol. Tasol em i stilim dispela samting! Dispela ensel i pulim Adam na Iv long lotuim em, na long dispela rot em i kamap stilman. Em i kamap Satan.

Wanem samting i mekim na man i kamap stilman?— Em laik bilong kisim samting i no bilong em. Dispela laik inap kamap strong tru na em inap kirapim ol gutpela man tu long mekim pasin nogut. Sampela man em ol i kamap stilman ol i no save tanim bel na mekim gen gutpela pasin. Wanpela bilong ol kain man olsem em wanpela aposel bilong Jisas. Nem bilong em Judas Iskariot.

Judas i bin lainim Lo Bilong God taim em i mangi yet, olsem na em i save i no stret long stil. Em i save olsem wanpela taim God long heven i bin tokim ol manmeri bilong em olsem: “Yupela i no ken stil.” (Kisim Bek 20:15) Taim Judas i kamap bikpela, em i bungim Bikpela Tisa na em i kamap wanpela disaipel bilong em. Bihain, Jisas i makim Judas long kamap wanpela bilong ol 12-pela aposel bilong em.

Jisas na ol aposel bilong em i save raun na kaikai wantaim. Na olgeta mani bilong ol i save stap long wanpela bokis. Jisas i givim dispela bokis long Judas bilong em i ken lukautim. Dispela mani i no bilong Judas. Tasol yu save long samting Judas i mekim bihain liklik?—

Judas i kirap long kisim mani long bokis, tasol i no stret long em i mekim olsem. Em i save kisim mani taim ol arapela i no lukim, na tu, em i painim rot bilong kisim planti mani moa. Em i kirap long tingting long mani long olgeta taim. Yumi ken skelim wanem samting i bin kamap long rot bilong dispela laik nogut sampela de tasol paslain long ol i kilim i dai Bikpela Tisa.

Maria, em susa bilong pren bilong Jisas, Lasarus, em i kisim sampela gutpela wel na kapsaitim long lek bilong Jisas. Tasol Judas i toktok planti long dispela samting. Yu save bilong wanem em i toktok planti?— Em i tok ol i mas salim dispela wel na mani ol i kisim ol i mas givim long ol rabisman. Tasol tru tru, em i laik bai i gat planti mani moa long dispela bokis na bai em i ken stilim.—Jon 12:​1-6.

Jisas i tokim Judas long em i no ken givim hevi long Maria husat i bin mekim gutpela pasin tru. Judas i no amamas long tok Jisas i bin mekim, olsem na em i go long ol hetpris, em ol birua bilong Jisas. Ol i laik holim Jisas, tasol ol i laik mekim long nait na bai ol man i no ken lukim ol.

Judas i tokim ol pris: ‘Mi bai tokim yupela long olsem wanem yupela inap holim Jisas sapos yupela i givim mani long mi. Yupela bai givim hamas mani long mi?’

Ol pris i tok: ‘Mipela bai givim yu 30 mani silva.’—Matyu 26:​14-​16.

Judas i kisim dispela mani. I olsem em i salim Bikpela Tisa na ol dispela man i baim em! Yu inap tingim olsem wanem wanpela man inap mekim kain pasin nogut olsem?— Em nau, dispela kain pasin i save kamap taim man i kamap stilman na i stilim mani. Em i laikim tumas mani, winim pasin bilong em long laikim God na ol arapela man.

Ating yu bai tok, ‘Mi bai no inap laikim moa yet wanpela samting, winim God Jehova.’ Em gutpela yu gat dispela kain tingting. Taim Jisas i makim Judas long kamap wanpela aposel, ating Judas i bin i gat kain tingting olsem. Ol narapela man em ol i kamap stilman, ating ol tu i bin tingting olsem. Yumi ken stori long sampela bilong ol.

Wanpela em i wokman bilong God, nem bilong em Akan, na em i bin stap long graun planti yia paslain long taim mama i karim Bikpela Tisa. Akan i lukim wanpela naispela klos, wanpela hap gol, na sampela mani silva. Ol dispela samting i no bilong em. Baibel i tok ol dispela samting i bilong Jehova, long wanem, ol i bin kisim long ol birua bilong lain bilong God. Tasol Akan i laikim tumas ol dispela samting, olsem na em i stilim.—Josua 6:​19; 7:​11, 20-​22.

Yumi ken stori long narapela man tu. Bipo tru, Jehova i bin makim Devit long stap king bilong lain Israel. Wanpela taim Devit i wok long lukluk long naispela meri Batseba. Em i wok long lukluk long Batseba na em i tingting long kisim em olsem meri bilong em. Tasol em i meri bilong Uria. Yu ting i stret Devit i bin mekim wanem?—

I stret sapos Devit i bin lusim dispela tingting bilong kisim Batseba. Tasol em i no mekim olsem. Devit i kisim em i go long haus. Na bihain em i stretim rot na ol i kilim i dai Uria. Bilong wanem Devit i mekim ol dispela pasin nogut?— Long wanem, em i wok long laikim meri bilong narapela man.—2 Samuel 11:​2-​27.

Devit i tanim bel, olsem na Jehova i larim em i stap laip. Tasol kirap long dispela taim, Devit i kisim planti hevi. Wanpela hevi em pikinini bilong em, Apsalom, i laik kisim wok bilong Devit olsem king. Olsem na taim ol manmeri i kam long lukim Devit, Apsalom i save holim ol na givim kis long ol. Baibel i tok: “Apsalom i pulim tingting bilong ol man bilong Israel na ol i save laikim em.” Em i pulim tingting bilong ol manmeri na bai ol i laik em i mas i stap king na Devit nogat.—2 Samuel 15:​1-​12.

Olsem wanem? Sampela taim yu gat bikpela laik tru long kisim wanpela samting, olsem Akan, Devit, na Apsalom?— Sapos dispela samting i bilong narapela man na yu no kisim tok orait na yu kisim nating dispela samting, dispela em pasin stil. Yu tingim yet samting em namba wan stilman, Satan, i bin laikim?— Em i laik bai ol manmeri i lotuim em, na God nogat. Olsem na Satan i stil taim em i pulim Adam na Iv long bihainim tok bilong em.

Taim man i gat wanpela samting bilong em yet, em i gat rait long givim tok orait long husat inap yusim dispela samting. Olsem: Ating yu go pilai wantaim ol narapela pikinini long haus bilong ol. Yu ting i stret long yu kisim wanpela samting long haus bilong ol na bringim i kam long haus bilong yu?— Nogat, tasol sapos papa o mama bilong ol dispela pikinini i givim tok orait long yu, orait yu ken kisim. Tasol sapos yu no askim na yu kisim nating wanpela samting i go long haus bilong yu, dispela em pasin stil.

Bilong wanem tingting bilong stil inap kamap long yu?— Long wanem, yu laikim samting em i no bilong yu. Maski sapos narapela man i no lukim yu kisim wanpela samting, husat i lukim yu?— God Jehova. Na yumi mas tingim olsem God i nolaik tru long pasin stil. Olsem na pasin bilong laikim God na ol arapela man bai helpim yu na yu no ken kamap stilman.