Em Pasin Stil Tru?

ABIODUN em i man bilong givim kaikai long ol man long bikpela haus pasindia long Naijiria. Wanpela apinun, em i wok long lokim haus kaikai na em i lukim wanpela paus mani i stap, i gat bikpela mani insait, inap olsem K1,827. Kwiktaim em i givim long ofis. Em mani bilong wanpela meri i slip long haus pasindia, na bihain em i kam kisim. Ol bos bilong Abiodun i makim em i “nambawan wokman bilong yia” na ol i givim bikpela wok moa long em. Meri tu i amamas na givim prais long em.

Wanpela nius (Quality) i stori long dispela samting na kolim Abiodun olsem “Gutpela Man Bilong Samaria.” Ol i askim em, em i bin tingting long holim dispela mani o nogat, tasol Abiodun i tok: ‘Mi wanpela Witnes Bilong Jehova, na taim mi lukim samting em i no bilong mi, mi save bekim long papa bilong en.’

Planti man long dispela hap i kirap nogut long stretpela pasin bilong Abiodun. Ol narapela Witnes i amamas long pasin bilong Abiodun, tasol ol i no kirap nogut long en. Long olgeta hap bilong graun ol Witnes Bilong Jehova i save wokabaut stret. Ol i no save stil; em wanpela lo Kristen.

Tasol sampela taim sampela samting i kamap na i olsem i hatwok long save wanem pasin i stret na wanem pasin i no stret. Tingim ol samting i bin painim Festas, em man bilong lukautim mani bilong wanpela kongrigesen bilong ol Witnes Bilong Jehova long Wes Afrika.a Meri bilong em i gat bikpela sik na ol dokta i laik katim em kwik, tasol em i mas baim hap pe bilong dispela pastaim.

Festas i sot long mani. Em i go askim sampela man long givim dinau long em, tasol ol i no laik givim. Nau em i tingim mani bilong kongrigesen i stap long han bilong em, na em i tingting olsem: ‘Ating i no gat rong sapos mi “dinau” long dispela mani, nogut mi larim meri bilong mi i dai. Taim sampela man i bekim dinau bilong ol long mi, bai mi bekim mani bilong kongrigesen.’

Olsem na Festas i kisim dispela mani i no bilong em na em i baim haus sik. Yu ting tingting bilong em i stret? Yu ting em i no gat rong, long wanem, em i gat bikpela hevi?

Em Mani Bilong Husat?

Taim yumi skelim dispela samting, i gat sampela samting bilong dispela mani em yumi mas tingim, olsem: Em mani bilong husat? Na em i bilong mekim wanem wok? Dispela mani em ol kontribusen ol brata sista long kongrigesen i givim long laik bilong ol yet bilong helpim lotu tru bilong Jehova. (2 Korin 9:⁠7) Em i no bilong baim ol man, long wanem, i no gat wanpela i kisim pe long ol wok ol i mekim long kongrigesen. Dispela mani em bilong baim na lukautim haus bung bilong kongrigesen, olsem Haus Kingdom. Em gutpela ples bilong ol yangpela na ol lapun, ol maniman na ol man i stap rabis, ol i ken bung long en na lain long tok bilong Baibel.

Em mani bilong husat? Em mani bilong kongrigesen. I no bilong wanpela man tasol na em i makim wok ol i mekim long dispela mani. Nogat. Lain elda i mekim wok long dispela mani bilong baim ol samting bilong kongrigesen, na sapos i gat wanpela bikpela samting ol i mas baim, ol i askim kongrigesen pastaim.

Dinau o Stil?

Festas i tingting long bekim kwik dispela mani, olsem na em i ting em i dinau tasol. Tasol wanpela buk i tok, man i “kisim samting bilong narapela man long pasin hait, o em i no tokim man pastaim, o kisim tok orait,” dispela man em i “mekim pasin stil,” em i “stilman.” (Webster’s New Dictionary of Synonyms) Festas i no tokim kongrigesen pastaim; em i no kisim tok orait. Em i kisim nating dispela mani em i bilong kongrigesen. Olsem na em i mekim pasin stil. Em i stilman.

Tru, sampela i gat tingting nogut na ol i stil, tasol sampela nogat. Olsem Judas Iskariot. Em i lukautim mani bilong Jisas na ol gutpela aposel. Baibel i tok: “[Judas] em i stilman. Em i gat wok bilong bosim bokis mani bilong ol lain bilong Jisas, na em i save stilim mani ol i putim long en.” (Jon 12:⁠6) Judas i gat tingting nogut na em i mangalim mani, na bihain pasin bilong em i go nogut olgeta​—⁠bilong kisim 30 mani silva, em i putim Pikinini bilong God long han bilong ol birua.​—⁠Matyu 26:​14-16.

Tasol Festas i tingting long helpim meri bilong em i gat sik. Olsem na yu ting em i no gat asua? Nogat. Tingim tok bilong Baibel long man i gat narapela hevi na em i stil: “Sapos wanpela man i hangre na i stilim sampela kaikai, orait ol man i no save tok nogut long em. Tasol sapos ol i painimaut long dispela samting em i bin mekim, orait bai ol i kotim em na em i mas bekim planti samting moa, inap long pinisim olgeta samting long haus bilong en.” (Sindaun 6:​30, 31) Taim ol i holim pinis stilman, em i mas kisim strafe olsem lo i kolim. Lo bilong Moses i tok, stilman i mas bekim ol samting. Olsem na maski taim nogut i painim man, Baibel i no orait long em i stil. Baibel i toksave olsem stilman inap lusim olgeta samting bilong em, na sem, na samting moa nogut inap painim em: Bai God i no amamas moa long em.

Olgeta Kristen tru ol i Witnes Bilong Jehova, ol i mas “mekim gutpela wok” bai ol man i no inap painim rong long ol, na ol man i holim wok insait long kongrigesen i mas mekim moa yet. (1 Timoti 3:10) Ol man i no bekim mani em Festas i wet long kisim, na em i no inap bekim mani bilong kongrigesen, olsem na ol i kisim save long dispela samting em i bin mekim. Ol i mekim wanem? Sapos Festas i no tanim bel, bai ol i rausim em long klinpela kongrigesen. (1 Pita 4:15) Tasol em i hevi tru long rong em i bin mekim na em i tanim bel, olsem na ol i no rausim em, tasol em i no inap holim moa wok insait long kongrigesen.

Bilip Tru Long God

Aposel Pol i tok, sapos man i tok em i wokman bilong Jehova na em i stil, dispela inap bagarapim nem bilong God Jehova na lain bilong em. Pol i tok: “Yupela i save tok, ol man i no ken stil, tasol ating yupela yet i save stil? Buk bilong God i gat tok long dispela pasin olsem, ‘Asua bilong yupela tasol, na ol arapela lain i wok long tok bilas na daunim nem bilong God.’ ”​—⁠Rom 2:​21, 24.

Agur, wanpela saveman bilong bipo, em i mekim wankain tok. Em i beten na em i tok: “Nogut mi kamap rabisman na mi stilim ol samting na mi daunim nem bilong yu, God bilong mi.” (Sindaun 30:⁠9) Em i tokaut olsem sapos man i stap rabis, dispela inap pulim em long stil, maski em i stretpela man. Tru tumas, sapos taim nogut i painim Kristen, dispela inap traim bilip bilong em​—⁠em i bilip tru long strong bilong Jehova long helpim lain bilong em o nogat.

Ol gutpela Witnes Bilong Jehova, ol Witnes i stap rabis tu, ol i bilip olsem “God i save mekim gut tru long ol man i wok long painim em.” (Hibru 11:⁠6) Ol i save, ol man i stap gut long Jehova, em i save helpim ol long kisim ol samting ol i mas kisim. Jisas i tok: “Yupela i no ken tingting planti na tok, ‘Bai yumi kaikai wanem samting? Bai yumi dring wanem samting?’ . . . Papa bilong yupela i stap long heven em i save pinis, yupela i mas kisim dispela olgeta kain samting.” Tasol yumi mas painim Kingdom pastaim na kisim stretpela pasin bilong God, na bai God “i givim dispela olgeta arapela samting long [yumi].”​—⁠Matyu 6:​31-33.

Ol Kristen tru i stap rabis, God i save helpim ol olsem wanem? Long planti rot, olsem long rot bilong ol wanlotu bilong ol. Lain bilong God ol i save givim bel tru long ol brata. Ol i tingim gut tok bilong Baibel, olsem: “Sapos wanpela man i gat ol samting bilong dispela graun, na em i lukim narapela brata i sot long ol samting, na sapos em i no sori long dispela brata, orait yumi save, pasin bilong God bilong laikim tru ol arapela, em i no i stap long dispela man. . . . Yumi no ken laikim ol brata long tok tasol . . . Yumi mas . . . mekim gutpela pasin long ol.”​—⁠1 Jon 3:​17, 18.

Long olgeta hap, i gat inap olsem 4 milion na hap Witnes Bilong Jehova long 73,000 kongrigesen. Ol i wok strong long bihainim ol lo bilong God. Ol i save, em i no ken lusim ol man i stap gut long em. Ol man i bin mekim wok bilong Jehova longtaim, ol i wanbel long tok bilong King Devit, em i tok: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai, na i singaut long ol arapela man bilong ol i ken helpim ol. Nogat tru.”​—⁠Song 37:⁠25.

Yumi mas bilip tru long God em i kirapim Devit long raitim dispela tok. Nogut yumi pundaun long traim na yumi stil, na ating bai God i no orait moa long yumi inap long olgeta taim bihain!​—⁠1 Korin 6:​9, 10.

[Ol Futnot]