Pas Bilong Ol Man

Karim Ol Hevi  Bel bilong mi i kirap tru long kamapim tingting bilong mi long stori “Kisim Strong Long Karim Ol Hevi Bihain Bai Kamap.” (Janueri 8, 1997) Mi pilim tru pasin bilong Edward Michalec long sanap strong long sampela bikpela hevi tru. Pasin bilong em long laikim tru Jehova, ol narapela, na tok i tru i kamapim klia gutpela pasin bilong em long i stap isi na karim ol hevi i painim em.

K. B., long Amerika

Man i Gat Sik Atraitis  Mi laik tok tenkyu long stori bilong Luretta Maass, het-tok bilong en “Taim Mi No Gat Strong, Long Dispela Taim Tasol Mi Gat Strong Tru.” (Februeri 8, 1997) Mi gat 27 krismas, na mi tu mi karim hevi bilong rumatoid atraitis. Maski marasin i pinisim pen liklik, sampela taim mi bel hevi liklik na mi no laik mekim wanpela samting, long wanem, sik bilong mi i mekim na mi mas lusim wok bilong autim tok long olgeta de. Pasin bilong Luretta Maass long mekim strong wok bilong Jehova, maski em i gat sik, i kirapim mi tru. Bai mi no ken larim bel hevi i daunim strong bilong mi; mi laik mekim sampela wok moa bilong autim tok.

A. B., long Itali

Mama bilong mi i karim hevi bilong rumatoid atraitis inap 30 yia samting. Sori tru, dispela pen i no inap pinis liklik. Tasol mi amamas long mama, long wanem, em inap i go long klostu olgeta miting bilong kongrigesen. Em i sindaun long wilsia, tasol em i insait long Skul Bilong Wok Autim Tok na em inap mekim yet wok bilong autim tok. Na maski em i gat sik, em i no save toktok planti.

S. M., long Jemani

Bikpela Tait Long Taim Bilong Noa  Stori bilong “Baibel i Tok Wanem? Bikpela Tait​—⁠Samting Tru o Stori Nating?” (Februeri 8, 1997) i helpim mi long skelim gut tru dispela bikpela samting i bin kamap bipo. Wankain olsem planti narapela mi bin kisim save long dispela Bikpela Tait taim mi liklik yet. Tasol mi no bin save olsem planti man i ting dispela stori i olsem wanpela stori nating tasol. Jisas i skelim ol samting bilong las de wantaim taim bilong Noa, na em i kamapim klia olsem Bikpela Tait i bin kamap tru.

S. M., long Amerika

Bikpela Kotkot  Taim stori “Bikpela Kotkot​—⁠Olsem Wanem Em i Narapela Kain?” i bin kamap mi bin sik. (Janueri 8, 1997) Klostu i no gat wanpela samting inap mekim mi amamas. Tasol savepasin bilong ol kotkot i mekim mi amamas. Bihain long dispela, mi raitim wanpela ripot bilong skul i stori long ol pisin, na mi mekim wok long stori mi kisim long Kirap! Mi kisim bikpela mak long skul long dispela ripot!

J. B., long Slovakia

Pikinini i No Lain Gut  Tenkyu long stori “Karim Hevi Long Pikinini i No Lain Gut.” (Mas 8, 1997) Mi save lukautim wanpela skul na mi bin wokim sampela kopi bilong dispela stori bilong givim long ol tisa. Na tu, taim mi raitim sampela stori long nius bilong skul mi kisim sampela stori long nius bilong yupela. Tenkyu long gutpela pasin bilong kamapim stret dispela stori.

E. G., long Honduras

Stap Pren Bilong God  (“Ol Yangpela i Laik Save . . . Sapos Mi Stap Pren Bilong God, Dispela Bai Helpim Mi?” long Kirap! bilong Mas 8, 1996) Em gutpela samting long save olsem Jehova i save tingim ol yangpela na em i laikim ol tru. Insait long sotpela taim long laip bilong mi, wanpela man i reipim mi, mi kisim drak, pikinini i lus long bel, na ol i tok nogut long mi na bagarapim bel bilong mi. Na wanpela taim mi traim long kilim i dai skin bilong mi yet. Tasol bihain mi kirap gen long i go long ol miting Kristen. Mi no les long beten na go klostu long Jehova, na kongrigesen i kisim bek mi. Ol tok bilong Jehova i mekim isi tingting bilong mi, winim ol drak.

W. B., long Amerika