Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • g97 12/8 p. 11-12
  • Sikspela Rot Bilong Lukautim Skin Bilong Yu

No gat vidio bilong dispela seksen.

Sori, popaia kamap long lodim vidio.

  • Sikspela Rot Bilong Lukautim Skin Bilong Yu
  • Kirap!—1997
  • Wankain Infomesen
  • 6-pela Rot Bilong Lukautim Helt Bilong Yu
    Kirap!—2004
  • Rot Bilong Lukautim Helt Bilong Yu
    Kirap!—2015
  • 2. Kaikai i Mas Klin
    Kirap!—2012
  • Olsem Wanem Yu Inap Lukautim Gut Ol Wok Bilong Haus?
    Rot Bilong Famili i Ken Stap Amamas
Lukim Moa
Kirap!—1997
g97 12/8 p. 11-12

Sikspela Rot Bilong Lukautim Skin Bilong Yu

WANPELA MAN LONG NAIJIRIA I RAITIM DISPELA STORI BILONG KIRAP!

LAIN Wol Helt Oganaisesen (WHO) i tok, inap 25 pesen bilong ol manmeri i sindaun long ol kantri i stap rabis ol i no gat gutpela wara bilong dring. Winim 66 pesen​—⁠em olsem 2.5 bilion manmeri​—⁠ol i no gat gutpela toilet samting. Olsem na planti bilong ol i save sik na i dai.

Long kain sindaun olsem, pasin bilong klinim gut skin samting i givim bikpela hatwok. Tasol sapos yu wok long lukautim gut skin bilong yu long olgeta taim, bai yu inap abrusim planti sik. Mipela raitim 6-pela samting yu inap mekim bilong lukautim skin bilong yu na famili bilong yu na bai ol jem i no inap go insait long bodi bilong yu na kamapim sik.

1. Wasim han long sop na wara sapos yu bin holim pekpek na taim yu laik holim kaikai.

Wanpela bikpela samting bilong abrusim sik i olsem: Olgeta taim sop na wara i mas i stap bambai olgeta insait long famili i ken wasim han. Sop na wara i save rausim ol jem long han​—⁠em ol jem inap go insait long kaikai o maus sapos yumi no wasim han. Planti taim ol liklik pikinini i save putim pinga bilong ol insait long maus, olsem na i bikpela samting long wasim han bilong ol planti taim, na mekim moa yet paslain long ol i kaikai.

Na i bikpela samting tru long wasim han bilong yu wantaim sop bihain long yu go long toilet, na paslain long yu holim kaikai, na bihain long yu klinim as bilong bebi o pikinini i bin pekpek.

2. Mekim wok long toilet.

Bilong ol jem i no ken kamap planti, em i bikpela samting tru long rausim gut pekpek. Planti sik​—⁠pekpek wara tu​—⁠i save kamap long ol jem i stap insait long pekpek bilong man. Ol dispela jem inap go insait long wara bilong dring, o long kaikai, o pas long han bilong yumi, o long ol sospen samting na long ol ples yumi save redim o sutim kaikai long en. Em nau, ol man inap daunim ol jem na kisim sik.

Bilong abrusim dispela samting, mekim wok long toilet. Pekpek bilong ol animal i no ken stap klostu long haus na wara bilong yumi. Ating yu bai kirap nogut long save, pekpek bilong ol bebi na liklik pikinini i moa nogut, winim tru pekpek bilong ol bikpela man. Olsem na ol pikinini tu i mas lain long mekim wok long toilet. Taim pikinini i pekpek nabaut, yu mas rausim kwiktaim na putim long toilet o kisim graun na karamapim.

Toilet i mas klin na yumi mas karamapim ai bilong en.

3. Mekim wok long klinpela wara.

Ol famili i gat planti klinpela wara i kam long paip ol i no save sik planti taim, winim ol man i no gat kain samting olsem. Ol man i no gat paip wara, ol inap lukautim skin bilong ol sapos ol i pasim ai bilong hul wara long wanpela samting na sapos wara i doti i no ran klostu long wara ol i save mekim wok long en bilong dring, waswas, o wasim laplap. Na bikpela samting tu i olsem: Ol animal i no ken stap insait long haus na ol i mas stap longwe long wara bilong dring.

Narapela rot bilong abrusim sik em long lukautim gut ol samting yu save mekim wok long en bilong kisim na bungim wara, olsem baket, rop, na plastik​—⁠ol i mas klin. Olsem: I gutpela yu hangamapim baket long wanpela ples; i no gutpela sapos yu lusim baket long graun.

Long haus, wara bilong dring i mas stap long wanpela klinpela plastik i gat tuptup. Bilong rausim wara long plastik, yu mas mekim wok long kap o bikpela klinpela spun i gat longpela han. Yu no ken larim wanpela man i putim han bilong em i go insait long wara bilong dring o long putim maus bilong em long plastik na dring.

4. Boilim wara bilong dring sapos i no kam long gutpela paip wara.

Planti taim gutpela wara bilong dring yumi kisim long paip wara. Wara i save kam long narapela rot, planti taim em i gat ol jem, maski i luk olsem em i klinpela wara.

Pasin bilong boilim wara i save kilim ol jem. Olsem na taim yu kisim wara long liklik raunwara, o wara i ran i go, o tang, i gutpela sapos yu boilim wara na larim i go kol paslain long dring. Wara i no gat jem i bikpela samting long ol bebi na liklik pikinini, long wanem, skin bilong ol i no strong tumas bilong sakim ol jem olsem skin bilong ol bikpela man inap mekim.

Sapos yu no inap boilim wara, orait, bungim wara long plastik o long wanpela samting ol i wokim long glas na i gat tuptup. Orait, larim plastik samting i sindaun long san inap 2-pela de paslain long yu mekim wok long dispela wara.

5. Kaikai i mas klin.

Ol kaikai yu no kukim, yu mas wasim gut. Ol narapela kaikai yu mas kukim gut, na mekim moa yet long abus na kakaruk samting.

Taim kaikai i tan pinis, i gutpela yu kaikai hariap; sapos yu mekim olsem kaikai i no inap sting. Sapos yu mas larim kaikai yu kukim pinis i stap nating inap 5-pela aua samting, orait, kaikai i mas stap long paia o yu mas putim insait long bokis ais. Tasol paslain long yu kaikai dispela kaikai, yu mas hatim gut gen.

Ol jem i stap insait long mit i no tan, olsem na yu no ken larim dispela kain mit i bung wantaim kaikai yu kukim pinis. Taim yu redim mit bilong kukim, klinim naip na ol samting long haus kuk dispela mit i bin sindaun long en.

Tebol samting yu save redim kaikai long en i mas klin long olgeta taim. Yu mas karamapim kaikai long wanpela samting na em i mas stap long wanpela hap ol lang, rat, na ol narapela animal i no ken kisim.

6. Kukim o planim pipia.

Ol lang i save karim ol jem i go nabaut nabaut, na ol i laik planim kiau bilong ol insait long pipia bilong kaikai. Olsem na yu no ken tromoi ol pipia bilong haus long graun. Long olgeta de yu mas planim pipia o kukim o rausim long narapela rot.

Sapos yu bihainim ol dispela rot, yu inap lukautim skin bilong yu na famili bilong yu, na yupela inap abrusim pekpek wara, kolora, taifoit, ol snek long bel, sik i kamap long kaikai i nogut pinis, na planti narapela kain sik.

[Kredit Lain]

Ol i kisim long buk Facts for Life, em wanpela buk sampela lain i kamapim, olsem lain United Nations Children’s Fund, United Nations Educational, Scientific, na Cultural Organization, na WHO.

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim