2. Kaikai i Mas Klin

BILONG lukautim gut sikman, dokta i save wasim gut han bilong em, klinim gut ol samting bilong katim man, na mekim tieta i stap klin, na olsem tasol yu inap lukautim gut famili bilong yu, taim yu wasim han bilong yu, klinim haus kuk, na wasim gut ol kaikai.

● Wasim han bilong yu.

Lain Public Health Agency bilong Kanada i tok olsem “han bilong ol man i save karim 80 pesen bilong ol kain sik i save kalap long narapela, kain olsem kus.” Olsem na yu mas wasim gut han long sop paslain long yu kaikai, taim yu yusim toilet pinis, na paslain long yu redim kaikai.

● Haus kuk i mas stap klin.

Wanpela wok painimaut i kamapim olsem, toilet em i wanpela klinpela rum long haus. Tasol “ol samting bilong haus we i pulap long doti na ol binatang jem, em ol spans bilong haus kuk.”

Olsem na olgeta taim senisim ol spans, na yusim sop wantaim hatwara o marasin bilong klinim ol samting insait long haus kuk. Tru, dispela i no isi. Bola em wanpela meri i stap long haus i no gat paip wara. Em i tok: “Em i hatwok tru, tasol oltaim mipela i save baim sop na kisim wara bambai mipela i ken klinim haus kuk na haus bilong mipela.”

● Wasim gut kaikai.

Paslain long ol i salim kaikai long maket, ating i gat ol binatang jem long en, long wanem, ol i bin wasim long doti wara o ol pipia bilong ol man na animal i pas long en, o ol abus i no tan i pas long en. Olsem na paslain long yu sapim prut o kaikai o stretim kumu samting, i gutpela long wasim gut bilong rausim ol doti. Yu mas lusim taim bilong mekim olsem. Daiane, wanpela mama long Brasil i tok: “Taim mi redim kumu, mi save wasim gut.”

● No ken bungim olgeta kaikai.

Yu mas karamapim ol mit, kakaruk, na pis, na putim ol long narapela narapela beg, no ken bungim wantaim ol narapela kaikai, na bai ol binatang i no ken go long ol narapela kaikai. Yu mas i gat wanpela hap plang na naip bilong katim abus na narapela plang na naip bilong katim ol narapela kaikai. Wasim gut plang bilong katim abus o pis long sop na hatwara paslain na bihain long yu yusim.

Yumi stori pinis long olsem wanem yu yet, ol samting bilong haus kuk, na ol kaikai i mas i stap klin. Nau bai yumi stori long pasin yu ken bihainim bilong redim kaikai bambai yu no ken kisim sik.

[Blok long pes 5]

LAINIM OL PIKININI: “Mipela i skulim ol pikinini long wasim han bilong ol paslain long ol i kaikai. Na sapos kaikai i pundaun long plua, ol i mas wasim o tromoi.”—Hoi, Hong Kong