Wasim na Draim Han Bilong Yu!

Yumi save kisim kus na ol narapela kain sik long wanem rot? Wanpela lain (U.S. Association for Professionals in Infection Control and Epidemiology) i tok, inap 80 pesen bilong ol kain sik olsem inap kalap long yumi long rot bilong han bilong yumi​—⁠yumi no kisim long rot bilong win yumi pulim. Pasin bilong wasim han em wanpela nambawan rot bilong pasim sik long kalap i go long planti man. Tasol planti manmeri i no save wasim han bilong ol bihain long ol i yusim toilet o rausim kus o paslain long ol i kaikai samting. Tru, planti ol narapela i save wasim han bilong ol long ol kain taim olsem. Tasol sapos yumi hariap tasol long wasim han na yumi no wasim gut, dispela i no ken rausim ol binatang jem i save kamapim sik.

Pasin bilong draim gut han, em tu i bikpela samting. Sampela saveman long wanpela yunivesiti (University of Westminster) long Inglan ol i kisim save olsem, planti manmeri i no save draim gut han bilong ol, na ol i bihainim moa yet dispela pasin sapos ol i mekim wok long masin bilong draim han. Bihain long ol mekim wok long masin, planti i save draim gut han long klos bilong ol. Dispela inap mekim na sampela binatang jem nogut i stap yet long han ol inap pas long klos na dispela inap kamapim sik. Ol dispela saveman i tok, em i bikpela samting long yumi mas draim gut han, na sapos inap i gutpela long mekim wok long wanpela kain pepa bilong draim han, o wanpela klinpela taul samting yumi no bin mekim yet wok long en.

Lain U.S. Centers for Disease Control and Prevention i kamapim ol dispela gutpela tok bilong helpim yumi long wasim gut han:

• Long olgeta taim, mekim wok long wara i ran na i hat liklik, na wanpela gutpela sop. Sapos yu mas mekim wok long wanpela dis samting, long wanem, yu no gat paip wara, orait long olgeta wan wan taim yumi mekim wok long en, yu mas wasim gut long snowait samting. Ol liklik pepa ol i save baim long stua bilong klinim han samting, ol i no inap klinim gut han.

• Rapim gut tupela han wantaim inap long spet bilong sop i kamap, na rapim yet inap 15 sekon samting. Skrapim gut han, na ol hap namel long ol pinga, na aninit long kapa bilong pinga.

• Rausim sop long han long wara i ran na i hat liklik.

• Draim han long pepa bilong draim han o long wanpela klinpela taul, na was gut, nogut klinpela han bilong yu i holim gen tep o ples bilong taul i hangamap long en.

• Bilong pasim tep, mekim wok long dispela klinpela taul samting bambai yu no ken holim handel bilong tep.

• Taim ol pikinini i wasim han, ol i mas sanap long wanpela samting bambai han bilong ol i hangamap tasol aninit long wara i ran. Helpim pikinini long bihainim olgeta dispela rot mipela i kamapim antap, na bihain yu ken wasim han bilong yu.