Planti i Dai Winim Ol Man i Dai Long Pait
MARILYN i gat 23 krismas. Taim em i lusim skin na skin i no gat strong, em i ting dispela hevi i painim em, long wanem, nau tasol em i karim pikinini. Na tu, planti taim em i kus, na em i tokim dokta long dispela. Dokta i tok, em i gat sik long nus na rop bilong pulim win, na em i givim marasin antibaiotik long em. Bihain, bikpela tuhat i kamap long taim em i slip, olsem na Marilyn i tingting planti. Em i go bek lukim dokta, na dokta i stretim rot bilong em i ken kisim eksre.
Wanpela hap bilong eksre i tudak, olsem na dokta i save em i mas painim Marilyn kwiktaim, tasol Marilyn i no gat telefon. Marilyn i tok: “Dokta i telefon long mama bilong mi na tokim em mi gat bikpela sik. Mama i kam painim mi na tokim mi long go hariap long dokta. Dokta i salim mi i go long haus sik na ol i kisim narapela eksre, na mi mas slip long haus sik.”
Marilyn i kirap nogut long save em i gat sik TB. Em i ting em bai dai, tasol bihain long em i kisim marasin bilong daunim sik TB, kwiktaim em i orait bek.
Yumi inap pilim tingting bilong Marilyn olsem em i kirap nogut long em i bin kisim sik TB. I no longtaim i go pinis na planti dokta tu i ting sik TB i pinis olgeta long ol kantri i gat planti wok bisnis long en. Wanpela nes long wanpela klinik long Landon i tok: “Mi ting dispela sik i pinis taim bikpela sik TB i bin kalap long planti man long bipo em i pinis. Tasol taim mi kam wok long dispela hap, mi kisim save olsem dispela sik i no pinis, em i wok long painim planti man moa i sindaun long biktaun.”
Long ol hap em bipo sik TB i pinis olgeta long en, nau em i kam bek, na long ol hap dispela sik i no pinis long en, em i go bikpela moa. Tru tumas, sik TB i no pinis olgeta, dispela sik i save kilim i dai planti man olsem pait na hangre i save mekim. Tingim:
◼ Maski i gat ol gutpela marasin samting long nau, insait long 100 yia sik TB i bin kilim i dai inap olsem 200 milion manmeri.
◼ Inap 2 bilion manmeri—em olsem 33 pesen bilong olgeta manmeri—ol i kisim pinis binatang jem bilong sik TB. Na tu, long olgeta wan wan sekon wanpela i save kisim sik TB!
◼ Long 1995 inap 22 milion manmeri i gat sik TB. Klostu 3 milion i dai, na planti bilong ol i sindaun long ol kantri i stap rabis.
I gat ol strongpela marasin bilong daunim sik TB, olsem na bilong wanem dispela sik i save bagarapim yet ol man? Sik TB bai pinis olgeta? I gat rot bilong lukautim yu yet na dispela sik i no ken kisim yu? Ol stori i kamap bihain long dispela bai bekim ol dispela askim.
[Piksa Kredit Lain long pes 3]
New Jersey Medical School—National Tuberculosis Center