Stretim Dispela Sik Long Olgeta Hap—I Gat Rot Long Mekim Olsem?
OL SAVEMAN i wanbel long tok, sik TB em i wanpela hevi long olgeta hap na olgeta kantri i mas wok wantaim long stretim. I no gat wanpela kantri i ken wok wanpela tasol bilong daunim sik TB, long wanem, planti milion manmeri i save brukim boda bilong ol kantri long olgeta wik.
Bilong olgeta kantri i ken wok gut wantaim, planti man i ting, ol kantri i gat planti wok bisnis long en ol i mas helpim ol kantri i stap rabis, long wanem, planti man moa long ol dispela kantri i bagarap long sik TB. Olsem saveman Arata Kochi i tok, “ol kantri i gat planti wok bisnis long en bai helpim kantri bilong ol yet sapos ol i helpim ol kantri i stap rabis long daunim sik TB. Sapos nogat, sik TB bai bagarapim kantri bilong ol.”
Tasol ol kantri i gat planti wok bisnis long en ol i ting sampela narapela kain hevi i bikpela samting, na ol i no bin mekim kwik wanpela samting bilong helpim ol kantri i stap rabis. Na sampela kantri i stap rabis, ol i no tingting tumas long ol samting bilong helt, ol i tromoi bikpela mani bilong baim ol samting bilong pait. Kirap long Jun 1996, liklik lain tasol (10 pesen) bilong olgeta man i gat sik TB, ol i bin kisim marasin long rot lain WHO i laik ol i kisim—olsem nes i lukim ol i dring marasin. Em nau, liklik lain tasol i mekim olsem, olsem na i no gat rot long pasim dispela sik long i go bikpela tru.
Lain WHO i tok: “Inap planti yia ol man i gat save long stretim sik TB na marasin bilong stretim i gat liklik pe tasol. Tasol samting yumi mas mekim long nau em olsem: Ol man i gat namba, na strong, na sori ol i mas kirapim ol man long olgeta hap long mekim gutpela wok long ol dispela marasin.”
Bihain Sik TB Bai Pinis
Olsem wanem? Yumi inap bilip olsem ol man i gat namba na strong bai ol i stretim dispela hevi? Spirit holi i givim tingting long man bilong raitim Song na em i raitim tok olsem: “Ol king na ol man bilong graun i no inap kisim bek yu. Olsem na nogut yu bilip long ol.” Orait, yumi ken bilip long husat? Skripsa i tok moa: “Sapos wanpela man i bilip long God bilong Jekop bai em i helpim em, na sapos dispela man i pas wantaim God, Bikpela bilong em, orait em i ken amamas. God i bin mekim kamap heven na graun na solwara na olgeta samting i stap long en.”—Song 146:3, 5, 6.
God Jehova em i Man bilong wokim graun, na em i gat strong na bikpela save long pinisim ol sik. Olsem wanem? Em i save sori long ol man? Jehova i tok promis long rot bilong profet bilong em olsem: “Ol dispela lain i stap manmeri tru bilong mi. Na bai mi marimari long ol olsem wanpela papa i save marimari long pikinini i mekim wok bilong papa.”—Malakai 3:17.
Laspela sapta bilong Baibel i stori long wanpela driman aposel Jon i bin lukim. Em i lukim ol “diwai bilong givim laip” na ol “i save karim kaikai 12-pela taim long olgeta yia.” Ol dispela diwai na prut bilong ol i makim ol samting God bai mekim bilong helpim ol man i bihainim tok long i stap oltaim long graun.—KTH 22:2.
Jon i tok moa: “Ol lip bilong diwai ol i bilong mekim orait ol manmeri bilong olgeta lain man.” Ol dispela lip i makim ol blesing God bai kamapim bilong helpim ol manmeri long kamap gutpela long spirit na skin. Olsem na yumi ken save tru, taim God i bosim graun long nupela taim, sik TB bai pinis olgeta na i no inap kamap bek.—KTH 21:3, 4.
[Piksa long pes 8, 9]
God i tok promis em bai oraitim sik bilong ol man inap oltaim