Pas Bilong Ol Man

Bosim Belhat  Tenkyu long dispela stori “Bilong Wanem Yu Mas Bosim Belhat Bilong Yu?” (Jun 8, 1997) Mi go bikpela insait long wanpela bikpela famili, na taim mi liklik yet mi lukim planti kros pait i kamap insait long famili bilong mipela. Papamama bilong mi i katim marit, na kirap long dispela taim, sampela taim mi save belhat. Mi save beten long Jehova olgeta taim long san na nait na askim em long helpim mi long dispela hevi. Mi kirap nogut long kaunim dispela stori, i olsem ol i raitim bilong mi stret! Mi wok long skelim ol skripsa stori i kamapim​—⁠olsem Efesus 4:​26, em i tok: “Nogut yupela i belhat yet i stap na san i go daun.” Mitupela man bilong mi i bihainim dispela tok. Jehova na dispela stori i helpim mi na mi inap long winim hevi bilong mi.

A. R. S., long Amerika

“Long Yau Bilong Liklik Pikinini”  Dispela stori (Jun 8, 1997) i kirapim tru bel bilong mi. Long taim bilong autim tok, planti taim mi bungim ol pikinini. Mi no givim baksait long ol o ting ol i samting nating, nogat; mi save stori wantaim ol long Paradais. Tenkyu tru long yupela i kamapim dispela stori, long wanem, em i strongim mi long mekim yet dispela pasin. Yumi no save husat pikinini bai harim tok, a?

M. O. U., long Naijiria

Dispela stori i sutim tru bel bilong mi! Taim mi kaunim hap i gat tok olsem, “Lain Long Tok i Tru Bilong Baibel” na kaunim tok olsem Louise i kirap nogut long lukim tok bilong Song 37:9 olsem ol stretpela man bai kisim graun​—⁠na em i lukim long Baibel bilong em yet!​—⁠aiwara bilong mi i pundaun. Tenkyu long ol dispela stori i save tokaut long i stap bilong ol man, na plis, olgeta taim yupela mas wok yet long prinim ol dispela kain stori long Kirap!

P. C., long Inglan

Pas Bilong Ol Man  Mi laikim tru olgeta nius mipela i save kisim. Mi laikim moa yet ol tok long pas bilong ol man long Kirap! bilong Oktoba 8, 1997, i stori long pasin bilong rausim man. Mi bin raus long kongrigesen na wanpela yia bihain ol i kisim bek mi. Planti man i ting dispela pasin em hatpela pasin. Tasol nogat tru. Tok ol i givim bilong stretim mi i hatwok long bihainim, tasol em i no hatpela pasin. Mi save ol elda i laik helpim mi tasol. Mi yet i sakim ol tok bilong helpim mi, olsem na mi raus. Taim ol i rausim mi pinis, mi save i stap bilong mi i no gutpela​—⁠mi pilim olsem mi wanpis, long wanem, mi lusim Jehova. Mi pilim olsem mi stap nating​—⁠no gat wanpela wok mi inap mekim sapos mi no senisim pasin bilong mi na kam bek long Jehova. Taim mi raus dispela i daunim mi na i skulim mi olsem mi mas i stap klostu long Jehova na oganaisesen bilong em.

A. C., long Kanada

Kirap!  Yupela i no ken tingim popaia bilong mi long lusim tingting long wokim gen sabskripsen bilong dispela gutpela nius Kirap! Em i wanpela nius bilong skulim yumi, na ol stori bilong en i stret na i save kirapim tingting. Mi laik kisim olgeta nius em mi no bin kisim. Mi no laik lusim wanpela. Tenkyu long yupela i mekim pasin isi na wok yet long helpim ol man i sot long save.

N. S., long Sri Lanka

Go Sindaun Long Narapela Hap  Mi laikim tru dispela stori “Go Sindaun Long Narapela Hap​—⁠Ol Hevi Bilong En!” (Jun 8, 1997) Mi pilim planti bilong ol hevi em yupela i stori long en. Mi bin lusim Afrika na i go sindaun long Yurop, na olgeta taim mi painim hevi, long wanem, mi bilong narapela lain, na narapela tok ples, na narapela skin, na bikpela samting moa​—⁠ol i tingting nogut long mi. Ol televisen na nius samting i givim tingting kranki long ol man long ol man bilong Afrika na bilong ol narapela hap.

P. A., long Jemani

Gutpela Amamas  Tenkyu long dispela stori “Olsem Wanem Long Ol Amamas?” (Jun 8, 1997) Mi gat 12-pela krismas, na taim mi malolo long skul, mi lukim televisen planti taim. Dispela stori i helpim mi long save i gat ol narapela samting mi ken mekim bilong kisim amamas.

J. L., long Inglan