ASKIM

Olsem wanem? Long miting bilong kongrigesen, i stret long ol papamama Kristen i sindaun wantaim pikinini husat i raus?

I no gat wok long yumi tingting planti long wanem hap rauspela man i ken sindaun long en insait long Haus Kingdom. Dispela magasin i bin traim long kirapim ol papamama Kristen em pikinini bilong ol i raus na i stap yet wantaim ol. Papamama i mas helpim rauspela pikinini long pas gut gen wantaim God. Olsem Wastaua bilong Me 1, 1989 long pes 21 na 22 i kamapim, ol papamama inap stadi wantaim rauspela pikinini husat i stap yet wantaim ol. Dispela inap kirapim pikinini long stretim wokabaut bilong em.

Taim rauspela pikinini i kam long Haus Kingdom, i gutpela em i ken sindaun isi wantaim papamama bilong em. I no gat lo i makim olsem ol i mas sindaun long baksait, olsem na i no gat rong sapos rauspela pikinini i sindaun wantaim papamama long wanem wanem hap ol i sindaun long en. Ol papamama i laik bai pikinini i pas gut wantaim Jehova, olsem na ol i laik bai ol miting i helpim gut pikinini. Taim pikinini i stap klostu long papamama na em i no sindaun em yet, dispela inap helpim tru pikinini.

Olsem wanem sapos rauspela pikinini i no stap moa wantaim papamama? Yu ting dispela i makim olsem em i no inap sindaun moa wantaim papamama? Long bipo, dispela magasin i bin kolim pasin ol Kristen i mas bihainim long sait bilong bung wantaim wanblut husat i raus na em i no stap moa wantaim famili bilong em.a I no gat rong long rauspela man i sindaun isi wantaim ol wanblut long taim bilong miting. Tasol i no stret long ol wanblut i painim rot long poroman nating wantaim rauspela man. Sapos ol wanblut husat i stap gut long God, ol i gat stretpela tingting long wanblut husat i raus, na ol i wok strong long bihainim tok kaunsel bilong Baibel long abrusim pasin bilong bung wantaim em, orait i no gat hevi bai kamap.—1 Kor. 5:11, 13; 2 Jon 11.

Maski wanpela rausman i sindaun wantaim wanblut o ol arapela insait long kongrigesen, dispela i no gat rong sapos em i sindaun isi na bihainim stretpela pasin. Sapos yumi pasim wanpela man long sindaun long hap em i laikim, dispela inap kamapim ol narapela hevi. Sapos olgeta arapela wantaim ol wanblut husat i stap gut long Jehova, ol i wok strong long bihainim ol stiatok bilong Baibel long pasin ol i mas mekim long rauspela man, na dispela i no pundaunim ol brata, orait i no gat as long wanpela i toktok planti long ples sindaun bilong rauspela man taim em i go long ol miting.