Baibel i Tok Wanem?
Ol Spirit Nogut i Stap Tru?
LONG yia 1600 i go inap olsem 1800 samting, ol man i mekim nogut long ol sangumameri long klostu olgeta hap bilong Yurop. Ol man i givim bikpela pen long planti meri em ol man i tok, ol i sangumameri. Sampela meri em ol i kotim ol nating, ol i tok ol i save mekim pasin sanguma bilong pasim ol man na ol i no givim pen moa long ol. Ol i kilim i dai planti planti meri, na tok win o pasin bilong tingting nogut long ol i as bilong dispela.
Maski ol i tok Baibel i as bilong ol samting ol i mekim long dispela taim bilong pinisim pasin sanguma—em wanpela wok bilong ol spirit nogut—ol i strong tumas long mekim olsem. Em i no wok bilong ol Kristen long givim bikpela pen o kilim i dai ol sangumameri o ol manmeri i save mekim ol wok bilong ol spirit nogut. (Rom 12:19) Long nau ol man i gat wanem kain tingting long wok bilong ol spirit nogut?
No Gat Strongpela Tingting
Planti manmeri bilong ol lotu i gat nem Kristen, ol i no ting ol wok bilong ol spirit nogut em i samting nogut tru. Sampela i laik kisim save, olsem na ol i insait liklik long pasin bilong lukluk long ol sta bilong save long samting bai kamap bihain, majik, pasin bilong glasman, na pasin sanguma, tasol ol i no ting ol dispela pasin i wok bilong ol spirit nogut. Sampela taim, ol man i pilai musik o mekim ol piksa wokabaut samting, na ol man i pilai spot, na ol man bilong wok politik, ol i tokaut stret olsem, ol i insait long sampela wok bilong ol spirit nogut. Wanpela buk dikseneri i tok, sampela buk na piksa wokabaut i stori long ol sangumameri na ol posinman olsem “ol man i gat gutpela pasin na ol i narapela kain man, na ol i gat bikpela strong i no inap bagarapim man.” Ol buk na piksa wokabaut samting ol i wokim bilong amamasim na skulim ol pikinini inap stori long ol wok bilong ol spirit nogut.
Taim ol man i no tingting tumas long wok bilong ol spirit nogut, dispela inap mekim na ol i no bilip olsem ol spirit nogut i stap tru. Olsem wanem? Yu bilip ol spirit nogut i stap na ol i wok strong long bagarapim yumi? Planti manmeri long nau bai tok, ol spirit nogut i no bin mekim wanpela samting long ol o ol i no lukim samting ol i mekim. Olsem wanem? Ol spirit nogut i stap tru?
Man i No Bilip, Tingting Bai Paul
Ol man i tok ol i bilip long Baibel tasol ol i no bilip olsem ol spirit nogut i stap, tingting bilong ol bai paul tru. Sapos ol i no bilip olsem ol spirit nogut i stap tru, ol i kamapim olsem ol i no bilip olgeta long Baibel. Bilong wanem? Long wanem, Baibel, em Tok Bilong God, i lainim yumi olsem ol spirit nogut i stap tru na ol i gat narapela kain strong, winim strong bilong ol manmeri.
Namba wan buk bilong Baibel, em Buk Stat, i stori long wanpela spirit i gat bikpela save na em i mekim wok long wanpela snek bilong giamanim Iv na kirapim em long bikhet long God. (Stat 3:1-5) Laspela buk bilong Baibel, em Buk Kamapim Tok Hait, i tok dispela man nogut i trikim Iv, em i “dispela snek bilong bipo yet,” na “ol i kolim em Satan . . . na man bilong giamanim olgeta manmeri bilong graun.” (KTH 12:9) Satan i grisim sampela narapela ensel long bikhet. (Jut 6) Baibel i kolim ol dispela ensel i bihainim Satan olsem spirit nogut. Ol i mekim wok bilong ol klostu long graun, na ol i kros nogut tru long God na long ol manmeri i lotuim em.—KTH 12:12.
Satan na ol spirit nogut i gat strong long stiaim tingting bilong ol man, na mekim nogut long ol, na toktok wantaim ol.(Luk 8:27-33) Inap planti tausen yia ol i bin kisim save long pasin bilong man. Ol i gat save long mekim wok long ol pasin kranki bilong ol man. Baibel i tok, ol spirit nogut i bin stap long sampela man na meri na pikinini, na bosim olgeta tingting bilong ol. (Matyu 15:22; Mak 5:2) Ol inap givim sik long man o bagarapim skin bilong em, olsem mekim em i kamap aipas. (Jop 2:6, 7; Matyu 9:32, 33; 12:22; 17:14-18) Ol inap pasim tu tingting bilong ol man. (2 Korin 4:4) Ol spirit nogut i save mekim wok long olgeta taim olsem hetman bilong ol Satan, na em i olsem “wanpela laion i singaut strong. Oltaim em i save raun bilong painim ol manmeri bilong kaikai.” (1 Pita 5:8) Baibel i gat planti stori i kamapim klia olsem, ol spirit nogut i stap. Sapos yu bilip long Baibel, orait bai yu bilip olsem ol spirit nogut yumi no inap lukim ol, ol i stap tru.
Ol i Man Nogut Bilong Giaman
Tasol olsem wanem ol dispela strongpela spirit nogut inap i stap long nau, na ol manmeri i no pret pret long olgeta taim? Bilong wanem ol i no kamapim long ples klia ol yet na ol samting ol i mekim? Baibel i bekim tok olsem: “Satan yet i save senisim pasin bilong en na kamap olsem ensel bilong lait.” (2 Korin 11:14) Satan em i man bilong giaman. Planti taim wok bilong ol spirit nogut i olsem samting i no inap givim hevi long man o em i gutpela samting. Olsem na em i hatwok long luksave long wok bilong ol.
Satan na ol spirit nogut bilong em i wok yet long putim kain kain hevi long ol man, olsem ol i bin mekim long taim bilong ol man i bin raitim Baibel. Sampela manmeri, em ol i trupela Kristen long nau, ol i bin insait long wok bilong ol spirit nogut na ol inap tokaut long ol samting nogut tru ol spirit nogut i bin mekim long ol. Long nau, ol spirit nogut i mekim bikpela wok, ating winim bilong bipo. Na long narapela kain strong bilong ol, ol i grisim ol manmeri long insait long ol wok bilong ol. Yumi no ken ting strong bilong ol em i samting nating. Tasol ol inap mekim bikpela wok moa long rot bilong pulim ol man long lusim God, winim rot bilong pretim ol man. Baibel i tok, Satan na ol spirit nogut i “giamanim olgeta manmeri bilong graun.” (KTH 12:9) Ol i laik tru long bagarapim ol samting bilong spirit, na ol i mekim dispela long pasin hait.
Ol spirit nogut i stap tru. I olsem i no gat narapela as na ol manmeri i kapsaitim blut bilong ol man na bagarapim ol samting, a? Pasin tru bilong yumi man em long stap bel isi na amamas. Tasol ol spirit nogut i save strongim pasin nogut na ol i gat strong long stiaim na bagarapim tingting bilong man.
Tasol Jehova em i God i gat olgeta strong—strong bilong em i winim strong bilong ol spirit nogut. Em i laik strongim na lukautim ol man long “olgeta kain pasin bilong trik na giaman Satan i save hait na mekim.” (Efesus 6:11-18) Yumi no gat wok long pret nogut tru long ol spirit nogut, long wanem, God i tok promis olsem: “Olsem na yupela i mas daunim yupela yet na i stap aninit long God. Yupela i mas sakim Satan, na em bai i lusim yupela na ranawe.”—Jems 4:7.
[Piksa Kredit Lain long pes 26]
Sipa Icono