Ol Man i Wok Long Painim Bel Isi

OL MAN i gat narapela narapela tingting long pasin bilong i stap bel isi. Sapos sampela man i gat wok mani, ol i stap bel isi; long sampela man moa, ol i mas i gat bikpela mani na bai ol i ken stap bel isi; na bilong i stap bel isi, sampela man i mas sindaun long wanpela hap i no gat ol raskol. Olsem wanem long yu?

Maski yu gat wanem kain tingting, ating yu yet yu save wok strong long mekim sampela samting bilong i stap bel isi. Tingim sampela samting ol manmeri long Yurop i save mekim bilong helpim ol long i stap bel isi.

Bikpela Skul Moa

Presiden bilong wanpela lain (European Commission) bilong ol kantri long Yurop, em Jacques Santer, em i tok, inap 20 pesen bilong ol yangpela long ol dispela kantri, ol i no gat wok mani. Olsem na ol dispela yangpela i gat askim, Olsem wanem mi ken kisim wanpela wok mani em bai helpim mi long i stap bel isi? Planti i ting ol i ken kisim kain wok mani olsem sapos ol i kisim bikpela skul moa. Na olsem nius The Sunday Times bilong Landon i tok, dispela i save “helpim tru ol sumatin taim ol i painim wok mani.”

Wanpela nius (Nassauische Neue Presse) i tok, long Jemani “ol i gat bikpela laik yet long kisim skul na go long yunivesiti.” Ol i gat dispela laik maski ol i mas tromoi 55 tausen dola bilong helpim sindaun bilong ol taim ol i stap olsem sumatin long wanpela yunivesiti long dispela kantri.

Yumi mas litimapim nem bilong ol yangpela i givim bel long skul na ol i gat laik long kisim wanpela wok mani em bai helpim ol long i stap bel isi. Na sapos wanpela i gat save na i winim ol mak long skul, dispela inap helpim em taim em i wok long painim wok mani. Tasol olsem wanem? Bikpela skul i makim olsem wanpela bai kisim wok mani? Wanpela sumatin i tok: ‘Taim mi kirap nupela na skul long wanpela kos, mi save dispela kos i no inap helpim mi tumas long painim wanpela wok mani na i stap bel isi.’ Wankain samting i save painim planti yangpela. I no longtaim i go pinis na insait long wanpela yia, namba bilong ol yangpela i winim pinis yunivesiti long Jemani na ol i no inap kisim wok mani, em i go antap tru, winim olgeta yia bipo.

Wanpela nius i tok, long Frans planti yangpela i no gat wok mani, olsem na ol yangpela i save go long yunivesiti, long wanem, ol i save setifiket bilong haiskul i no inap helpim ol long kisim wok. Tasol planti sumatin bilong yunivesiti i save, taim ol i pinis long yunivesiti, “maski ol i kisim pinis setifiket, ol bai i wankain olsem ol sumatin i no bin go long yunivesiti.” Nius The Independent i tok, long Briten “ol sumatin i go long yunivesiti bikpela hatwok i save painim ol na i nogutim ol tru.” Ol ripot i tok, ol yunivesiti i no save helpim ol sumatin long karim dispela hevi bilong ol olsem bel i no stap isi; planti samting tumas ol sumatin i mas tingim long yunivesiti i mekim na sampela taim bel hevi i painim ol, na ol i tingting planti, na ol i no amamas long ol yet.

Ol yangpela i lain long mekim wanpela wok, planti taim dispela i save helpim ol long kisim wok, winim ol mak bilong yunivesiti.

Ten Tausen Samting Bilong Skin Em Inap?

Planti ol i ting as bilong i stap bel isi em bikpela mani. Ating sampela i ting em gutpela tingting, long wanem, man i gat planti mani long beng, em i gat mani bilong helpim em long taim bilong hevi. Baibel i tok, ‘mani i save helpim yumi long taim nogut.’ (Saveman 7:12) Tasol sapos yumi kisim planti mani moa, yu ting dispela i save helpim yumi long i stap bel isi moa long olgeta taim?

Ating nogat. Tingim bikpela mani kago ol man i bin kisim insait long 50 yia i go pinis. Taim Namba Tu Pait i pinis, planti manmeri long Jemani i bin i stap rabis. Tasol wanpela nius i tok, long nau, olgeta wan wan manmeri long Jemani i gat 10,000 samting bilong skin. Na ol nius i save tokaut long ol wok bisnis samting, sapos ol i tok stret, ol lain i kamap bihain bai i gat planti samting moa. Tasol olsem wanem? Dispela pasin bilong bungim planti mani kago, em i save helpim ol man long i stap bel isi moa? Nogat. Wanpela lain long Jemani i skelim dispela samting na ol i kisim save olsem, long olgeta 3-pela 3-pela manmeri, 2-pela i tok, ol i no stap bel isi olsem ol i bin stap inap 20 o 30 yia i go pinis. Olsem na bikpela mani kago moa i no bin helpim ol manmeri long i stap bel isi moa.

Na yumi ken save dispela samting i stret, long wanem, olsem yumi lukim pinis long stori i kam paslain long dispela, dispela pasin olsem ol man i no stap bel isi em i wanpela hevi bilong bel. Na bikpela mani i no inap stretim tru bel hevi. Tru, bikpela mani i save daunim pasin bilong i stap rabis na i save helpim man long taim bilong hevi. Tasol long sampela kain taim, maski man em i maniman o rabisman, bai em i gat hevi.

Olsem na sapos yumi gat stretpela tingting long ol samting bilong skin olsem mani samting, yumi no ken lusim tingting olsem, maski bikpela mani i olsem wanpela gutpela samting, em i no bikpela samting bilong helpim yumi long i stap bel isi. Taim Krais Jisas i stap long graun, em i strongim ol disaipel na em i tok: “Maski yu yet yu gat planti samting moa, tasol yu no inap kisim laip long ol dispela samting bilong yu.” (Luk 12:15) Bilong i stap bel isi olgeta, man i no ken kisim bikpela mani tasol​—⁠em i mas i gat sampela samting moa.

Ol lapun i no save tingim pe bilong ol samting ol i holim, nogat; ating ol i bin holim ol dispela samting longtaim o sampela pren i bin givim long ol, dispela i mekim na ol i laikim tru ol samting ol i holim. Wanpela samting ol lapun i save tingting moa long en, em pasin raskol​—⁠olsem ol raskol bai kam na stilim ol samting bilong ol o bagarapim ol.

Was Gut!

Wanpela buklet (Practical Ways to Crack Crime) ol i bin wokim long Briten, em i tok: ‘Insait long 30 yia i go pinis, pasin raskol em i wanpela hevi i bin go bikpela moa long olgeta hap bilong graun.’ Ol polis i mas mekim bikpela wok tru, winim skel bilong ol. Sampela manmeri i mekim wanem bilong helpim ol long karim dispela hevi?

Bilong lukautim yumi yet, yumi mas tingim haus bilong yumi. Long Swiselan, wanpela man bilong wokim piksa bilong ol haus, em i save wokim ol haus ol raskol i no inap brukim, em ol haus i gat ol strongpela lok, na ol strongpela dua, na sekyuriti-ba long ol windo. I olsem papa bilong ol dispela haus i bihainim wanpela savetok planti man i save long en, olsem: “Haus bilong mi em i haus king bilong mi,” long wanem, ol haus king bilong bipo i gat ol strongpela banis samting bilong pasim ol birua. Nius Focus i tok, ol dispela haus i gat bikpela pe, tasol planti man i laik kisim.

Bilong lukautim ol yet taim ol i stap insait long haus o ausait long en, sampela manmeri i bin stretim rot bilong lukautim ples bilong ol yet. Na long sampela ples ol manmeri i mekim narapela samting; ol i baim wanpela kampani sekyuriti bilong raun long ka long sampela kain taim. Planti manmeri i ting i no gutpela sapos wanpela tasol i wokabaut long ol rot bilong biktaun long nait na rot i no gat man. Na ol papamama, em ol i save tingim i stap bilong ol pikinini bilong ol, ol inap mekim sampela samting moa bilong lukautim pikinini. Tingim ol tok bilong helpim yumi i stap long blok long dispela pes.

Tasol i no olgeta man inap baim wanpela haus i gat ol samting bilong pasim ol raskol. Na tu, pasin bilong kisim ol lain i was long ples na ol sekyuriti i raun long ka, dispela i no inap pasim olgeta pasin raskol. Dispela inap mekim na ol raskol i go long wanpela hap i no gat ol samting bilong pasim ol. Olsem na pasin raskol i stap yet olsem wanpela bikpela samting i save bagarapim bel isi bilong ol man. Bilong helpim yumi long i stap bel isi, i mas i gat sampela samting moa bilong daunim pasin raskol.

Yumi Mas Stretim As Tru Bilong Hevi

Yumi olgeta i gat laik long i stap bel isi, na i gutpela yumi mekim sampela samting inap long yumi ken i stap olsem. Tasol pasin raskol, no gat wok, na ol narapela samting i save mekim na yumi no stap bel isi, em ol samting i olsem mak bilong wanpela samting i save nogutim yumi olgeta man. Bilong stretim dispela samting, yumi no ken stretim tasol ol hevi, yumi mas stretim as tru bilong en.

Wanem as tru bilong dispela pasin olsem yumi no i stap bel isi? Olsem wanem yumi inap pinisim dispela pasin na i stap bel isi inap oltaim oltaim? Bai yumi toktok long dispela samting long stori i kamap bihain long dispela.

[Blok long pes 6]

Sampela Rot Bilong Lukautim Ol Pikinini

Ol man i mekim nogut long planti pikinini, na stilim ol, na kilim ol i dai, olsem na planti papamama i save skulim pikinini bilong ol long mekim olsem:

1. Sapos wanpela man i laik bai pikinini i mekim wanpela samting na pikinini i ting em i no stret, orait em i mas tok, Nogat.

2. Pikinini i no ken larim wanpela i holim sem samting bilong em, tasol sapos dokta o nes i mas mekim, orait papa o mama i ken stap wantaim em.

3. Sapos hevi i kamap, pikinini i mas ranawe, o singaut strong, o bikmaus, o askim wanpela man o meri i stap klostu long helpim em.

4. Pikinini i mas tokim papamama long samting i bin kamap o long wanpela toktok pikinini i no amamas long en.

5. Pikinini i no ken haitim wanpela samting long papamama bilong em.

Laspela samting, ol papamama i mas was gut taim ol i makim wanpela man o meri long lukautim pikinini bilong ol.

[Ol Piksa long pes 5]

Skul, mani, wok bilong daunim pasin raskol, ol dispela samting i no inap helpim yumi long i stap bel isi​—⁠i mas i gat sampela samting moa