Stap Bel Isi Inap Oltaim
SAPOS yu gat bikpela fiva, ating bai yu dring marasin bilong daunim het pen, na ating bai yu putim ais long skin bilong kolim skin. Tasol maski marasin na ais i daunim hap pen bilong yu, ol dispela samting i no stretim as tru bilong fiva. Na sapos sik i bikpela tru, yu mas go long dokta.
Ol man bilong graun i karim hevi long wanpela samting i olsem fiva i no laik pinis, i olsem ol i no stap bel isi. Yumi save painim rot bilong daunim ol hevi inap sotpela taim na i stret yumi mekim olsem, tasol bilong stretim as tru bilong ol hevi i mas i gat wanpela man em inap glasim gut i stap bilong yumi. God Jehova i bin wokim yumi, olsem na em tasol i save gut long yumi. Em i save yumi no stap bel isi, long wanem, yumi bin kisim planti hevi.
Bel Isi i Pinis
Baibel i tok, Jehova i wokim namba wan man na meri i nambawan olgeta na em i putim ol long wanpela ples ol inap stap bel isi long en. Ol i no gat wanpela wari bilong pulim nabaut tingting bilong ol. God i laik bai ol manmeri i stap long wanpela paradais na stap bel isi tru inap oltaim. Namba wan ples ol man i bin sindaun long en i gat “ol kain kain diwai, pikinini bilong ol i gutpela long kaikai. Olgeta dispela diwai i naispela tru.” Tingim: God i lukautim ol gut long kaikai, na em i tingim bel isi bilong ol tu, long wanem, dispela hap “i naispela tru.” Olsem na yumi ken save, namba wan man na meri ol i bin sindaun gut long wanpela hap i no gat hevi.—Stat 2:9.
Adam na Iv i bin sakim gutpela wok bos bilong God, olsem na ol i kisim ol pasin olsem tupela tingting, na pret, na sem, na bel i kotim ol, na ol i no stap bel isi. Taim Adam i sakim God, em i tok em i “pret.” Namba wan man na meri i samapim ol lip na pasim olsem laplap na tupela i hait long gutpela Man bilong wokim ol, em pastaim ol i bin i stap pren bilong em.—Stat 3:1-5, 8-10.
Laik bilong Jehova long bipo i no senis. Baibel i tok Man bilong wokim yumi em i God bilong sori, na klostu nau em bai inapim ol gutpela manmeri long mekim graun i kamap Paradais gen na long stap bel isi long en inap oltaim oltaim. Long rot bilong profet Aisaia God i tok promis olsem: “Mi wokim nupela skai na nupela graun. . . . Yupela i ken bel gut na amamas oltaim.” (Aisaia 65:17, 18) Aposel Pita i stori long dispela nupela skai na nupela graun olsem: “Stretpela pasin tasol bai i stap long en.”—2 Pita 3:13.
Dispela bai kamap olsem wanem? Em bai kamap long rot bilong wanpela gavman Jehova bai kamapim. Em dispela Kingdom Krais Jisas i bin tokim ol disaipel long beten long en olsem: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—Matyu 6:9, 10.
Kingdom bilong God bai senisim ol gavman bilong ol man na long gutpela rot em bai kamapim laik bilong God long olgeta hap. (Daniel 2:44) Ol hevi i bin mekim nogut long ol man kirap long taim bilong Adam, olsem pasin bilong tupela tingting, na pret, na sem, na bel i kotim ol—olgeta bai pinis. Baibel i tok, dispela Kingdom klostu nau bai kamap. Long nau tu, maski yumi stap long taim nogut, ol man i laik tru long Kingdom bilong God i kam, ol inap stap bel isi.
Ol Samting Bilong Spirit i Mas Stap Namba Wan
Devit em i wanpela wokman bilong God na em i save long pret na hevi. Tasol long Song 4:8 Devit i raitim tok olsem: “Bikpela, yu tasol yu save lukautim mi na mi stap gut. Mi no save pret long wanpela samting. Taim mi go long bet, wantu mi save slip i dai.” Jehova i mekim na bel bilong Devit i stap isi, maski sampela taim em i gat planti hevi. Olsem wanem? Dispela inap skulim yumi long wanpela samting? Olsem wanem bel bilong yumi i ken stap isi, maski ol man i no stap bel isi?
Tingim stori bilong Adam na Iv long Buk Stat. Kirap long wanem taim tupela i no bin stap bel isi? Em taim tupela i no laik pas moa wantaim God na ol i no laik bihainim laik bilong em. Olsem na sapos yumi mekim narapela kain pasin na pas gut wantaim Jehova na wok long bihainim laik bilong em, long nau tu yumi inap i stap bel isi, em wanpela samting yumi no inap kisim sapos yumi no mekim olsem.
Taim yumi kisim save long Jehova long rot bilong Baibel-stadi, dispela i save helpim yumi long save long wanem as na yumi stap. Long dispela rot tasol yumi inap save, yumi stap bilong mekim wanem. Yumi inap stap bel isi sapos yumi laikim tru God, na save long laik bilong em long ol man, na save long ol samting yumi mas mekim. Wanpela man nem bilong em Paul, em i kisim save long dispela samting inap sampela yia i go pinis.
Mama i karim Paul na mekim bikpela long em long wanpela ailan klostu long nambis bilong Jemani. Ol samting i bin painim papamama bilong em long taim bilong Namba Tu Pait, dispela i mekim na famili bilong Paul i no save tingim ol samting bilong lotu. Paul i stori long em yet taim em i yangpela, olsem: “Mi no bilip long wanpela samting na mi no daun long wanpela man. Mi bin daunim ol bel hevi bilong mi long rot bilong dring; sampela taim mi dring spak inap 2-pela o 3-pela taim long wanpela wik. Bel bilong mi i no bin stap isi.”
Orait bihain Paul i toktok wantaim wanpela Witnes Bilong Jehova. Planti taim Paul i tok pait wantaim dispela Witnes, tasol wanpela samting Witnes i bin tokim em long en i kirapim tingting bilong Paul. Witnes i tok: “I no gat wanpela samting inap kamap nating.” Olsem: Olgeta samting yumi lukim olsem ol diwai plaua samting, olgeta i mas i gat Man i bin wokim.
Paul i tok: “Mi tingim tingim dispela tok planti taim, na bihain mi mas wanbel long en.” Olsem na Paul i kirap na stadi long Baibel wantaim ol Witnes Bilong Jehova na em i kisim save long Jehova. Em i tok: “Papamama na Jehova ol i namba wan long mekim ol samting bilong helpim mi.” Paul i kisim baptais olsem wanpela Witnes long 1977, na em i tok: “Nau mi save long as tru bilong i stap bilong mi. Mi amamas long wokabaut stret wantaim laik bilong Jehova. Mi stap bel isi, long wanem, i no gat wanpela samting em inap painim mi o famili bilong mi em Jehova i no inap stretim long bihain.”
Samting i bin painim Paul inap lainim yumi long wanem samting? Paul i no tingim ol samting bilong skin, em i tingim ol samting bilong spirit na dispela i helpim em long winim dispela hevi long bel i no stap isi. Em i bin wok long pas gut wantaim God. Planti milion Witnes Bilong Jehova ol i pas gut wantaim God. Dispela i save strongim bel bilong ol na i save helpim ol long daunim laik bilong ol yet long ol samting ol i mekim long ol narapela man. Ol Witnes Bilong Jehova i lusim taim bilong ol yet long go long haus bilong ol man bilong helpim ol long stap bel isi moa long rot bilong tingim ol samting bilong spirit. Tasol ol Witnes i no save autim tok tasol.
‘Singaut Long Jehova, God Bilong Yupela’
Long Julai 1997, taim wara Oda i tait na karamapim bikpela hap bilong noten Yurop, ol Witnes Bilong Jehova long Jemani i kisim toksave olsem ol manmeri long Polan, em kantri klostu long Jemani, ol i sot long ol samting. Ol inap mekim wanem? Insait long sampela de tasol, ol wan wan Witnes long Belin na ol hap klostu long en, ol i mekim wanpela gutpela samting tru—ol i givim nating 116 tausen dola.
Na ol Witnes i gat save long wokim haus samting, ol i baim rot bilong ol yet na ran long ka inap 6-pela aua, kirap long Belin i go inap long hap bilong Vroklo, Polan. Long wanpela liklik taun, planti haus i bin kisim bikpela bagarap. Wara i bin go antap long haus bilong wanpela famili Witnes olsem 6-pela mita. Pikinini meri long dispela famili em i laik marit long mun antap na sindaun long dispela haus wantaim man bilong em. Ol inap mekim wanem bilong stretim dispela haus na long helpim dispela famili, em klostu olgeta samting bilong ol i lus?
Taim wara i slek pinis, wanpela man i sindaun klostu i tok bilas olsem: “Bilong wanem yupela i no singaut long Jehova, God bilong yupela, bambai yupela i ken save em bai helpim yupela o nogat?” Long de bihain long en, dispela man i kirap nogut taim sampela ka i kam long Jemani ol i kamap long haus bilong dispela famili! Sampela man em ol i no save long ol, ol i lusim ol dispela ka na ol i kirap long stretim dispela haus. Dispela man i sindaun klostu i askim olsem: “Husat dispela lain? Husat i baim ol dispela samting bilong stretim haus?” Dispela famili Witnes i tokim em, ol i brata spirit bilong ol na ol dispela brata i kam long Jemani, ol yet i bin baim ol dispela samting. Ol man bilong ples i kirap nogut taim ol i lukim ol i stretim dispela haus. Na tu, marit i bin kamap long taim stret olsem ol i bin makim.
Dispela famili i kisim save olsem, ol Witnes Bilong Jehova long olgeta hap bilong graun ol i stap olsem brata brata na ol i insait long dispela lain, olsem na dispela i save helpim ol long ol samting bilong spirit na i helpim ol long stap bel isi long dispela taim bel bilong ol man i no stap isi. I no dispela famili tasol i kisim helpim. Long olgeta hap em tait i bin bagarapim, ol i stretim ol haus na Haus Kingdom bilong ol Witnes Bilong Jehova. Na ol i no lusim tingting long ol man i sindaun klostu long ol Witnes tasol ol i no Witnes. Ol i bin mekim bikpela wok long stretim haus bilong ol tu, na ol dispela man i amamas long dispela samting.
Stretpela Pasin, na Bel Isi
Taim fiva i pinis na skin i strong gen, yumi amamas long dokta i bin helpim yumi, a? Taim dispela pasin olsem ol man i no stap bel isi i pinis olgeta long rot bilong Kingdom bilong God, yumi bai amamas tru long Man i bin wokim yumi! Tru tumas, em i tok promis olsem yumi ken stap long “stretpela pasin bai i kamapim pasin bel isi na [yumi] bai i no pret moa na bai [yumi] sanap strong oltaim.” Em gutpela samting tru i laik kamap!—Aisaia 32:17.
[Rait long pes 10]
Yumi inap stretim bel hevi bilong yumi sapos yumi tingting long ol samting bilong spirit—ol samting bilong skin nogat
[Piksa long pes 8, 9]
God i tok promis long nupela taim bai kamap na olgeta man bai stap bel isi long en