Bel Isi Tru​—⁠Nau na Inap Oltaim Oltaim

YUMI save, God Jehova inap tru long helpim lain bilong em na bai ol i gat bel isi long sindaun bilong ol. Em “God I Gat Olgeta Strong.” (Song 68:14) Insait bilong nem bilong em i olsem “Em i Mekim i Kamap.” Dispela i kamapim klia olsem em dispela wanpela Man tasol em inap rausim olgeta samting i laik pasim em bambai em i ken truim tok promis bilong em na kamapim laik bilong em; i no gat narapela long heven o long graun inap mekim olsem. God yet i tok: “Olsem tasol tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.”​—⁠Aisaia 55:⁠11.

God i save givim bel isi long ol man i bilip long em. Baibel i tokaut klia long dispela samting. Spirit holi i stiaim tingting bilong saveman King Solomon na em i tok: “Bikpela i olsem wanpela strongpela haus. Ol stretpela man i ken ran i go long en na i stap gut.” Na em i tok moa olsem: “Sapos man i bilip strong long Bikpela, bai em i stap gut.”​—⁠Sindaun 18:10; 29:⁠25.

Ol Wokman Bilong God i Stap Bel Isi

Long olgeta taim Jehova i bin givim bel isi long ol man i wetim em, olsem: God i bin lukautim profet Jeremaia. Taim lain bilong Jerusalem i lusim Jehova, ol ami bilong Babilon i kam banisim Jerusalem, na ol manmeri “i sot tru long kaikai na . . . i hangre nogut tru.” (Esekiel 4:​16) Kaikai i go sot olgeta na sampela meri i kukim pikinini bilong ol yet na kaikai. (Krai 2:​20; 4:​10) Long dispela taim Jeremaia i stap kalabus, long wanem, em i autim tok na i no pret, olsem na Jehova i mekim na “long olgeta de ol i save kisim wanpela bret long haus bret na givim long Jeremaia. Tasol taim olgeta bret bilong taun i pinis, ol i no inap mekim moa.”​—⁠Jeremaia 37:⁠21.

Taim ol Babilon i kisim Jerusalem, ol i no bin kilim i dai Jeremaia o kisim em i go kalabus long Babilon, nogat. “Nebusaradan [em nambawan ofisa bilong Babilon] i givim Jeremaia wanpela presen na sampela kaikai na larim em i go.”​—⁠Jeremaia 40:⁠5.

Sampela handet yia bihain, Krais Jisas i tokim ol wokman bilong God: “Yupela i no ken tingting planti na tok, ‘Bai yumi kaikai wanem samting? Bai yumi dring wanem samting?’ Nogat. Ol haiden i save wari long painim olgeta dispela samting. Tasol Papa bilong yupela i stap long heven em i save pinis, yupela i mas kisim dispela olgeta kain samting. Tasol namba wan samting yupela i mas mekim i olsem. Yupela i mas larim God i stap king bilong yupela [olsem wok long painim kingdom pastaim], na kisim stretpela pasin bilong em, na bai em i givim dispela olgeta arapela samting tu long yupela.”​—⁠Matyu 6:​31-​33.

Olsem wanem? Ating Jehova bai lukautim ol wokman bilong em long olgeta taim na ol hevi bilong nau i no ken painim ol? Nogat, i no olsem. Ol man i stap gut long em, hevi i save painim ol tu. Ol Kristen tru i save sik, na ol man i save mekim nogut long ol, na ol raskol i save stilim ol samting bilong ol o paitim ol, na ol i save kisim bagarap na ol i dai, na ol narapela hevi tu i save painim ol.

Tru, Jehova i no pinisim yet ol hevi na pen na givim bel isi olgeta long ol, tasol ol ripot i kamapim klia olsem Jehova i save mekim wok long strong bilong em bilong givim kaikai samting long ol wokman bilong em na lukautim ol. Na ol Kristen i save bihainim ol lo bilong Baibel, na dispela i lukautim ol na i gat planti kain hevi i no save painim ol. (Sindaun 22:⁠3) Na tu, ol i insait long bikpela lain brata sista spirit i stap long olgeta hap, em ol i gat pasin sori na narapela i save helpim narapela long taim bilong hevi o ol i sot tru long ol samting. (Jon 13:​34, 35; Rom 8:​28) Olsem: Taim bikpela pait i kamap long Ruanda, ol Witnes Bilong Jehova long Yurop i kisim toksave olsem ol brata bilong ol long Ruanda i sot tru long ol samting, olsem na kwiktaim ol i givim mani na ol narapela samting na ol i salim 65 ton klos na planti marasin na kaikai samting inap olsem 1,600,000 dola.​—⁠Skelim wantaim Aposel 11:​28, 29.

Tru, Jehova i save larim hevi i painim ol Kristen tru, tasol ol i save em bai givim strong na helpim na gutpela tingting long ol bambai ol inap karim ol dispela hevi na sanap strong. Aposel Pol i tokim ol wanbilip: “Ol traim [olsem hevi] i bin kamap long yupela . . . i wankain olsem ol traim i save kamap long olgeta man. Na God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. Dispela rot i olsem. Em bai i mekim yupela i sanap strong, na dispela traim bai i no inap daunim yupela.”​—⁠1 Korin 10:⁠13.

Samting God i Save Mekim Bilong Helpim Lain Bilong Em

Long nau i gat planti milion manmeri ol i save amamas long mekim laik bilong God. Em i no subim ol long mekim wok bilong em; ol i mekim, long wanem, ol i save long em na ol i laikim em tumas. Na Jehova i save laikim tumas ol wokman bilong em i stap gut long em, olsem na em i laik mekim graun i kamap wanpela paradais, na ol manmeri bai i stap long gutaim, na no gat sik, na ol bai stap bel isi inap oltaim oltaim.​—⁠Luk 23:⁠43, Nupela Testamen na Ol Sam, bilong 1978.

God bai mekim dispela samting long rot bilong wanpela gavman bilong heven, na King em i bin makim, em Krais Jisas, em bai bosim dispela gavman. (Daniel 7:​13, 14) Baibel i kolim dispela gavman olsem “kingdom bilong God” na “kingdom bilong heven.” (1 Korin 15:50; Matyu 13:44) Kingdom bilong God bai senisim ol gavman bilong ol man. Bai i no gat planti gavman long graun​—⁠bai i gat wanpela gavman tasol. Em bai bosim olgeta hap bilong graun long stretpela pasin.​—⁠Song 72:⁠7, 8; Daniel 2:​44.

Jehova i save singautim olgeta man ol i ken i stap aninit long Kingdom. Wanpela rot bilong em long mekim i olsem: Ol i save tilim ol Baibel long ol man bilong planti kantri, na Baibel i tokim ol long ol samting Kingdom bai mekim bilong helpim ol man. Ol i save tilim Baibel long planti hap bilong graun, winim ol narapela buk, na nau ol man inap kisim Baibel olgeta o sampela hap bilong Baibel long planti tok ples, winim 2,000.

Long pasin sori God Jehova i save helpim ol man long kisim save long ol tok Baibel i mekim long Kingdom. Bilong helpim ol olsem, em i save skulim na salim ol man i go bilong kamapim klia ol tok bilong Baibel long ol narapela man. Long nau, winim 5 milion Witnes Bilong Jehova i autim gutnius bilong Kingdom bilong God long ol man long 230 samting kantri.

Olgeta Man Bai Stap Bel Isi Tru?

Yu ting olgeta manmeri bai kirap bihainim ol stretpela lo bilong God bambai ol i ken bihainim dispela singaut na kamap man bilong i stap aninit long Kingdom bilong God? Nogat, long wanem, planti man i no laik mekim laik bilong God. Ol i sakim wok bilong helpim ol long senisim wokabaut bilong ol na mekim i kamap gutpela. Tru tumas, ol i kamapim bel bilong ol, ol i kain olsem ol man Jisas i bin toktok long ol, olsem: “Bel bilong dispela lain manmeri i pas pinis, na yau bilong ol i les long harim toktok, na ol i pasim pinis ai bilong ol, nogut ai bilong ol i lukim wanpela samting, na yau bilong ol i harim tok, na bel bilong ol i save long as bilong tok, na ol i tanim bel na kam bek long mi [God] na mi mekim ol i kamap orait gen.”​—⁠Matyu 13:15.

Olsem wanem bel isi i ken i stap long graun namel long ol man i no laik bihainim ol stretpela lo bilong God? I no inap tru. Ol man i givim baksait long God ol inap bagarapim bel isi bilong ol man i laik mekim wok bilong Jehova.

God i no save subim ol man long senisim pasin bilong ol, tasol em i no ken larim pasin nogut i stap oltaim. Jehova i isi long ol man na em i wok long salim ol Witnes bilong em i go na skulim ol long ol lo na laik bilong em, tasol em i no ken mekim inap longpela taim moa, nogat. Krais Jisas i tok profet olsem: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”​—⁠Matyu 24:⁠14.

Taim “las de” i kamap, olsem wanem long ol man i sakim ol lo bilong God? Kot bilong God bai painim ol na bai ol i bagarap olgeta. Baibel i toktok long strafe bai painim “ol man i no laik save long God na i no bihainim gutnius bilong Jisas, Bikpela bilong yumi. Ol dispela man bai i kisim pe nogut olsem. . . . Ol bai i bagarap i stap oltaim oltaim.”​—⁠2 Tesalonaika 1:​6-9.

Em Nau​—⁠Bel Isi Tru Inap Oltaim!

Taim Jehova i bagarapim pinis ol man i sakim ol lo bilong em long i stap isi, Kingdom bilong God bai kamapim gutaim i gat bel isi long en, bilong helpim ol stretpela man long graun. (Song 37:​10, 11) Dispela nupela taim bai i narapela kain tru long dispela taim nau yumi stap long en!​—⁠2 Pita 3:13.

Bikpela hangre i no ken kamap moa. Olgeta man bai i gat planti kaikai. Baibel i tok, bai i gat “bikpela kaikai tru” bilong “ol manmeri bilong olgeta kantri.” (Aisaia 25:⁠6) Kaikai i no ken sot, long wanem, “planti rais na wit samting i ken kamap long ol gaden bilong ol manmeri.”​—⁠Song 72:⁠16.

Ol man i no ken sindaun moa long ol liklik pipia haus na ol skwota setelmen. Aninit long Kingdom bilong God olgeta man bai i gat gutpela haus, na ol bai i kisim ol kaikai i kamap long gaden bilong ol yet na kaikai. Baibel i tok promis olsem: “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring.”​—⁠Aisaia 65:⁠21.

Long nau i no gat planti wok mani, tasol aninit long Kingdom bai i gat ol gutpela wok i stap na ol man bai i lukim ol gutpela samting i kamap long wok bilong ol. Baibel i tok: “Bai ol i amamas long ol samting ol yet i bin hatwok long kamapim. Wok ol i mekim bai i no inap lus nating.”​—⁠Aisaia 65:​22, 23.

Aninit long Kingdom ol man i no ken kisim pen na i dai long sik. Baibel i tokim yumi olsem: “I no gat man . . . bai i tok olsem, ‘Mi gat sik.’ ”​—⁠Aisaia 33:⁠24.

Long dispela Paradais liklik taim bai kamap tru long graun, sik na pen na hevi na dai bai pinis olgeta. Yes, dai tu bai pinis! Ol man bai stap oltaim oltaim long Paradais! Baibel i tok, God “bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—⁠KTH 21:⁠4.

Aninit long wok king bilong Krais Jisas, em “King bilong kamapim gutpela sindaun na bel isi,” ol manmeri long graun bai i stap bel isi tru. Tru tumas, bel isi bai stap long olgeta hap bilong graun aninit long dispela wanpela gavman i mekim stretpela pasin na pasin sori​—⁠em Kingdom bilong God.​—⁠Aisaia 9:​6, 7; KTH 7:​9, 17.

[Rait long pes 4]

“Taim ol man i stap bel isi, dispela i makim olsem ol i bilip long gutpela samting bai kamap bihain, . . . [ol i bilip olsem] wok politik na ol samting bilong mani na wok bisnis bai kamap gutpela.”​—⁠Em tok bilong wanpela meri i stap long Esia

[Rait long pes 5]

“Samting i save mekim na yumi no stap bel isi, em pasin bilong pait na bagarapim man, na pasin bikhet.”​—⁠Em tok bilong wanpela man i stap long Saut Amerika

[Rait long pes 6]

“Taim ol i kam . . . pait long kantri bilong mipela, mi no stap bel isi. Sapos i gat pait long wanpela kantri, olsem wanem ol man inap i stap bel isi?”​—⁠Em tok bilong wanpela sumatin bilong komyuniti-skul long Midel-Is

[Rait long pes 7]

“Taim mi save mi inap wokabaut long rot long nait na i no gat wanpela man i reipim mi, bai mi stap bel isi.”​—⁠Em tok bilong wanpela yangpela meri bilong skul long Afrika