Yu Laikim Wanem Kain Gutaim?
NARAPELA narapela man i gat narapela narapela tingting long gutaim. Sampela i ting sapos ol strongpela lain i gat ami ol i lusim pasin birua na sindaun gut wantaim, nau gutaim i kamap. Olsem: Tupela strongpela lain long graun long nau wantaim ol poroman bilong ol long Yurop ol i bin pasim tok long mekim planti samting bambai ol liklik kros i no ken i go bikpela na kirapim pait nuklia long olgeta hap. Yiabuk bilong wanpela lain (Stockholm International Peace Research Institute Yearbook 1990) i tok ol i kirap nogut, long wanem, ol lain “long ol narapela hap bilong graun” i no tingim ol dispela samting tupela lain hia i mekim.
Tasol ol planti milion manmeri long ol kantri i stap rabis ol i gat narapela tingting long “gutaim.” Sapos ol i gat kaikai na marasin samting bilong lukautim skin bilong ol bai ol i ting, ‘Em i gutaim nau, yumi stap gutpela.’ Wanpela saveman bilong wok politik (em Yash Tandon) i tok, ‘Planti man i bihainim tingting bilong ol man long hap bilong Wes, em ol i ting . . . “gutaim” em olsem ol man i lusim ol samting bilong pait, tasol ol i no tingim bikpela hap lain bilong graun, em ol i no gat kaikai na ol i no gat haus.’
Tasol Baibel i tok promis olsem, taim Kingdom bilong God i bosim graun bai i no gat pait moa. Baibel i tok: “[God] i save mekim i dai pait long olgeta hap graun. Em i save brukim olgeta banara na spia, na i save kukim ol hap plang long paia.” (Buk Song 46:9; Aisaia 2:4) Na bai ol man i no ken sik moa. Baibel i tok: “I no gat man . . . bai i tok olsem, ‘Mi gat sik.’ Na Bikpela bai i lusim sin bilong ol manmeri.”—Aisaia 33:24.
Taim dispela Kingdom i bosim graun, bai ol man i no gat hatwok moa long painim wok na liklik wansiling bilong lukautim ol. “Ol . . . bai i wokim ol haus na stap long ol. Na bai ol i planim ol gaden wain na wokim wain na dring. Ol birua i no inap kam moa na rausim ol manmeri bilong mi na sindaun long ol haus bilong ol na kisim ol gaden wain bilong ol na wokim wain na dring.”—Aisaia 65:21, 22.
Na bikpela samting tru em olsem: Kingdom bilong God bai pinisim as bilong ol hevi na ol samting nogut i mekim na ol man i no inap i stap bel isi na kisim gutpela sindaun. Yumi tingim ol gavman ol man i bin kamapim na long bipo yet i kam inap long nau wok bilong ol dispela gavman i no kamap gutpela na ol i bin mekim nogut long ol man—orait yumi laik save, husat i bos tru bilong ol dispela gavman? I gat gutpela as na God i bin larim ol dispela gavman i stap, tasol bos tru bilong ol dispela gavman em Satan, olsem na em i gat asua long ol hevi i bin kamap long rot bilong ol dispela gavman. Baibel i tok: “Dispela graun olgeta em i stap aninit long strong bilong Satan.”—1 Jon 5:19.
Taim Kingdom bilong God i bosim graun, bai yumi amamas, long wanem, truim bilong tok bilong Pol bai kamap, em Pol i bin tokim ol Rom: “God bilong givim gutpela sindaun na bel isi long yumi, em bai i . . . krungutim Satan aninit long lek bilong yupela”! (Rom 16:20) Kingdom bilong God long heven i stap long han bilong Krais Jisas, dispela samting tasol inap mekim dispela samting. Olsem na taim dispela Kingdom i bosim graun, long dispela taim tasol bai graun i kamap olsem gutpela ples paradais.—Stat 1:28; Luk 23:43.
Tru tumas, gutaim em Baibel i tok promis long en, em i gutpela tru, na em bai kamap long olgeta hap na i stap oltaim. Dispela kain gutaim i winim tru gutaim ol man i bin tingting long kamapim. Taim dispela gutaim Baibel i tok long en em i kamap, “ol manmeri bai i no i dai moa, na ol bai i no bel hevi na krai moa, na ol bai i no inap kisim pen gen”! (Kamapim Tok Hait 21:4) Olsem wanem? Yumi ken bilipim ol dispela tok promis bilong Baibel? Yumi ken bilipim, long wanem, God i gat olgeta strong, em Man bilong wokim olgeta samting, nem bilong em Jehova, em i as bilong ol dispela tok promis, na em i tok tu: “Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.” (Aisaia 55:11) Ol wok Jehova i mekim long bipo na long nau tu bilong kamapim gutaim bilong i stap oltaim, dispela wok bilong em i mas kamap gutpela—i no inap lus nating. Bai olgeta man i stap amamas na bel isi na kisim gutpela sindaun, na dispela bai kamapim klia tru olsem Jehova em i King bilong oltaim.