Baibel i Tok Wanem?
I Stap Wanpela Tasol, i Gat Gutpela Samting Bilong En
WANPELA taim Jisas “em wanpela i go antap long maunten, bilong em i ken beten. Na long taim san i go daun, em wanpela tasol i stap long maunten.” (Matyu 14:23) Narapela taim “long moningtaim tru Jisas i lusim taun na em i go long wanpela hap i no gat man.” (Luk 4:42) Dispela tupela tok bilong Baibel i makim olsem Krais Jisas i laik stap wanpela tasol long sampela taim na em i ting kain taim olsem i bikpela samting.
Na Baibel i stori long sampela man moa, em ol i olsem Jisas na ol i ting i gutpela samting long i stap wanpela tasol long sampela taim. Taim man bilong raitim Song i stap wanpela tasol long nait na was i stap, em i bin tingim tingim Bikpela Man bilong wokim em. Na taim Krais Jisas i harim tok olsem ol i bin kilim i dai Jon Bilong Baptais, kwiktaim em i “go long wanpela hap i no gat man.”—Matyu 14:13; Song 63:6.
Long nau, ol manmeri i save go i kam na i gat planti pairap tu bilong ol samting, olsem na ol man i no ting em i bikpela samting long i stap wanpela tasol long sampela taim, maski ol i mas i stap olsem o ol yet i gat laik long mekim. Olsem wanem? Yu inap tingim laspela taim yu bin i stap wanpela tasol? Wanpela yangpela meri marit i tok: “I no gat wanpela taim mi bin stap wanpela.”
Tasol olsem wanem? Sampela taim yumi mas i stap wanpela? Sapos olsem, orait olsem wanem dispela kain taim i no gat pairap samting long en i ken helpim yumi na bai yumi kisim gutpela samting long en? Na stretpela tingting i mekim wanem wok bilong helpim dispela pasin bilong i stap wanpela?
Stap Wanpela—Bilong Wanem Em i Gutpela Samting?
Baibel i tok, wanpela man bilong bipo i save lotuim God, em Aisak, em i laik i stap wanpela na “long wanpela apinun em i wokabaut long ples i gat sotpela gras.” Bilong wanem em i mekim olsem? Em i laik bai em i ken tingim tingim long bel sampela samting. (Stat 24:63) Wanpela buk dikseneri i tok, pasin bilong tingim tingim ol samting, em pasin bilong ‘stap isi tasol na wok long tingting long ol samting.’ I olsem ‘tingim tingim ol samting na mekim i go inap longtaim liklik.’ Aisak bai kisim sampela bikpela wok, olsem na taim em i stap wanpela na tingim tingim dispela samting bai kamap, dispela inap helpim em long wokim gut tingting bilong em, na stretim gut ol samting em i tingting long en, na skelim wanem ol samting i olsem namba wan samting.
Wanpela saveman bilong skelim tingting em i tok, ‘sapos sampela taim tasol yumi stap wanpis, orait taim ol narapela i no stap yumi inap stretim gut ol samting yumi tingting long en, na yumi inap putim gut tingting long dispela samting.’ Planti ol i tok, dispela i gutpela bilong maloloim tingting na kisim nupela strong, na i save helpim tingting long i stap gut.
Sampela gutpela samting bilong tingim tingim ol samting bilong God i olsem: Bai yu tingting gut na bosim gut tingting na bel bilong yu, em ol samting bilong helpim yu long stap olsem man i gat gutpela tingting na i save mekim ol gutpela tok tasol na gutpela pasin, na dispela bai mekim na bai yu stap gut wantaim ol narapela. Olsem: Man i lain long tingim tingim ol samting bilong God, em inap lain long wanem taim em i taim bilong pasim maus. Em i no save hariap long kamapim tok bilong em, nogat; pastaim em i tingting gut long samting tok bilong em bai mekim long narapela. Spirit holi i kirapim wanpela man bilong raitim Baibel long tok olsem: “Sapos man i no tingting gut pastaim na i toktok, orait bai yumi hat tru long helpim em.” (Sindaun 29:20) Wanem samting inap daunim dispela pasin? Baibel i tok: “Stretpela man i save tingting gut pastaim, na bihain em i bekim tok long arapela man.”—Sindaun 15:28; skelim wantaim Song 49:3.
Bilong helpim wanpela Kristen long kamap strong long ol samting bilong spirit, pasin bilong i stap isi tasol na i stap wanpela bilong tingim tingim ol samting bilong God, em i bikpela samting. Tok bilong aposel Pol i stret wantaim dispela, em i tok: “Oltaim yu mas lukautim gut ol dispela wok bilong yu. Yu mas wok hat long mekim olgeta dispela wok i kamap gut, na bai olgeta manmeri i lukim pasin bilong yu yet i kamap gutpela tru.”—1 Timoti 4:15.
Stap Wanpela i Helpim Yumi Long Kam Klostu Long God
Wanpela man bilong Inglan i save raitim buk, em i tok: “Pasin bilong i stap wanpela tasol i save helpim yumi long beten long God na em i ken harim beten bilong yumi.” Sampela taim Jisas i pilim olsem em i mas lusim ol narapela man na stap wanpela tasol bilong beten long God. Baibel i stori long wanpela kain taim olsem: “Long moningtaim tru Jisas i kirap na i go ausait na em i go long wanpela hap i no gat man, na em i prea i stap.”—Mak 1:35.
Buk Song i toktok planti taim long pasin bilong tingim tingim ol samting bilong God. King Devit i toktok long Jehova olsem: “Taim mi slip long bet mi save tingting long yu.” Na Asap i mekim wankain tok olsem: “Bai mi tingting long olgeta samting yu bin mekim. Yu bin mekim ol strongpela wok, na bai mi tingim dispela tu.” (Song 63:6; 77:12) Olsem na taim yumi tingting long ol pasin na wok bilong God, dispela i kamapim planti gutpela samting. Dispela i save helpim yumi long pilim tru gutpela pasin bilong God na long go klostu moa long em.—Jems 4:8.
Was Gut
Tru, sapos sampela taim yumi stap wanpela, em gutpela. Tasol sapos planti taim yumi save stap wanpela na yumi stap olsem inap longpela taim, em i no gutpela na yumi inap kisim nogut long en. Sapos yumi stap wanpis planti taim, dispela i narapela kain long ol samting yumi man i mas kisim, olsem bung wantaim ol narapela, na toktok wantaim, na kamapim long ol narapela olsem yumi laikim ol tru. Na sapos yumi stap wanpis tasol, dispela i olsem graun em gras nogut i kamap long en, olsem tingting kranki na pasin bilong tingim yumi yet tasol inap kamap long dispela kain pasin. Wanpela savetok bilong Baibel i tok: “Man i save stap wanpis, em i save tingting long em yet tasol. Maski sapos ol arapela man i gat gutpela tingting, dispela man i no laikim tingting bilong ol.” (Sindaun 18:1) Bilong yumi ken kisim stretpela tingting long pasin bilong i stap wanpela tasol, yumi mas save long ol samting nogut em inap kamap sapos yumi stap wanpis planti taim.
Olsem Jisas na ol narapela man bilong bipo, em ol i bin tingim ol samting bilong spirit, ol Kristen long nau i ting ol hap taim ol inap stap wanpela tasol, em i gutpela samting tru. Tru, yumi gat planti wok na hevi, na sampela taim i hatwok long painim taim na rot bilong i stap wanpela tasol na tingim tingim ol samting bilong God. Tasol olsem olgeta gutpela samting, yumi mas makim taim bilong mekim olsem, “nogut dispela taim i lus nating.” (Efesus 5:15, 16) Sapos yumi mekim olsem, yumi inap mekim wankain tok olsem man bilong raitim Song i tok: “Bikpela, mi laik bai tok bilong mi na tingting bilong mi i ken i orait long ai bilong yu.”—Song 19:14.