Ol Yangpela i Laik Save . . .

Bilong Wanem Papamama i No Stap Wantaim Mi?

Joaquín i tok: “Olsem wanem long i stap bilong mi na i no gat papamama? Mi ken tok olsem planti samting i mekim na mi no stap amamas. Em i hatwok tru long go bikpela sapos yu no gat papamama bilong holim yu na sori long yu.”

Abelina i gat 16 krismas, em i tok: “Bikpela hevi i painim mi em long de ol papamama i mas kam long skul na sainim ripot-kat bilong skul. Mi bel hevi tru na mi pilim olsem mi stap wanpis. Sampela taim long nau tu mi pilim olsem.”

EM I wanpela bikpela hevi long taim bilong yumi​—⁠planti milion yangpela ol i go bikpela na i no gat papamama. Long Isten Yurop planti tausen pikinini i no gat papamama, long wanem, ol i bin dai long pait. Long Afrika sik AIDS i bin kamapim wankain hevi. Sampela papamama i ranawe lusim nating pikinini bilong ol. Pait o bikpela win ren samting i mekim na sampela famili i bruk.

Wankain samting i bin kamap long taim bilong ol man i bin raitim Baibel. Planti taim Baibel i tok long ol hevi bilong pikinini em papamama bilong em i dai pinis. (Song 94:6; Malakai 3:⁠5) Long bipo tu, ol pait na ol narapela bikpela hevi i bin brukim ol famili. Olsem na Baibel i stori long wanpela pikinini meri ol Siria i bin kisim long papamama bilong em taim ol i kam bilong stilim ol samting.​—⁠2 King 5:⁠2.

Ating yu wanpela bilong planti milion yangpela em ol i no gat papamama. Sapos yu stap olsem, yu pilim pinis hevi bilong dispela kain sindaun. Bilong wanem dispela samting i bin painim yu?

Em i No Asua Bilong Yu

Olsem wanem? Yu ting God i givim strafe long yu? O yu belhat long papamama bilong yu, long wanem, ol i dai​—⁠i olsem ol i dai long laik bilong ol yet. Namba wan samting yu mas save long en, i olsem: God i no belhat long yu. Na papamama i no lusim yu long laik bilong ol yet. Indai em i wanpela bikpela hevi bilong ol manmeri bilong graun i gat sin, na sampela taim ol papamama i dai taim pikinini bilong ol i yangpela yet. (Rom 5:​12; 6:​23) Gutpela waspapa bilong Krais Jisas, em Josep, em i dai.a Na Jisas i no gat sin, olsem na long dispela as Josep i no dai, nogat tru.

Yu mas save tu, yumi stap long taim bilong “planti hevi nogut tru.” (2 Timoti 3:​1-5) Pasin bilong bagarapim man, na pait, na pasin raskol i mekim, na planti milion manmeri ol i dai nating long taim bilong yumi. Sampela narapela ol i kisim bagarap, long wanem, “taim nogut i save painim yumi olgeta.” (Saveman 9:​11) Tru, yu bel hevi tru taim papamama i dai, tasol em i no asua bilong yu. Yu no ken sutim tok long yu yet na tok em asua bilong yu o bel hevi olgeta, nogat; larim tok promis bilong God long kirap bek i mekim gut bel bilong yu.b Jisas i tok: “Yupela i no ken tingting planti long dispela tok bilong mi. Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:​28, 29) Abelina, em pastaim yumi stori long em, em i tok: “Mi laikim tru Jehova na dispela bilip bilong kirap bek i bin helpim mi tru.”

Tasol olsem wanem sapos papamama bilong yu ol i stap yet, tasol ol i bin ranawe lusim yu? God i tok, papamama i mas mekim bikpela long ol pikinini bilong ol na lukautim ol long ol samting bilong skin. (Efesus 6:4; 1 Timoti 5:⁠8) Tasol sori tru, sampela papamama i “no save long pasin bilong i stap pren” o sori long pikinini bilong ol. (2 Timoti 3:⁠3) Papamama bilong sampela i lusim ol, long wanem, ol i stap rabis olgeta, o ol i kalabus long ol drak o dring, o ol i stap long kalabus. Tru, i gat sampela papamama i lusim pikinini bilong ol, long wanem, ol i save tingim ol yet tasol, pikinini nogat. Tasol maski i gat wanem as na famili i bruk, dispela i save bagarapim tru bel bilong ol yangpela. Tasol dispela i no makim olsem sampela pasin bilong yu i nogut o yu mas pilim asua long dispela samting. God bai kotim papamama bilong yu long pasin ol i bin mekim long yu. (Rom 14:12) Tasol sapos sampela bikpela hevi i winim strong bilong papamama i kamap, olsem bikpela win ren samting o sik i kisim ol, na long dispela as papamama i no inap stap wantaim yu, orait, dispela i no asua bilong wanpela bilong famili! Oltaim yu mas tingting olsem bihain yu inap bung gen wantaim famili, maski sampela taim i luk olsem dispela samting i no inap kamap.​—⁠Skelim wantaim Stat 46:​29-​31.

Bikpela Hevi Tru

Taim yu wet long dispela taim, ating planti bikpela hevi inap painim yu. Wanpela ripot (Children in War) em lain United Nations Children’s Fund i kamapim, i tok: ‘Planti hevi inap painim ol pikinini sapos wanpela man i bikpela pinis em i no stap wantaim ol, winim ol narapela pikinini. Kain kain samting bilong bagarapim ol i painim ol, na i no gat man i strongim ol taim ol i go bikpela, na ol man i mekim pasin nogut long ol. Taim papamama i no stap wantaim pikinini, dispela i bagarapim tru bel bilong pikinini.’ Ating yu tu i wok long daunim bikpela bel hevi.

Tingim gen Joaquín, em pastaim yumi stori long em. Marit bilong papamama bilong em i bruk, na ol i ranawe lusim em na ol brata susa bilong em. Long dispela taim em i gat wanpela krismas tasol, na ol susa bilong em ol i mekim bikpela long em. Em i tok: “Bipo mi save askim ol bilong wanem mipela i no gat papamama olsem ol pren bilong mi. Na taim mi lukim wanpela papa i pilai wantaim pikinini man bilong em, mi laik dispela man i stap olsem papa bilong mi.”

Kisim Helpim

Tru, em i hatwok long go bikpela taim i no gat papamama bilong mekim olsem long yu, tasol dispela i no makim olsem yu no inap kamap gutpela. Taim narapela i helpim na strongim yu, yu inap abrusim bagarap na i stap gut. Ating yu hatwok long bilip long dispela tok sapos nau yu bel hevi. Tasol yu mas save olsem, bel hevi em i wanpela pasin bilong yumi ol man, na yu no ken bel hevi inap oltaim oltaim. Saveman 7:​2, 3 i tok: “Sapos yumi go long haus we ol man i krai long man i dai pinis, em i gutpela pasin na i winim pasin bilong go long haus we ol i mekim bikpela kaikai. . . . Sapos yumi bel hevi long wanpela samting, em i gutpela, na i winim pasin bilong lap. I tru, bel hevi inap mekim pes bilong yumi i tudak, tasol em i helpim yumi long tingting gut long olgeta pasin bilong dispela graun.” Em nau, taim bikpela hevi i painim yumi, i stret na i gutpela long krai sori. Na sapos yu kamapim bel bilong yu long wanpela pren i pilim hevi bilong yu o long wanpela strongpela brata o sista long kongrigesen, na yu toktok wantaim em long bel hevi bilong yu, ating dispela bai helpim yu.

Tru, ating yu laik i stap wanpis. Tasol Sindaun 18:1 i tok: “Man i save stap wanpis, em i save tingting long em yet tasol. Maski sapos ol arapela man i gat gutpela tingting, dispela man i no laikim tingting bilong ol.” Em i gutpela moa long askim man i gat gutpela pasin na em i pilim hevi bilong yu, long helpim yu. Sindaun 12:25 i tok: “Sapos man i save wari oltaim, em bai i bel hevi tru na tingting bilong en bai i bagarap. Tasol sapos man i mekim gutpela tok long wantok bilong en, orait wantok bai i belgut tru.” Yu no inap kisim “gutpela tok” long narapela sapos yu no tokim em long “wari” bilong yu.

Yu inap toktok wantaim husat? Painim wanpela insait long kongrigesen Kristen bilong helpim yu. Jisas i tok promis olsem insait long kongrigesen yu inap painim “planti brata na planti susa na planti mama,” na ol bai laikim yu tru na tingim yu. (Mak 10:30) Joaquín i tok: “Taim mi bung wantaim ol brata Kristen, dispela i helpim mi long kisim gutpela tingting long i stap bilong mi. Taim mi go oltaim long ol miting, dispela i mekim na mi laikim Jehova moa yet na mi laik mekim wok bilong em. Ol strongpela brata i helpim famili bilong mi long ol samting bilong spirit, na ol i givim gutpela tok bilong stretim ol. Long nau sampela brata susa bilong mi, ol i mekim wok bilong God long olgeta de.”

Tingim tu, Jehova i “save lukautim ol pikinini, papa bilong ol i dai pinis.” (Song 68:​5, 6) Long taim bilong ol man i bin raitim Baibel, God i strongim lain bilong em long marimari long ol pikinini em papamama bilong ol i dai pinis na long mekim stretpela pasin long ol. (Lo 24:19; Sindaun 23:​10, 11) Na long nau tu em i save tingim ol yangpela i no gat papamama. Olsem na beten long God, na bilip olsem em i tingim yu tru na em bai harim beten bilong yu. King Devit i tok: “Maski papa na mama i givim baksait long mi, Bikpela bai i lukautim mi. Yu mas bilip na wetim Bikpela i kam helpim yu. Sanap strong, yu no ken bel hevi.”​—⁠Song 27:​10, 14.

Tasol yangpela i no gat papamama, em i mas winim kain kain hevi long olgeta de. Bai yu slip we? Olsem wanem yu inap kisim ol samting bilong skin? Wanpela stori i kamap bihain bai stori olsem wanem yu inap winim sampela bilong ol dispela hevi.

[Ol Futnot]

[Rait long pes 22]

“Mi laikim tru Jehova na dispela bilip bilong kirap bek i bin helpim mi tru”

[Piksa long pes 22]

Ating sampela taim yu pilim olsem yu stap wanpis

[Ol Piksa long pes 23]

Insait long kongrigesen ol pren inap helpim yu na strongim yu