Ol Yangpela i Laik Save . . .

Olsem Wanem Mi Inap i Stap Gut Sapos Mi No Gat Papamama?

Horacio i tok: “Taim mi gat 3-pela krismas na susa bilong mi em i gat 4-pela krismas, papamama bilong mi i katim marit. Ol i pait long kot long mipela pikinini bai stap wantaim papa o mama, na kot i makim mipela long stap wantaim mama. Tasol taim mi gat 7-pela krismas, mi na susa bilong mi i go stap wantaim papa.”

INAP sampela yia bihain, papa bilong Horacio na pren meri i save stap nating wantaim papa, ol i lusim Horacio na susa bilong em. Horacio i tok: “Olsem na taim mi gat 18 krismas, mi kamap het bilong wanpela famili i gat 3-pela long en​—⁠em mi, na susa bilong mi i gat 19 krismas, na pikinini meri bilong narapela mama, em i gat 12-pela krismas na em i laik stap wantaim mipela.”

Olsem stori i bin kamap paslain long dispela i kamapim klia, planti milion yangpela long olgeta hap ol i no gat papamama.a Olsem Horacio, papamama bilong sampela yangpela ol i bin lusim ol. Na sampela ol i no gat papamama, long wanem, papamama i dai o ol pait o bikpela win ren samting i mekim na famili i bruk. Tasol maski wanem samting i mekim na papamama i no stap wantaim pikinini, dispela em i wanpela bikpela hevi. Na em inap mekim na pikinini i mas kirap mekim ol bikpela wok.

‘Husat Bai Lukautim Mi?’

Krismas bilong yu na i stap bilong yu i mekim na yu inap karim kain hevi olsem o nogat. Tru, hevi i bikpela moa sapos yu pikinini yet o yu gat 13 krismas samting tasol. Tasol ating yu no stap wanpis olgeta. Ating wanpela ankol, o anti, o bikpela brata o susa i orait long yu ken stap wantaim em.

Long ol Witnes Bilong Jehova, wok bilong lukautim ol pikinini em papamama bilong ol i dai pinis, na ol meri em man bilong ol i dai pinis, em hap wok lotu bilong ol. (Jems 1:​27; 2:​15-​17) Na planti taim ol brata sista insait long kongrigesen bai helpim yu. Horacio na ol susa bilong em, ol i bin stadi long Baibel wantaim ol Witnes Bilong Jehova na ol i save go long ol miting bilong ol. Long ol dispela miting ol i bungim wanpela famili Kristen i kirap helpim ol. Horacio i tok: “Mi tok tenkyu tru long Jehova long em i bin soim rot long mipela na mekim pasin sori long mipela long olgeta de! Mipela i kisim helpim insait long kongrigesen long wanpela famili i strong tru long ol samting bilong spirit, na pikinini bilong ol i wankrismas bilong mipela. Ol i kisim mipela olsem pikinini tru bilong ol, olsem na em i namba wan taim mipela i pilim olsem mipela i bilong wanpela famili mipela inap bilip long en.”

Tasol i no olgeta yangpela i save kisim gutpela helpim olsem. Wanpela ripot em lain United Nations Children’s Fund i kamapim, em i tok: “Sampela pikinini i no gat wanpela man i lukautim ol​—⁠ol i go stap wantaim ol famili i save mekim nogut long ol, o ol i subim ol pikinini long mekim wok ol i no kisim pe long en o ol i no gat rot long kisim gutpela wok long bihain, o ol i subim ol long mekim wok pamuk o long kamap wokboi nating.” Olsem na sapos yu gat wanpela man i wok long lukautim yu, yu mas amamas long dispela samting.

Tru, taim yu no gat papamama, dispela em i wanpela bikpela hevi tru. Na ating yu kros, long wanem, ol i no stap bilong lukautim yu. Taim wanpela wanblut o bikpela brata o susa em i tokim yu long mekim sampela samting, dispela inap mekim na yu kros moa yet. Tasol yu no ken kros long ol man i wok long lukautim yu. Baibel i tok: “Lukaut. Nogut yu larim belhat bilong yu i pulim yu long mekim tok bilas . . . Lukaut gut. Nogut yu pas olgeta long pasin nogut.” (Jop 36:​18, 21) Tingim yangpela meri em Baibel i stori long em, nem bilong em Esta. Papamama bilong em ol i dai pinis, olsem na kasen brata bilong em Mordekai, em i mekim bikpela long em. Tru, Mordekai i no papa tru bilong em, tasol em “i tokim Esta long” ol samting em i mas mekim, na Esta i harim tok bilong em, na em i mekim olsem long taim em i bikpela pinis tu! (Esta 2:​7, 15, 20) Wok strong long harim tok bilong ol man i helpim yu na wok gut wantaim ol. Dispela bai mekim na i stap bilong yupela olgeta bai i no gat planti hevi long en.

Wok Bilong Lukautim Famili

Sapos yu gat brata o susa i bikpela long yu​—⁠o sapos yu yet i no yangpela tumas​—⁠ating yu wantaim ol brata susa bilong yu, yupela inap bosim i stap bilong yupela yet. Ating yu mas kamap olsem het bilong famili, na dispela em i wanpela bikpela wok tru! Tasol planti yangpela i gat kain sindaun olsem, ol i bin mekim gutpela wok long mekim bikpela long ol brata susa bilong ol.

Tru, ating sampela taim bai yu bel hevi long sindaun bilong yu, tasol taim yu tingim ol brata na susa bilong yu, olsem yu laikim na tingim tru ol, ating dispela bai helpim yu long kisim stretpela tingting. Na sapos yu ting wok bilong lukautim ol em i wanpela wok God i givim long yu, dispela tu inap helpim yu. Tru tumas, Baibel i tok ol Kristen i mas lukautim wanblut bilong ol. (1 Timoti 5:⁠8) Tasol maski yu wok strong long stap olsem papa o mama long ol brata susa bilong yu, yu no inap kamap papa o mama tru bilong ol.

Yu no ken ting ol brata susa bilong yu bai mekim wankain pasin long yu olsem ol i bin mekim long papamama bilong yupela. Ating longpela taim liklik i mas pinis pastaim na ol i orait long nupela sindaun bilong ol na ol i daun long yu. Olsem na inap long dispela taim, yu no ken bel hevi. Yu mas “rausim olgeta pasin bilong bel nogut na kros na belhat na bikmaus na tok bilas.” Stap olsem gutpela piksa bilong lainim ol brata susa bilong yu long ‘mekim gutpela pasin long ol narapela, na long givim bel long ol narapela, na long lusim sin bilong ol narapela.’​—⁠Efesus 4:​31, 32.

Horacio i tokaut olsem em i bin popaia. Em i tok: “Sampela taim mi bin putim ol strongpela lo long ol susa bilong mi. Tasol dispela samting i bin lukautim mipela, na mipela i mekim pasin i stret long ai bilong Jehova.”

Lukautim Yu Yet

Sapos papamama bilong yu ol i no stap bilong lukautim yu, bai yu tingting planti long lukautim yu yet long ol samting bilong skin. Ating sampela brata sista long kongrigesen Kristen ol inap helpim yu na ol brata susa bilong yu​—⁠sapos yu gat ol brata susa​—⁠long lain long wok bilong kukim kaikai, klinim haus, na long mekim ol narapela wok bilong haus nau yupela yet i mas mekim. Tasol bai yu mekim wanem bilong kisim mani? Ating i gat wanpela rot tasol​—⁠yu mas painim wok mani.

Tasol i no gat planti wok mani ol yangpela i ken kisim sapos ol i bin kisim liklik skul tasol, o bipo ol i no bin mekim wok mani, o ol i no gat save long mekim sampela wok. Olsem na sapos yu inap pinisim skul bilong yu o go long wanpela skul i lainim yu long mekim sampela wok, em i gutpela tru sapos yu mekim olsem. Horacio i tok: “Mi wantaim bikpela susa, mipela i mekim wok mani na baim skul bilong mi na bilong narapela susa.” Sapos yu sindaun long wanpela kantri i stap rabis, ating yu mas wokim gut tingting bilong yu bilong kisim wok mani.​—⁠Lukim stori “Long Ol Kantri i No Gat Planti Wok Bisnis, Ol i Kirapim Wok Bilong Ol Yet,” long Kirap! bilong Ogas 8, 1995.

Long ol kantri i gat planti wok bisnis, ating yu inap kisim mani samting long gavman. I gat planti lain bilong gavman o ol lain ol man yet i bosim bilong helpim ol pikinini em papamama bilong ol i dai pinis o papamama i bin lusim ol. Sampela lain olsem inap helpim yu long kisim kaikai o long painim ples slip. Tasol mani yu kisim, yu mas mekim gutpela wok long en. Baibel i tok: ‘Mani i save helpim yumi long taim nogut.’ (Saveman 7:​12) Na sapos yu no was gut taim yu skelim mani na baim ol samting, wantu tasol ‘i olsem mani i kisim wing na i flai i go.’​—⁠Sindaun 23:​4, 5.

I no hatwok tumas long kisim ol samting bilong skin sapos wanpela man i bikpela pinis em i lukautim yu. Tasol bihain, yu mas lukautim yu yet long ol samting bilong skin. Na yu no gat moa papamama bilong strongim yu long skul gut, olsem na ating yu mas wok strong long putim tingting bilong yu long ol samting yu skul long en. Tok aposel Pol i mekim long Timoti bambai em i ken kamap strong long ol samting bilong spirit, ating dispela tok i stret long ol wok bilong skul tu. Em i tok: “Oltaim yu mas lukautim gut ol dispela wok bilong yu. Yu mas wok hat long mekim olgeta dispela wok i kamap gut, na bai olgeta manmeri i lukim pasin bilong yu yet i kamap gutpela tru.” (1 Timoti 4:​15) Taim yu mekim olsem, bai yu stap olsem gutpela piksa long ol man i stap klostu long yu, na tu, dispela bai helpim yu yet.

Nambawan bikpela samting yu mas mekim, em yu mas lukautim yu yet long ol samting bilong spirit. Makim taim bilong mekim ol wok bilong spirit inap long skel bilong yupela. (Filipai 3:​16) Olsem: Em i pasin bilong ol famili Witnes long skelim tok bilong Baibel long olgeta de. Gutpela sapos yupela tu i mekim olsem, a? Pasin bilong stadi long Baibel na pasin bilong go oltaim long ol miting Kristen, dispela bai helpim yu long stap strong long ol samting bilong spirit.​—⁠Hibru 10:​24, 25.

Karim Hevi

Tru, taim papamama i no stap wantaim yu, bai yu hatwok tru, tasol dispela i no makim olsem yu no inap i stap amamas. Nogat. Paola i gat 20 krismas, na mama bilong em i dai taim Paola i gat 6-pela krismas tasol. Taim Paola i gat 10-pela krismas, papa bilong em i dai. Wanpela gutpela meri i kisim Paola wantaim 4-pela susa bilong em bilong i stap wantaim em. Olsem wanem? I stap bilong em i nogut olgeta? Nogat. Paola i tok: “Tru, mipela i no olsem ol famili i gat papamama, tasol i stap bilong mipela em i gutpela. Na pasin sori i stap namel long mipela i strong tru, winim planti famili.”

Susa bilong Paola, em Irene, em i tok: “Maski mipela i no gat papamama, mipela i wankain olsem ol narapela yangpela.” Irene i kamapim wanem tok bilong helpim ol narapela i gat wankain sindaun olsem em? Em i tok: “Yu no ken ting yu lus long olgeta gutpela samting.” Horacio tu i tok: “I stap bilong mipela i mekim na kwiktaim mi kisim tingting bilong man i bikpela pinis.”

Taim pikinini i no gat papamama, dispela em i wanpela bikpela hevi tru. Tasol yu ken bilip tru olsem Jehova bai helpim yu long i stap gut na kisim blesing long em.

[Futnot]

[Piksa long pes 14]

Ol elda Kristen bai helpim yu