Ol Yangpela i Laik Save . . .

Olsem Wanem Mi Inap i Stap Gutpela Piksa Bilong Ol Liklik Brata Susa?

POL i save, liklik brata bilong em i save laik tru long lukim televisen. Tasol wanpela taim em i kirap nogut long lukim liklik brata i pasim televisen long namel bilong program. Bilong wanem em i mekim olsem? Brata bilong Pol i tok: “Dispela piksa i no gutpela tumas. Mi save yu bai pasim televisen, olsem na mi pasim.”

Pasin Pol i bin mekim i olsem gutpela piksa long brata bilong em i ken bihainim—na dispela i gutpela. Olsem wanem? Yu gat ol liklik brata susa? Em nau, toktok na pasin bilong yu inap helpim ol o em inap bagarapim ol. Wanpela buk (Sibling Rivalry, bilong Seymour V. Reit) i tok: “Dispela laik bilong bihainim pasin bilong bikbrata o susa em i strongpela tru na i stiaim pasin na tingting bilong ol pikinini.”

Yu bikpela long ol, olsem na ol liklik brata susa bilong yu bai i laik bihainim olgeta samting yu save mekim. Ating bai ol i bihainim yu long ol toktok na pasin bilong yu. Tru tumas, em i hatwok liklik long i stap olsem gutpela piksa long olgeta taim.a Wanpela yangpela meri nem bilong em Linda, em i no amamas tumas long dispela na em i tok olsem: “Mama bilong mi i tok, mi mas stap olsem gutpela piksa bilong ol narapela. Olsem na mi mas mekim ol gutpela pasin tasol long skul . . . Mi gat bikpela wok tru long mekim.” Na sapos yu gat papa o mama tasol i lukautim yu, ating bai i hatwok tru long yu. Wanpela yangpela man em i gat ol liklik brata susa, em i tok: “Mi kamap olsem papa bilong ol.”

Tasol sapos yu stap bikbrata o susa, em gutpela tu. Bai yu stap olsem gutpela samting i stiaim ol liklik brata susa. Yumi ken skelim dispela samting.

Long Haus

Baibel i tok: “Man i gat gutpela tingting na save, em bai i gat gutpela haus, na famili bilong en bai i kamap strong.” (Sindaun 24:3) Tru tumas, em wok bilong papamama long strongim famili na kamapim bel isi na gutpela sindaun bilong yupela. Tasol sapos yu bihainim savepasin na gutpela tingting, dispela bai helpim ol long kamapim amamas insait long famili.

Olsem wanem? Taim papamama i tokim yu long kisim pipia i go ausait o bilong klinim rum slip bilong yu, yu save mekim? Yu save wok gut wantaim papamama? Yu save bihainim tok bilong ol? O yu save bikhet na bekim maus bilong ol? Sapos olsem, orait yu no ken kirap nogut taim yu lukim ol liklik brata susa i kirap na bihainim pasin bilong yu long bekim maus bilong papamama samting. Tok bilong Baibel long Sindaun 1:8 i tok: “Pikinini, yu mas harim tok bilong papamama bilong yu na yu no ken sakim tok bilong tupela.” Taim yu mekim olsem, em yu bihainim savepasin na gutpela tingting.

Tasol ating i gat gutpela as na yu toktok planti long wok bilong lukautim ol liklik brata susa bilong yu. Wanpela yangpela meri i gat 18 krismas em i tok: “Mama bilong mi i no givim planti wok long tupela brata bilong mi. Mi save mekim olgeta wok long haus, na mi mas mekim ol gutpela pasin tasol, na olgeta narapela samting tu.” Ating tok bilong em i stret liklik. Tasol yu no ken bikhet—i gutpela sapos yu toktok gut wantaim papamama long pasin isi, na long dispela yu soim olsem yu daun long tupela. Yu inap kamapim klia tingting bilong yu na ol samting yu ting em inap long helpim yupela. Taim yupela i toktok gut wantaim na yu no haitim wanpela samting long papamama, yu no helpim yu yet tasol, nogat. Yu makim gutpela pasin ol liklik brata susa i ken bihainim taim ol i laik stretim ol hevi samting bilong ol.

Tasol taim yu toktok pinis wantaim papamama, yu mas tingim: Tupela yet i mas makim wanem samting i gutpela bilong helpim yupela. Olsem na yu mas wanbel long tok bilong ol. Sapos yu mekim olsem, yu makim gutpela pasin ol liklik brata susa i ken bihainim.

Sapos yu laik abrusim ol hevi na kros long mekim ol wok bilong haus samting, orait pastaim yu mas kirap na mekim ol wok bilong yu. I olsem: Oltaim yu save wet long ol narapela i mas tokim yu, no ken tromoi ol klos bilong yu nabaut long plua? O yu save stretim ol samting na yu no wet long narapela i mas kirapim yu? Taim yu yet yu kirap na mekim ol wok samting, dispela bai lainim liklik brata o susa tu olsem, sapos olgeta wan wan insait long famili i mekim wok bilong ol yet, ol samting bai i kamap gutpela insait long famili.—Skelim Galesia 6:5.

Long Skul

Planti yangpela i save kisim kain kain tingting kranki long skul. Ol i tok olsem: ‘Mi les tru long i go long skul.’ Na ol i tok, ‘Bilong wanem mi mas i go long skul?’ ‘Mi no lain long wanpela gutpela samting.’ ‘Taim mi kisim sampela save inap pinis, bai mi lusim skul.’ Olsem wanem? Ol liklik brata susa i harim yu i mekim ol kain tok olsem? O ol i save lukim yu, sampela taim yu bikhet na yu no go long skul? Dispela samting inap bagarapim tingting bilong ol long i go long skul.

Yu mas makim gutpela pasin olsem—yu mas bihainim gutpela na stretpela tingting long ol samting bilong skul. Ating em i hatwok long mekim olsem. Tasol yu mas tingim: Taim yu wok strong long kisim save long skul, dispela bai helpim yu long kisim gutpela save na tingting, na em bai helpim yu long kamap gutpela long ol samting bilong spirit. Tu, bai yu kisim gutpela save bilong mekim kain kain wok samting bilong lukautim yu long bihain, taim yu bikpela man o meri pinis. Long buk bilong helpim ol yangpela (Questions Young People Ask—Answers That Work) i gat wanpela hap i stori long “Skul na Wok.”b Dispela buk i kamapim sampela gutpela tok bilong helpim yu long pasin bilong lainim ol samting.

Sapos yu bihainim gutpela pasin long skul samting, ol liklik brata susa tu bai bihainim dispela pasin. Na taim ol i gat ol homwok samting, sampela taim yu ken helpim ol long mekim homwok bilong ol. Em nau, sapos yu mekim olsem, yu soim olsem yu tingim tru ol na yu kirapim ol long mekim gut ol wok bilong skul. Tasol olsem wanem long pasin bilong yu long skul? Yu save mekim wanem kain pasin long ol tisa bilong yu na ol narapela bikman bilong skul? Yu save belhat na yu laik tok kros wantaim ol? O yu save mekim gutpela pasin na yu daun long ol bikman?—Skelim Taitus 3: 1, 2.

Ol liklik brata susa bilong yu bai skelim tu wanem kain ol poroman yu kisim. Sapos yu kirap raun wantaim ol yangpela lain i save mekim ol pasin bilong dispela graun, ating i no longtaim na bai God i givim baksait long yu na i no laikim yu moa. Olsem Baibel i toksave long 1 Korin 15:33, em i tok: “Sapos yumi poroman wantaim ol man nogut, bai ol i bagarapim gutpela pasin bilong yumi.” Na nogut ol liklik brata susa i kirap na bihainim ol dispela pasin bilong yu. Wanpela yangpela man, mama bilong em i wanpela Kristen, tasol dispela yangpela man i kirap na givim baksait long ol gutpela pasin God i save laikim na em i poroman wantaim wanpela lain yangpela ol i save kisim drak. I no longtaim na em tu i kirap long kisim ol drak. Nau em i tingting planti, nogut liklik brata bilong em tu bai kisim drak, olsem na em i toksave long liklik brata olsem: “Yu no ken tru kisim ol drak!” Tasol pasin bilong em i pulim brata bilong em, na liklik taim bihain brata bilong em tu i bihainim wanpela lain nogut olsem em yet i bin mekim. Ating bai yu no amamas na bel bilong yu i gat tok taim pasin bilong yu i pundaunim brata o susa bilong yu na em i mekim pasin nogut, a?—Skelim Matyu 18:7.

Makim Gutpela Pasin Long Ol Samting Bilong Spirit

Em bikpela samting tru, ol yangpela Kristen i mas bihainim gutpela pasin long ol samting bilong lotu. Taim yu bihainim pasin bilong tingim gut ol samting na yu mekim gut ol pasin em God i laikim, na toktok bilong yu i strongim bel bilong ol man, dispela bai i mekim gut bel bilong Papa bilong yu long beven, na tu, dispela pasin i gutpela piksa tru long ol brata susa bilong yu na ol bai i tingim long olgeta taim.—Sindaun 27:11.

I olsem: Sampela yangpela bilong ol Witnes Bilong Jehova ol i hatwok long mekim wok autim tok. (Matyu 24:14; 28:19, 20) Olsem Jeremaia bilong bipo, sampela yangpela ol i pilim olsem ol i no inap long mekim dispela wok. (Skelim Jeremaia 1:6.) Na sampela i sem, nogut ol pren bilong ol i lukim ol taim ol i mekim dispela bikpela wok bilong helpim ol manmeri bilong i stap laip oltaim. Olsem wanem? Yu ting dispela kain pasin kranki i bagarapim tingting bilong ol brata susa bilong yu? Sapos olsem orait, yu yet yu mas bihainim stretpela tingting long mekim wok bilong autim tok. Makim taim bilong go autim tok planti taim wantaim famili bilong yu. Na taim ol liklik brata susa i lukim olsem yu kisim bikpela amamas long taim yu mekim dispela wok, em nau bai ol tu i laik bihainim pasin bilong yu.—Skelim Hibru 13:7.

Wanpela yangpela meri nem bilong em Kristol, em i tok: “Mi putim wanpela mak mi mas winim, olsem tupela mun samting bai mi mekim wok painia haptaim long taim bilong malolo bilong skul.c Dispela i mekim wanem long liklik brata bilong em? Kristol i tok: “Taim mi kirap mekim olsem dispela i kirapim brata bilong mi, em i gat 12-pela krismas, na nau em tu i lusim bikpela hap taim liklik long mekim wok autim tok.”

Na tu, ol miting Kristen i narapela gutpela rot bilong helpim yu long mekim ol gutpela pasin. Baibel it tok, yu mas go long olgeta miting Kristen. (Hibru 10:24, 25) Yu inap lainim ol liklik brata susa long stretim gut ol samting bilong ol na taim skul i pinis long apinun ol i ken mekim kwik ol homwok bilong ol bambai ol inap i go long olget miting. Na taim ol i lukim yu, oltaim yu save redi gut pastaim na yu bekim ol tok long miting, bai ol i amamas long go long ol miting.

Em i hatwok long bihainim ol pasin God i laikim. Tasol God i laik bai olgeta yangpela Kristen i mas “mekim ol gutpela pasin tasol . . . long tok bilong [ol] na long wokabaut bilong [ol] na long pasin bilong laikim tru ol arapela na long pasin bilong bilip na long pasin bilong i stap klin tru long ai bilong God,” maski ol i gat ol liklik brata susa o nogat. (1 Timoti 4:12) Orait yu ken kirap long mekim gutpela pasin long haus, a? Taim yu mekim olsem bai yu helpim tru i stap bilong yupela—bilong ol liklik brata susa na bilong yu yet!

[Ol Futnot]

[Piksa long pes 17]

Pasin yu mekim long papamama bilong yu inap kirapim ol liklik brata susa long harim tok bilong ol o bikhet long ol