Ol Yangpela i Laik Save . . .

Bilong Wanem Papamama i Save Tingim Tasol Brata Bilong Mi?

“Wanpela samting mi no save amamas long en, em taim ol bratasusa bilong mi i mekim pasin i no stret, papamama i save tingim ol tumas taim ol i skulim ol o taim ol i givim strafe long ol. Tasol mi save bihainim tok bilong ol, olsem na papamama i no save tingim mi tumas.”​—⁠Kay, 18 krismas.a

“Papamama bilong mi i save tingim moa ol bratasusa bilong mi na mekim gutpela pasin moa long ol. Taim ol i tingim mi, planti taim em bilong mekim sampela tok bilong stretim mi. Sapos mi save ol narapela tu i kisim sampela tok bilong stretim ol, bai mi pilim gutpela liklik.”​—⁠Ruth, 15 krismas.

“I luk olsem papamama i save givim ol gutpela wok long ol bikpela bratasusa bilong mi na tingim ol moa yet.”​—⁠Bill, 13 krismas.

KIRAP long de mama i karim yumi, yumi laik papamama i mas tingim gut yumi. Na sapos yu pilim olsem papamama bilong yu i no mekim olsem long yu, ating bai yu bel hevi na kros. Na bai yu pilim olsem moa yet, sapos i luk olsem long olgeta taim bikpela brata bilong yu, o liklik brata bilong yu, o brata i save harim tok, o brata i save sakim tok i pulim tingting bilong papamama na ol i tingim em tasol. Ating yu pilim wankain olsem Devit taim em i raitim tok olsem: “Olgeta man i lusim tingting long mi olsem ol i save lusim tingting long man i dai pinis. Mi olsem sospen graun i bruk na ol i tromoi pinis.”​—⁠Song 31:⁠12.

Taim yu lukim papamama i tingim ol bratasusa bilong yu na ol i no tingim yu, dispela i ken bagarapim tru bel bilong yu. Tasol olsem wanem? Dispela i makim olsem papamama i no laikim yu? Nogat tru. Sampela taim ol papamama i save tingim moa ol yangpela i gat gutpela save long mekim sampela samting o ol i save pren gut na toktok gut wantaim ol narapela man. Kenneth i gat 11-pela krismas em i tok: “Maski liklik brata bilong mi, Arthur, em i stap long gret 3 tasol, em i save pilaim musik long string-ben bilong ol gret 5. Na tu em i gutpela long pilai spot na em i save gut long bungim ol namba. Em i save kisim ol gutpela mak tasol long olgeta wok bilong skul. Sampela taim mi ting ol manmeri i laikim em moa yet, winim mi, tasol mi no bel nogut long em. O ating mi bel nogut long em liklik tasol.”

Long sampela yangpela ol papamama i save givim bikpela hap taim, long wanem, ol i namba wan pikinini o laspela pikinini. Baibel i stori long yangpela man Josep olsem: “Jekop, narapela nem bilong en Israel, i save laikim Josep moa yet long ol arapela pikinini bilong em, long wanem, mama i karim Josep taim Israel i lapun pinis.” (Stat 37:​3, 4) Tasol Todd, em i gat 18 krismas, em i ting papamama i laikim brata bilong em moa, long wanem, em i namba wan pikinini. Todd i tok: “Wanpela taim ol i tokim mipela long kisim i kam long skul wanpela piksa bilong mipela taim mipela i bebi yet, bilong mekim wanpela wok bilong skul. Mi inap painim sampela piksa tasol bilong mi, tasol mi lukim planti piksa bilong bikpela brata bilong mi i stap. Mi tingting planti, bilong wanem em i olsem.”

Tasol planti taim papamama i save tingim moa wanpela pikinini, long wanem, em i gat sampela hevi​—⁠ating sampela hevi yu yet i no save long en. Cassandra, nau em i gat 22 krismas, em i tok: “Taim mi gat 16 krismas, bikpela brata bilong mi i gat ol bikpela hevi. Em i no bin save gut em i laik mekim wok bilong Jehova, o nogat. Papamama bilong mi i tingim em tasol na givim bikpela hap taim long em. Long dispela taim mi no klia, bilong wanem ol i mekim olsem. Mi bin pilim olsem ol i no laikim mi liklik. Dispela i mekim na mi bel hevi na kros tu.”

Bilong Wanem Ol i Laikim Narapela Moa

Tasol sampela taim ol papamama i gat asua long pasin bilong laikim moa yet wanpela pikinini na narapela nogat. Wanpela mama i tokaut stret: “Mi save pikinini man bilong mi, Paul, em i save gut tru long pasin bilong mipela long amamas tumas long pikinini meri bilong mipela. Em i bin tokim mipela stret olsem, ‘Taim Liz i mekim sampela tok, yu save lukluk long papa na em i save lukluk long yu.’ Pastaim mipela i no klia long tok bilong em. Tasol bihain mipela i luksave mipela i save mekim dispela pasin bilong kamapim tingting bilong mipela olsem em i wanpela gutpela meri stret. Kirap long taim em i kamapim dispela tok long mipela, mipela i wok strong long lusim dispela pasin.”

Tasol bilong wanem ol papamama i save laikim moa wanpela pikinini bilong ol? Ating ol samting i painim ol taim ol i go bikpela i mekim na ol i kisim dispela pasin. Olsem: Sapos mama bilong yu i laspela pikinini long famili bilong em, dispela inap mekim na em i tingim moa laspela pikinini bilong em. Ating em yet i no luksave long dispela, tasol taim i gat sampela hevi namel long ol pikinini, em bai helpim dispela pikinini. O ating papa o mama i save laikim moa pikinini i gat wankain pasin olsem em o i gat laik long mekim wankain wok samting olsem em. Tingim stori Baibel i mekim long Aisak na Rebeka wantaim tupela pikinini man bilong ol, em Jekop na Iso: “Tupela manki i kamap bikpela na Iso i kamap saveman tru bilong painim abus. Em i man bilong raun long bus. Tasol Jekop em i man bilong stap isi, na em i save stap long ples tasol. Aisak i laikim Iso, long wanem, em i save amamas long kaikai ol abus Iso i save kilim. Tasol Rebeka i laikim Jekop.”​—⁠Stat 25:​27, 28.

Yu ken mekim wanem sapos yu ting papamama i laikim moa wanpela bilong ol bratasusa bilong yu?b Long gutpela pasin na pasin isi toktok wantaim ol long dispela samting. (Sindaun 15:22) Taim yu harim gut tok bilong ol, ating dispela i ken helpim yu long kisim gut tingting bilong ol. Na dispela i ken helpim yu long daunim kros bilong yu. (Sindaun 19:11) Wanpela yangpela i tok: “Mama bilong mi i laikim tru liklik brata bilong mi na dispela i bin bagarapim tru tingting bilong mi. Taim mi askim em long dispela samting, em i tok brata bilong mi i wankain olsem papa, olsem na em i laikim em tru. Na mi yet mi wankain olsem mama, olsem na papa i laikim mi tru. Na tu, mitupela i wankain long planti samting, olsem na narapela i save skrapim bel bilong narapela. Papa na brata bilong mi, tupela tu i wankain long planti samting, olsem na narapela i save kirapim narapela long kros. Taim em i stori gut long dispela​—⁠maski mi no amamas tumas long dispela samting​—⁠mi inap pilim tingting bilong em.”

Mekim Narapela Narapela Pasin​—⁠Dispela i No Stret?

Bilong wanem ol papamama i no mekim wankain pasin long olgeta pikinini? Beth, nau em i gat 18 krismas, em i tok: “Taim mi gat 13 krismas, mi ting papamama i mas mekim wankain pasin long mi na liklik brata bilong mi. Tasol olgeta taim ol i save bikmaus na stretim mi, tasol brata bilong mi ol i larim em tasol. Na tu, planti taim em i stap wantaim Papa na tupela i wok long stretim ka. Mi pilim dispela i no stret.”

Tasol taim man i mekim narapela narapela pasin long narapela narapela man, dispela i no makim em i mekim pasin i no stret. Tingim pasin Jisas i bin mekim long ol aposel bilong em. Em i laikim tru olgeta 12-pela aposel, tasol em i singautim 3-pela bilong ol tasol long lukim sampela bikpela samting, olsem kirap bek bilong pikinini meri bilong Jairus na lukim Jisas i tanim i kamap narakain. (Matyu 17:1; Mak 5:37) Na tu, Jisas em i pas gut tru wantaim aposel Jon. (Jon 13:23; 19:26; 20:2; 21:​7, 20) Olsem wanem? Jisas i mekim wankain pasin long olgeta man? Nogat, a? Na olsem wanem? Dispela pasin bilong em i no stret? Nogat, em i stretpela pasin, long wanem, taim Jisas i laikim tru sampela aposel bilong em, em i no bin givim baksait long ol narapela.​—⁠Mak 6:​31-34.

Long wankain pasin tasol, ating papamama bilong yu i tingim moa wanpela bilong ol bratasusa bilong yu, long wanem, em i gat gutpela save long mekim sampela wok, o em i gat gutpela pasin, o em i sot long samting. Tru, taim yu lukim dispela pasin, dispela inap bagarapim tru bel bilong yu. Tasol askim skin bilong yu yet, Papamama bilong mi i save lukautim mi gut o nogat? Taim yu laik ol i mas givim gutpela tingting long yu, o helpim yu, o strongim bel bilong yu, ol i save mekim olsem? Sapos ol i save mekim, olsem wanem, yu inap tok ol i mekim pasin i no stret long yu? Baibel i tok, yumi mas helpim ol man long ol samting ol i sot long en. (Rom 12:13) Yu na ol bratasusa bilong yu i sot long narapela narapela samting, olsem na papamama bilong yu i no inap mekim wankain pasin long yupela wan wan long olgeta taim.

Beth, em pastaim yumi bin kamapim tok bilong em, em i kisim save olsem, pasin bilong mekim wankain pasin long olgeta man, dispela i no stretpela pasin long olgeta taim, na tu, man i mekim stretpela pasin em bai no mekim wankain pasin long olgeta man. Em i tok: “Bihain mi luksave, mi na brata bilong mi, mipela i narapela narapela na pasin papamama i mas mekim long mipela tu i mas narapela narapela. Nau mi save tingting, bilong wanem mi no bin luksave long dispela samting taim mi yangpela. Ating taim mi yangpela yet, mi no skelim gut ol samting.”

Lain Long Skelim Gut Ol Samting

Tru tumas, pasin bilong yu long skelim ol samting, dispela bai stiaim ol samting yu mekim. Bel bilong yu inap giamanim yu, na yu no skelim gut ol samting. Bel bilong yumi i gat strongpela laik long papamama i mas tingim yumi na orait long yumi. Saveman Stephen Bank na Michael Kahn i tok: “Maski papamama inap long mekim wankain pasin long ol pikinini i gat narapela narapela pasin, long tingting bilong ol pikinini ol i laikim narapela pikinini moa.”

Tingim gen dispela tripela yangpela, pastaim yumi bin kamapim tok bilong ol. I luk olsem, i stap bilong ol i no gutpela tumas, tasol tingim dispela: Tripela ol i brata na susa! Em nau, olgeta wan wan i ting, papamama i save tingim moa ol narapela na ol i no tingim em! Yes, planti taim tingting bilong yumi yet i kranki liklik. Sindaun 17:27 i tok: “Man i gat gutpela tingting, em i no save belhat kwik.” Bilong skelim gut ol samting, yumi mas tingting stret na lukluk gut long dispela samting na yumi no ken larim bel bilong yumi i bosim tingting bilong yumi. Taim yu skelim gut ol samting, dispela i ken helpim yu long luksave olsem, maski papamama i no mekim wankain pasin long olgeta pikinini, tasol ol i tingim tru yupela olgeta wan wan. Taim yu tingim dispela, em i ken helpim yu na bai yu no ken kros na bel nogut.

Tasol olsem wanem? Sapos tru tru papamama bilong yu i no save tingim yu olsem i stret ol i mas mekim? Yu ken mekim wanem? Bai yumi skelim dispela samting long Kirap! i kamap bihain.

[Ol Futnot]

[Piksa long pes 18]

Taim papamama i no mekim wankain pasin long ol pikinini, ol pikinini i pilim olsem dispela i no stret