Ol Yangpela i Laik Save . . .

Mi Ken Mekim Wanem Taim Papamama i Laikim Moa Ol Bratasusa?

“Susa bilong mi i liklik long mi inap tupela krismas na papamama i save tingim em tasol. . . . Mi ting dispela i no stret.”​—⁠Rebecca.a

TAIM papamama bilong yu i mekim gut tru long brata o susa bilong yu, ating yu pilim olsem ol i no tingim yu tumas. Na sapos wanpela brata o susa bilong yu i gat save long mekim gut sampela wok, o em i gat sampela bikpela hevi, o em i laik mekim wankain wok samting olsem papamama i laik mekim, o sampela pasin bilong em i wankain olsem bilong papamama, ating bai yu hatwok tru long kirapim papamama long tingim yu liklik! Taim yu wok long tingting long dispela samting, ating bai yu bel hevi tru na kros.b

Tasol Baibel i tok: “Yupela i mas pret long God na lusim pasin bilong mekim sin. Taim yupela i slip long bet, yupela i mas tingting gut long dispela tok, na pasim maus.” (Song 4:⁠4) Taim yu bel hevi na kros, yu inap mekim sampela tok o sampela pasin bihain bai yu bel hevi long en. Tingim Kein, em i kros long brata bilong em Abel, long wanem, God i amamas moa long Abel. God i tokim em: “Sin bai i redi long bagarapim yu. Sin i gat bikpela laik tru [long] winim yu. Tasol yu mas strong na winim em.” (Stat 4:​3-16) Kein i no bosim bel bilong em, na samting nogut tru i kamap!

Tru, ating yu no laik kamap man bilong kilim narapela man olsem Kein. Tasol taim papamama i laikim tru brata o susa bilong yu, winim yu, dispela inap kamapim pasin bilong bel nogut na kros. Olsem na sampela samting nogut inap painim yu! Wanem samting nogut inap painim yu? Na yu ken mekim wanem bilong winim dispela hevi?

Bosim Maus Bilong Yu!

Taim Beth i gat 13 krismas, em i ting papamama i laikim tru brata bilong em, winim em, na ol i no mekim stretpela pasin long em. Em i tok: “Mama i save bikmaus long mi na mi save bikmaus long em, tasol dispela i no bin kamapim wanpela gutpela samting. Mi no harim tok bilong em, na em i no harim tok mi mekim, olsem na no gat wanpela gutpela samting i kamap.” Ating yu tu i kisim save pinis olsem, pasin bilong bikmaus i save mekim hevi i go bikpela moa. Efesus 4:31 i tok: “Yupela i mas rausim olgeta pasin bilong bel nogut na kros na belhat na bikmaus na tok bilas, na olgeta kain pasin nogut.”

I no olsem yu mas bikmaus bilong kamapim tingting bilong yu. Bilong mekim olsem, pasin bilong toktok isi i gutpela moa. Sindaun 25:15 i tok: “Sapos yu mekim tok isi na yu no kros kwik, orait yu inap tanim bel bilong ol man i no laik harim tok bilong yu. Na yu inap senisim tingting bilong ol hetman tu.” Olsem na sapos i luk olsem papamama bilong yu i gat asua long pasin bilong laikim moa brata o susa bilong yu, no ken bikmaus na sutim tok long ol. Wet pastaim na painim wanpela gutpela taim, na long pasin isi toktok gut wantaim ol.​—⁠Skelim wantaim Sindaun 15:⁠23.

Sapos yu toktok tasol long ol pasin kranki bilong papamama bilong yu, o sutim tok long ol na tok ol i no mekim stretpela pasin, dispela i no helpim ol long pas gut wantaim yu o ol bai i tok ol i no mekim wanpela rong. Stori gut long ol long yu pilim olsem wanem taim ol i mekim dispela pasin. (Yu ken tokim ol olsem: “Mi save bel hevi tru taim yupela i no tingim mi.”) Dispela inap kirapim ol long pilim hevi bilong yu. Na tu, “putim yau kwik long harim tok.” (Jems 1:19) Ating i gat as tru na papamama bilong yu i save tingim moa brata o susa bilong yu. Nogut em i gat sampela hevi yu no save long en.

Tasol olsem wanem sapos yu save kros kwik, na yu no was gut long ol tok yu mekim taim yu kros? Sindaun 25:28 i tok “man i no inap pasim belhat bilong en” em i olsem “wanpela taun i no gat banis”; ol pasin nogut bilong dispela man yet inap bagarapim em. Tasol sapos yu bosim gut bel bilong yu, dispela i makim olsem yu wanpela strongpela man! (Sindaun 16:32) Olsem na gutpela sapos yu wet inap long bel bilong yu i kol, na bihain yu kamapim tingting bilong yu, ating yu ken wet inap long narapela de bihain. Narapela samting tu i ken helpim yu; yu ken lusim haus na go raun o eksasais liklik. (Sindaun 17:14) Taim yu bosim maus bilong yu, bai yu no mekim sampela tok kranki em inap bagarapim bel bilong narapela.​—⁠Sindaun 10:19; 13:3; 17:⁠27.

Pasin Bilong Sakim Tok

Narapela samting yu mas abrusim em pasin bilong sakim tok. Marie i gat 16 krismas, em i luksave olsem taim liklik brata bilong em i save mekim nabaut long famili-stadi, papamama i no givim strafe long em. Dispela i mekim em i kros na em i “straik,” na em i no bekim moa tok long stadi. Olsem wanem? Taim papamama bilong yu i mekim pasin yu ting i no stret, yu save pasim maus bilong yu na yu no toktok moa wantaim ol?

Sapos olsem, yu mas save dispela kain pasin i no stret wantaim tok bilong Baibel olsem ol pikinini i mas daun na bihainim tok bilong papamama. (Efesus 6:​1, 2) Na tu, pasin bilong sakim tok i mekim na yu no inap pas gut wantaim papamama bilong yu. Gutpela sapos yu toktok wantaim papamama bilong yu long ol hevi bilong yu. Sindaun 24:26 i tok, sapos “man i bekim stretpela tok” ol narapela bai laikim em tru. Taim Marie i toktok wantaim mama bilong em, tupela i kamap wanbel, na i stap bilong ol i wok long kamap gutpela.

Pasin Bilong Stap Wanpis Inap Kamapim Hevi

Taim papamama i laikim moa brata o susa bilong yu, narapela rot nogut long karim dispela hevi em olsem, yu no pas tumas wantaim famili bilong yu o yu painim ol man ausait long mekim gut long yu. Dispela i kamap long Cassandra: “Mi no pas tumas wantaim famili bilong mi na mi stap wantaim ol poroman ausait bilong mi long skul. Mi poromanim ol yangpela man, na papamama bilong mi i no save long dispela samting. Bihain mi bel hevi tru na bel bilong mi i gat tok, long wanem, mi save mi no mekim stretpela pasin. Mi laik lusim ol poroman ausait bilong mi, tasol mi pilim i hatwok long tokim papamama bilong mi long dispela samting.”

Pasin bilong stap wanpis na “lusim” famili na ol wanbilip inap kamapim hevi​—⁠na i nogut moa taim yu kros na yu no tingting gut. Sindaun 18:1 i tok: “Man i save stap wanpis, em i save tingting long em yet tasol. Maski sapos ol arapela man i gat gutpela tingting, dispela man i no laikim tingting bilong ol.” Sapos yu pilim olsem yu no inap toktok wantaim papamama bilong yu long nau, orait painim wanpela poroman Kristen olsem Sindaun 17:17 i stori long em: “Ol gutpela pren i save laikim yumi long olgeta taim. [Na ol i olsem] brata i save sambai long helpim yumi long taim bilong hevi.” Dispela kain “gutpela pren” yu inap painim namel long ol strongpela brata sista long kongrigesen.

Cassandra i painim pinis wanpela “gutpela pren” long taim bilong hevi: “Taim wasman sekit i kam lukim kongrigesen bilong mipela, papamama bilong mi i kirapim mi long wok wantaim em. Em wantaim meri bilong em tupela i gat gutpela pasin, na ol i tingim mi tru. Mi inap toktok gut wantaim ol. Mi no pilim olsem ol i laik sutim tok long mi. Ol i save, maski mi go bikpela insait long famili Kristen, mi no gutpela olgeta.” Tok ol i mekim bilong strongim em na givim gutpela tingting long em i helpim tru Cassandra!​—⁠Sindaun 13:⁠20.

Pasin Bilong Bel Nogut Inap Kamapim Hevi

Sindaun 27:4 i tok: “Man bilong belhat na kros i save givim pen . . . long ol arapela man na mekim nogut tru long ol. Tasol pasin bilong mangal na bel nogut long ol arapela man, em i nogut tru na i winim pasin bilong belhat na kros.” Pasin bilong bel nogut long brata o susa, long wanem, papamama i laikim em moa i bin kirapim sampela yangpela long mekim pasin i no stret. Wanpela meri i tokaut stret: “Taim mi liklik, gras bilong mi i braunpela na i no strong, na gras bilong susa bilong mi i olsem gol na gras bilong em i strongpela na longpela. Papa bilong mi i laikim tru gras bilong em na em i save tok amamas long dispela. Em i save kolim em olsem ‘Rapansel’ bilong em. Long wanpela nait taim susa i slip, mi kisim sisis bilong mama na mi wokabaut isi isi i go long bet bilong em, na mi katim bikpela hap bilong gras bilong em.”​—⁠Buk Siblings Without Rivalry, em Adele Faber na Elaine Mazlish i raitim.

Olsem na yumi no kirap nogut taim Baibel i tok, pasin bilong bel nogut em i wanpela pasin nogut bilong “olpela bel.” (Galesia 5:​19-21; Rom 1:​28-32) Tasol pasin bilong bel nogut i stap insait long yumi olgeta. (Jems 4:⁠5, NW) Olsem na sapos yu wok long putim hevi long brata o susa bilong yu, o yu bagarapim nem bilong em, o long sampela narapela rot yu daunim em, ating pasin bilong bel nogut “i gat bikpela laik tru long winim yu”!

Yu mas mekim wanem, sapos dispela kain tingting nogut i stap long bel bilong yu? Namba wan samting, yu mas beten askim God long givim spirit bilong em long yu. Galesia 5:16 i tok: “Yupela i mas larim Holi Spirit i stiaim wokabaut bilong yupela. Sapos yupela i mekim olsem, orait yupela bai i no inap bihainim laik bilong olpela bel.” (Skelim wantaim Taitus 3:​3-5.) Gutpela sapos yu skelim yu gat wanem kain tingting tru long brata o susa bilong yu. Maski yu bel hevi long em, yu inap tok yu no laikim em liklik? Baibel i tok, man i save givim bel long narapela “em i no save bel nogut.” (1 Korin 13:⁠4) Olsem na no ken tingting long ol samting i save kirapim yu long bel nogut long narapela. Wok strong long amamas wantaim dispela brata o susa em papamama i save laikim em moa.​—⁠Skelim wantaim Rom 12:⁠15.

Taim yu toktok wantaim papamama bilong yu long dispela samting, em inap helpim yu. Sapos ol i luksave olsem ol i mas tingim yu moa, dispela bai helpim yu long winim pasin bilong bel nogut long brata o susa bilong yu. Tasol olsem wanem sapos i stap bilong yu i no wok long kamap gutpela, na pasin bilong laikim moa narapela pikinini i stap yet long famili bilong yu? Yu no ken kros, o bikmaus, o bikhet long papamama bilong yu. Wok yet wantaim ol na bihainim tok bilong ol. Sapos yu mas kisim sampela helpim moa, askim sampela strongpela brata o sista long kongrigesen long helpim yu. Bikpela samting tru, pas gut wantaim God Jehova. Tingim tok bilong man bilong raitim Song, em i tok: “Maski papa na mama i givim baksait long mi, Bikpela bai i lukautim mi.”​—⁠Song 27:⁠10.

[Ol Futnot]

[Piksa long pes 19]

Stori long papamama, yu pilim olsem ol i no tingim yu, ating dispela inap stretim dispela hevi