Sampela Tok i Kam Long Olgeta Hap
Liklik Wok Bilong Kisim Gras Bilong Sipsip
Olsem wanem ol man inap rausim gras bilong sipsip, na sipsip i no kisim hevi na naip i no katim skin bilong en? Dispela i save kamap taim ol i rausim gras bilong sipsip. Long Ostrelia ol i save givim sut long ol sipsip i gat wanpela kain marasin protin long en. Dispela marasin protin i wankain long protin i stap long blut bilong sipsip. Taim ol i givim sut pinis, mak bilong marasin protin long blut bilong sipsip bai go antap na stap olsem inap 24 aua. Em nau, dispela i mekim na gras bilong sipsip i no pas strong long skin bilong en. Orait, gras olgeta bai raus na nupela gras i wok long kamap gen. Ol i pasim umben long olgeta wan wan sipsip na taim gras i raus em i pundaun long umben. Dispela i save kamap insait long wanpela wik. Dispela pasin i mekim na gras bilong sipsip i gutpela na ol i no gat wok long katim gras tupela taim. Na tu, taim ol i mekim wok long dispela pasin ol i no gat wok long putim marasin long sipsip bilong rausim ol laus, na ol liklik buk i no save kamap long skin bilong ol, olsem na ol sipsip i no kisim hevi. Nius The Sunday Times bilong Landon i tok, long Ostrelia planti man i laik mekim wok long dispela pasin bilong rausim gras bilong sipsip, tasol ating ol i no ken mekim bikpela wok long en long ol kantri olsem Briten. Long kain kantri olsem, ol i mas tingim taim bilong san na ren taim ol i laik rausim gras bilong sipsip. Wanpela mausman bilong kampani i wokim dispela sut, em i tok, sapos ol i givim sut pinis long ol sipsip na ples i kamap kol wantu tasol, em nau, taim gras i raus pinis ol sipsip bai kol nogut tru.
Papamama na Pikinini i No Pikinini Tru Bilong Ol
Ol papamama i gat tingting long kisim wanpela pikinini bilong narapela man olsem pikinini bilong ol yet, sampela i ting olsem oltaim ol bai pas gut wantaim dispela pikinini, na oltaim dispela pikinini bai mekim gutpela pasin, na taim sampela hevi i kamap, ol i no ken hatwok long stretim. Tasol nius O Estado de S. Paulo i tok, dispela samting i no save kamap planti taim. Dokta bilong skelim tingting, em Heloísa Marton, em i tok: “Planti papamama ol i no redi long mekim ol samting bilong stretim ol hevi i save kamap.” Profesa Miriam Debieux Rosa, bilong Yunivesiti Bilong Sau Paulo, em i tok: “Ol marit i ting pikinini bai tenkyu long ol oltaim,” ol bai kirap nogut, long wanem, planti taim dispela samting i no save kamap. Dispela profesa i tok moa, i no gat wanpela man i save amamas oltaim, na “planti taim ol papamama i ting ol hevi i save kamap, long wanem, ol i no wanblut bilong dispela pikinini, tasol dispela tingting em i no tru.” Em i tok olsem long ol papamama i mas mekim pasin sori long pikinini ol i bin kisim olsem pikinini bilong ol yet, na em i tok: “Pasin bilong lukautim pikinini long ol samting bilong skin tasol i no inap.” Ol i mas strongim bel na tingting tu bilong pikinini.
Ol i Stretim Bek Ol Buk
Planti milion buk ol i olpela, o i bruk, o win nogut samting i bagarapim ol. Wanpela nius (Leipziger Volkszeitung) i tok, long Jemani, inap 60 milion buk i bagarap na ol man i no inap mekim wok moa long ol. Pasin bilong stretim bek ol buk long han, em i wanpela wok i save kisim bikpela hap taim tru. Saveman W. Wächter, em dairekta bilong wanpela lain (Center for Book Conservation) long Laipsik, em i tok: “Taim man i wok long stretim wanpela buk long han, 4-pela o 5-pela narapela buk i bagarap pinis.” Dispela lain i bin wok strong long kamapim ol masin bilong lukautim planti buk na ol i no ken bagarap. Wanpela masin em i bilong rausim marasin asit i save kamap long ol buk, na taim masin i wok inap 8-pela aua samting long wanpela de, em inap stretim bek 100 tausen buk long wanpela yia. Na tu, i gat wanpela kain masin bilong brukim pes bilong buk i kamap olsem 2-pela pes, na masin i pasim wanpela kain strongpela pepa namel long dispela 2-pela pes bilong strongim pes na pasim 2-pela wantaim, na nau em i kamap olsem wanpela pes gen. Dispela masin inap strongim 2,000 pes long wanpela de, tasol taim man i mekim dispela wok long han, em inap strongim 100 i go inap long 200 pes long wanpela de. Na wok bilong masin i mekim na mani ol i tromoi bilong strongim wan wan pes i go daun tru (94 pesen). Ol haus buk samting na ol man tu, ol i save kisim i kam ol buk bilong ol long dispela lain bilong ol i ken stretim bek.
Saket Bilong Ol Man i Go Lukim Haus Lotu
Planti taim ol i no larim ol turis i go insait long ol ples holi bilong Misin Katolik long Itali, long wanem, long taim bilong hatpela san ol turis i save pasim singlis na sotpela trausis. Tasol nau ol inap i go insait long sampela ples holi sapos ol i pasim wanpela kain braunpela saket i go daun long skru bilong lek. Dispela saket em i bilong ol man na meri, na bikpela bilong en i wankain tasol, na nau ol man inap baim saket long Venis na Rom. Ol saket ol i salim long Rom i gat wanpela mak bilong Pop na wanpela rait olsem: “Bikpela Yia 2000.” Tasol olsem wanem? Ol inap mekim wok long ol dispela saket long olgeta haus lotu bilong Misin Katolik? Ol haus lotu long Venis ol i orait long en, tasol sampela man ol i raun olsem turis na ol i go lukim haus lotu St. Peter’s Basilica, ol i no larim ol i go insait long dispela haus lotu, maski ol dispela turis i bin baim na pasim dispela saket. Wanpela nius (Corriere della Sera) bilong Itali i tok: “Ol wokman bilong ofis bilong Pop ol i ting dispela saket i stret long ol meri tasol. Ol i no larim ol man i go insait long haus lotu—ol i ting taim lek bilong man i stap ples klia, dispela i no stret.”
Ol Samting i Stap Long Ol Maunten Ais
Taim graun i wok long go hat liklik, ol maunten ais i wok long kamap wara na kamapim sampela samting i bin stap hait. Long 1991, long boda bilong Ostria na Itali, taim ais bilong bipo yet i kamap wara, skin bilong wanpela man i bin dai long bipo yet i kamap ples klia. Long Ogas 1998, ol bikman bilong noten Itali ol i mas pasim ol man long go long sampela hap bilong ol maunten bambai ol i ken rausim ol narapela samting ol i painim, olsem bun bilong ol soldia i dai pinis na ol hanbom i no pairap yet na ol katres. Ol dispela samting i bilong Namba Wan Pait, taim ami bilong Itali na Ostria ol i pait strong long dispela hap. Wanpela nius (Corriere della Sera) bilong Itali i tok, taim ol i rausim ol samting long dispela hap, “ol manmeri i save sindaun long dispela hap, na ol turis, na ol man i save wokabaut long ol maunten, ol i mas was gut” na askim ol bikman long wanem hap ol i ken raun long en, long wanem, “ol hanbom samting inap pairap.” Planti samting ol i painim i samting nogut tru, na i wok long kilim i dai o bagarapim skin bilong ol man i painim ol dispela samting.
Planti Tumas Toksave
Wanpela nius bilong ol samting bilong kompyuta (Computing Canada) i tok: ‘Long nau ol masin ol man i ken mekim wok long en bilong salim tok long narapela, ol i kamapim wanpela nupela hevi long ples wok, olsem: Ol wokman i kisim planti toksave na dispela i putim hevi long ol.’ I no longtaim i go pinis na wanpela kampani (Pitney Bowes Inc.) long Stamfot, Konektikat, i skelim pasin bilong ol wokman long salim tok i go i kam long ol narapela wokman, na ol i kisim save olsem, planti wokman i save salim o kisim “inap 190 toksave long wanpela de long rot bilong kain kain masin,” olsem telefon, na masin faks, na masin bilong singautim man, na kompyuta. Dispela nius i tok: ‘Dispela i mekim na taim ol man i wok, ol i mas bihainim tok bilong ol toksave ol i kisim, na nau ol i kisim bikpela hevi moa na dispela i laik daunim ol.’ Kampani i kisim save olsem planti wokman i laik lukim ol man bilong toktok wantaim ol o toktok wantaim ol long telefon. Ol saveman i tok, em gutpela sapos “olgeta wokman i kisim toksave long wanem rot i gutpela na stret long mekim wok long ol dispela masin.” Sapos ol i mekim olsem ol i no gat planti tok tumas i go i kam.
Strongpela Graun
Nius New Scientist i tok, long Yurop inap 30 milion hekta bilong graun “i bagarap, long wanem, graun i kamap strong.” Save Yunivesiti Bilong Kiel long Jemani i kisim long dispela samting i kamapim klia olsem taim bikpela trakta, em wan wan wil bilong en i gat hevi olsem 5-pela ton, na em i go i kam long wanpela gaden inap 6-pela taim, em nau, dispela i save pinisim planti (80 pesen) kain kain liklik binatang na snek i save stap insait long graun inap wan mita. Ol dispela liklik binatang i save helpim graun na graun i gat gris, olsem na taim ol binatang i dai, gaden i no karim planti kaikai. Ol rop bilong kaikai i no inap i go daun insait long strongpela graun, na nau kaikai bai drai long taim bilong san. Na wara bilong ren i no inap i go daun insait long graun—wara i ran nating antap long graun na karim i go graun i gat gris. Pasin bilong brukim graun oltaim i mekim na dispela hevi i go bikpela, na graun aninit i kamap strong. Ol saientis long Jemani i tok, sapos ol man i brukim graun i go daun inap 8 sentimita tasol, graun i no ken bagarap tumas.
Sampela Save Moa Long Pasin Bilong Smok
I no longtaim i go pinis na wanpela nius (International Herald Tribune) i kamapim ripot bilong wanpela lain long Netelan, olsem “ol man i save smok ol inap kisim wanpela kain sik bilong tingting, na sik alsaima, olsem tingting bilong ol i wok long lus, winim ol man i no save smok inap 50 pesen.” Ol i skelim inap 6,870 manmeri i winim 55 krismas, na ol i kisim save olsem ol man i save smok, planti bilong ol inap kisim sik alsaima, winim ol man i no smok. Na long ol man i bin lusim smok, sampela tasol i kisim dispela sik. Sik alsaima i save bagarapim isi isi ol sel bilong kru, na em i “wanpela bikpela sik bilong tingting.”