Gras Bilong Sipsip
Wanpela man long Ostrelia i raitim dispela stori bilong Kirap!
WANEM laplap i save hatim skin long taim bilong bikpela kol, na mekim skin i stap kol long taim bilong hatpela san? Wanem laplap i narapela kain long koten, tasol ol laplap samting ol i wokim long en i no hevi tumas? Wanem laplap i save amamasim man bilong samapim laplap? Wanem laplap ol inap pulim i go longpela, na bihain em i go bek long mak stret bilong en?
Olgeta dispela askim i stori long wanpela samting tasol—em gras bilong sipsip! Em i stret, gras bilong sipsip i save kamapim planti gutpela laplap bilong ol man i ken pasim long nau.
I Gat Wok Bilong En Long Bipo
Taim ol namba wan waitskin i go kamap long Saut Amerika, ol i lukim planti lain bilong dispela hap, olsem ol lain Peru, ol i pasim ol naispela laplap ol i wokim long gras bilong wanpela animal em i gat gras i wankain liklik olsem gras bilong sipsip. Long taim bilong ol man long Baibel long bipo tu, ol i lukautim planti lain sipsip, na taim ol i katim gras bilong sipsip ol i putim marasin long en bilong kamapim laplap i gat kain kain kala long en.—Kisim Bek 26:1; Wok Pris 13:47.
Long nau ol i save mekim wok long wanpela kain sipsip em ol i kolim merino, i kam long hap bilong Spen, long wanem, em i gat gutpela gras, na ol inap wokim planti gutpela laplap samting long gras bilong en. Dispela kain sipsip inap stap long ples drai olsem Ostrelia. Paslain liklik long yia 1800, taim ol man i go sindaun nupela long Ostrelia, ol i laik painim wanpela kain animal ol inap lukautim bilong kaikai na bilong mekim wok bisnis long en.
Ol i makim sipsip, long wanem, i no hatwok long lukautim ol sipsip. Ol inap raun ol yet inap longpela taim, na i no hatwok long rausim gras bilong ol. Ol inap bungim ol dispela gras wantaim na pulimapim long bokis samting. Taim kol i holim ol narapela kain laplap, blakpela samting i save holim na bagarapim, tasol em i no save kamap long gras bilong sipsip. Olsem na taim sip i lusim Ostrelia na kamap long Inglan inap 6-pela mun bihain, gras bilong sipsip i stap gutpela yet. Na i hatwok long paia i kukim.
Sipsip i Helpim Gut Ol
Namba wan lain sipsip merino i kam kamap long Ostrelia long 1797, olsem na inap 150 yia, ol Ostrelia i mekim wok bisnis long gras bilong sipsip bilong helpim kantri. Bihain long Namba Wan Pait, ol man i painim rot bilong wokim samting i kain olsem gras bilong sipsip na ol i wokim ol laplap long dispela samting, i olsem senis bilong gras bilong sipsip. Olsem na wan wan lain tasol i baim gras bilong sipsip long Ostrelia. Tasol kirap long 1985, planti lain moa i baim gras bilong sipsip long Ostrelia. Long dispela taim i gat 166 milion sipsip i stap long Ostrelia, na long olgeta wan wan yia ol i bungim olsem 950,000 ton gras bilong sipsip.
Wanpela nius (Sunday Correspondent) bilong Inglan i stori olsem: Long 1990, wan wan lain tasol i laik baim gras bilong sipsip long Ostrelia. Olsem na ol 70,000 man i save lukautim sipsip, i no inap baim ol sipsip i go long ol man, em namba bilong olgeta i olsem 20,000,000 samting.
Bilong Wanem Em Gutpela?
Ol samting ol man inap wokim long gras bilong sipsip i kamapim long ples klia olsem em i wanpela gutpela samting tru. Gras bilong sipsip i wankain liklik olsem gras bilong ol man, na planti kain sipsip i gat longpela gras tu i stap wantaim dispela gutpela gras. Tasol planti man i save laikim gras bilong sipsip merino, long wanem, em i no gat dispela longpela gras. Maski gras bilong sipsip i pas pas na i no stap wan wan olsem linen o koten, em i no hevi, olsem na ol inap samapim ol laplap samting long en i no hevi. I no hatwok long senisim kala bilong en long marasin samting. Sapos yu lukim wanpela meri i pasim laplap long het na liklik win i sakim nabaut, ating ol i bin wokim dispela laplap long gras bilong sipsip.
Olsem wanem? Yu bin traim long holim na brukim gras bilong sipsip? Em i strong tru, a? Wanpela gras tasol em i strong tru, olsem na yu mas katim long sisis. Olgeta wan wan gras bilong sipsip i tanim tanim, olsem na yu inap pulim i go longpela na bihain em i go bek long mak stret bilong en taim yu rausim han bilong yu. Dispela samting i mekim na laplap ol i wokim long gras bilong sipsip i no gat mak long en taim ol i wasim na em i drai.
Win inap pas namel long wan wan gras bilong sipsip. Dispela samting i save mekim na ol man i pasim laplap ol i wokim long gras bilong sipsip ol inap i stap hat long taim bilong bikpela kol tru, na i stap kol long taim bilong bikpela san. Wara i no inap pas tumas long en, olsem na sapos yu pasim siot na ren i wasim yu, skin bilong yu i no inap kol hariap.
I gat planti samting ol i wokim long gras bilong sipsip em ol i hatim long paia, olsem ol mat na karamap bilong bal bilong pilai tenis samting. Na ol i wokim ol strongpela siot na trausis bilong ol man, na ol klos samting bilong meri tu long gras bilong sipsip.
Long Rot Bilong Sipsip Em i Kamap Long Yumi
Long ol kantri i gat planti sipsip i stap long en, ol haus bilong rausim gras bilong sipsip i stap tu. Ol i save rausim gras bilong sipsip wanpela taim long wanpela yia, tasol long ol ples hat, ol inap mekim tupela taim long wanpela yia.
Ol man i save rausim gras bilong sipsip, ol i gat strongpela han na strongpela baksait. Ol i save mekim wok long paua-sisis long rausim gras bilong sipsip. Man i save gut long dispela wok em inap rausim gras bilong 200 sipsip insait long wanpela de tasol. Pastaim em i rausim gras i stap long bel bilong sipsip, na bihain em i rausim long baksait, na long nek na sol, na long arere arere. Gras i stap long sol na long arere bilong sipsip em i gutpela moa.
Taim ol i katim gras bilong sipsip pinis na ol i larim ol i kam ausait long haus, bai yu amamas long lukim ol i kalap kalap nabaut, long wanem, gras i bin kalabusim ol na nau i no stap moa.
Nau ol i kirap long skelim gras bilong sipsip. Ol man bilong skelim ol i sanap klostu long ol tebol em ol dispela gras bilong sipsip i stap long en. Ol i skelim gras—em i waitpela, na i pas pas, na i gutpela, na i malumalum, na i longpela olsem wanem. Insait long wanpela wik, man i save gut long mekim dispela wok em inap skelim 4,500 kilogram sapos yumi bungim na skelim hevi bilong olgeta gras wantaim. Bihain ol i klinim na mekim drai, na ol i rausim gris i stap long en. Gras ol i rausim long sipsip i stap laip yet, em i gutpela moa.
Lukautim Gut na Em Bai Stap Longtaim
I gat wanpela kain bataplai i save laikim tru gras bilong sipsip. Em i save karim ol kiau long gras bilong sipsip, na taim ol liklik snek olsem katapila i kam ausait bai ol i gat planti kaikai. Ol i laikim gras bilong sipsip i gat tuhat na ol pipia bilong kaikai i stap yet long en. Olsem na no ken putim laplap i doti long kabot samting. Sapos yu baim laplap em dispela kain bataplai i no inap bagarapim, em gutpela tru. Putim ol laplap ol i wokim long gras bilong sipsip long ol strongpela bokis samting yu inap pasim gut ai bilong en. Na sapos olgeta taim yu pasim laplap ol i wokim long gras bilong sipsip, yu mas brosim gut bilong klinim.
Long nau, ol i stretim gut ol laplap em ol i wokim long gras bilong sipsip na ol binatang na paia samting i no ken bagarapim. Tasol yu mas was gut taim yu laik wasim dispela laplap. Planti masin bilong wasim laplap i gat toksave bilong wasim dispela kain laplap. Tasol sapos yu wasim long han, tanim tanim laplap isi isi long wara bilong klinim gut. Wara i mas olsem kol. Mekim wok long marasin bilong dispela kain laplap yet, long wanem, em i winim sop. Sapos nogat, tanim sop wantaim wara, na taim sop i kamap olsem wara yu ken wasim long dispela sop. No ken mekim wok long ol strongpela marasin, long wanem, ol inap bagarapim dispela laplap. Wasim gen long nupela wara bilong rausim sop i stap long laplap. Karamapim long taul samting na tanim tanim isi isi bilong rausim wara.
Na planti taim i no gat wok long ainim dispela kain laplap. Tasol sapos yu laik ainim, mekim wok long ain i gat wara long en. Tasol laplap i mas drai olgeta pastaim.
Gras Bilong Sipsip Em Gutpela Samting Tru
Nau bai yu wanbel long tok olsem gras bilong sipsip em wanpela gutpela samting. Ol i wokim ol laplap na bal bilong pilai tenis, na ol i wokim planti ol arapela samting em inap stap longpela taim tru. Ol lain i kam sindaun long Ostrelia long bipo i gat gutpela tingting na ol i kisim sipsip i kam. Mipela i tok tenkyu long ol, long wanem, mipela i wok long kisim yet ol samting ol i wokim long gras bilong sipsip.
[Ol Piksa long pes 24]
Ol i no katim yet gras bilong sipsip
Taim bilong katim
Ol i katim pinis
Laplap ol i wokim long gras bilong sipsip