Sampela Ples Long Graun Bilong Promis

Go Lukim Ples, Go Lukim Ol Sipsip!

PLANTI tausen Kristen i bin lukim Graun Bilong Promis, long wanem, ol i ting sapos ol i lukim ol ples em Baibel i stori long en, dispela bai helpim ol long save gut moa long ol tok bilong Baibel. Na dispela tingting bilong ol i stret.

Sapos yu bin go lukim tru ol dispela ples o yu bin kaunim ol buk samting i stori long en na i olsem yu go lukim, orait, olsem wanem? Yu bin go lukim ol sipsip tu? Ating yu kirap nogut long dispela askim, tasol ol sipsip i bikpela samting long ol man long taim bilong Baibel, olsem na man i go lukim Graun Bilong Promis, ating em i mas i go lukim ol sipsip tu bambai em i ken save gut long ples.

Sapos yu lukim ol piksa hia i olsem yu go lukim dispela ples, long wanem, ol sipsip i stap long dispela ples long nau i wankain liklik long ol sipsip i bin i stap long taim bilong Baibel.a Patpela tel bilong ol i gat planti gris. (Wok Pris 7:3; 9:19) Ol sipsip i gat bikpela gras, na gras bilong planti i waitpela. Tasol tingim bikpela lain sipsip bilong Jekop​—⁠sampela i “blakpela” na sampela “i gat makmak.”​—⁠Stat 30:⁠32.

Dispela stori bilong Jekop i kamapim klia tu olsem man i gat bikpela lain sipsip em i wanpela maniman. (Stat 30:43) Baibel i stori long Jop olsem: “Em i gat 7,000 sipsip na 3,000 kamel na 1,000 bulmakau na 500 donki meri. . . . Em i gat biknem i winim biknem bilong ol arapela man long ol kantri bilong hap sankamap.” (Jop 1:3; 42:12) Na tingim Nabal, em i gat 3,000 sipsip na 1,000 meme. Olsem na yu ting em i wanpela maniman i gat namba long taim bilong Devit? (1 Samuel 25:⁠2) Tasol man i gat bikpela lain sipsip, olsem wanem em i kamap maniman?

Long wanem, wasman o papa bilong sipsip inap kisim planti gutpela samting long ol sipsip. Ol sipsip i gat bikpela gras i save kamap long olgeta taim na wasman o papa bilong sipsip inap kisim. Long Sindaun 31:​13, 21, 22, Baibel i helpim yumi long save, meri marit i gat gutpela tingting na i save wok strong em inap mekim wok long gras bilong sipsip na wokim klos bilong famili o bilong maketim. (Jop 31:20) Long bipo gras bilong sipsip i gat bikpela pe bilong en na ol man inap mekim wok long en olsem senis bilong mani. Olsem: Wanpela king bilong Moap “i gat planti sipsip.” Em i stap aninit long king bilong Israel, na long olgeta yia em i save givim planti sipsip na gras bilong sipsip tu long king bilong Israel olsem takis. (2 King 3:⁠4) Em nau, dispela i kamapim klia olsem long dispela taim bipo ol man i tingim gras bilong sipsip i gutpela samting tru, olsem samting i gat bikpela pe bilong en.

Sampela sipsip man i gat bikpela kom, olsem yu lukim long piksa hia long han sut. Bilong kirapim namba 50 yia long Israel, ol i winim wanpela kain biugel ol i bin wokim long kom bilong sipsip man. Yu tingim? (Wok Pris 25:​8-10) Ol man i bin mekim wok long kain kom olsem bilong singautim ol man na givim toksave long ol, na bilong stiaim ol man long taim bilong pait.​—⁠Hetman 6:34; 7:​18, 19; Joel 2:⁠1.

Olsem na sapos wanpela Israel long bipo i gat wanpela lain sipsip, orait, em i no ken sot long kaikai, long wanem, ol sipsip i wanpela animal i klin long ai bilong God na ol Israel i ken kaikai. (Lo 14:⁠4) Mit bilong sipsip, ol i ken kukim long sospen o kukim long paia. Wanpela bikpela samting bilong de Pasova, em mit bilong sipsip ol i bin kukim long paia. (Kisim Bek 12:​3-9) Na tu, long olgeta taim ol man inap kisim susu long sipsip. Ol i dring dispela susu, na ol inap wokim sis long en.​—⁠1 Samuel 17:​17, 18; Aisaia 7:​21, 22.

Sapos yu go lukim ol sipsip, bai yu lukim olsem wasman i save pas gut wantaim lain sipsip bilong em. Gutpela wasman i save lukautim gut ol sipsip bilong em. Olsem Jisas i tok, ol sipsip i save long maus bilong wasman bilong ol na taim em i kolim nem bilong ol, ol i harim na bihainim em i go. (Jon 10:​3, 4) Sapos wanpela i lus, orait, gutpela wasman bai wok long painim. Taim em i painim pinis, ating em i slipim long sol bilong em na karim i go bek long lain sipsip.​—⁠Luk 15:​4, 5.

Devit i save gut long pasin bilong ol sipsip, na em i kamapim dispela save long taim em i tok em i kain olsem wanpela sipsip em Jehova i stap Wasman bilong en. Jehova i bin lukautim gut Devit, olsem wasman i save lukautim gut ol sipsip bambai ol animal nogut i no ken bagarapim. Wasman i save tingim gut ol sipsip na ol sipsip i bihainim em. Sapos ol sipsip i kisim bagarap, em i save pasim sua bilong ol, ating em kapsaitim wel long sua. Ol wasman o hetman bilong lain Israel ol i no save mekim gutpela pasin olsem; ol i save tingim ol yet tasol, olsem Esekiel 34:​3-8 i tok!

Planti taim Baibel i tok profet na mekim tok piksa long sipsip. Olsem na sapos yu inap i go lukim ol sipsip bilong Graun Bilong Promis na kisim save long pasin bilong ol, dispela inap helpim yu long save gut moa long sampela tok bilong Baibel, olsem “liklik lain sipsip,” na “Pikinini Sipsip Bilong God,” na “ol arapela sipsip.”​—⁠Luk 12:32; Jon 1:36; 10:⁠16.

[Ol Futnot]

[Piksa Kredit Lain long pes 24]

Pictorial Archive (Near Eastern History) Est.

[Piksa Kredit Lain long pes 25]

Garo Nalbandian