Baibel i Tok Wanem?

Wanbel Long Lotu Insait Long Marit​—⁠Bilong Wanem Em i Bikpela Samting?

WANPELA famili i sindaun na kaikai. Taim papa i beten, mama i beten long tingting bilong em long narapela god. Long narapela famili, meri i save lotu long wanpela lotu i gat nem Kristen, tasol man bilong em i save go long haus lotu bilong ol Juda. Long sampela famili, papa i save lainim ol pikinini long Santa Klaus, tasol mama i lainim ol long Hanuka.

Ol ripot bilong nau i kamapim olsem dispela samting i save painim planti famili, long wanem, planti manmeri moa ol i maritim poroman i no wanlotu bilong ol. Ripot bilong wanpela lain i kamapim olsem, long Yunaitet Stets inap 21 pesen bilong ol Katolik ol i save maritim poroman bilong narapela lotu, na 30 pesen bilong ol Momon i mekim wankain samting, na 40 pesen bilong ol Muslim, na winim 50 pesen bilong ol Juda. Inap planti handet yia, ol man i bin biruaim ol man bilong narapela lotu, olsem na sampela i ting, pasin bilong maritim poroman bilong narapela lotu i makim olsem dispela kain pasin birua i go daun. Wanpela man bilong raitim ol stori long nius, em i tok: “Yumi mas amamas long ol manmeri i maritim poroman bilong narapela lotu, lain, skin, o tok ples samting.” Tasol Baibel i tok wanem?

Yumi mas save olsem Baibel i no orait long pasin bilong biruaim ol man bilong narapela skin o lain. Baibel i kirapim yumi long mekim wankain pasin long ol manmeri bilong olgeta lain. Aposel Pita i kamapim klia dispela samting: “Tru tumas, nau mi save, God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” (Aposel 10:​34, 35) Tasol Baibel i tok tu olsem ol manmeri i lotu tru long Jehova, ol i mas maritim “man i bilip long Bikpela.” (1 Korin 7:​39) Bilong wanem Baibel i tok olsem?

As Bilong Marit

God i laik tupela marit i pas gut wantaim. (Stat 2:​24) Taim God i wokim marit bilong namba wan man na meri, em i no tingting tasol long ol bai pren wantaim. Taim Jehova i givim wok long tupela long kamapim ol pikinini na lukautim graun, em i tokim ol olsem ol i mas wok gut wantaim bilong kamapim laik bilong em. (Stat 1:​28) Taim man na meri i wok gut wantaim bilong mekim laik bilong God, ol bai pren gut wantaim, na i no dispela samting tasol, nogat; bai ol i pas gut wantaim inap oltaim oltaim.​—⁠Skelim wantaim Malakai 2:​14.

Jisas i toktok long dispela samting taim em i kamapim wanpela tok planti man i save long en, olsem: “Tupela i no i stap olsem tupela moa. Nogat. Tupela i kamap olsem wanpela bodi. Olsem na samting God i pasim pinis, em man i no ken katim.” (Matyu 19:⁠6) Jisas i tok piksa bilong skelim marit wantaim samting i save pasim tupela bulmakau wantaim, olsem hap plang, bambai ol i ken pulim o surikim wanpela samting em tupela wantaim i karim. Tingim bikpela hevi bai painim tupela animal em hap plang i pasim tupela wantaim bilong mekim wok, sapos wanpela i pulim i go long han kais na narapela long han sut! Olsem tasol, ol man i maritim poroman i no insait long lotu i tru, ating bai ol i hatwok long bihainim ol lo bilong Baibel taim poroman marit i no wanbel long dispela. Olsem na Baibel i tok: “Ol haiden ol i narakain, olsem na yupela i no ken pas wantaim ol.”​—⁠2 Korin 6:​14.

Marit i Gutpela Moa

Taim tupela i wanbel long lotu i tru, dispela inap strongim tru marit. Wanpela man bilong raitim buk, em i tok: “Pasin bilong lotuim God wantaim, em i wanpela bikpela mak bilong ol famili i stap strong na amamas.” Saveman 4:​9, 10 i tok: “I no gutpela long man i stap wanpis. Sapos tupela man i stap wantaim, em i gutpela. Sapos tupela man i poroman long wok, orait bai wok bilong tupela i kamap gutpela moa. Sapos wanpela i pundaun, orait narapela i ken litimapim em gen.”

Taim lotu i bikpela samting long i stap bilong tupela marit Kristen, ol i no pas gut wantaim long skin tasol, nogat; ol i pas gut wantaim long ol samting bilong spirit tu. Taim ol i beten wantaim, na stadi long Baibel wantaim, na bung wantaim ol narapela Kristen, na autim bilip bilong ol long ol narapela man, orait ol i save pas gut wantaim long spirit na dispela i mekim na marit bilong ol i stap strong. Wanpela meri Kristen i tok: “Lotu i tru i stiaim olgeta wokabaut bilong mi. Mi no inap ting olsem mi bai maritim wanpela man i no wanbel wantaim mi long ol samting i as bilong pasin na i stap bilong mi.”​—⁠Skelim wantaim Mak 3:​35.

Ol manmeri i maritim “man i bilip long Bikpela,” ol inap ting olsem poroman bilong ol bai bihainim pasin bilong Jisas. Ol man marit Kristen i mas mekim wankain pasin sori long meri bilong ol olsem Jisas i bin mekim long kongrigesen. Ol meri Kristen i mas tingim gut man bilong ol. (1 Korin 11:3; Efesus 5:​25, 29, 33) Ol Kristen i no mekim dispela bilong amamasim poroman bilong ol tasol, nogat; ol i mekim olsem bilong amamasim God, em i save skelim ol marit long pasin narapela i mekim long narapela.​—⁠Malakai 2:​13, 14; 1 Pita 3:​1-7.

Taim ol marit Kristen i bihainim wankain bilip, dispela tu i save helpim ol long stretim ol hevi long gutpela pasin. Baibel i tokim ol Kristen olsem ol i no ken tingim ‘ol samting bilong ol yet tasol. Nogat. Ol i mas lukautim ol samting bilong ol arapela manmeri na helpim ol long i stap gut.’ (Filipai 2:⁠4) Maski olgeta wan wan marit i gat laik bilong em yet, ol marit i wanbel long bilip, ol i larim tok bilong Baibel i stiaim ol taim ol i stretim samting ol i no wanbel long en. (2 Timoti 3:​16, 17) Long dispela rot ol i bihainim tok Baibel i mekim long ol Kristen, olsem ol i mas i gat “wankain tingting.”​—⁠1 Korin 1:​10; 2 Korin 13:11; Filipai 4:⁠2.

Laikim Narapela na Wankain Tingting

Tru, taim man na meri i gat wankain bilip, dispela samting tasol i no save mekim na tupela i pas gut wantaim. Narapela i mas i gat laik long narapela. (Song Bilong Solomon 3:5; 4:​7, 9; 5:​10) Tasol bilong marit i ken stap strong, em i bikpela samting long tupela i gat wankain tingting long ol bikpela samting. Buk Are You the One for Me? i tok: “Ol marit i gat wankain tingting long ol samting ol i ting em bikpela samting, ol inap i stap amamas, na wanbel, na stap wantaim inap longpela taim.”

Sori tru, taim tupela i marit pinis, ol inap lukim sampela tingting o pasin bilong poroman i narapela kain na ol i no laikim. Tingim dispela: Yu baim wanpela haus, long wanem, haus i luk gutpela. Tasol taim yu sindaun pinis long dispela haus, yu kisim save olsem as bilong haus i no strong. As bilong haus i mekim na nau ol gutpela samting bilong en i olsem samting nating tasol. Olsem tasol, man o meri inap laikim poroman bilong narapela lotu na ting olsem pasin na tingting bilong em i wankain olsem bilong em yet, tasol taim ol i marit pinis, ol bikpela hevi inap painim tupela.

Tingim sampela hevi inap kamap insait long marit bilong tupela i no wanbilip. Olsem: Famili bai lotu long wanem haus lotu? Bai ol i skulim ol pikinini long bihainim wanem lotu? Famili bai givim mani long wanem lotu? Man marit bai strong long famili i mas insait long sampela pasin bilong lotu na ol holide em meri i ting em samting bilong ol haiden? (Aisaia 52:11) Long olgeta marit, tupela wantaim i mas senisim sampela pasin bilong ol, tasol God i no orait long wanpela i kalapim lo bilong em, maski em i mekim olsem bilong helpim marit long i stap gut.​—⁠Skelim wantaim Lo 7:​3, 4; Nehemia 13:​26, 27.

Sampela marit em ol i no wanbilip, ol i save go long lotu bilong ol yet bambai ol i ken i stap bel isi wantaim. Tasol sori tru, taim tupela i no lotu wantaim, marit bilong ol i lus long ol samting bilong spirit. Wanpela meri Kristen i marit long man i no wanbilip bilong em, em i tok: “Maski mitupela i marit inap 40 yia, man bilong mi em i no save gut long mi.” Tasol ol marit, em tupela wantaim i lotu “long strong bilong Holi Spirit na long pasin i tru,” God i stap olsem nambawan bikpela samting insait long marit bilong ol. Olsem Baibel i tok: “Sapos ol i tanim tripela string na wokim baklain, orait dispela baklain i no inap bruk kwiktaim.”​—⁠Jon 4:​23, 24; Saveman 4:​12.

Olsem Wanem Long Ol Pikinini?

Sampela man i tingting long maritim poroman i no wanbilip bilong ol, ol i ting olsem ol pikinini i ken skul long lotu bilong papa na bilong mama, na ol pikinini yet i ken makim wanem lotu ol i laik bihainim. I stret papa na mama i skulim pikinini bilong ol long ol samting bilong lotu na dispela i stret wantaim lo bilong gavman tu, na bihain ol pikinini yet bai makim lotu ol i laik bihainim.a

Baibel i tok, ol pikinini i mas bihainim tok bilong papa na bilong mama na “pas wantaim Bikpela.” (Efesus 6:⁠1) Sindaun 6:​20 i tok: “Pikinini, yu mas harim tok bilong papamama bilong yu na yu no ken sakim tok bilong tupela.” Ol pikinini em papamama bilong ol i wanbilip na ol i no skulim ol pikinini long tupela kain bilip, bai ol i wanbel long ‘wanpela Bikpela, na long wanpela pasin bilong bilip, na long wanpela baptais tasol.’​—⁠Efesus 4:5; Lo 11:⁠19.

Maritim ‘Man i Bilip Tru Long Bikpela’

Sapos wankain pasin na tingting i bikpela samting bilong marit i ken stap gut, yu ting olgeta man i tok ol i Kristen ol i gutpela bilong maritim? Baibel i bekim dispela askim: “Sapos wanpela man i tok, ‘Mi pas wantaim God,’ orait dispela man i mas wokabaut olsem Krais i bin wokabaut.” (1 Jon 2:⁠6) Olsem na Kristen i laik marit, em bai painim wanpela Kristen i wok strong long bihainim pasin bilong Jisas. Kain man olsem em i dediketim pinis laip bilong em long God na kisim baptais. Na em i bihainim ol gutpela pasin bilong Jisas, na pasin bilong em long givim bel long autim tok long Kingdom bilong God. Wok bilong mekim laik bilong God em i bikpela samting long em, olsem em i bikpela samting long Jisas.​—⁠Matyu 6:​33; 16:24; Luk 8:1; Jon 18:⁠37.

Taim ol man i tingting long marit ol i stap isi na wet long painim wanpela gutpela poroman insait long lain bilong God, ol i kamapim pasin bilong putim laik bilong God olsem namba wan samting long i stap bilong ol. Kain pasin olsem bai mekim na taim ol i marit ol bai i stap amamas.​—⁠Saveman 7:8; Aisaia 48:​17, 18.

[Futnot]

[Blok long pes 18]

Samting Bilong Helpim Ol Famili i No Wanbel Long Lotu

I gat kain kain as na planti marit long nau ol i no wanbel long lotu. Ating sampela i bin maritim poroman i bilong narapela lotu. Tasol planti marit i bin stap long wankain lotu long taim ol i marit, tasol bihain ol i no wanbel long lotu taim man o meri i kirap bihainim narapela lotu. Ating ol narapela samting tu i mekim na famili i no wanbel long lotu. Tasol maski wanem samting i as bilong en, ol marit i mas bihainim tok promis ol i bin mekim taim ol i marit na ol i no ken ting em i liklik samting, long wanem, ol i no wanbel long lotu. Baibel i tok olsem marit em i samting holi na i bilong i stap oltaim, maski tupela marit i no wanbel long lotuim God. (1 Pita 3:​1, 2) Aposel Pol i tok: “Sapos wanpela brata long Krais em i marit na meri bilong en i no bilip long Krais, na sapos meri i laik i stap wantaim em, orait dispela brata i no ken rausim em.” (1 Korin 7:​12) Sapos ol marit i bihainim dispela lo i stap long Baibel, dispela inap helpim ol long i stap gut na bel isi wantaim.​—⁠Efesus 5:​28-​33; Kolosi 3:​12-​14; Taitus 2:​4, 5; 1 Pita 3:​7-9.