Baibel i Tok Wanem?

Rot Bilong Makim Poroman Marit

OL I ASKIM WANPELA MERI SINGEL OLSEM: “SAMPELA TAIM YU TINGTING LONG MARIT?” EM I BEKIM TOK HARIAP: “MAN! YU TING MI NO SAVE TINGIM? MI SAVE TINGTING PLANTI LONG DISPELA SAMTING.”

BEKIM bilong dispela meri i kamapim klia olsem sampela man na meri i gat bikpela laik tru long narapela i poromanim ol na laikim ol tru. Planti ol i tok, wok bilong painim poroman marit em namba wan bikpela samting long i stap bilong ol. Olsem na ol lain bilong helpim ol man long painim poroman marit ol i kamap planti long olgeta hap. Tasol long planti hap bilong graun, planti marit i bruk, winim ol marit i wok gut.

Long ol kantri long hap bilong Wes, ol man yet i save makim poroman ol i laik maritim. Tasol long sampela hap bilong Esia na Afrika, famili i save makim poroman em man o meri bai maritim. Tasol maski ol man i bihainim wanem pasin, ol i no ken ting pasin bilong makim poroman i liklik samting. Wok bilong makim poroman marit i bikpela samting tru, winim planti narapela samting man i save mekim long i stap bilong em, long wanem, dispela inap mekim na bai em i stap amamas o bel hevi. Marit i wok gut inap mekim na ol marit i amamas na belgut. Tasol taim tupela marit i save tok pait, dispela inap kamapim pen na bel hevi.​—⁠Sindaun 21:19; 26:⁠21.

Olsem ol narapela man, ol trupela Kristen tu ol i laik bai marit bilong ol i mekim na ol i stap amamas na belgut. Tasol ol i gat laik tu long mekim ol samting God i laikim na i givim biknem long em. (Kolosi 3:​23) God em i Man bilong wokim yumi na As bilong marit, olsem na em i save gut long ol samting yumi mas kisim na wanem samting i gutpela bilong helpim yumi. (Stat 2:​22-​24; Aisaia 48:​17-​19) Na tu, insait long planti tausen yia man i bin stap long graun, God i bin lukim planti milion milion marit​—⁠ol gutpela marit na marit nogut. Em i save wanem samting i save helpim marit long wok gut, na wanem samting i save bagarapim marit. (Song 32:⁠8) Long rot bilong Baibel, God i kamapim ol gutpela lo i ken helpim olgeta Kristen long bihainim gutpela tingting taim ol i makim poroman marit. Wanem sampela bilong ol dispela lo?

No Ken Tingim Skin Tasol

Long ol kantri em man o meri yet i save makim poroman bilong em, em inap bungim wanpela poroman long kain kain hap, o long rot bilong ol pren o famili. Planti taim gutpela skin bilong man o meri i kirapim narapela long laikim narapela. Dispela em pasin bilong yumi man na i strongpela samting bilong kirapim yumi long laikim narapela, tasol Baibel i tok yumi no ken tingim skin tasol taim yumi tingting long marit.

Sindaun 31:30 i tok: “Maski meri i luk nais tru, em i no inap i stap olsem oltaim. Mobeta yumi litimapim nem bilong meri i save aninit long Bikpela.” Aposel Pita i bin toktok long “pasin bilong i stap belgut na i stap bel isi. Dispela kain pasin em i gutpela moa yet long ai bilong God.” (1 Pita 3:⁠4) Em nau, ol gutpela pasin bilong spirit bilong man yu laik maritim​—⁠na pasin bilong em long givim bel long God, na ol gutpela pasin Kristen bilong em​—⁠ol dispela samting i winim tru gutpela skin. Em bikpela samting long skelim gut ol man, na makim poroman i gat wankain tingting olsem yu long ol samting bilong spirit, na tu, em i wok strong long kamapim ol pasin bilong God. Dispela bai helpim tru marit long i stap amamas.​—⁠Sindaun 19:2; Galesia 5:​22, 23.

“Maritim Man i Bilip Long Bikpela”

Em bikpela samting tru long yu na man yu laik maritim i gat wankain laik na bilip. Ol marit i mas wok strong bambai marit bilong ol i ken wok gut, na tupela wantaim i mas senisim sampela pasin na tingting bilong ol. Na taim yu na man yu laik maritim i gat wankain tingting long planti samting, bai yupela i no ken hatwok tumas long mekim ol samting bilong i stap gut wantaim.

Dispela i helpim yumi long save long as na aposel Pol i tok, ol Kristen i “no ken pas wantaim ol [haiden] na wok bung wantaim ol.” (2 Korin 6:​14) Pol i save man i maritim poroman i no gat wankain bilip na i no wanbel wantaim em long ol lo bilong Baibel, dispela inap kamapim kros namel long tupela. Olsem na tok bilong Pol long “maritim man i bilip long Bikpela” i gutpela tok tru. (1 Korin 7:​39) Dispela tok i kamapim tingting bilong God. Ol man i bihainim dispela tok, ol i abrusim planti bikpela hevi.​—⁠Sindaun 2:​1, 9.

Taim Famili i Makim Poroman

Olsem wanem long ol hap em pasin bilong famili long makim poroman marit? Sampela i tok, long sauten India, papamama bilong planti marit (80 pesen) i save makim poroman marit bilong ol. Em samting bilong papamama Kristen yet sapos ol i laik bihainim dispela pasin o nogat. Tasol ol dispela kain marit bai wok gut taim ol samting bilong spirit i stiaim tingting bilong papamama.

Ol man i laik bihainim dispela pasin, ol i ting wok bilong makim poroman marit i stap long han bilong ol man i gat save na gutpela tingting. Wanpela elda Kristen long Afrika, em i tok: “Sampela papamama i ting, pikinini bilong ol i yangpela na em i no gat save yet long planti samting, olsem na pikinini i no inap skelim poroman em i laik maritim olsem em i strong long ol samting bilong spirit o nogat.” Wanpela wasman bilong raun long India, em i tok: “Ol yangpela i no gat save long planti samting, na bel bilong ol inap kirapim ol long pasim tingting long mekim ol samting.” Papamama i save gut long pasin bilong pikinini bilong ol, winim ol narapela man, olsem na ol i ting ol inap bihainim gutpela tingting na makim poroman bilong pikinini bilong ol. Papamama i bihainim savepasin sapos ol i tingim laik bilong yangpela man na meri tu.

Tasol taim papamama i no bihainim ol lo bilong Baibel, ating ol tu bai kisim hevi sapos marit bilong pikinini i gat hevi. Taim famili i makim poroman, planti yangpela i no gat rot long kisim gutpela save long poroman em bai maritim, olsem na ol hevi inap kamap. Wanpela papa Kristen long India, em i tok taim dispela samting i kamap, “tupela marit bai tok em asua bilong papamama na ol i gat hevi.”

Papamama Kristen i laik makim poroman marit bilong pikinini, ol i mas tingim as na ol i laik mekim olsem. Taim laik bilong ol long kisim mani o biknem i stiaim ol long makim poroman bilong pikinini, ol hevi bai kamap. (1 Timoti 6:⁠9) Olsem na ol man i laik makim poroman marit bilong narapela, ol i mas askim ol yet olsem: ‘Mi makim gutpela poroman bambai tupela wantaim i ken i stap amamas na strong long ol samting bilong spirit? O mi mekim olsem bambai famili i ken kisim mani o biknem o sampela narapela gutpela samting bilong skin?’​—⁠Sindaun 20:⁠21.

Tok bilong Baibel i klia na gutpela bilong helpim man. Taim man i wok long painim poroman bilong em yet o bilong narapela, namba wan samting em i mas tingting oltaim long en i olsem: Poroman em i laik maritim i gat gutpela pasin na em i strong long ol samting bilong spirit o nogat. Taim em i mekim olsem, dispela bai litimapim nem bilong God Jehova, em As bilong marit, na ol samting bilong spirit bai stiaim tupela marit. (Matyu 7:​24, 25) Dispela bai mekim na marit bilong ol i stap gut na amamas.