Marit Inap i Stap Gut Long Nau

“Yupela i mas kisim pasin bilong laikim tru ol narapela, olsem klos yupela i pasim, long wanem, dispela em i nambawan pasin bilong mekim ol man i stap wanbel.”​—KOLOSI 3:14, NW.

1, 2. (a) Wanem samting long kongrigesen Kristen i strongim bel bilong yumi? (b) Marit i stap gutpela em i wanem kain marit?

TAIM yumi lukim ol lain insait long kongrigesen Kristen, i gutpela samting tru long lukim planti marit em ol i bin stap gut long poroman bilong ol inap 10, 20, 30, o planti yia moa. Ol i bin stap gut long poroman bilong ol maski ol hevi i bin painim ol.​—Stat 2:24.

² Planti i tok olsem marit bilong ol i bin i gat sampela hevi. Wanpela meri i tok: “Marit i stap gutpela i no makim olsem marit i no gat hevi. Sampela taim amamas i stap, na sampela taim hevi i stap . . . Tasol . . . ol i no katim marit bilong ol maski i gat [ol hevi] bilong nau.” Ol marit i stap gutpela ol i lain pinis long karim ol hevi em ol hatwok bilong ol wan wan de i as bilong en, moa yet sapos ol i bin mekim bikpela long ol pikinini. Ol samting i bin painim ol dispela marit i skulim ol olsem trupela pasin laikim “i no inap pinis.”​—1 Korin 13:8.

3. Sampela ripot i tok wanem long marit na pasin bilong katim marit? Dispela i kamapim wanem ol askim?

³ Tasol marit bilong planti milion manmeri i bagarap pinis. Wanpela ripot i tok: “Fifti pesen bilong olgeta marit long Amerika long nau bai i bruk long bihain. Na fifti pesen bilong ol dispela [marit i bruk], ol i bruk insait long 7-pela yia samting . . . Samting olsem 75 pesen i save marit gen, na 60 pesen bilong ol i save katim marit gen.” Na long ol kantri em bipo i no gat planti marit i bruk, nau planti marit i bruk. Olsem: Long Japan namba bilong ol man i katim marit long nau i go bikpela olsem dabol long bipo. Wanem sampela hevi i olsem as na dispela samting i kamap, em ol hevi i save painim tu ol bratasista insait long kongrigesen Kristen? Wanem samting i ken helpim ol marit long i stap gut maski Satan i laik bagarapim ol?

Ol Hevi Yumi Mas Abrusim

4. Wanem sampela samting inap givim hevi long marit?

⁴ Tok Bilong God i helpim yumi long kliagut long ol samting em inap givim hatwok long marit. Tingim tok aposel Pol i mekim long ol samting bilong las de: “Long taim bilong las de planti hevi nogut tru bai i kamap. Ol man bai i laikim ol yet tasol, na ol bai i laikim tumas long kisim mani. Ol bai i litimapim nem bilong ol yet na hambak nabaut, na ol bai i tok kros na tok nogut long ol arapela. Ol bai i sakim tok bilong papamama, na ol bai i no tok tenkyu long ol manmeri i mekim gutpela pasin long ol. Ol bai i givim baksait long ol pasin bilong God. Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin. Ol bai i mekim nogut long ol pren bilong ol yet, na ol bai i bihainim kwik olgeta kranki tingting bilong ol yet. Ol bai i tingim ol yet i bikpela man tru. Ol bai i laikim tumas ol kain kain pasin bilong amamas bilong dispela graun, na ol bai i no laikim God. Ol bai i bihainim pasin bilong God long skin tasol na ol bai i no save liklik long bikpela strong i stap long pasin tru bilong God. Yu mas stap longwe long ol dispela kain man.”​—2 Timoti 3:​1-5.

5. Bilong wanem pasin bilong “laikim ol yet tasol” i putim hevi long marit? Baibel i tok wanem long dispela samting?

⁵ Taim yumi skelim tok bilong Pol, yumi luksave olsem planti samting em i kolim inap mekim marit i bagarap. Olsem, ol man i “laikim ol yet tasol” ol i no tingim ol arapela. Ol man na meri marit husat i gat dispela pasin, ol i strong long inapim laik bilong ol yet tasol. Bai ol i no tingim ol arapela na daunim sampela laik bilong ol yet. Yu ting kain pasin olsem bai helpim marit long i stap gutpela? Nogat tru. Aposel Pol i givim gutpela tok long ol Kristen, na ol marit tu. Em i tok: “Yupela i no ken tingting long yupela yet tasol, na wok long kamapim biknem bilong yupela. Nogat. Yupela i mas daunim yupela yet na yupela i mas ting pasin bilong ol arapela i winim pasin bilong yupela. Yupela i no ken lukautim ol samting bilong yupela tasol. Nogat. Yupela wan wan i mas lukautim ol samting bilong ol arapela manmeri bilong yupela na helpim ol long i stap gut.”​—Filipai 2:​3, 4.

6. Olsem wanem pasin bilong laikim tumas mani inap givim hevi long marit?

⁶ Laikim tumas mani inap mekim na man na meri marit i no pas gut moa. Pol i tok: “Tasol ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus. Bel bilong ol bai i kirap long mekim planti samting nogut na dispela bai i paulim ol tru. Na long dispela pasin ol bai i bagarap olgeta. Pasin bilong laikim tumas mani em i as bilong olgeta pasin nogut. Sampela man ol i bin laikim tumas mani, na dispela pasin i pulim ol na ol i lusim bilip pinis, na ol i karim bikpela hevi moa.” (1 Timoti 6:​9, 10) Sori tru, samting Pol i tokaut long en i painim planti marit long nau. Ol i wok strong long kisim bikpela mani, olsem na ol i no tingim ol samting poroman marit bilong ol i mas kisim, olsem ol i mas strongim bel bilong poroman na pren gut wantaim em.

7. Wanem samting i mekim na man o meri i no stap gut moa long poroman bilong em?

⁷ Na tu, Pol i tok long taim bilong las de, sampela bai “givim baksait long ol pasin bilong God. Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol.” Tok promis bilong marit i mas kirapim tupela marit long pas gut wantaim inap oltaim, na no ken giaman na brukim tok promis bilong marit. (Malakai 2:​14-16) Tasol sampela marit i no tingim poroman bilong ol na ol i kirap mekim pasin long ol narapela olsem ol i gat laik long ol. Wanpela meri i gat 30 krismas samting, man i lusim em pinis, em i tok paslain long man i lusim em, man i save mekim pasin long ol arapela meri olsem em i gutpela pren bilong ol na laikim ol tumas. Man hia i no luksave olsem i no stret long maritman i mekim kain pasin olsem. Bel bilong dispela meri i bagarap tru taim em i lukim dispela samting na long gutpela pasin em i mekim tok lukaut long man bilong em olsem hevi inap kamap long dispela. Tasol man i mekim pasin pamuk. Maski em i kisim gutpela tok lukaut, em i no tingim. Em i pundaun tru long trap.​—Sindaun 6:​27-29.

8. Wanem samting inap kirapim wanpela marit long mekim pasin pamuk?

⁸ Tok lukaut bilong Baibel long no ken mekim pasin pamuk i klia tru! Baibel i tok: “Sapos man i slip wantaim meri bilong narapela man, em i kranki olgeta na i longlong tru. Man i mekim dispela pasin em i bagarapim em yet.” (Sindaun 6:32) Planti taim pasin pamuk i no samting i kamap wantu tasol. Olsem man bilong raitim Baibel, em Jems, i kamapim, planti taim kain sin olsem em i samting man o meri i tingting strong long en pastaim na bihain ol i mekim. (Jems 1:​14, 15) Poroman marit husat i mekim dispela pasin, isi isi em i bin lusim tingting long poroman em i bin tok promis long stap gut long em i go inap long em i dai. Jisas i tok: “Yupela i harim pinis bipo ol i tok olsem, ‘Yupela ol marit, yupela i no ken mekim pasin pamuk.’ Tasol mi tokim yupela olsem, sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.”​—Matyu 5:​27, 28.

9. Wanem savetok i stap long Sindaun 5:​18-20?

⁹ Olsem na em i savetingting long bihainim tok bilong Buk Sindaun: “God i ken mekim gut long meri bilong yu. Meri i olsem hul wara bilong yu na yu ken amamas long em. Em i naispela tumas na pasin bilong en i gutpela tru. Em i save laikim yu tumas, olsem na oltaim yu mas tingting long em na laikim em tru. Na yu mas amamas oltaim long susu bilong en. Pikinini, nogut yu tingting oltaim long meri bilong narapela man na yu laik holim susu bilong en.”​—Sindaun 5:​18-20.

No Ken Marit Hariap

10. Bilong wanem em i savetingting long lusim haptaim bilong save gut long poroman yu tingting long maritim?

¹⁰ Sampela taim ol hevi i painim ol marit taim tupela i marit hariap. Ating ol i yangpela tumas na ol i no save tumas long ol samting. O ating ol i no lusim bikpela haptaim long save gut tru long poroman ol i laik maritim​—olsem ol samting poroman i laikim o i no laikim, ol mak em i laik winim, na famili bilong em. Em i savetingting long stap isi na lusim haptaim bilong save gut long poroman yu tingting long maritim. Tingim Jekop, pikinini man bilong Aisak. Paslain long Jekop i ken maritim Resel, em i mas helpim papa bilong Resel inap 7-pela yia. Em i amamas long mekim olsem, long wanem, pasin laikim i as bilong laik i stap long bel bilong em, em i no tingting tasol long naispela skin bilong Resel.​—Stat 29:​20-30.

11. (a) Marit i pasim wanem tupela samting wantaim? (b) Bilong wanem ol marit i mas bihainim savetingting taim ol i toktok wantaim poroman?

¹¹ Marit i no olsem man i laikim meri na meri i laikim man na em tasol. Marit i pasim wantaim wanpela man na meri em ol i bin go bikpela insait long narapela narapela famili, tupela i gat ol pasin i bilong ol yet, strong bilong bel i no wankain, na planti taim skul ol i bin kisim i no wankain. Sampela taim tupela marit i bilong narapela narapela kantri, na tok ples bilong tupela i narapela narapela. Marit i bungim tupela maus em ol i ken kamapim narapela narapela tingting long planti samting. Dispela tupela maus i bikpela samting tru insait long marit. Tupela maus inap toktok planti na sutim tok, o ol i ken kamapim ol tok long pasin bilong strongim na helpim narapela. Tru tumas, tok yumi mekim inap givim pen o mekim orait poroman bilong yumi. Sapos i no gat pasin bilong bosim gut maus, dispela i putim bikpela hevi long marit.​—Sindaun 12:18; 15:​1, 2; 16:24; 21:9; 31:26.

12, 13. I gutpela sapos yumi gat wanem stretpela tingting long marit?

¹² Olsem na em i savetingting long lusim haptaim bilong save gut tru long poroman yu tingting long maritim. Wanpela sista Kristen i marit longpela taim, em i tok: “Taim yu tingting long wanpela yu laik maritim, tingim tenpela samting yu laik bai dispela poroman i mas mekim. Sapos em i mekim sevenpela samting tasol, orait askim yu yet, ‘Mi inap lusim tingting long dispela tripela samting em i no save mekim? Na long olgeta de wan wan bihain long mipela i marit, bai mi no tingim ol?’ Sapos yu gat tupela tingting, orait skelim gut.” Tasol yu mas i gat stretpela tingting. Sapos yu laik marit, yu mas save olsem bai yu no painim wanpela poroman i gutpela olgeta. Na tu, husat i maritim yu, em i no kisim poroman i gutpela olgeta!​—Luk 6:41.

¹³ Olgeta marit i mas daunim sampela laik bilong ol yet. Pol i kamapim dispela samting taim em i tok: “Mi no laik bai ol wari bilong dispela graun i pulim nabaut tingting bilong yupela. Man i no marit, em i save tingting planti long pasin bilong Bikpela. Em i laik mekim pasin Bikpela i laikim. Tasol man i marit, em i save tingting planti long ol samting bilong dispela graun. Em i laik mekim pasin meri bilong en i laikim. Olsem na tingting bilong en i bruk. Na ol yangpela meri na ol arapela meri i no marit, ol i save tingting planti long pasin bilong Bikpela. Ol i laik givim ol yet olgeta long God na i stap holi long bodi na long spirit tu. Tasol meri i marit, em i save tingting planti long ol samting bilong dispela graun. Em i laik mekim pasin man bilong en i laikim.”​—1 Korin 7:​32-34.

As na Sampela Marit i Bagarap

14, 15. Wanem samting inap mekim na marit i no stap strong?

¹⁴ I no longpela taim i go pinis wanpela meri Kristen i karim bikpela hevi bilong katim marit. Em i marit inap 12-pela yia na man bilong em i lusim em na prenim narapela meri. Olsem wanem? Meri i bin luksave long sampela samting i soim olsem marit i gat hevi? Em i tok: “Man bilong mi i bin lusim pasin bilong beten. Em i larim ol liklik samting nating i pasim rot bilong em long go long ol miting na autim tok. Em i tok em i gat planti wok tumas o em i tait tru na em i no inap lusim haptaim long stap wantaim mi. Em i no toktok moa wantaim mi. Mipela i no stori moa long ol samting bilong spirit olsem bipo. Sori tru, em i no stap moa olsem man mi bin maritim.”

¹⁵ Sampela narapela i tok ol tu i lukim ol kain mak olsem, poroman i no mekim Baibel stadi bilong em yet, lusim beten, na ol miting Kristen. Yumi ken tok, ol lain i bin lusim poroman marit bilong ol, planti taim ol i bin lusim ol samting i bin helpim ol long pas gut wantaim Jehova pastaim. Olsem na ol i no tingting moa long ol samting bilong spirit. Ol i no tingim Jehova moa olsem God i gat laip. Ol i no gat tingting moa olsem tru tru nupela taim i gat stretpela pasin bai kamap. Sampela taim ol dispela hevi bilong spirit i bin painim ol paslain long ol i bin kirap prenim wanpela i no poroman bilong ol.​—Hibru 10:​38, 39; 11:6; 2 Pita 3:​13, 14.

16. Wanem samting i strongim marit?

¹⁶ Tasol stori bilong tupela marit i amamas long marit bilong ol i narapela olgeta, ol i tok marit bilong ol i stap gut, long wanem, ol i stap strong long ol samting bilong spirit. Ol i save beten na stadi wantaim. Man i tok: “Mipela ritim Baibel wantaim. Mipela wok wantaim long autim tok. Mipela amamas long mekim ol samting wantaim.” Skul yumi kisim i klia tru: Taim yumi mekim yet ol samting bilong pas gut wantaim Jehova, dispela i bikpela samting bilong helpim marit long stap strong.

Tingting Stret na Toktok Gut Wantaim

17. (a) Wanem tupela samting i helpim marit long stap gut? (b) Pol i tok wanem long pasin laikim ol Kristen i save kamapim?

¹⁷ Tupela narapela samting i helpim marit long stap gut i olsem: Pasin laikim Kristen na pasin bilong toktok gut wantaim. Taim narapela i dai tru long narapela, planti taim bai ol i no tingim pasin kranki bilong poroman ol i laik maritim. Ating tupela bai marit, tasol ol i no gat stretpela tingting long sindaun tru tru bilong ol marit, ating ol buk nating ol i ritim o ol piksa ol i lukim long TV i as bilong tingting bilong ol. Tasol bihain samting tru tru i kamap ples klia. Nau ol liklik pasin kranki inap kamapim ol bikpela hevi. Sapos dispela samting i kamap, ol Kristen i mas kamapim ol pasin em holi spirit i as bilong en, wanpela em pasin laikim. (Galesia 5:​22, 23) Pasin laikim i gat bikpela strong. Pol i tok pasin laikim ol Kristen i kamapim i olsem: ‘Em i no save kros kwik, em i save mekim gutpela pasin long olgeta man. Em i no save tingting tumas long em yet. Em i no save belhat kwik. Em i no save tingim rong. Em i no save larim wanpela samting i daunim em. Oltaim em i save bilip long God na wetim God i helpim em, na sanap strong.’ (1 Korin 13:​4-7) Em nau, pasin laikim tru i mekim na yumi no save tingim ol pasin kranki em yumi olgeta manmeri bilong graun i save mekim, na i no ting man i mas mekim ol pasin i gutpela olgeta.​—Sindaun 10:12.

18. Olsem wanem pasin bilong toktok gut wantaim i ken strongim marit?

¹⁸ Pasin bilong toktok gut wantaim em i bikpela samting. Maski ol i marit inap hamas yia, ol marit i mas toktok wantaim poroman na putim gut yau long poroman. Wanpela man marit i tok: “Long gutpela pasin mipela i save kamapim ol tingting i stap long bel.” Taim ol i lain gut, man na meri marit i save lain long putim yau long tok poroman i kamapim na long tok poroman i no mekim. Olsem: Taim ol i marit longtaim liklik, tupela marit i stap amamas ol inap save long tingting na laik bilong bel em poroman i no tokaut long en. Sampela meri i tok man bilong ol i no save putim yau tru long tok bilong ol. Sampela man i tok, i luk olsem oltaim meri bilong ol i laik toktok gut long taim em i gat ol wok long mekim. Pasin sori na pasin bilong tingim tru narapela i insait long pasin bilong toktok gut wantaim. Pasin bilong toktok gut wantaim i helpim man na meri marit wantaim.​—Jems 1:19.

19. (a) Bilong wanem i hatwok long tok sori? (b) Wanem samting inap kirapim yumi long tok sori?

¹⁹ Pasin bilong tok sori i insait long pasin bilong toktok gut wantaim. Sampela taim dispela em i hatwok long mekim. Man i mas i gat pasin daun bilong tokaut olsem em i popaia. Tasol dispela samting inap strongim tru marit! Pasin bilong tok sori inap rausim hevi na kros i no ken kamap long bihain, na em i opim rot long lusim tru rong bilong narapela na long stretim hevi. Pol i tok: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela.” Na “Yupela i mas kisim pasin bilong laikim tru ol narapela, olsem klos yupela i pasim, long wanem, dispela em i nambawan pasin bilong mekim ol man i stap wanbel.”​—Kolosi 3:13, 14; NW.

20. Kristen i mas mekim wanem kain pasin long poroman bilong em taim tupela tasol i stap? Em i mas mekim wanem kain pasin long poroman long taim tupela i stap long ai bilong ol arapela?

²⁰ Narapela bikpela samting insait long marit em narapela i mas helpim narapela. I stret insait long marit Kristen narapela inap bilip long narapela, na kisim strong long narapela. No ken tru daunim poroman o mekim samting i daunim pasin bilong em long bilip long em yet. Yumi save givim ol gutpela tok long poroman bilong yumi; yumi no save mekim hatpela tok na kotim ol. (Sindaun 31:28b) Yumi no save mekim ol tok pilai samting i daunim ol. (Kolosi 4:6) Pasin bilong poroman i helpim poroman i kamap strong moa taim tupela i save kamapim pasin laikim bilong ol. Holim poroman long gutpela pasin o mekim liklik switpela tok, dispela i wankain olsem yu tokim poroman: “Mi no lusim pasin bilong laikim yu tru. Mi amamas yu stap wantaim mi.” Em ol sampela samting bilong helpim pasin poroman insait long marit na helpim marit i stap gut nau long dispela taim. I gat ol arapela samting tu, na stadi i kamap bihain long dispela bai kamapim sampela gutpela tok moa bilong Baibel long olsem wanem marit i ken i stap gut.a

[Futnot]

Yu Inap Stori Long Dispela?

• Wanem sampela samting i putim hevi long marit?

• Bilong wanem i no gutpela long marit hariap?

• Pasin bilong stap strong long ol samting bilong spirit i mekim wanem long marit?

• Wanem samting i helpim marit long stap gut?

[Piksa long pes 12]

Marit i no olsem man i laikim meri na meri i laikim man na em tasol

[Ol Piksa long pes 14]

Pasin bilong pas gut wantaim Jehova bai helpim tupela marit na marit bilong ol i ken stap gut