Sampela Tok i Kam Long Olgeta Hap
Wok Bisnis Bilong Stilim Man
Wanpela nius (U.S.News & World Report) i tok: “Pasin bilong stilim man . . . em wanpela bikpela wok bisnis long Meksiko, Kalombia, Hong Kong, na Rasia. Long olgeta hap insait long 3-pela yia i go pinis, namba bilong ol man ol i stilim na askim famili samting long baim bek dispela man em i go antap tru.” Ol i stilim planti man long Latin Amerika, winim ol narapela kantri. Long 1995 i go inap 1998, ol i bin stilim 6,755 man long dispela hap. Ol narapela kantri ol i save stilim planti man long en, em Esia na Hap Bilong Is (617), Yurop (271), Afrika (211), Midel-Is (118), na Not Amerika (80). Tru, ol i save stilim ol bisnisman bilong ples na ol papa bilong graun, tasol ol i stilim tu ol man i go helpim ol man i sot, na ol bisnisman i save raun, na ol turis. Long nau sampela bikpela kampani i baim insurens bilong inapim pe bilong baim bek man ol i stilim, na tu, pe bilong ol wokman i save toktok wantaim ol stilman bilong stretim dispela hevi, na pe bilong baim dokta samting i save stretim tingting. Ol lain i stilim man ol i save stretim gut wok bilong ol, ol i kisim save long ol samting bilong ol man ol i laik stilim olsem husat i gat planti mani samting, na ol i skelim wanem ol hevi inap painim ol taim ol i stilim man. Ol i save mekim gutpela pasin long man ol i stilim, long wanem, ol i save dispela inap mekim na man ol i stilim i no traim long ranawe, na ol inap kisim mani long famili bilong baim bek man ol i bin stilim. Nius i tok: “Long olgeta hap, long olgeta 10-pela 10-pela man ol i stilim, wanpela tasol i dai.” Tasol nius i tok moa: “Was gut long ol polis. Planti taim ol i wok wantaim lain i stilim man.”
Nambawan Bikpela Binatang Jem
Wanpela saientis bilong lain Max Planck Institute for Marine Microbiology, em Heide Schulz, em i bin kisim save long wanpela traipela binatang jem i stap long as bilong solwara klostu long nambis bilong Namibia, Afrika. Bikpela bilong dispela jem i olsem 0.75 milimita na i winim olgeta narapela binatang jem inap 100 taim. Nius The Times bilong Landon i tok: “Sapos bikpela bilong ol narapela binatang jem i olsem nupela liklik rat, bikpela bilong dispela nupela jem i olsem blu weil.” Nem bilong ol dispela jem em Thiomargarita namibiensis, na ol i pas wantaim olsem rop bis. Nius The Times i tok, “bilong stap laip, dispela jem i save kaikai marasin salfait.”
Planti Tumas Bodi Long Genjis
Wanpela nius (Electronic Telegraph) i tok: “Inap planti handet yia, ol Hindu i bin putim skin bilong ol man i dai pinis long wara Genjis, long wanem, ol i bilip olsem dispela bai mekim na daiman i winim mak moksa, em olsem tewel i lusim pasin bilong kamap nupela gen long narapela skin. Bipo dispela wara, em longpela bilong en i olsem 2,500 kilomita, em i go daun tru na i ran strong, na karim i go planti handet bodi i wok long sting. Tasol bihain pipia bilong ol faktori na pipia ol man i tromoi long wara i mekim na wara i no ran strong na i no go daun tru olsem bipo.” Dispela i mekim na skin bilong ol daiman i “pas long gras na pipia inap planti wik.” Long 1988 samting, gavman i traim long stretim dispela hevi na ol i putim planti tausen trausel i save kaikai abus long Genjis. Tasol long 1994 ol i lusim dispela samting, long wanem, planti tumas bodi i stap long wara na ol trausel i no inap pinisim, na ol man i kilim ol trausel long pasin hait. Nau gavman i kirapim ol man long kukim skin bilong man i dai pinis o long planim em long wesan long arere bilong wara Genjis.
Ol Yangpela Bilong Kanada na Lotu
Wanpela nius (The Vancouver Sun) i tok: “Planti yangpela (80 pesen) long Kanada ol i bilip long God,” tasol “sampela tasol (15 pesen) i save go oltaim long haus lotu.” Bilong wanem em olsem? Sampela i no laik go long haus lotu, long wanem, “ol i les long tok ol i save autim long haus lotu,” na “ol strongpela bilip bilong lotu i mekim na ol yangpela i les long go long haus lotu.” Nius i tok moa: “Na ating nem bilong ol bikpela lotu i bagarap tru taim ol nius i stori long pasin bilong ol pris long mekim pasin sem long ol pikinini, na long ol pait bilong lotu Sik, na long ol Juda i strong tumas long ol samting bilong lotu, na long ol Hindu i save pait. Ol lain i skelim tingting bilong ol yangpela, ol i kisim save olsem sampela yangpela (39 pesen) tasol bilong Kanada ol i bilip long ol bikman bilong lotu, tasol long 1984 planti yangpela (62 pesen) i bilip long ol.” Long pinis bilong stori, nius i tok: “Ating ol yangpela i no save ol pris i amamas long ol i kam long haus lotu, o planti man i save birua long lotu, o planti yangpela i no laikim tok ol i save autim long haus lotu, o olgeta dispela samting i mekim na planti yangpela i no save go long haus lotu.”
Marasin Asit na Hul Long Tit
Wanpela bilong ol man i raitim buk Oral Health: Diet and Other Factors, em Mike Edgar, em i tok: “Ol man i no ken ting moa olsem suga tasol i save kamapim ol hul long tit, ol i mas tingim tu ol kaikai i save kamapim marasin asit long maus bilong ol.” Dispela ripot i tok, taim man i dring wara bilong swit muli long moningtaim, o em i kisim kaikai i gat marasin asit long en, em i mas wet inap hap aua pastaim na bihain em i ken wasim tit. Bilong wanem? Long wanem, taim mak bilong marasin asit long maus i go antap, dispela i mekim na skin bilong tit i go malumalum na isi isi bras bai rausim skin. Bilong daunim mak bilong marasin asit, ol i tok em gutpela long kaikai samting i gat planti marasin protin long en, olsem sis na pinat, tasol man i mas kaikai dispela samting insait long 20 minit bihain long em i kisim kaikai i gat asit long en.—Nius The Times bilong Landon.
Kompyuta i Helpim Man Long Beten
I no longtaim i go pinis na Sios Bilong Inglan i kamapim program bilong en long kompyuta Intenet. Long dispela program i gat tok bilong helpim man long beten. Dispela lotu i tok, God i save harim olgeta beten, olsem na ol i kirapim ol man long beten long kain kain pasin. Ol i tok, “mekim wok long musik, ston, gras bilong pisin, plaua, o kendel bilong helpim yu long putim tingting bilong yu long beten,” na “mekim wok long han bilong yu. Yu ken mekim wok long pinga bilong yu bilong tingim narapela narapela samting yu ken beten long en.” Olsem: Program i tok, namba wan pinga em strongpela, olsem na em i ken kirapim yu long beten long ol samting i bikpela samting long i stap bilong yu, olsem haus na famili. Longpela pinga i stap long namel inap kirapim yu long beten askim God long helpim “ol man i gat namba long bosim graun,” na liklik pinga inap kirapim yu long beten askim God long helpim “yu yet.” Nius The Times i stori long dispela samting olsem: “Dispela program long kompyuta Intenet i kamapim klia tingting bilong lotu, ol i ting ol man i givim baksait pinis long lotu. Program i tok: ‘Gutpela sapos yu mekim planti taim ol sotpela beten, tasol yu no ken lusim pasin bilong beten.’ ”
Ol Kokros i Ran Siksti
Man i bin traim long paitim kokros em i save dispela i hatwok long mekim. Bilong wanem? Wanpela samting i olsem: Ol liklik liklik gras i stap long tupela sait bilong bel bilong en i pilim win i meknais liklik taim birua i kam, na i kamapim hap birua i kam long en. Na tu, ol rop wailis bilong en i wok gut tru, na kokros inap kirap na ranawe i go insait long hap seken tasol. Wanpela nius (Berliner Morgenpost) i tok, Jeffrey Camhi na ol wanwok bilong em long Hibru Yunivesiti bilong Jerusalem, ol i bin kisim sampela save moa long rot bilong wanpela kain kamera i save kisim ol piksa hariap tru. Ol i kisim save olsem ol kokros inap ran wanpela mita insait long wanpela sekon, na ol inap senisim hap ol i laik go long en inap 25 taim insait long wanpela sekon, na spit bilong ol i no go daun. Nius New Scientist i kamapim tok bilong Camhi: “Mipela i no save long wanpela narapela animal em inap tanim hariap na go long narapela hap olsem kokros inap mekim. Sapos ol kokros i no mekim ol samting nogut long haus bilong man, ating planti man bai laikim ol kokros, olsem i stret ol i mekim.”
Doli Bilong Japan i Stretim Hevi?
Wanpela kampani long Tokyo inap stretim hevi bilong ol bubu i sindaun longwe long ol tumbuna pikinini bilong ol, na ol i no lukim ol tumbuna planti taim. Olsem: Salim piksa bilong bebi i go long kampani, na insait long 6-pela wik bai yu kisim wanpela doli i wankain olsem tumbuna. Nius New Scientist i tok: “Na i no dispela samting tasol. Insait long doli i gat liklik kaset samting i kisim toktok samting bilong bebi, olsem na doli i gat nek bilong bebi bilong yu. Holim han bilong doli na kaset bai kamapim toktok bilong bebi, o wanem samting yu bin putim long kaset. Nius The Nikkei Weekly i tok, pe bilong doli em 400 dola, na ol bubu i save lukim tumbuna bilong ol wan wan taim tasol, ol i save baim dispela doli.”