Sampela Tok i Kam Long Olgeta Hap
Lain Bilong Bikpela Bel Hevi
Nius The Australian i tok, sampela lain i bin skelim tingting bilong ol yangpela bilong nau em ol i gat 15 i go inap 24 krismas wantaim tingting bilong ol yangpela bilong bipo, na ol i kisim save olsem, pasin bilong mekim nabaut long ol drak, na pasin raskol, na pasin bilong kilim i dai skin bilong ol yet i bikpela moa. Wanpela saveman (Richard Eckersley) i kamapim tingting bilong planti yangpela long nau, em i tok: “Ol yangpela i ting ol samting i mas kirapim bel na tingting na givim amamas long ol, na ol i mas lukautim ol yet, na rot i mas op bilong ol i ken bihainim olgeta laik bilong ol, na ol gavman i no inap stretim ol hevi bilong ol man, na ol yangpela yet i no gat strong bilong stretim ol hevi.” Wanpela yangpela meri i gat 15 krismas, nem bilong em Shanu, em i tok: ‘Planti man moa i wok long kamap na mipela i mas resis long kisim wok mani o haus samting, long wanem, ol dispela samting i sot.’
Ol Man Bilong Smok Long Esia
Ol i ting long Vietnam klostu 73 pesen bilong ol man i smok. Wanpela nius (The Journal of the American Medical Association) i tok, “i no gat narapela lain man long olgeta hap i save smok planti olsem.” Tasol i no gat planti meri long Vietnam i smok—inap 4 pesen tasol. Long ol narapela kantri bilong Esia klostu long solwara Saut Pasifik, ol i bihainim wankain pasin. Olsem: Long Indonisia inap 53 pesen bilong ol man na 4 pesen bilong ol meri i smok, na long Saina inap 61 pesen bilong ol man na 7 pesen bilong ol meri i smok.
Ol Monki Babun i Kros
Long kirap bilong dispela yia narapela kain hevi i bin painim ol draiva long wanpela bikrot bilong Saut Afrika i gat planti ka i go i kam long en—wanpela lain monki, em ol babun, ol i tromoi ston long ol. Wanpela nius (International Herald Tribune) i tok, ol monki babun i tromoi ston long ol draiva taim ol i kamap long wanpela ples daun bilong maunten long rot i ran namel long Kep Taun na Johanisbek. Birua i no bin painim ol draiva na ka bilong ol i no kisim bagarap, tasol bilong stretim dispela hevi ol polis i tromoi ston long ol monki bilong rausim ol long dispela hap bilong bikrot. I no gat wanpela lain—polis o monki—i winim tru dispela pait wantaim ol ston.
Long Ples Antap Ol Samting i Hip i Stap
Inap 11-pela yia ol i mekim wok long wanpela roket-stesin (Mir) bilong Rasia long ples antap, na nau ol i wok long karim hevi long samting yumi ol man long graun i save gut long en—ol inap mekim wanem long ol samting i hip i stap. Long ples antap ol samting i no gat hevi bilong en—ol samting i save trip nabaut. Olsem na ol samting ol i mas kisim bilong mekim wok long en long ples antap olsem wanpela kain klos, ol waia bilong kompyuta, ol karamap kaikai, ol tul, na ol spe-pat, ol i mas pasim long plua na rup na banis bilong roket-stesin. Tasol ol dispela samting i hip i stap inap 30 sentimita long plua na rup na banis, olsem na insait long roket, spes i go liklik. Taim ol i wokim nupela roket-stesin (International Space Station), ating bai i gat wanpela masin bilong krungutim strong ol pipia na ol man bilong i go long ples antap inap mekim wok long en. Ol bai amamas long dispela, long wanem, long nau ol man i stap insait long roket-stesin (Mir) ol yet i mas krungutim ol tin bihain long ol i kaikai na putim ol tin i go insait long bokis kaikai na pasim bokis long banis.
Skul Bilong Lotu i Senisim Lo
Wanpela nius (The Christian Century) i tok, wanpela skul bilong lotu Episkopal long Vejinia, “i no strong moa long wanpela lo bilong ol i bin stap 25 yia, em lo i tambuim ol sumatin na tisa long mekim ol samting bilong maritpasin wantaim wanpela i no poroman marit bilong ol, na long mekim pasin sodom.” Siaman bilong lain i bosim skul, em Peter J. Lee, em i tok: “Yumi mas save, klostu olgeta sumatin i gat 30 o 40 krismas samting. I no gat mama i bosim ples slip bilong ol na sekim husat i stap long bet bilong ol o nogat.” Insait long 11-pela yia nau, namba bilong ol man i insait long skul i go daun inap 33 pesen. Na tu, insait long 25 yia i go pinis, ol sumatin i insait long skul ol i gat bikpela krismas liklik. Bipo planti i gat 27 krismas samting, tasol nau ol i gat 40 krismas samting. Lee i tok: “Mi siaman bilong lain i bosim skul na mi no laik skul i pasim wanpela man i gat 28 krismas long insait long skul, long wanem, mipela painimaut olsem em i save slip wantaim meri em i laik maritim.”
Kaikai na Tit i Bagarap
Long bipo i kam inap nau, ol man i save sapos yumi lusim kaikai i gat planti suga long en, dispela inap helpim tit bilong yumi na ol i no ken bagarap. Tasol wanpela buk i stori long ol samting famili i ken mekim bilong lukautim tit (How to Keep Your Family Smiling) i tok, bikpela samting em long was gut long wanem taim yu kisim ol liklik kaikai paslain o bihain long bikpela kaikai bilong yu, na hamas taim yu kisim. Buk i tok, taim kaikai i gat suga samting i holim tit, wanpela kain marasin i save kamap long maus na kukim tit. Inap 20 minit samting dispela marasin i wok long bagarapim strongpela skin bilong tit. Insait long dispela sotpela taim ol liklik hul inap kamap long tit. Na “dispela samting inap kamap long olgeta taim yu kaikai wanpela liklik kaikai i gat suga samting long en.” Olsem na sapos yu laik kisim liklik kaikai paslain o bihain long bikpela kaikai bilong yu, “i gutpela sapos yu pinisim dispela kaikai olgeta” na marasin bilong kukim tit bai mekim wok wanpela taim tasol bilong bagarapim tit. Sapos nogat na yu kaikai dispela wanpela kaikai i go i go, marasin bilong kukim tit i gat longpela taim liklik bilong bagarapim tit. Bilong helpim yu na tit i no ken bagarap, ol dokta bilong tit i tok, yu mas brosim tit bilong yu inap 2-pela taim long wanpela de. Na yu no ken lusim tingting long klinim namel long wan wan tit wantaim liklik string bilong klinim tit.
Ol Jem Bilong Raun Long Olgeta Hap
Wanpela nius (New Scientist) i tok, ol tang bilong toilet long ol balus i gat marasin bilong kilim ol jem, tasol sampela jem i gat strong long winim marasin. Mark Sobsey, wanpela saientis i wok long Yunivesiti Bilong Not Karolaina, em i kisim save olsem, inap 50 pesen bilong pekpek samting i stap long ol tang bilong toilet long ol balus i kam long ol narapela kantri na i pundaun long Yunaitet Stets, ol i gat ol jem i stap laip yet long en. Long Yunaitet Stets, ol dispela pipia bilong balus i save go long wanpela ples bilong tromoi pekpek na ol i save putim marasin samting long en bilong kilim ol jem na bihain ol i tromoi long ol tais o solwara samting. Olsem na ol i mas was gut, nogut sampela bilong ol dispela jem i givim sik long planti man olsem hepataitis A na E, meninjaitis, na polio. Saveman Sobsey i tok: “Ol kain kain sik ol balus bilong ol narapela kantri inap bringim i kam, em samting mipela tingting planti long en.”
Ol Saientis i Bilip Long God
Long 1916, wanpela saveman bilong Amerika, em James Leuba, em i askim 1,000 saientis, ol i bilip long God o nogat. Ol i tok wanem? Nius The New York Times i tok, long ol saientis i bin bekim tok, inap 42 pesen i tok ol i bilip long God. Saveman Leuba i tok, bihain taim planti man moa i kisim skul, planti i no ken bilip long God. Nau, 80 yia bihain, saveman Edward Larson bilong Yunivesiti Bilong Jojia, em i bin mekim wankain samting olsem Leuba i bin mekim. Larson i kamapim ol wankain askim na em i bihainim wankain pasin bilong Leuba na em i askim sampela kain saveman na saientis, ol i bilip olsem wanpela God i save tingim ol man o nogat. Samting i kamap em olsem: Long nau planti saientis—inap olsem 40 pesen—ol i tok ol i bilip long God. Saveman Larson i tok, “Ating Leuba i bin popaia long skelim tingting bilong man o long strong bilong saiens long inapim laik bilong ol man.”
Wara Genjis i Wok Long Pinis
Wara Genjis—long India ol i kolim Genja—em i wanpela wara planti handet milion Hindu ol i ting em i holi. Na dispela wara i bikpela samting tru long ol, long wanem, arere long olgeta hap bilong wara Genjis ol man i wokim ol gaden na plantesen. Tasol nius India Today i tok, long nau wara i wok long go daun, olsem na long planti hap long arere bilong wara, graun i drai. Ol i ting wara i wok long go daun, long wanem, India i no kisim planti ren, na klostu long het bilong wara ol i mekim bikpela wok bilong givim wara long ol gaden samting. Na nius i tok, dispela hevi inap bagarapim wok bilong ol fama long dispela hap. Na tu, wara i laik drai na i no ran strong, na dispela i mekim na graun i wok long hip long pasis, olsem na ating bihain ol sip i no inap kam insait long pasis bilong Kalkata.