Baibel i Tok Wanem?

Tripela King i Bin i Go Lukim Jisas Long Betlehem?

BIHAIN long taim mama i karim Jisas, sampela man i gat namba bilong hap sankamap i kam long Betlehem bilong givim biknem long king bilong ol Juda. Inap long nau planti manmeri long olgeta hap i tingim yet dispela samting taim ol i mekim Krismas.

Long sampela hap ol manmeri i save sanapim piksa bilong pikinini Jisas na mama bilong em na long piksa ol i bilasim ol man bilong hap sankamap olsem tripela king ol i givim ol presen long bebi Jisas. Na long sampela hap moa ol pikinini i bilas olsem “ol King Holi” na ol i mats raun long ples. Maski 2000 yia i go pinis, ol manmeri bilong olgeta hap i save tingim yet ol dispela man i bin go lukim Jisas. Ol i husat?

Ol i Stap King o Nogat?

Stori tru tru bilong ol dispela samting i stap long Baibel long Buk Matyu. Long Matyu yumi kaunim dispela tok: “Em i karim Jisas pinis, na bihain sampela man bilong glasim ol sta bilong kisim save long ol samting bai kamap bihain bilong hap sankamap i kam long Jerusalem na ol i askim nabaut olsem, ‘Nupela pikinini em king bilong ol Juda, em i stap we? Mipela i lukim sta bilong en long hap sankamap, na mipela i kam bilong lotu long em.’ ” (Matyu 2:​1, 2, New American Bible) Bilong wanem Baibel New American i tok ol dispela man bilong is ol i man bilong glasim ol sta na i no tok ol i king?

Baibel i mekim wok long wanpela tok Grik maʹgos. Sampela Baibel i tanim dispela tok olsem, “ol saveman,” o “ol man bilong glasim ol sta bilong kisim save long ol samting bai kamap bihain,” o “ol man i lukluk long ol sta,” o “Maji.” Dispela tok i makim man i lukluk long ol sta na planet samting bilong save long ol samting bai kamap bihain. Olsem na Baibel i givim save long yumi olsem ol dispela man i bin kam long Betlehem em ol man i mekim wok long ol samting bilong ol spirit nogut God i no orait long en.​—⁠Lo 18:​10-​12.

Olsem wanem? Ol i stap king tu? Sapos olsem, Baibel bai tokaut klia long dispela samting. Baibel i kolim dispela tok “king” fopela taim long Matyu 2:​1-​12, wanpela taim i stori long Jisas na tripela taim i stori long Herot. Tasol i no gat wanpela taim Baibel i kolim ol dispela saveman olsem king. Wanpela buk (The Catholic Encyclopedia) i tok: “I no gat wanpela bikman bilong Sios bilong bipo i ting ol dispela saveman i king.” Baibel i wanbel long dispela tok.

I Gat Tripela i Bin Stap?

Baibel i no stori long hamas saveman haiden i bin stap. Tasol ol piksa bilong pikinini Jisas na mama bilong em wantaim planti singsing bilong Krismas i tok i bin i gat tripela saveman. As na ol i tok olsem, em Baibel i stori long tripela presen. Baibel i tok: “Na ol i opim paus bilong ol, na ol i givim ol presen long em. Ol i givim gol na gutpela sanda na paura bilong kamapim smok i gat gutpela smel.”​​—⁠Matyu 2:​11.

Olsem wanem? I stret yumi ken ting i gat tripela saveman long wanem ol i bin givim tripela presen? Yumi ken skelim stori bilong wanpela meri i gat namba i bin kam long Israel. Kwin bilong Seba i bin kam lukim King Solomon na em i givim em “planti gol tru na ol kain paura samting i gat gutpela smel na olkain ston i dia tumas.” (1 King 10:⁠2) Baibel i kolim tripela kain presen, tasol em i stori long Kwin bilong Seba wanpela tasol i bin givim. Solomon i bin kisim tripela presen, tasol dispela i no makim olsem i gat tripela man i bin givim ol dispela presen long em. Na olsem tasol, dispela 3-pela presen Jisas i bin kisim, em i no makim hamas man i bin kam lukim em.

Wanpela buk (The Catholic Encyclopedia) i tok: “Ol Gutnius i no stori long hamas saveman i bin stap na ol stori tumbuna tu i no makim hamas. Sampela bikman bilong Sios bilong bipo ol i tok i gat tripela saveman, tasol ol i tingim namba bilong presen na ol i mekim dispela tok.” Dispela buk i tok moa olsem, sampela piksa ol man i bin wokim i gat tupela o tripela o fopela o inap etpela man i kam lukim Jisas. Sampela stori tumbuna i tok 12-pela man i bin kam. Tasol, i no gat rot bilong save hamas saveman i bin kam.

Wanpela Stori Planti Man i Laikim Tasol i No Stret

Planti manmeri i bilip olsem ol saveman i bin kamap long Betlehem pastaim, tasol nogat. Ol i bin kamap long Jerusalem bihain long taim mama i karim Jisas. Ol i no bin stap taim mama i karim em. Bihain, ol i go long Betlehem na Baibel i tok “ol saveman i go insait long haus, na ol i lukim pikinini wantaim mama bilong en Maria.” (Matyu 2:​1, 11) Olsem na taim ol saveman i lukim Jisas, em wantaim famili bilong em i sindaun pinis long wanpela haus. Ol i no lukim em i slip long bokis kaikai long haus bulmakau.

Taim yumi skelim tok bilong Baibel, yumi kisim save olsem stori bilong tripela king i kam adorim Jisas long taim mama i bin karim em i no stret. Olsem yumi stori pinis, Baibel i kamapim klia olsem ol dispela saveman em ol man bilong glasim ol sta na ol i mekim wok long ol samting bilong ol spirit nogut. Baibel i no stori long hamas i bin kam. Na tu, ol i no bin stap long taim mama i karim Jisas na slipim em long bokis kaikai bilong ol bulmakau, nogat. Ol i bin kam taim Jisas na famili bilong em ol i sindaun pinis long wanpela haus.

Dispela stori bilong tripela king na ol narapela stori tumbuna bilong Krismas i no stret wantaim tok bilong Baibel, tasol ol man i ting ol dispela stori i no inap nogutim yumi. Tasol ol Kristen i gat bikpela laik long mekim lotu i no gat ol pasin giaman. Jisas yet i gat wankain tingting. Taim em i beten long Papa bilong em, em i bin tok: “Tok bilong yu i tru olgeta.” (Jon 17:17) Em i tok “olgeta man i laik lotu tru bai ol i lotu long Papa long strong bilong Holi Spirit na long pasin i tru. Na Papa i laikim tumas bai ol kain man olsem i mas lotu long em.”​—⁠Jon 4:​23.

[Piksa long pes 19]

“Ol saveman i adorim Jisas”