Ol Yangpela i Laik Save . . .

Olsem Wanem Mi Inap Abrusim Samting Nogut Bilong Intenet?

LONG tingting i olsem yu stap long wanpela traipela haus buk. Long dispela haus buk i gat ol kain kain buk na nius samting na ol piksa bilong stori long planti samting. Wanem samting yu gat laik long save long en, samting bilong bipo o samting bilong nau, ol i stap na yu ken skelim.

Intenet i narapela rot bilong kisim ol kain save olsem. Wanpela man inap mekim wok long kompiuta bilong em na kisim ol save i stap long ol narapela kompiuta long olgeta hap bilong graun, na em inap givim o kisim sampela tok o save long man i mekim wok long narapela kompiuta.a Man inap mekim wok long Intenet bilong salim o baim ol samting. Em inap mekim wok long beng o toktok wantaim narapela i mekim wok long Intenet o harim ol nupela kaset bilong singsing​—⁠em inap mekim ol dispela samting taim em i stap long haus bilong em yet.

Olsem na sampela man i gat save long ol dispela samting ol i tok taim dispela yia i pinis, 320 milion manmeri bai mekim wok long Intenet. Long planti ol hap bilong graun ol i save mekim wok long en. Ol skul na haus buk i save kirapim ol manmeri long mekim wok long Intenet, olsem na rot i op bilong planti yangpela i ken mekim wok long en. Long Yunaitet Stets, 65 pesen bilong ol yangpela i gat 12 i go inap 19 krismas ol i mekim wok long en.

Taim yu mekim wok i stret long en, dispela Intenet inap helpim yu long save long wanem hap bai i gat ren o san samting, na pasin bilong raun long sampela narapela hap na ol narapela kain samting. Yu inap mekim wok long en bilong baim ol buk o samting bilong stretim ka na ol narapela samting. Planti i save mekim wok long en bilong helpim ol long ol wok bilong skul.

Wok bilong Intenet inap long helpim yumi, tasol em i olsem wanpela haus buk i no gat man i stap long en. Yumi inap stap yumi yet na lukluk long ol samting. Tasol dispela em i wanpela samting nogut bilong Intenet. Bilong wanem? Long wanem, sampela hap bilong Intenet i stori long kain kain samting nogut na samting bilong bagarapim yumi long ol samting bilong spirit. Olsem na samting ol i lukim long Intenet inap traim ol yangpela. Tru, ol manmeri i gat laik long kisim save long ol samting, na inap longpela taim Satan i save mekim wok long dispela. Iv i gat laik long save long olgeta samting, olsem na Satan i mekim wok long dispela bilong ‘giamanim em.’​​—⁠2 Korin 11:⁠3.

Olsem tasol, sapos wanpela yangpela Kristen i no lukautim em yet long ol samting bilong spirit, ol save nogut bilong Intenet inap traim em. Stori i stap long buk Better Homes and Gardens i tok: “Long Intenet sampela saveman i wok long kamapim ol nupela save klostu klostu; tasol ol man i laik mekim pasin sem long ol pikinini, na ol man bilong giamanim ol narapela, na ol man i save bel nogut tru long sampela lain, na sampela narapela lain nogut, ol tu i save mekim wok long Intenet.”

Wanpela yangpela man nem bilong em Javier,b em i tok: “Sampela Web-sait [wanpela kain program bilong kompiuta] i gat ol samting nogut tru long en. No gat toksave pastaim, tasol wantu samting nogut i save kamap.” Em i tok moa olsem: “Ol i laik pulim yumi​—⁠ol i laik grisim yumi bilong kisim mani bilong yumi.” Wanpela yangpela Kristen nem bilong em John, em i tok: “Taim yu kirap pinis long skelim ol samting nogut, i hatwok long lusim dispela pasin​—⁠bai yu gat laik long mekim moa moa yet.” Sampela yangpela Kristen i bin wok long skelim sampela Web-sait nogut, na dispela i kirapim ol long insait long sampela pasin nogut. Sampela i no pas gut moa wantaim Jehova. Olsem wanem yu inap abrusim dispela hevi?

“Givim Baksait Long Ol Samting i No Gutpela”

Atres bilong sampela Web-sait i kamapim klia olsem ol samting i stap long en i no gutpela.c Sindaun 22:3 i tokaut olsem: “Man i gat gutpela tingting, em i save olsem, hevi i laik kamap long em na em i abrusim. Tasol man i no gat tingting, em i lukim trabel i stap long rot bilong en, na em i go na bungim na karim hevi.”

Tasol planti taim hevi i kamap taim man i popaia na lukim wanpela Web-sait nogut. Sampela piksa nogut bai stap long hom pes bilong grisim man long skelim ol samting i stap insait long Web-sait​—⁠bihain em bai i gat laik long lukim long olgeta taim!d

Kevin i stori long samting i bin kamap long wanpela pren bilong em: “Em i stap nating na em i gat laik long save liklik long dispela samting. Bihain em i kisim pasin bilong lukim ol piksa nogut bilong pasin sem.” Tasol gutpela tru dispela yangpela Kristen i tokim wanpela elda bilong helpim em long lusim dispela pasin.

Olsem wanem? Yu pasim tok pinis long bel long samting yu bai mekim sapos wanpela Web-sait nogut i kamap long kompiuta bilong yu? Kristen i mas mekim olsem: Lusim dispela Web-sait wantu o pasim Intenet long kompiuta bilong em! Bihainim tingting bilong man i bin raitim ol Song, em i beten olsem: “Helpim mi long givim baksait long ol samting i no gutpela.” (Song 119:37; skelim wantaim Jop 31:⁠1.) Tingim, maski i no gat wanpela man long graun i stap na lukim yumi, i no olsem i no gat wanpela i no save long samting yumi mekim. Baibel i tokim yumi: “I no gat wanpela samting God i bin wokim, em inap hait long pes bilong God.”​—⁠Hibru 4:​13.

Pasin bilong toktok wantaim papamama bilong yu o sampela strongpela Kristen inap helpim yu long sakim pasin bilong lukim gen ol Web-sait nogut. I wankain olsem sapos klostu yu bai kisim sampela bagarap long skin, yu bai singaut long kisim helpim wantu a? Yu no ken wet long bagarap i painim yu pastaim.

Olsem Wanem Long Toktok Wantaim Ol Narapela Long Intenet?

Ol man inap mekim wok long Intenet bilong toktok wantaim ol man long olgeta narapela hap bilong graun. Planti bisnis i mekim wok long en bilong toktok wantaim ol narapela long ol samting bilong bisnis na bilong helpim ol man. Yu inap toktok wantaim ol man i gat save long stretim ol samting olsem ka o long stretim kompiuta. Rot i op na yu inap toktok wantaim sampela pren o famili bilong yu i stap longwe na no gat hevi long bikpela pe bilong telefon. I gat ol gutpela wok bilong Intenet, tasol olsem wanem? I gat sampela hevi inap kamap long dispela?

Man i toktok wantaim ol narapela long rot bilong Intenet em i mas was gut, long wanem, hevi inap kamap long dispela. Meri bilong raitim buk, em Leah Rozen, em i tok: “Sampela yangpela em ol i gat bikpela save long kain kain wok bilong kompiuta ol i tromoi planti aua long Intenet bilong toktok wantaim ol narapela man ol i no save long ol na ol i stap long kantri ol yet i stap long en o long narapela hap bilong graun. Tasol nogut yangpela i toktok wantaim wanpela man nogut i gat tingting long paulim yangpela long sampela pasin bilong sem.” Wanpela stori i stap long buk Popular Mechanics i tok, yu mas “was gut” taim yu toktok wantaim man yu no save long en long Intenet. Sapos yu givim nem na atres bilong yu long wanpela man yu no save long en, i olsem yu laik kisim sampela bikpela hevi! Bilong wanem yu laik givim hevi long yu yet?

Narapela hevi em planti ol i no tingim, i olsem: Taim ol i toktok wantaim ol narapela ol i no save long ol, ol i wok long poromanim ol lain i no bihainim ol lo bilong Baibel.e Ol man i skelim dispela samting i tok, long Intenet planti ol yangpela i save toktok long samting bilong marit pasin o pasin bilong sem. Tok bilong Baibel long 1 Korin 15:33 i stret: “Yupela i no ken larim ol arapela man i giamanim yupela. Sapos yumi poroman wantaim ol man nogut, bai ol i bagarapim gutpela pasin bilong yumi.” Pasin bilong poromanim ol ausait lain long rot bilong kompiuta em inap kamapim sampela bikpela hevi. Olsem wanem? I gutpela sapos wanpela yangpela i pret long God i mekim dispela samting?

Samting Bilong Lukautim Yu

Hevi inap kamap sapos yu mekim wok long Intenet, olsem na i gutpela sapos yu bihainim savepasin taim yu mekim wok long en. Sampela famili i putim kompiuta i stap ples klia long wanpela rum i gat planti man i go i kam long en. Na ating sampela famili bai putim lo olsem sampela i mas i stap taim yangpela i laik mekim wok long Intenet. Sapos papamama bilong yu i putim sampela lo olsem, yu mas wanbel long dispela. (Sindaun  1:⁠8) Ol dispela lo i makim olsem ol i laikim yu tumas.

Sapos wok bilong skul i mekim na yu mas mekim wok long Intenet, skelim ol aua yu bai wok long en. Makim taim yu bai lusim long dispela wok, na kisim klok na putim belo bilong en na taim em i krai em bai kirapim yu long tingim taim i pinis. Tom i tok: “Tingting gut, na save gut long samting yu laik lukim, na lukim dispela tasol, maski planti narapela samting i pulim ai bilong yu.”

Na yumi mas tingting gut taim yumi mekim wok long E-mail. Ol yangpela Kristen i mas was gut, nogut dispela samting i pulim ol na ol i wok long kaunim kaunim planti samting tru i stap long E-mail, na ol i mas was gut moa yet sapos ol tok bilong en i olsem ol stori nabaut tasol o i no gat as bilong en. Sapos oltaim oltaim ol i mekim wok long E-mail, ol bai lusim nating bikpela hap taim bilong ol em i bilong mekim ol wok bilong skul na ol wok bilong spirit.

King Solomon i tok: “Ol man i save raitim planti buk, na dispela kain wok i no gat pinis bilong en.” (Saveman 12:12) Dispela tok i stret long Intenet. No ken tromoi bikpela hap taim bilong kisim kain kain save na bai yu lus long mekim wok bilong yu long stadi long Baibel na long go autim tok. (Matyu 24:14; Jon 17:3; Efesus 5:​15, 16) I gat taim bilong toktok wantaim narapela long kompiuta, tasol pasin bilong lukim pes bilong narapela Kristen na toktok wantaim em i win tru. Olsem na sapos yu mas mekim wok long Intenet, pasim tok long bel olsem yu bai mekim gutpela wok long en tasol. Abrusim ol Web-sait nogut, na no ken tromoi bikpela hap taim long Intenet. “Was gut tru long tingting bilong yu,” no ken kamap wokboi bilong Intenet.​—⁠Sindaun 4:⁠23.

[Ol Futnot]

[Rait long pes 26]

“Sampela Web-sait i gat ol samting nogut long en. No gat toksave pastaim, tasol wantu samting nogut i save kamap”

[Piksa long pes 27]

Sampela famili i putim kompiuta i stap ples klia long wanpela rum