Askim
◼ Wanem ol samting nogut inap kamap taim yumi yusim Intenet bilong toktok wantaim wanpela yumi no save long em?
Ol i bin kamapim planti Web-sait bilong ol man i ken salim ol tok i go i kam long ol narapela long rot bilong Intenet. Long planti Web-sait olsem, ol man na meri i ken putim ol piksa na sampela stori bilong ol yet long en. Ol lain husat i lukim ol dispela piksa samting ol i ken salim tok long dispela man long rot bilong Intenet. Ol yangpela i save laikim tru ol dispela kain Web-sait, na sampela yangpela insait long kongrigesen i bin yusim ol dispela Web-sait bilong salim ol tok i go i kam wantaim sampela husat i tok ol i Witnes Bilong Jehova.
Man yumi stori wantaim em long rot bilong Intenet, i no hatwok long em i giaman long em i husat tru, wanem tingting tru bilong em, na em i stap olsem wanem long ol samting bilong spirit. (Sng. 26:4) Man inap tok em i wanpela Witnes Bilong Jehova, tasol nogut em i wanpela man ausait, o rauspela man, o wanpela apostet. (Ga. 2:4) Planti man husat i save mekim pasin sem long ol pikinini, ol i painim ol pikinini long rot bilong ol kain Web-sait olsem.
Maski sapos yumi ting olsem man yumi wok long salim tok i go i kam wantaim, em i gat gutpela nem insait long kongrigesen, pasin bilong stori long kain rot olsem inap kirapim yumi long stori long ol samting i no gutpela. Dispela samting inap kamap, long wanem, taim man i stori wantaim wanpela em i no bin bungim, em i pilim olsem i no gat samting i pasim em long kamapim tingting bilong em. Na tu, ol man inap ting taim ol i stori wantaim narapela long rot bilong Intenet, tupela tasol i save long dispela samting, na maski ol i stori long wanem samting, ol narapela i no inap save long en, olsem papamama na ol elda. Sori tru, planti yangpela bilong ol famili Kristen i insait long dispela pasin na ol i mekim ol tok doti. (Ef. 5:3, 4; Kl. 3:8) Sampela i bin putim long Web-sait sampela piksa bilong ol yet i bilong kirapim laik nogut bilong bel, ol niknem i gat mining nogut, o sampela musik vidio i stori long maritpasin.
Taim yumi tingim ol dispela samting, ol papamama i mas putim gut ai long ol samting pikinini bilong ol i mekim long kompiuta. (Snd. 29:15) Bikpela hevi inap kamap sapos yumi singautim wanpela man yumi no save long en i kam insait long haus bilong yumi o larim em i stap wanpis wantaim ol pikinini bilong yumi. Na olsem tasol, ol samting nogut inap kamap sapos yumi o pikinini bilong yumi i prenim ol man yumi no save long ol long rot bilong Intenet, maski ol dispela man i tok ol i Witnes Bilong Jehova.—Snd. 22:3.