Rot Bilong Helpim Ol

Ol Kristen tru i save insait long wok bilong autim gutnius long olgeta man. (Fl. 2:17) Bilong helpim dispela wok, ol i bin putim sampela buklet, ol liklik nius, na sampela stori long 20 tok ples i stap long Intenet long www.watchtower.org. Wok bilong dispela Web-sait i no bilong tilim ol nupela buk samting long ol Witnes Bilong Jehova. Wok bilong en i bilong ol narapela man i ken kisim ol tok i stret long ol samting ol Witnes Bilong Jehova i save skulim ol man long en long Baibel.

Nau tasol ol i bin putim wanpela bikpela samting moa long Web-sait bilong yumi. Ol i putim buklet God i Laik Yumi Mas Mekim Wanem? long planti tok ples, winim 220. Na tu, stat long Wastaua bilong Janueri 1 na Awake! bilong Janueri 8, 2004, long olgeta tok ples i gat atres bilong Web-sait bilong yumi long laspela pes.

Olsem wanem yu ken yusim dispela tul? Yu ken yusim taim yu bungim wanpela man yu ting em i gat laik long harim tok tasol em i save mekim narapela tok ples. Sapos em i gat rot long yusim Intenet, orait yu ken soim em atres bilong Web-sait i stap long laspela pes bilong Wastaua o Kirap! Long dispela rot em inap skelim buklet Yumi Mas Mekim Wanem? long tok ples bilong em yet inap long taim yu go bek wantaim sampela buk samting long tok ples bilong em. O ating yu ken toksave long wanpela kongrigesen o grup husat i save autim tok long dispela tok ples.